34 C
Phnom Penh

មនុស្ស​បី​នាក់​ជាប់ចោទ​ពីបទ​រំលោភ​និង​ជួញដូរ​ក្មេង​ជំទង់​ពីរ​នាក់

ដោយ ឌឹ ខេមបូឌា ដេលី

បទវិភាគ

មន្ត្រី​បាន​និយាយ​កាលពី​ថ្ងៃ​អាទិត្យ​ថា តុលាការ​ខេត្ត​ស្វាយរៀង​បាន​ចោទ​បុរស​បី​នាក់​ពី​បទ​រំលោភ​និង​ជួញ​ដូរ​មនុស្ស បន្ទាប់ពី​បាន​ចាប់​ខ្លួន​ពួកគេ​កាលពី​សប្តាហ៍​មុន ពី​បទ​ចាប់​ពង្រត់​កម្មករ​កាត់ដេរ​ជំទង់​ពីរ​នាក់ និង​បង្ខំ​ឲ្យ​ធ្វើជា​ស្រី​ពេស្យា​នៅ​បៀរហ្គាឌិន​មួយ​កន្លែង។

លោក ហ៊ឹង ប៊ុនជា ព្រះរាជ​អាជ្ញា​អម​សាលា​ដំបូង​ខេត្ត​ស្វាយ​រៀង​បាន​មាន​ប្រសាសន៍​ថា ព្រះរាជអាជ្ញា​រង កៀង សុន្ទរោ បាន​ចោទ​ពួកគេ​កាលពី​ថ្ងៃ​សៅរ៍។

ដោយ​មិន​អធិប្បាយ​ច្រើន លោក ប៊ុនជា បាន​និយាយ​ថា “យើង​កំពុង​ស៊ើប​អង្កេត​ករណី​នេះ​នៅ​ឡើយ” ។

លោក នាត សារឿន ប្រធាន​ការិយាល័យ​នគរបាល​ប្រឆាំង​ការ​ជួញដូរ​មនុស្ស​ខេត្ត បាន​មាន​ប្រសាសន៍​ថា យើង​បាន​ទទួល​បណ្តឹង​អំពី​មនុស្ស​បាត់​ខ្លួន​កាលពី​ថ្ងៃ​អង្គារ​ពី​គ្រួសារ​របស់​ក្មេង​ស្រី​អាយុ​១៧​ឆ្នាំ​និង​គ្រួសារ​របស់​ក្មេង​ស្រី​អាយុ​១៨​ឆ្នាំ អ្នក​ទាំងពីរ​ធ្វើ​ការ​នៅ​រោងចក្រ​កាត់ដេរ​ក្នុង​តំបន់​សេដ្ឋកិច្ច​ពិសេស​ម៉ានហាថាន​ក្រុង​បាវិត។ លោកបាន​ឲ្យ​ដឹង​ទៀត​ថា ​គ្រួសារ​របស់​ជន​រងគ្រោះ​បាន​និយាយ​ថា អ្នក​ទាំងពីរ​បាន​បាត់​ខ្លួន​កាលពី​ថ្ងៃ​ទី​៣១​ខែ​មករា។

លោក សារឿន បាន​និយាយ​ថា ពេល​ទទួល​ពាក្យ​បណ្តឹង​នៅ​ថ្ងៃ​ដដែល​នោះ មន្ត្រី​របស់​លោក​បាន​តាមរក​ស្ត្រី​ទាំងពីរ​នាក់​នៅ​បៀរហ្គាឌិន តូ រ៉ូ និង​ ខេធីវី ក្នុង​សង្កាត់​ព្រៃអង្គុញ ក្រុង​បាវិត។

លោក​បាន​និយាយ​ថា “បន្ទាប់ពី​យើង​បាន​ទទួល​ពាក្យ​បណ្តឹង​ភ្លាម យើង​បាន​ចាប់​ផ្តើម​ការ​ស៊ើប​អង្កេត។ យើង​បាន​រកឃើញ​ជន​រងគ្រោះ​នៅ​ ខេធីវី”។

យោងតាម​លោក សារឿន បាន​ឲ្យ​ដឹង​ថា នៅ​ពេល​នគរបាល​សាកសួរ​បន្ទាប់ពី​ការ​សង្គ្រោះ​ពួកគេ ជនរងគ្រោះ​បាន​និយាយ​ថា ពួកនាង​ត្រូវ​បាន​រំលោភ​និង​ឃុំ​ខ្លួន​ដោយ​បុរស​បី​នាក់ ដែល​បាន​បង្ខំ​ឲ្យ​ពួកនាង​ដេក​ជាមួយ​បុរស​ផ្សេងទៀតដែរ។

លោក​ សារឿន បាន​និយាយ​ថា ប៉ូលិស​បាន​ចាប់​ខ្លួន​ជន​សង្ស័យ សួង ពី អាយុ​៣១​ឆ្នាំ ម៉ី រស្មី អាយុ​៣៨​ឆ្នាំ និង ម៉ី ម៉ាលី អាយុ​៣៨​ឆ្នាំ នៅ​បៀរហ្គាឌិន​នោះ​កាលពី​ថ្ងៃ​អង្គារ។ លោក​បាន​បន្ថែម​ថា បច្ចុប្បន្ន​ជន​សង្ស័យ​កំពុង​ត្រូវ​ឃុំ​ខ្លួន​បណ្តោះ​អាសន្ន​ក្នុង​ពន្ធនាគារ​ខេត្ត។

លោក ម៉ុន លីដា អ្នក​ស៊ើបអង្កេត​ក្រុម​សិទ្ធិ​មនុស្ស​លីកាដូ​ប្រចាំ​ខេត្ត​បាន​និយាយ​ថា លោក បាន​សម្ភាសន៍​ជនរងគ្រោះ​អាយុ​១៧​កាលពី​ថ្ងៃ​សុក្រ ហើយ​ថា នាង​បាន​ប្រាប់​ថា នាង​និង​មិត្ត​របស់​នាង​បាន​ជួប​លោក ពី និង​លោក រស្មី ដែល​ក្មេងស្រី​អាយុ​១៨​ឆ្នាំ​បាន​ស្គាល់ នៅ​មុខ​រោងចក្រ​កាត់ដេរ​របស់​ខ្លួន នៅ​ម៉ោង​ប្រហែល​១១​ព្រឹក​កាលពី​ថ្ងៃ​ទី​៣១​ខែ​មករា។

លោក លីដា បាន​និយាយ​ថា ក្មេង​ស្រី​អាយុ​១៧​ឆ្នាំ​បាន​ប្រាប់​គាត់​ថា ទាំង​បួន​នាក់​បាន​ធ្វើ​ដំណើរ​ជាមួយ​គ្នា​ទៅ បៀរហ្គាឌិន តូរ៉ូ នៅ​ទីនោះ​​បុរស​ពីរ​នាក់​និង​ម្ចាស់​ហាង គឺ​លោក ម៉ាលី បាន​រំលោភ​នាង​និង​មិត្ត​របស់​នាង។

លោក​បាន​និយាយ​ថា “ជនសង្ស័យ​បាន​រំលោភ​ពួកគេ​ម្តង​ម្នាក់ៗ”។ លោក​បាន​បន្ថែម​ថា នៅ​ថ្ងៃ​ទី​១​ខែ​កុម្ភៈ លោក ពី និង​លោក រស្មី បាន​លក់​ជន​រងគ្រោះ​ទៅ​លោក ម៉ាលី។

លោក លីដា បាន​និយាយ​ថា យោងតាម​ក្មេងស្រី​អាយុ​១៧​ឆ្នាំ​បាន​ឲ្យ​ដឹង​ថា លោក ម៉ាលី បាន​បង្ខំ​ជនរងគ្រោះ​ឲ្យ​រួម​ភេទ​ជាមួយ​បុរស​ផ្សេងទៀត ទាំងនៅ​បៀរហ្គាឌិន និ​ង​នៅ​បន្ទប់​ជួល​ក្នុង​ទីក្រុង​នេះ ដើម្បី​យក​លុយ។

លោក​បាន​និយាយ​ថា “ជនរងគ្រោះ​បាន​ប្រាប់​ខ្ញុំ​ថា គេ​បង្ខំ​នាង​ឲ្យ​ដេក​ជាមួយ​ប្រុស​ផ្សេង​ទៀត។ ពួកគេ​វាយ​ធ្វើបាប​នាង​ប្រសិន​បើ​នាង​មិន​ដេក​ជាមួយ​ភ្ញៀវ”។

ម្តាយ​របស់​ក្មេងស្រី​អាយុ​១៧​ឆ្នាំ ដែល​រស់នៅ​ក្នុង​ស្រុក​ជាំក្សាន្ត ខេត្ត​ព្រះវិហារ​បាន​និយាយ​កាលពី​ថ្ងៃ​អាទិត្យ​ថា កូន​ស្រី​របស់​គាត់​បាន​ទៅ​ធ្វើការ​នៅ​ក្រុង​បាវិត​ទើបតែ​បាន​ពីរបី​ថ្ងៃ​ប៉ុណ្ណោះ មុន​ពេល​នាង​ត្រូវ​គេ​ចាប់​ពង្រត់។ គាត់​បាន​និយាយ​ថា កូនស្រី​របស់​គាត់​បាន​ត្រឡប់​មក​ផ្ទះ​នៅ​ខេត្ត​ព្រះវិហារ​វិញ​ហើយ។

គាត់​បាន​និយាយ​ថា “នាង​មាន​អារម្មណ៍​ខ្មាស​អៀន​ណាស់។ នាង​មិន​ចង់​និយាយ​ជាមួយ​អ្នកណា​ទេ។ ខ្ញុំ​បារម្ភ​ណាស់​អំពី​អនាគត​កូនស្រី​របស់​ខ្ញុំ”។ ស្ត្រី​ជា​ម្តាយ​រូប​នេះ​បាន​បន្ថែម​ថា គាត់​បាន​ទារ​សំណង​១០.០០០​ដុល្លារ​ក្នុង​ម្នាក់ៗ​ពី​ជន​សង្ស័យ​បី​នាក់​នោះ៕ មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស