បន្ទាប់ពីការចរចារវាងអាជីវករ និងអ្នកគ្រប់គ្រងនៅផ្សារសុរិយាក្នុងរាជធានីភ្នំពេញបានបញ្ចប់ដោយគ្មានដំណោះស្រាយកាលពីថ្ងៃពុធនោះ ម្ចាស់តូចរាប់រយនាក់បានបិទតូបរបស់ខ្លួនកាលពីម្សិលមិញ ជាការបិទផ្សារទំនើបមួយក្នុងចំណោមផ្សារទំនើបធំបំផុតក្នុងរាជធានី។
នៅតែរោងភាពយន្ត និងអ្នកលក់រាយតិចតួចប៉ុណ្ណោះនៅបើកតូបរបស់ខ្លួនខណៈដែលអាជីវករជាច្រើនបានឈរនៅខាងក្រៅផ្សារដោយកាន់ស្លាកសញ្ញាទាមទារឲ្យបញ្ចុះថ្លៃជួលតូប៣០ភាគរយ និងឲ្យប្តូរអ្នកគ្រប់គ្រង។
លោក ស៊ី ទួន ចៅសង្កាត់ផ្សារថ្មី១ ក្នុងខណ្ឌដូនពេញបានប្រាប់អាជីវករនៅម៉ោងប្រហែល៥ល្ងាចថា អ្នកគ្រប់គ្រងផ្សារបានព្រមព្រៀងជួបពិភាក្សាគ្នាមួយលើកទៀតនៅព្រឹកនេះ។
នៅក្នុងការពិភាក្សាកាលពីថ្ងៃពុធ អ្នកគ្រប់គ្រងផ្សារបានស្នើបញ្ចុះថ្លៃជួលត្រឹម២០ភាគរយ ដរាបណាអាជីវករបង់ថ្លៃជួលទាន់ពេលវេលា ដាក់តម្លៃលក់ឲ្យបានច្បាស់លាស់ ហើយប្រកាន់ខ្ជាប់ទៅនឹងម៉ោងអាជីវកម្ម។ អាជីវករបានលើកឡើងថា ពួកគាត់នឹងដោះស្រាយសម្រាប់ការបញ្ចុះ២៥ភាគរយដោយឥតលក្ខខណ្ឌ ហើយការប្រជុំនោះបញ្ចប់ទៅដោយគ្មានការព្រមព្រៀងអ្វីឡើយ។
អ្នកស្រី វ៉ាន់ ដាវី អាយុ៣៥ឆ្នាំ ជាអ្នកលក់សម្លៀកបំពាក់នៅផ្សារសូរិយាបាននិយាយថា “ការលក់របស់យើងបានធ្លាក់ចុះយ៉ាងខ្លាំង ជាពិសេសនៅឆ្នាំនេះចាប់តាំងពីអ្នកគ្រប់គ្រងថ្មីចូលមកកាន់។ អ្នកស្រីបាននិយាយថា ការលក់បានធ្លាក់ចុះពី៧០ទៅ៨០ភាគរយក្នុងរយៈពេលពីរបីឆ្នាំកន្លងមកនេះ។
អ្នកស្រី ដាវី បាននិយាយថា សំណើឲ្យប្រកាន់ខ្ជាប់តាមម៉ោងអាជីវកម្មតឹងរ៉ឹងនោះគឺជាលក្ខខណ្ឌដែលមានការជំទាស់ក្នុងចំណោមអាជីវករ ដែលពេញចិត្តឲ្យមានសេរីភាពក្នុងការសម្រេចនៅពេលបើកនិងបិទតូបរបស់ខ្លួនជាង។
អ្នកស្រីបាននិយាយថា “យើងអាចទទួលយកលក្ខខណ្ឌមួយចំនួន ប៉ុន្តែយើងមិនអាចធានាថា យើងនឹងមកទាន់ពេលវេលាក្នុងការបើកតូបឡើយ”។
លោក រឿង ថន អាយុ៤៨ឆ្នាំជាអ្នកសម្លៀកបំពាក់ម្នាក់ទៀតបាននិយាយថា អ្នកជួលជាច្រើននាក់ទៀតក៏អាក់អន់ចិត្តនឹងការខ្វះការកែលម្អអគារផងដែរ។ លោកបាននិយាយថា “អ្នកគ្រប់គ្រងផ្សារទុកច្រកកាន់តែចង្អៀត ហើយមិនសូវទាក់ទាញទេ ដូច្នេះហើយ វាលំបាកលក់ផលិតផលរបស់យើងណាស់។ វាក៏មិនសូវមានសុវត្ថិភាពដែរ ពីព្រោះយើងមិនមានច្រកសម្រាប់គ្រាអាសន្ន”៕សារុន