37 C
Phnom Penh

ក្រុម​យុវជន​គណបក្ស​ប្រជាជន​កម្ពុជានិង​អង្គការ​មិនមែន​រដ្ឋាភិបាល​សុវត្ថិភាព​ចរាចរណ៍​ផ្លូវគោក​ធ្វើយុទ្ធនាការ​​ស្តីពីការ​ពាក់​មួក​សុវត្ថិភាព​

ដោយ ឌឹ ខេមបូឌា ដេលី

បទវិភាគ

ក្រុមយុវជន​ដែលមាន​ទំនាក់ទំនង​ជាមួយ​គណបក្ស​ប្រជាជន​កម្ពុជា​​និងអង្គការ​សុវត្ថិភាព​ចរាចរណ៍​ផ្លូវគោក ជា​អង្គការ​មិនមែន​រដ្ឋាភិបាល​ក្នុង​តំបន់ កាលពី​ម្សិលមិញ​ បាន​រៀបចំកម្ម​វិធី​សាកល្បង​រយៈពេល​ពីរឆ្នាំដែលចំណាយ​ទឹក​ប្រាក់​​១,២​លាន​ដុល្លារ​ដើម្បី​អប់រំ​ប្រជា​ជន​កម្ពុជា​​អំពី​សារៈសំខាន់នៃការ​ពាក់មួក​សុវត​្ថិភាពនៅពេល​បើក​បរ ឬ​​ជិះក្នុង​នាម​ជា​អ្នក​រួម​ដំណើរ​តាម​ម៉ូតូ។Helmets

កម្មវិធី​សាកល្បង​នៅក្នុង​រាជ​ធានី​ភ្នំពេញ​ និង​នៅ​ខេត្ត​កណ្តាល​ និង​ខេត្ត​កំពង់​ស្ពឺ នឹង​អនុវត្ត​រួមគ្នា​ដោយ​អង្គការ​មូលនិធិបង្ការ​របួស​អាស៊ី និង​សហភាព​សហព័ន្ធ​យុវជន​កម្ពុជា​ ជា​អង្គការ​ដែលដឹក នាំដោយ​លោក ហ៊ុន ម៉ានី កូនប្រុស​លោក​នាយក​រដ្ឋមន្ត្រី ហ៊ុន សែន។

នៅពិធីមួយ​​ដើម្បី​ចាប់​ផ្តើម​​យុទ្ធនាការ​នៅ​​សាកល​វិទ្យាល័យ​ភូមិន្ទភ្នំពេញ លោក Greig Craft ប្រធាន​ស្ថាបនិក​​អង្គការ​មូលនិធិបង្ការ​របួស​អាស៊ី​បាន​សង្កត់​ធ្ងន់​ពី​សារៈសំខាន់​​នៃ​ការ​ពាក់មួក​សុវត្ថិភាព ខណៈស្វែង​យល់​ពី​គ្រោះថ្នាក់​​តាម​ដង​ផ្លូវ​ក្នុង​ប្រទេស​កម្ពុជា ដោយ​លើក​ឡើង​ថា មនុស​្ស​២.០០០នាក់​បាន​ស្លាប់​តាម​ដងផ្លូវ​ក្នុង​មួយ​ឆ្នាំ​ៗ “ភាគច្រើន​មក​ពី​ការ​មិន​ពាក់​មួកសុវត្ថិភាព”។

លោក Craft បាន​មាន​ប្រសាសន៍​ថា “​ការ​ស្លាប់នៅ​តាម​ដងផ្លូវ​ដោយ​សារ​គ្រោះ​ថ្នាក់​ចរាចរណ៍​ច្រើន​ជាង​ការ​ស្លាប់​ដោយ​សារ​គ្រាប់មីន​ ជំងឺ​គ្រុន​ចាញ់ និង​ជំងឺ​គ្រុន​ឈាម​​ដល់ទៅ​​២០ដង​”។

ថ្លែង​នៅ​ក្រៅ​ពិធីនោះ​​ លោក Craft បាន​មាន​ប្រសាសន៍ថា អង្គការ​របស់​លោក​​បាន​សម្រេច​សហការ​ជាមួយ​​អង្គការ​របស់​លោក ហ៊ុន មា៉ានី ពីព្រោះ​យុវជន​ខ្មែរ​​​ងាយ​សម្រប​អាកប្បកិរិយា​របស់ខ្លួន​​ជាង​​មនុស្ស​ចាស់ ហើយ​ពួកគេ​គឺ”ជា​ភ្នាក់ងារ​ធ្វើឲ្យ​ផ្លាស់ប្តូរ”។

លោក​បាន​លើក​ឡើង​ថា “​យុវជន​មាន​ឆន្ទៈ​សម្រប​តាម​ការ​ផ្លាស់ប្តូរ​ថ្មី និង​សម្រប​តាម​ច្បាប់ថ្មី”។

លោកស្រី ចាន់ផា ឃុន មន្ត្រី​ទំនាក់ទំនង​ព័ត៌មាន​នៅ​​អង្គការ​មូលនិធិបង្ការ​របួស​អាស៊ីក្នុង​ប្រទេស​កម្ពុជា​​បាន​មាន​ប្រសាសន៍​ថា ដំណាក់​កាល​ដំបូង​នៃ​កម្មវិធីនេះ​ដែល​ផ្តល់​មូល​និធិ​មួយ​ផ្នែក​ដោយ​​អង្គការ​ USAID នឹង​ចុះ​តាម​ផ្ទះ​​ដើម្បី​បញ្ចុះ​បញ្ចូល​អ្នក​ប្រើ​ប្រាស់​ផ្លូវ​ថ្នល់​​ឲ្យ​ពាក់​មួក​សុវត្ថិភាព។

លោកស្រី​បាន​មាន​ប្រសាសន៍​ថា “​អង្គការ​មូលនិធិបង្ការ​របួស​អាស៊ី​នឹង​បណ្តុះ​បណ្តាល​​យុវ​ជន​ស្ម័គ​ចិត្ត​​របស់​សហភាព​សហព័ន្ធ​យុវជន​កម្ពុជា​​ពី​របៀប​ទំនាក់ទំនង​ចំពោះ​សហ​គមន៍​។ យើង​នឹង​​ផ្តល់​សម្ភារ​បណ្តុះ​បណ្តាល​ ខិត្ត​ប័ណ្ណ​ ប័ណ្ណប្រកាស”។

លោកស្រី ឃុន បានថ្លែង​ថា សមាជិក​សហភាព​សហព័ន្ធយុវជន​កម្ពុជា​​ក៏នឹង​ធ្វើការ​ជាមួយ​​នគរបាល​ចរាចរ​នៅ​ថ្នាក់​ខណ្ឌ​​ដើម្បី​រក​វិធី​ផ្សេង​​ក្នុងការ​បញ្ចុះ​បញ្ចូល​ប្រជា​ជន​ឲ្យ​ពាក់​មួក​សុវត​្ថិភាព។ លោក​ស្រី​បាន​បន្ថែម​ថា កាលពី​ខែ​មេសា អង្គការ​មូលនិធិបង្ការ​របួស​អាស៊ី​ នឹង​ផ្សព្វផ្សាយ​យុទ្ធនាការ​នេះតាម​វិទ្យុ ទូរទស្សន៍ និង​ផ្ទាំង​ប៉ាណូ​ជាដើម។

លោកស្រី ឃុន បាន​មាន​ប្រសាសន៍​ថា បន្ទាប់ពី​ការ​វាយ​តម្លៃ​លទ្ធផល​នៃកម្មវិធី​សាក​ល្បង​ក្នុង​រយៈ​ពេល​ពីរឆ្នាំ អង្គការ​មូលនិធិ​បង្ការ​របួស​អាស៊ី​នឹង​សម្រេច​​ថាតើ​ផ្នែក​ណាខ្លះ​នៃ​គម្រោង​នេះ​ដំណើរ​ការ​ទៅមុខ​ជាមួយ​ថ្នាក់​ជាត​ិ។

កាលពី​ខែ​មុន ព្រះមហាក្សត្រ នរោត្តម សីហមុនី បាន​ឡាយ​ព្រះហស្ត​លេខា​​លើ​ច្បាប់​ថ្មីតម្រូវ​ឲ្យ​​អ្នក​រួម​ដំណើរ​តាម​ម៉ូតូ​អាយុ​លើស​ពី​៣ឆ្នាំ​​ពាក់មួក​សុវត្ថិភាព បើទោះ​ជា​នគរបាល​​ចរាចរ​មិន​ទាន់​ចាប់​ផ្តើម​អនុវត្ត​ក៏ដោយ៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស