36 C
Phnom Penh

លោក​​​ ហ៊ុន សែន និង​​​លោក សម រង្ស៊ី កំពុង​​​ធ្វើ​​​ការ​​​ដើម្បី​​​បង្កើត​​​ច្បាប់​​​​​​គ្រប់​​​គ្រង​​​ការ​​​ជួល​​​ផ្ទះ​​​ថ្មី​​​

ដោយ ឌឹ ខេមបូឌា ដេលី

បទវិភាគ

លោក​​នាយក​​រដ្ឋមន្ត្រី​ ហ៊ុន សែន និង​លោក​ សម​ រង្ស៊ី មេ​ដឹកនាំ​គណបក្ស​ប្រឆាំង​បាន​លើក​ឡើង​កាលពី​ម្សិល​មិញ​ថា ពួក​គាត់​កំពុង​តែ​ធ្វើការ​ជាមួយ​គ្នា​ដើម្បី​បង្កើត​ច្បាប់​ថ្មី​​ដែល​នឹង​​កំណត់​សិទ្ធិ​របស់​ម្ចាស់​​ក្នុង​ការ​​ដំឡើង​ថ្លៃ​ឈ្នួល​​ផ្ទះ​ពី​រយៈ​ពេល​នៃ​កិច្ចសន្យា​មួយ​ទៅ​កិច្ចសន្យា​មួយ​ទៀត​។​

ថ្លៃឈ្នួល​​ផ្ទះ​​គឺជា​​កត្តា​រាំង​ស្ទះ​ដ៏​​​​ចម្បង​​​​សម្រាប់​កម្មករ​រោង​ចក្រ​កាត់ដេរ ដែល​ចាក​ចេញ​ពី​ស្រុក​កំណើត​​មក​ធ្វើ​ការ​នៅ​ក្នុង​​រាជ​ធានី​ភ្នំពេញ​ ដោយ​ក្នុង​រាល់​ការ​​ដំឡើង​ប្រាក់ខែ​ទាំង​បី​លើក​​ចាប់តាំង​ឆ្នាំ​​​២០១៣​​​ មក​ ថ្លៃ​ឈ្នួល​​ផ្ទះ​​គឺ​សុទ្ធ​តែ​ត្រូវ​បាន​ដំឡើង​​រាល់​​​លើក​ដូចគ្នា​។

ពេល​​​ថ្លែង​​​ទៅ​កាន់​និស្សិត​​បញ្ចប់​​ការសិក្សា​​ជាង​​​៤.០០០​ នាក់​​នៅ​កោះ​ពេជ្រ​​ក្នុង​រាជធានី​កាល​ពី​ម្សិលមិញ​ លោក​ ហ៊ុន​ សែន​ បាន​​លើក​​ឡើង​ថា លោក​ និង​លោក​ សម​ រង្ស៊ី​ កំពុង​សហការ​​​ជា​មួួយ​​គ្នា​​ដើម្បី​បង្កើត​​ច្បាប់​ថ្មី​​​ ដែល​នឹង​​ទប់​ស្កាត់​​កុំ​ឲ្យ​បញ្ហា​នេះ​​កើត​​ឡើង​។

លោក​ នាយក​​រដ្ឋ​មន្ត្រី​​​ បាន​មាន​ប្រសាសន៍​ថា “យើង​​ចំបាច់​​ត្រូវតែ​បង្កើត​ច្បាប់​មួយ​ដែល​ការ​ពារ​ភាគី​ទាំង​ពីរ​”។ លោក​ បាន​​បន្ថែម​ថា ទីផ្សារ​ផ្ទះ​ជួល​ក្នុង​ពេល​សព្វថ្ងៃ​ កំពុង​ធ្វើ​ឲ្យ​មាន​ផល​​ប៉ះពាល់​​យ៉ាង​​ខ្លាំង​ដល់​​ទាំង​​អ្នក​ជួល​ផ្ទះ​​និង​​​​ម្ចាស់​ផ្ទះ​​​ ដោយ​​សារ​​កិច្ចសន្យា​​ពុំសូវ​​មាន​​ប្រសិទ្ធ​ភាព​​។

លោក​ បាន​​មាន​​​ប្រសាសន៍​​បន្ថែម​​ថា​ “ម្ចាស់​​ផ្ទះ​​បាន​​ដំឡើង​​ថ្លៃ​​ឈ្នួល​​ផ្ទះ​​តាម​​តែ​​ទំនើង​ចិត្ត​ដោយសារ​មាន​កិច្ច​សន្យា​ត្រឹម​តែមាត់​។ ​​​ ថ្លៃ​​​ឈ្នួល​​​បន្ទប់​​​ជួល​​​​​​ត្រឹម​​​តែ​​​ប៉ុណ្ណេះ​​​សោះ​​​ ហើយ​​​ពួកគេមិន​​​គិត​​​ពី​​​ចំនួន​​​នៃ​​​អ្នក​​​​​​មក​​​ស្នាក់​​​​​​នៅ​​​ឡើយ​​​។ ប៉ុន្តែ​​​បន្ទាប់​​​មក​​​នៅ​​​ពេល​​​ពួក​​​គេ​​​ទទួល​​​បាន​​​ដំណឹង​​​ថា ប្រាក់​​​ខែ​​​កម្មករ​​​ត្រូវ​​​បាន​​​ដំឡើង​​​នោះ ពួក​​​គេ​​​​​​ក៏​​​ដំឡើង​​​ថ្លៃ​​​ឈ្នួល​​​ផ្ទះ​​​ភ្លាម​​​ៗ​​​តែ​​​ម្តង​​​​​​​​​​​​​​”។

លោក​​​​​​បាន​​​មាន​​​ប្រសាសន៍​​​បន្ត​​​ទៀត​​​ថា “បញ្ហា​​​ផ្សេង​​​ទៀត​​​គឺ​​​នៅ​​​ត្រង់​​​ថា ជួន​​កាល​​​កម្មករ​​​​​​ស្នាក់​​​នៅ​​​ក្នុ​​​ង​​​បន្ទប់​​​ជួល​​​មួយ​​​ ហើយ​​​ខណៈ​​​ពួក​​​គាត់​​​កំពុង​​​រស​​​់​​​នៅ​​​ក្នុង​​​បន្ទប់​​​ជួល​​​របស់​​​​​​ខ្លួន​​​​​​ ពួក​​​គាត់​រក​​​បន្ទប់​​​ជួល​​​ណា​​​ដែល​​​ថោក​​​ផ្សេង​​​ទៀត​​​។ ​​​បន្ទាប់​​​មក​​​ពួក​​​​​​គាត់​​​ចាក​​​ចេញ​​​ពី​​​បន្ទប់​​​ជួល​​​ចាស់​​​​​​ទៅ​​​ជួល​​​បន្ទប់​​​ជួល​​​​​​មួួយ​​​ផ្សេង​​​​​​ទៀត​​​ ហើយ​​​ម្ចាស់​​​ផ្ទះ​​​​​​ត្រូវ​​​ទុក​​​បន្ទប់​​​ជួល​​​របស់​​​ខ្លួន​​​ឲ្យ​​​នៅ​​​ទំនេរ​​​”។

លោក​​​នាយក​​​រដ្ឋ​​​មន្ត្រី ហ៊ុន សែន បាន​​​មានប្រសាសន៍​​​ទៀត​​​ថា” មេ​​​ដឹក​​​នាំ​​​​​​នៃ​​​គណបក្ស​​​នយោបាយ​​​ទាំង​​​ពីរ​​​ គឺ​​​មាន​​​ន័យ​​​ថា ទាំង​​​អ្នក​​​នៅ​​​ក្នុង​​​ និង​​​ក្រៅ​​​រដ្ឋាភិបាល​​​ នឹង​​​បង្កើត​​​​​​ក្រុម​​​ការ​​​ងារ​​​មួយ​​​ដើម្បី​​​ចាប់​​​ផ្ដើម​​​តាក់​​​តែង​​​ច្បាប់​​​នេះ ។ មុន​​​ពេល​​​ច្បាប់​​​នេះ​​​ត្រូវ​​​បាន​​​តាក់​​​តែង​​​រួច ​​​ខ្ញុំ​​​សូម​​​អំពាវ​​​នាវ​​​ដល់​​​ម្ចាស់​​​ផ្ទះ​​​កុំ​​​ដំឡើង​​​ថ្លៃ​​​បន្ទប់​​​របស់​​​ខ្លួន​​​ ហេតុ​​​ដូច្នេះ​​​កម្មករ​​​អាច​​​នៅ​​​សល់​​​ប្រាក់​​​ខ្លះ”។

លោក សម រង្ស៊ី បាន​​​​​លើក​​​ឡើង​​​តាម​​​រយៈ​​​ទូរស័ព្ទ​​​មក​​​ថា ​​​ច្បាប់​​​គ្រប់​​​គ្រង​​​ការ​​​ជួល​​​ផ្ទះ​​​គឺ​​​មាន​​​តែ​​​នៅ​​​ក្នុង​​​ប្រទេស​​​សេរី​​​ៗ​​​បំផុត​​​​​​ប៉ុណ្ណោះ ហើយ​​​ថា លោក​​​សង្ឃឹម​​​ថា ច្បាប់​​​បែប​​​នេះ​​​មាន​​​នៅ​​​ក្នុង​​​ប្រទេស​​​កម្ពុជា​​​នឹង​​​ជួយ​​​លើក​​​កម្ពស់​​​កិច្ច​​​សន្យា​​​ជួល​​​ផ្ទះ​​​រយៈ​​​ពេល​​​យូរ​​​ឲ្យ​​​កាន់​​​តែ​​​មាន​​​ប្រសិទ្ធ​​ភាព​​​​​​​​​ ដោយ​​​​​​ការ​​​ពារ​​​ទាំង​​​​​​​​​ម្ចាស់​​​ផ្ទះ និង​​​អ្នក​​ជួល​​​ផ្ទះ​​​។

លោក សម រង្ស៊ី បាន​​​មាន​​​ប្រសាសន៍​​​ថា “វា​​​គឺ​​​ជា​​​គំនិត​​​ផ្តួច​​​ផ្តើម​​​រួម​​​គ្នា​​​នៃ​​​គណបក្ស​​​ទាំង​​​ពីរ​​​​​​ដើម្បីបង្កើត​​​ច្បាប់​​​មួ​យ​​​​​​សម្រាប់​​​ដោះស្រាយ​​​បញ្ហា​​​នៃ​​​ទំនាក់​​​ទំនង​​​រវាង​​​ម្ចាស់​​​ផ្ទះ​​​ និង​​​អ្នក​​​ជួល​​​ផ្ទះ ព្រោះ​​​យើង​​​ចង់​​​ឲ្យ​​​ទំនាក់​​​ទំនង​​​នេះ​​​មាន​​​ភាព​​​ច្បាស់​​​លាស់​​​  មាន​​​តម្លាភាព​​​ និ​​​ងផ្អែក​​​លើ​​​សម​​​ភាព។​​​ យើង​​​មិន​​​ចង់​​​ឲ្យ​​​ម្ចាស់​​​ផ្ទះ​​​​​ដំឡើង​​​ថ្លៃ​​​ឈ្នួល​​​ផ្ទះ​​​ ឬ​​​ផ្លាស់ប្តូរ​​​កិច្ច​​​សន្យា​​​ជួល​​​ផ្ទះ​​​តាម​​​តែ​​​ចិត្ត​​​ឡើ​​​យ​​​”។

លោក​​​​​​បា​​​ន​​​មាន​​​ប្រសាសន៍​​៍បន្ថែម​​​ទៀត​​​ថា “​​​នៅ​​​ក្នុង​​​ប្រទេស​​​ជា​​​ច្រើន​​​ គេ​​​អាច​​​ដំឡើង​​​ថ្លៃ​​​ឈ្នួល​​​ផ្ទះ​​​​​​នៅ​​​ពេល​​​​​ណា​​​ដែល​​​មាន​​​អតិផរណា​​​តែ​​​ប៉ុណ្ណោះ។ គេ​​​មិន​​​អាច​​​ដំឡើង​​​ថ្លៃ​​​ជួល​​​ផ្ទះ​​​តាម​​​តែ​​​ចិត្ត​​​នោះឡើយ​​​។ ​​​ច្បាប់​​​នេះ​​​នឹង​​​កំណត់​​​ការ​​​ដំឡើង​​​ថ្លៃ​​​ជួល​​​ផ្ទះ​​​ពីរយៈ​​​ពេល​​​មួយ​​​ទៅ​​​រយៈ​​​ពេល​​​មួយ​​​ទៀត​​​ ហើយ​​​នៅ​​​ក្នុង​​​រយៈ​​​ពេល​​​នោះ ​​​ម្ចាស់​​​ផ្ទះ​​​នឹង​​​​​​​​​អនុញ្ញាត​​​ឲ្យ​​​ដំ​​​ឡើង​​​ថ្លៃ​​​ផ្ទះ​​​តាម​​​សមាមាត្រ​​​ដ៏​​​ជាក់​​​លាក់​​​មួយ​​​តែ​​​ប៉ុណ្ណោះ​​​។ សមាមាត្រ​​​នេះ​​​នឹង​​​ឆ្លុះ​​​បញ្ចាំង​​​អំពី​​​អតិផរណា​​​ ឬក៏​​​វិធាន​​​ការ​​​ផ្សេង​​​ទៀត​​​ដែល​​​ត្រូ​​​វបាន​​​កំណត់​​​យ៉ាង​​​ច្បាស់​​​ដោយ​​​ឆ្លុះបញ្ចាំង​​​ពី​​​ស្ថាន​​​ភាព​​​សេដ្ឋ​​​កិច្ច​​​ និង​​​​​​កម្លាំង​​​​​​ទិញ។ ប្រសិនបើ​​​ម្ចាស់​​​ផ្ទះដំឡើង​​​ថ្លៃ​​​ឈ្នួល​​​​​ផ្ទះ​​​លើស​​​ពី​​​អ្វី​​​ដែល​​​ច្បាប់​​​អនុញ្ញាត​​​ អ្នក​​​ជួល​​​ផ្ទះ​​​អាច​​​ដាក់​​ពាក្យ​​​ប្តឹង​​​បាន​​​ ហើយ​​​តុលាការ​​​នឹង​​​ពិន័យ​​​ម្ចាស់​​​ផ្ទះ​​​”។

លោក​​ សម រង្ស៊ី បាន​​​លើក​​​ឡើង​​​ថា លោក សង្ឃឹម​​​ថា ​​​ច្បាប់​​​គ្រប់​​​គ្រង​​​​​​​​ការជួល​​​ផ្ទះ​​​នេះ​​​ នឹង​​​ត្រូវ​​​អនុវត្ត​​​ដោយ​​​ស្មើ​​​ភាព​​​ចំពោះ​​​ពល​​​រដ្ឋ​​ទាំង​​​អស់​​​នៅ​​​ក្នុង​​​ប្រទេស​​​កម្ពុជា​​​ ពោល​​​គឺ​​​​​​ចាប់​​​ពី​​​​​​ផ្ទះ​​​ជួល​​​​​​ដែល​​​មាន​​​តម្លៃ​​​៣០ ដុល្លារ​​​ និង​​​៤០​​​ដុល្លារ រហូត​​​ដល់​​​ភូមិ​​​គ្រឹះ​​​ដែល​​​មាន​​​ថ្លៃ​​​ឈ្នួល​​​​​​​​​​​​​​​ដល់​​​ទៅ​​​​​​១.០០០​​​ដុល្លារ​​​។

លោក​​​បាន​​​មាន​​​ប្រសាសន៍​​​ដោយ​​​ច្រាន​​​ចោល​​​ចំពោះ​​​លទ្ធភាព​​​ដែល​​​ថា​​​ច្បាប់​​​​​​គ្រប់​​​គ្រង​​​​​​ការ​​​ជួល​​​ផ្ទះ​​​នេះ​​​អាច​​​កាត់​​​បន្ថយ​​​ ការ​​​ផ្គត់​​​ផ្គង់​​​​​​ផ្ទះ​​​ជួល​​​ថា “តាម​​​គោល​​​ការណ៍ ​​​ច្បាប់​​​ថ្មី​​​គួរ​​​តែ​​​គ្រប​​​ដណ្ដប់​​​លើ​​​​​​ប្រភេទ​​​នៃ​​​ផ្ទះ​​​ជួល​​​ទាំង​​​អស់​​​ ព្រោះ​​​យើង​​​មិន​​​អាច​​​មាន​​​ស្តង​់ដារ​​​ពីរ​​​បាន​​​ឡើយ​​​។ គោល​​​ការណ៍​​​ដូច​​​គ្នា​​​នឹង​​​អនុវត្ត​​​ចំពោះ​​​ផ្ទះ​​​ជួល​​​គ្រប់​​​ប្រភេទ​​​ទាំង​​​អស់”។

លោក​​​បាន​​​មាន​​​ប្រសាសន៍ ​​​​​​បន្ថែម​​​ទៀត​​ថា “​​​ផ្ទះ​​​ជួល​​​នឹង​​​មិន​​​មែន​​​មាន​​​​​​ថ្លៃ​​​ឈ្នួល​​​នៅ​​​ទាប​​​រហូត​​​នោះ​​​ទេ​​​។ វា​​​អាច​​​មាន​​​ការ​​​ផ្លាស់​​​ប្តូរ​​​។ ឧទាហរណ៍​​​ពេល​​​មាន​​​ការ​​​ជួស​​​ជុល​​​ផ្ទះ​​​ជា​​​ដើម​​​ ម្ចាស់​​​ផ្ទះ​​​​​​​​​​​​អាច​​​ដំឡើង​​​ថ្លៃ​​​ឈ្នួល​​​ផ្ទះ​​​​​​តាម​​​​​​នោះ​​​បាន​​​។ យើង​​​មិន​​​​​មែន​​​​​​​​​​​​​​​ចង់​​​​​​ធ្វើ​​​ឲ្យ​​​ខូច​​​​​​ទីផ្សារ​​​នោះ​​​ទេ​​​  ប៉ុន្តែ ​​​អ្វី​​​ដែល​​​យើង​​​ចង់​​​ធ្វើ​​​នោះ​​​គឺ​​​ដើម្បី​​​ការ​​​ពារ​​​កុំ​​​ឲ្យ​​​មា​​​ន​​​ការ​​​រំលោភ​​​បំពាន​​​”។

លោក​​​ អាត់ ធន់ ​​​មេ​​ដឹក​​​នាំ​​​សហជីព​​​ដ៏​​​លេច​​​ធ្លោ​​​មួយ​​​រូប​​​បាន​​​លើក​​​ឡើង​​​ថា លោក​​​គាំទ្រ​​​ចំពោះ​​​​​​ច្បាប់​​​គ្រប់​​​គ្រង​​​ការ​​​ជួល​​​ផ្ទះ​​​ដែលត្រូវ​​​បាន​​​ស្នើ​​​ឡើង​​​នេះ​​​ ហើយ​​​ថា វា​​​ជា​​​ការល្អ​​​ណាស់​​​ដែល​​​ឃើញ​​​គណបក្ស​​​នយោបាយ​​​ប្រកួត​​​ប្រជែង​​​គ្នា​​​ដើម្បី​​​អត្ថ​​​ប្រយោជន៍​​​ជាតិ​​​នោះ​​​។

លោក​​​បាន​​​មាន​​​ប្រសាសន៍​​​ថា “យើង​​​​​​​​​គ្មាន​​​មន្ទិល​​​ថា អ្វី​​​ដែល​​​ពួក​​​គាត់​​​​​​កំពុង​​​ធ្វើ​​​គឺ​​​ជា​​​រឿង​​​នយោបាយ​​​នោះ​​​ឡើយ​​​។​​​ ប៉ុន្តែ​​​យើង​​​ចង់​​​ឃើញ​​​គណបក្ស​​​នយោបាយ​​​ប្រកួត​​​ប្រជែង​​​គ្នា​​​ដើម្បី​​​អត្ថប្រយោជន៍​​​កម្មករ​​​។ នេះ​​​ហើយ គឺ​​​ជា​​​​​​អ្វី​​​ដែល​​​យើង​​​ចង់​​​បាន​​​”៕ស៊ុយ​​​​​​ឈាង​​​

​​​​​​​​​

​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស