ប្រជាពលរដ្ឋស្នាក់នៅក្នុង “អគារស” ឬហៅថា អគារប៊ូឌីង បានជួបជាមួយមន្ត្រីមកពីសាលារាជធានីភ្នំពេញ និងក្រសួងរៀបចំដែនដីកាលពីម្សិលមិញ ដើម្បីលើកឡើងពីក្ដីបារម្ភរបស់ពួកគាត់ចំពោះស្នាមប្រេះមួយដែលមានទំហំ៥សង់ទីម៉ែត្រនៅជញ្ជាំងបែរទៅទិសខាងត្បូងនៃប្លុកអគារដ៏ទ្រុឌទ្រមនេះកាលពីល្ងាចម្សិលម្ងៃ។
យោងតាមលោក ខាត់ ណារិទ្ធ ចៅសង្កាត់ទន្លេបាសាក់ ខណ្ឌចំការមន បានឲ្យដឹងថា ស្នាមប្រេះដែលមានចាប់ពីដីរហូតដល់ដំបូលនៃអគារកម្ពស់បួនជាន់នេះ ស្ថិតនៅចម្ងាយតែប៉ុន្មានម៉ែត្រប៉ុណ្ណោះពីគ្រឹះដែលទើបតែជីកបានពាក់កណ្ដាលសម្រាប់សាងសង់សណ្ឋាគារ ហើយស្នាមប្រេះនេះបានកើតឡើងនៅមុនម៉ោង៦ល្ងាចថ្ងៃអាទិត្យ នៅពេលគ្រឿងចក្រមួយបានបុកគ្រឹះនៅខាងក្នុងការដ្ឋានសំណង់ជាប់គ្នា។
លោកបានមានប្រសាសន៍ថា ទីតាំងនេះត្រូវបានក្រុមហ៊ុនអភិវឌ្ឍន៍ 7NG ដែលបានបណ្ដេញប្រជាពលរដ្ឋរាប់រយគ្រួសារដោយហិង្សាចេញពីដីដែលមានហាងឆេងខ្ពស់នៅពីក្រោយអគារសកាលពីឆ្នាំ២០០៩ លក់ឲ្យទៅពាណិជ្ជករខ្មែរម្នាក់ឈ្មោះ រិទ្ធី សំណាង។
លោកបានលើកឡើងថា “សហគមន៍ដីក្រហមបានលក់វាឲ្យទៅក្រុមហ៊ុន 7NG ហើយក្រុមហ៊ុន 7NG បានលក់វា [មួយផ្នែក] ឲ្យទៅពាណិជ្ជកររូបនេះ”។ លោកបានលើកឡើងថា លោក រិទ្ធី សំណាង បានជួលក្រុមហ៊ុនសំណង់ឈ្មោះ Biaxis របស់ម៉ាឡេស៊ីឲ្យចាប់ផ្ដើមជីកបុកគ្រឹះសម្រាប់សាងសង់សណ្ឋាគារកាលពីប្រហែល១ខែមុន។
លោក ឈាង បូណា អ្នកនាំពាក្យក្រុមហ៊ុន 7NG បានលើកឡើងកាលពីម្សិលមិញថា លោកមិនដឹងអ្វីទេជុំវិញកិច្ចព្រមព្រៀងរវាងក្រុមហ៊ុនរបស់លោក និងលោក រិទ្ធី សំណាង។ ចំណែកឯលោក រិទ្ធី សំណាង មិនអាចទាក់ទងសុំការបំភ្លឺបានទេទាក់ទងនឹងបញ្ហានេះ។
លោក មាស ស៊ីថន អាយុ៥០ឆ្នាំ ដែលរស់នៅជាមួយគ្រួសាររបស់គាត់ក្នុងអគារសនេះតាំងពីទសវត្សរ៍ឆ្នាំ១៩៨០មក បាននិយាយថា នៅពេលអគារនេះលេចចេញស្នាមប្រេះកាលពីល្ងាចថ្ងៃអាទិត្យ គាត់និងអ្នកជួលបន្ទប់ប្រហែល១២នាក់ទៀតបានប្រញាប់ទៅបញ្ឈប់សកម្មភាពជីកដីបុកគ្រឹះនៅការដ្ឋានខាងលើនេះ មុនពេលវាបង្កការខូចខាតបន្ថែមទៀត។
គាត់និយាយថា “យើងមិនអាចអនុញ្ញាតឲ្យពួកគេបន្តការងារទៀតបានទេ ពីព្រោះអគារអាចនឹងបាក់រលំ ដូច្នេះយើងត្រូវរារាំងពួកគេកុំឲ្យជីកដី”។ លោកបានលើកឡើងបន្ថែមថា ប្រជាពលរដ្ឋស្នាក់នៅទីនោះបានស្នើសុំឲ្យមន្ត្រីជួបជាមួយពួកគាត់នៅព្រឹកបន្ទាប់។
លោក កើត សារ៉េត អនុរដ្ឋលេខាធិការក្រសួងរៀបចំដែនដី ដែលបានជួបជាមួយប្រជាពលរដ្ឋទាំងនេះកាលពីម្សិលមិញ បានមានប្រសាសន៍ថា ស្នាមប្រេះនេះមិនមែនបង្កឡើងដោយសារការសាងសង់នៅជាប់គ្នាឡើយ។
ទោះជាយ៉ាងណា លោកបានមានប្រសាសន៍ថា លោកបានស្នើសុំឲ្យលោក រិទ្ធី សំណាង បញ្ឈប់ការជីកបុកគ្រឹះនេះហើយ។
លោកមានប្រសាសន៍អំពីការបុកគ្រឹះសម្រាប់សាងសង់អគារការិយាល័យដែលមិនមែនសម្រាប់សណ្ឋាគារនេះថា ” ខ្ញុំបានប្រាប់ក្រុមហ៊ុនឲ្យឈប់ជីកដី ពីព្រោះយើងពិនិត្យមើលរាល់ហេតុផលដែលធ្វើឲ្យជញ្ជាំងប្រេះ”។ លោកបានបន្ថែមថា លោកបានដាក់កញ្ចក់ធំមួយនៅពីលើស្នាមប្រេះលើជញ្ជាំងខាងក្នុង។ លោកបានពន្យល់ថា ប្រសិនបើស្នាមប្រេះរីកកាន់តែធំ កញ្ចក់នឹងបែក។
លោក កើត សារ៉េត បានមានប្រសាសន៍ថា ការដ្ឋានសំណង់របស់ក្រុមហ៊ុនលោក រិទ្ធី សំណាង មានទំហំមិនលើសពី៣.០០០ម៉ែត្រក្រឡាឡើយ ហើយត្រូវការតែការអនុម័តពីសាលារាជធានីប៉ុណ្ណោះ ពីព្រោះទាល់តែគម្រោងដែលមានផ្ទៃដីលើសពី៣.០០០ម៉ែត្រក្រឡាឡើងទៅ ទើបត្រូវការអាជ្ញាប័ណ្ណពីក្រសួងរបស់លោក។
នៅពេលសាកសួរថា តើសាលារាជធានីបានអនុញ្ញាតឲ្យលោក រិទ្ធី សំណាង សាងសង់អគារមួយជាប់នឹងអគារសឬយ៉ាងណានោះ លោក ឡុង ឌីម៉ង់ អ្នកនាំពាក្យសាលារាជធានីបានបដិសេធមិនឆ្លើយសំណួរនេះទេ។
នៅពេលសួរថា ហេតុអ្វីបានជាក្រុមហ៊ុន 7NG ត្រូវបានអនុញ្ញាតឲ្យលក់ផ្នែកខ្លះនៃដីដែលខ្លួនបានសន្យាអភិវឌ្ឍទៅជាសំណង់លំនៅដ្ឋាន និងការិយាល័យ ដោយទុកចោលឲ្យនៅទំនេរសម្រាប់យកកន្លែងចតរថយន្ត និងតារាងបាល់ទាត់នោះ លោក ឡុង ឌីម៉ង់ បានលើកឡើងថា ក្រុមហ៊ុនមានសិទ្ធិធ្វើអ្វីក៏បានលើដីនេះ។
លោកបានលើកឡើងបន្ថែមទៀតថា “ត្រង់ពួកគេអភិវឌ្ឍឬធ្វើអ្វីផ្សេង វាស្រេចលើក្រុមហ៊ុន។ ក្រុមហ៊ុនបានដោះដូរជាមួយសហគមន៍ ដូច្នេះដីនេះគឺជាដីរបស់ក្រុមហ៊ុន។ តើវាខុសច្បាប់ត្រង់ណា? បើពួកគេសាងសង់សង្វៀនជល់មាន់ នោះទើបវាខុសច្បាប់”។
កាលពីខែសីហា ប្រជាពលរដ្ឋជាច្រើននាក់ដែលស្នាក់នៅអគារស ជាគម្រោងលំនៅដ្ឋានតម្លៃថោក ដែលត្រូវបានសាងសង់ក្រោមការដឹកនាំរបស់ព្រះអង្គម្ចាស់ នរោត្តម សីហនុ នៅក្នុងឆ្នាំ១៩៦៣ ដែលពេលនេះក្លាយជាកន្លែងស្នាក់នៅរបស់ប្រជាពលរដ្ឋជាង៦០០គ្រួសារនោះ បានលើកឡើងថា តំណាងក្រុមហ៊ុន 7NG បានលួចទិញផ្ទះល្វែងនៅក្នុងអគារនេះដោយស្ងាត់ៗ។
នៅខែបន្ទាប់លោក ប៉ា សុជាតិវង្ស អភិបាលរាជធានីភ្នំពេញបានមានប្រសាសន៍ថា អគារសនេះបានទទួលរងការថ្កោលទោស ហើយចាំបាច់ត្រូវវាយកម្ទេចចោល ប៉ុន្តែក្រោយមកសាលារាជធានីបានផ្លាស់ប្ដូរគំនិតវិញ ចំពេលសាធារណជនរិះគន់យ៉ាងខ្លាំងចំពោះការធ្វើអត្ថាធិប្បាយនេះ៕ សុខុម