35 C
Phnom Penh

ព្រះសង្ឃ​​មួយ​ចំនួន​​ចោទ​ប្រកាន់​ព្រះសង្ឃ​ដែល​ដឹកនាំ​វត្ត​សាមគ្គីរង្សី​ពីបទ​​ចេញ​បញ្ជា​ឲ្យ​មាន​ការ​វាយ​ដំ​

ដោយ ឌឹ ខេមបូឌា ដេលី

បទវិភាគ

ប៉ុន្មាន​ថ្ងៃ​ប៉ុណ្ណោះ​បន្ទាប់ពី​សាលា​រាជធានី​​បាន​ប្រកាស​ថា ​ខ្លួន​កំពុង​ស៊ើបអង្កេត​វត្ត​​សាមគ្គីរង្សី​ពីបទ​សង្ស័យ​ថា ​បាន​បង្កើត​ “ចលនា​អបគមន៍​ប្រឆាំង​រដ្ឋាភិបាល​” ​ព្រះសង្ឃ​មួយ​ក្រុម​ដែល​គង់​នៅ​វត្ត​នេះ​បាន​មាន​សង្ឃដីកា​ថា ក្រុម​ព្រះអង្គ​កំពុង​រៀបចំ​ដាក់​ពាក្យ​ប្ដឹង​ទៅ​កាន់​អាជ្ញាធរ​ដោយ​ចោទ​ប្រកាន់​ព្រះសង្ឃ​ដែល​ដឹកនាំ​វត្ត​នេះ​ពីបទ​រៀបចំ​ការ​វាយ​ដំ​​​ដ៏ព្រៃផ្សៃ​លើ​ក្រុម​ព្រះអង្គ។pagoda

វត្ត​នេះ​គឺ​ជា​វត្ត​មួយ​ក្នុង​ចំណោម​វត្ត​មួយ​ចំនួន​នៅ​ក្នុង​ប្រទេស​កម្ពុជា ដែល​ហ៊ាន​ប្រឆាំង​នឹង​វិន័យ​សង្ឃ​មិន​ឲ្យ​ពាក់​ព័ន្ធ​នឹង​បញ្ហា​​ដ៏រសើប​​​ទាក់ទិន​រឿង​នយោបាយ ដោយ​ផ្ដល់​ជម្រក​ដល់​អ្នកភូមិ​ខេត្ត​ផ្សេងៗ​​ដែល​មក​រាជធានី​ភ្នំពេញ​​​ដើម្បីប្ដឹង​អំពីវិវាទ​ដីធ្លី​របស់ពួកគាត់​។ កាលពី​ថ្ងៃ​អាទិត្យ​ អ្នក​នាំពាក្យ​សាលា​រាជធានី​បាន​ចោទ​ប្រកាន់​ចៅអធិការ​វត្ត​នេះ​​​ពីបទ​រៀបចំ​ចលនា​អបគមន៍​ ហើយ​ថា ការ​ស៊ើបអង្កេត​កំពុង​ត្រូវ​បាន​ធ្វើ​ឡើង​ដើម្បី​​រក​ឲ្យ​ឃើញ​ថា តើ​វត្ត​នេះ​បង្កើត​ឡើង​ដោយ​ស្រប​ច្បាប់​ ហើយ​ព្រះសង្ឃ​នៅ​ទីនេះ​បាន​បួស​ដោយ​ត្រឹម​ត្រូវ​ឬក៏អត់។

កាលពី​ម្សិលមិញ​សាមណេរ​មួយ​អង្គ​គង់​នៅ​វត្ត​សាមគ្គីរង្សី​នេះ​បាន​មាន​សង្ឃដីកា​ថា ព្រះ​អង្គ​នឹង​ព្រះសង្ឃ​មួយ​ចំនួន​ផ្សេង​ទៀត​កំពុង​ចោទ​ប្រកាន់​ចៅអធិការ​វត្ត​ សៀង សុវណ្ណារ៉ា ​ជំនួយ​ការ​របស់​ព្រះអង្គ គឺ​ព្រះតេជគុណ ឡាយ ឡាត់ និង​ចៅអធិការ​ស្ដីទី​ ថាច់ ហាសំអាង ពីបទ​​បញ្ជា​​ឲ្យ​មាន​ការ​វាយ​ដំ​ដ៏ព្រៃផ្សៃ​​លើ​ក្រុម​​ព្រះអង្គ។

សាមណេរ​ សុត ឆាយា បាន​អះអាង​ថា ព្រះសង្ឃ​ទាំង​បី​អង្គ​ខាង​លើ​នេះ​បាន​បញ្ជា​ឲ្យ​ព្រះ​សង្ឃ​បី​អង្គ​ផ្សេង​ទៀត​មក​វាយ​​ធ្វើ​បាប​ព្រះអង្គ​ដោយ​ប្រើ​កាំបិត និង​ដុំថ្ម​កាលពី​ថ្ងៃទី២ ខែ​មករា ខណៈ​ព្រះសង្ឃ​ទាំង​បី​អង្គ​នេះ​សង្ស័យ​ថា ព្រះអង្គ​ព្យាយាម​គ្រប់គ្រង​វត្ត​នេះ​។ សាមណេរ​អង្គ​នេះ​បាន​បង្ហាញ​អ្នក​យកព័ត៌មាន​ឲ្យ​ឃើញ​អំពី​ស្លាក​ស្នាម​ដ៏វែង​នៅ​លើ​ដៃ​ខាង​ឆ្វេង​របស់​ព្រះអង្គ ដែល​ព្រះអង្គ​បាន​លើក​ឡើង​ថា បាន​រង​របួស​នៅ​ពេល​មាន​ការ​​វាយ​ដំ​។

សាមណេរ​អង្គ​នេះ​បាន​មាន​សង្ឃដីកា​ថា “ក្រុម​ព្រះសង្ឃ​ទាំង​នោះ​បាន​វាយ​ដំ​អាត្មា​ ហើយ​គំរាម​យក​ជីវិត​អាត្មា​ទៀត​ផង។ ហើយ​ក្រុម​ព្រះសង្ឃ​ទាំង​នោះ​មិន​មែន​គ្រាន់​តែ​វាយ​ដំ និង​គំរាម​អាត្មា​នោះ​ទេ ប៉ុន្តែ​​ក៏​បាន​វាយ​ដំ និង​គំរាម​ព្រះសង្ឃ​ផ្សេង​ទៀត​ដែរ​”។

សាមណេរ​​ សុត ឆាយា បាន​មាន​សង្ឃដីកា​ថា ក្រុម​ព្រះសង្ឃ​ទាំង​បី​អង្គ​ដែល​ដឹកនាំ​វត្ត​នេះ​បាន​​បញ្ជា​ឲ្យ​មាន​ការ​វាយ​ដំ​លើ​ព្រះសង្ឃ​​ចំនួន​ប្រាំពីរ​អង្គ​នៅ​ក្នុង​ពេល​ខុស​ៗ​គ្នា។ ព្រះ​សង្ឃ​បួន​អង្គ​ក្នុង​ចំណោម​ព្រះសង្ឃ​ទាំង​ប្រាំពីរ​អង្គ​នេះ​បាន​គាំទ្រ​ចំពោះ​ពាក្យ​បណ្ដឹង​នេះ​ ហើយ​កំពុង​រង់ចាំ​ព្រះសង្ឃ​មួយ​អង្គ​ទៀត​ចូល​រួម​មុន​ពេល​ដាក់​ពាក្យ​បណ្ដឹង​នេះ​ទៅ​កាន់​សាលា​រាជធានី​ និង​​មន្ត្រី​ធម្មការ​ចាប់ពី​ថ្នាក់​ខណ្ឌ​រហូត​ដល់​ក្រសួង​ធម្មការ និង​សាសនា​។

ចៅអធិការ​វត្ត​ សៀង សុវណ្ណារ៉ា ​បាន​និមន្ត​ទៅ​ប្រទេស​ក្រៅ​ ហើយ​មិន​អាច​ទាក់​ទង​បាន​ឡើយ​។ ព្រះតេជគុណ ថាច់ ហាសំអាង បាន​បដិសេធ​ចំពោះ​ការ​ចោទ​ប្រកាន់ទាំង​នេះ​ ហើយ​បាន​ចោទ​ប្រកាន់​ព្រះសង្ឃ​ដែល​ដាក់​ពាក្យ​​​បណ្ដឹង​ថា ទទួល​​បញ្ជា​ពី​មន្ត្រី​រដ្ឋាភិបាល​​ដែល​​ចង់​បិទ​វត្ត​សាមគ្គីរង្សី​នេះ។

ព្រះតេជគុណ​​បាន​មាន​សង្ឃដីកាថា “ពាក្យ​បណ្ដឹង​​របស់​សាមណេរ​អង្គនេះ​គឺ​មិន​ពិត​នោះ​ទេ ព្រោះ​យើង​មិន​ដែល​​ធ្វើ​អ្វី​ដូច្នេះ​ឡើយ​។ យើង​ជា​សង្ឃ​ តើ​យើង​អាច​វាយ​ដំ​សាមណេរ​អង្គ​នេះ​ម្ដេច​នឹង​កើត​ទៅ? វា​ពិត​ជា​មាន​នរណា​ម្នាក់​នៅ​ពីក្រោយ​ ដោយ​បញ្ជា​ឲ្យ​សាមណេរ​អង្គនេះ​បង្ក​ភាព​ចលាចល​នៅ​ក្នុង​វត្ត​”។

ព្រះតេជគុណ ថាច់ ហាសំអាង បានមាន​សង្ឃដីកា​ទៀត​ថា ក្រសួង​ធម្មការ និង​សាសនា បានទទួល​ស្គាល់​វត្ត​នេះ​ជា​ផ្លូវ​ការហើយ​​​ ប៉ុន្តែ​​​ព្រះតេជគុណ ឃឹម សន មេគុណ​រាជធានី​​​ភ្នំពេញ​មាន​សង្ឃ​ដីកា​ថា ក្រសួង​មិន​បាន​​ទទួល​ស្គាល់​វត្ត​នេះជា​ផ្លូវ​ការ​​ឡើយ​។ គេមិន​អាច​ទាក់​ទង​រដ្ឋមន្ត្រី​​ ឬអ្នក​នាំពាក្យ​ក្រសួង​នេះ​សុំ​ការ​ធ្វើ​អត្ថាធិប្បាយ​បាន​ឡើយ៕ ស៊ុយឈាង​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស