26 C
Phnom Penh

ដំណើរ​ការ​​ផ្ដល់​សក្ខីកម្មអំពី​​ស្ថាន​ភាព​គួុរ​ឲ្យ​តក់​ស្លុត​នៅ​ក្នុង​គុក ​បន្ត​នៅ​សាលា​ក្ដី​ខ្មែរ​ក្រហម​

ដោយ ឌឹ ខេមបូឌា ដេលី

បទវិភាគ

ជា​ថ្មីម្ដងទៀត​ ស្ថានភាព​ដ៏គួរ​ឲ្យ​ភ័យ​ខ្លាច​​នៅ​ក្នុង​គុក​ក្រាំង​តាចាន់ ​បាន​ក្លាយ​ជា​ចំណុច​ផ្ដោត​​សំខាន់​នៅ​ក្នុង​សវនាការ​របស់​​សាលាក្ដី​ខ្មែរ​ក្រហម​​កាល​ពី​ម្សិល​មិញ​ ដោយ​ភាគី​ដើម​បណ្ដឹង​រដ្ឋប្បវេណី​ម្នាក់​​​បាន​​រៀប​រាប់​អំពី​ភាពឃោរឃៅ​​ដែល​ “ហួស​នឹង​បរិយាយ​”។eccc

​​ក្នុង​នាម​​ជា​អតីត​អ្នក​ទោសទី៣​​នៅ​គុក​នេះ​​ដែល​ត្រូវ​​បង្ហាញ​​ភ័ស្តុតាង​​ក្នុង​ដំណាក់​កាលទី២​នៃ​សំណុំ​រឿង០០២​ប្រឆាំង​ នួន ជា និង​ ខៀវ សំផន ​លោក សាយ សេន បាន​រៀបរាប់​អំពី​ហេតុ​ការណ៍​ដែល​​កុមារ​ត្រូវ​គេ​​ចាប់បោក​ផ្ទប់​នឹង​ដើម​ឈើ និង​ស្ត្រី​ដែល​ត្រូវ​គេ​បំពាន​ផ្លូវ​​ភេទ​​ដោយ​​កាំភ្លើង​វែង។

លោក សាយ សេន ដែល​ជា​អ្នក​ទោស​វ័យ​ជំទង់​​នៅ​គុក​ក្នុង​ខេត្ត​តាកែវ​ ចន្លោះពី​ឆ្នាំ​១៩៧៤​ដល់​ឆ្នាំ​១៩៧៩​នេះ បាន​លើក​ឡើង​ថា គាត់​ត្រូវ​បាន​អង្គការ​ចាត់​តាំង​ឲ្យ​ជីក​រណ្ដៅ និង​កប់​សាកសព​អ្នក​ទោស​។

គាត់និយាយ​​ថា “ថ្ងៃ​មួយ ​ខ្ញុំ​បាន​ឡើង​ដើម​ត្នោត​នៅ​ពេល​រសៀល ហើយ​ពេល​មើល​ពី​លើ​ចុះ​មក​ក្រោម​ ខ្ញុំ​ឃើញ​​ក្មេង​​ពីរ​នាក់​ត្រូវ​គេ​នាំ​ចេញ​ទៅ…​។ ជា​ធម្មតា​ ពួកគេ​រង់ចាំ​ខ្ញុំ​ចុះ​ពី​ដើម​ត្នោត​មក​វិញ ប៉ុន្តែ​នៅ​ក្នុង​ថ្ងៃ​នោះ​ ខ្ញុំ​បាន​ឮសំឡេង​​បោក​កូនក្មេង​ផ្ទប់​នឹង​ដើម​ត្នោត”។

គាត់​បាន​​លើក​ឡើង​បន្ត​ថា ពេល​នោះ​គាត់​បាន​​ឃើញ​កុមារ​តូច​ជាង​គេ​ត្រូវ​គេ​ចាប់​បោក​ផ្ទប់​នឹង​ដើម​ឈើ មុន​ពេល​​កុមារធំទី​២ត្រូវ​គេ​វាយ​ក្បាល​នឹង​​ត្បូង​ចប​ រួច​ទម្លាក់​ចូល​រណ្ដៅ។ ក្មេងទាំង​ពីរ​​នេះ​ត្រូវ​គេ​ខ្វេះ​ពោះវៀន​ចេញ ហើយ​ថង់​​ប្រមាត់​របស់ពួកគេ​ត្រូវគេ​​​ចង​ព្យួរ​នៅ​លើ​ដើម​ឈើ​។

គាត់​និយាយ​ថា ​នៅ​ពេល​មួយ​ទៀត គាត់​ត្រូវ​បាន​​ឆ្មាំ​គុក​ម្នាក់​ដែល​​ទើប​តែ​​រំលោភ​​ស្ត្រី​ពីរ​នាក់​រួច ប្រាប់​ឲ្យ​ “រៀប​ចំ​” បន្ទប់។”ពេល​ខ្ញុំ​ទៅ​ដល់​ទី​នោះ ​តាម​ពិត​គាត់​បាន​ចាប់​រំលោភ​​ស្ត្រី​ពីរ​​នាក់​មក​ពី​​កង​ចល័ត​ ហើយ​គាត់​បាន​​ប្រើ​កាំ​ភ្លើង​វែង​រុក​ចូល​ក្នុង​​ប្រដាប់​ភេទ​របស់​ស្ត្រី​ទាំង​នោះ”។ គាត់​និយាយ​​បន្ថែម​ថា ម្នាក់​ក្នុង​ចំណោ​ម​ជន​រង​គ្រោះ​ទាំង​​នោះ​​មាន​​ជីវិត​រស់​ដល់​សព្វ​ថ្ងៃ​។

លោក​ សាយ សេន ដែល​សព្វ​ថ្ងៃ​រស់​នៅ​ពេជ្ឈឃាតមួយ​ចំនួន​ក្នុង​ចំណោមពេជ្ឈ​ឃាត​នៅ​គុក​ក្រាំង​តាចាន់ ​និយាយ​ថា ស្ថានភាព​នៅ​ក្នុង​គុក​នេះ​​គឺ​ “ហួស​នឹង​ថ្លែង​ ហួស​ពីការ​​យល់​ដឹង​របស់​យើង​”។

គុក​ដែល​ទទួល​បាន​​ការ​​ចាប់​​អារម្មណ៍​​តិច​តួច​បើ​ប្រៀប​ធៀប​​ទៅ​នឹង​មន្ទីរ​សន្តិសុខ​ទួល​ស្លែង​នៅ​ភ្នំ​ពេញ​​នេះ មាន​ទី​តាំង​ស្ថិត​នៅ​ក្នុង​​ឃុំគុស ស្រុក​តាំកក់ ហើយ​ដំបូង​ឡើយ​វា​​ត្រូវ​បាន​សាង​សង់​ឡើងសម្រាប់​ធ្វើ​ជា​មណ្ឌលសម្រាប់​ប្រជុំ និង​​​ការ​​​អប់រំ​​នៅក្នុង​ឆ្នាំ​១៩៧៣ មុន​ពេល​ត្រូវ​​​បាន​កែប្រែ​ទៅ​ជាមន្ទីរ​​ដ៏សំខាន់​សម្រាប់​ការ​សម្លាប់​នៅ​តំបន់​​​​ប៉ែក​និរតី។

សវនាការ​កាលពី​ម្សិលមិញបាន​ចាប់​ផ្ដើម​ជាមួយ​នឹង​ការ​ផ្ដល់​សក្ខីកម្ម​ពី​សាក្សី​ឈ្មោះ កែវ ច័ន្ទ​តារា ជា​អតីត​គ្រូពេទ្យ​សម័យ​ខ្មែរ​ក្រហម ដែល​អះអាង​ថា ​គាត់​​បាន​ជាប់​ឃុំ​២៤ថ្ងៃ​​នៅ​គុក​​នេះ។ កាលពី​ថ្ងៃ​ច័ន្ទ គាត់​បាន​​រៀប​​រាប់​ប្រាប់​តុលាការ​អំពី​ការ​សម្លាប់​រង្គាល​ ការ​ធ្វើ​ទារុណកម្ម និង​ការ​ស៊ីសាច់​មនុស្ស​​នៅ​​ទី​នោះ​។

លោក កែវ ច័ន្ទ​តារា និយាយ​​ថា​ គាត់​បាន​ជួយ​ធ្វើ​កំណាយ​​រក​ឃើញ​លលាដ៍​ក្បាល​ចំនួន​​១.២០០​​នៅ​​ទីតាំង​នេះ​ក្នុង​ឆ្នាំ​១៩៧៩ ហើយ​បាន​អះអាង​ថា ​ក្នុង​មួយ​​ថ្ងៃ​ គាត់​​ឃើញ​មនុស្ស​យ៉ាង​ហោច​ណាស់​៥០​នាក់​ត្រូវ​គេ​សម្លាប់ ក្នុង​​នោះ​រួម​​មាន​ទាំង​ស្ត្រី​ម្នាក់​​ដែល​ត្រូវ​​គេ​ជះ​ទឹក​អាស៊ីត​​​ដាក់ និង​​ស្ត្រី​ម្នាក់​ទៀត​ដែល​ត្រូវ​គេ​​វះ​ពោះវៀន​ចេញ​ផង​ដែរ​ អំឡុង​ពេល​គាត់​ជាប់​គុក​​មួយ​រយៈ​ពេល​ខ្លី។

លោក មាស សុខា ដែល​​ជា​សាក្សី​ទី១​នៅ​ក្នុង​ដំណាក់​កាល​ទី២​នៃ​សំណុំរឿង​០០២​ បាន​មាន​ប្រសាសន៍​ថា គាត់​បាន​មើល​​ឃើញ​​ការ​ស៊ីសាច់​មនុស្ស​​នៅ​ក្នុង​​គុក​នេះ ដោយ​កម្មា​ភិបាល​ខ្មែរ​ក្រហម​​បាន​ផឹក​ស្រា​ជា​មួយ​​​ថង់​ប្រមាត់​របស់​ជន​រង​គ្រោះ​ដើម្បី​ជំរុញ​ទឹក​ចិត្ត​ឲ្យ​ពួកគេ​ក្លាហាន​ហ៊ាន​សម្លាប់​តទៅទៀត​។

លោក វីកទ័រ កូប៉េ (Victor Koppe) មេធាវី​អន្តរជាតិ​តំណាង​ឲ្យ នួន ជា បាន​ចោទ​ប្រកាន់​​លោក កែវ ​ច័ន្ទ​តារា និង​លោក​ ​មាស សុខា ថា​សុទ្ធតែនិយាយ​កុហក​។

​លោក​ សាយ សេន ដែល​​ក្រុម​មេធាវីការ​ពារ​មិន​ទាន់​ពិនិត្យ​ពិច័យ​នៅ​ឡើយ ​មាន​​ទឹក​មុខ​បង្ហាញ​ពី​​អារម្មណ៍​​​ឈឺ​ចាប់​អំឡុង​សវនាការ​កាលពី​ម្សិលមិញ ជាពិសេស​​ពេល​​គេ​​បង្ហាញ​រូប​ថត​​ដែល​គេ​​បាន​ថត​​នៅ​ក្នុង​គុក​នេះ​​មិន​យូរ​ប៉ុន្មាន​បន្ទាប់ពី​ការ​​ដួល​រលំ​​នៃ​របប​ខ្មែរ​ក្រហម​។ គាត់​និយាយ​ថា “ខ្ញុំ​មិន​ចង់​ឃើញ​រូប​ថត​ទាំង​នេះ​​ទៀត​ទេ ពីព្រោះមើល​​ស្មង​ជើង​របស់​ខ្ញុំ​ចុះ ខ្ញុំ​មាន​ស្លាក​​ស្នាម​ដើម្បី​បង្ហាញ​”៕ សុខុម​​​​​​​​​​​​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស