26 C
Phnom Penh

កូរ៉េ​ខាងត្បូង​នឹង​បង្កើន​ចំនួន​ពលករ​ខ្មែរ​ចំណាក​ស្រុក​ទ្វេដង

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​កាលពី​ថ្ងៃ​ច័ន្ទ​ថា រដ្ឋាភិបាល​កូរ៉េខាង​ត្បូង​នឹង​បង្កើន​ចំនួន​ទ្វេដង​នូវ​ពលករ​ខ្មែរ​ចំណាក​ស្រុក​ដែល​ទទួល​បាន​ការ​អនុញ្ញាត​ឲ្យ​ធ្វើការ​នៅ​វិស័យ​រោងចក្រ សំណង់​និង​កសិកម្ម​របស់​ប្រទេស​នេះ​រាល់​ឆ្នាំ។​​​

យោងតាម​ក្រុម​មន្ត្រី​ស្ថានទូត​បាន​ឲ្យ​ដឹង​ថា សព្វថ្ងៃ​មាន​ពលករ​ខ្មែរ​ជាង​៣៥.០០០​នាក់​កំពុង​ធ្វើការ​នៅ​ប្រទេស​កូរ៉េ​ខាង​ត្បូង ដែល​ផ្ញើ​ប្រាក់​មក​ស្រុក​វិញ​​ប្រហែល​២០០​លាន​ដុល្លារ​រាល់​ឆ្នាំ។ កាលពី​ឆ្នាំ​មុន រដ្ឋាភិបាល​ក្រុង​សេអ៊ូល បាន​កំណត់​ចំនួន​ការ​អនុញ្ញាត​៤.៦០០​សម្រាប់​ពលករ​ខ្មែរ​ឲ្យ​ចូល​ប្រទេស​នេះ។

បន្ទាប់ពី​កិច្ច​ប្រជុំ​ដំបូង​នៅ​សភា​ជាតិ រវាង​លោក គីម វ៉ន ជីន (Kim Weon-jin) ឯកអគ្គរដ្ឋទូត​​ទើប​តែងតាំង​ថ្មី​នៃ​សាធារណរដ្ឋ​កូរ៉េ​ខាង​ត្បូង​ប្រចាំ​ប្រទេស​កម្ពុជា​ និង​លោក ហេង សំរិន ប្រធាន​រដ្ឋ​សភា​នៃ​ព្រះ​រាជាណាចក្រ​កម្ពុជា​កាលពី​ថ្ងៃ​ច័ន្ទ លោក កែវ ពិសិដ្ឋ នាយក​ខុទ្ទកាល័យ​របស់​លោក ហេង សំរិន បាន​និយាយ​ថា កូរ៉េ​ខាងត្បូង​បាន​យល់​ព្រម​ចាប់​ផ្តើម​ទទួល​យក​ពលករ​ខ្មែរ​កើន​ឡើង​ចំនួន​ទ្វេដង។

លោក ពិសិដ្ឋ បាន​ដកស្រង់សម្តី​លោក គីម ដែល​និយាយ​ក្នុង​កិច្ច​ប្រជុំ​បិទ​ទ្វារ​ថា “ឥឡូវ​នេះ រដ្ឋាភិបាល​កូរ៉េ បាន​សម្រេច​បង្កើន​ចំនួន​ពលករ​ទ្វេដង”។

លោកស្រី គីម ហ៊ីវ៉ន (Kim Hye-won) លេខា​ទី២​នៅ​ស្ថានទូត​កូរ៉េខាងត្បូង​ក្នុង​ក្រុង​ភ្នំពេញ​បាន​និយាយ​ថា នៅ​ពេល​ដែល​កូតា​ចុង​ក្រោយ​នេះ​មិន​ទាន់​សម្រេច​នៅ​ឡើយ​នោះ គេ​រំពឹង​ថា​នឹង​កើន​ចំនួន​យ៉ាង​ច្រើន។

លោក​ស្រី គីម បាន​និយាយ​ថា “ចំនួន​ជាក់លាក់​មិន​ទាន់​ដឹង​នៅឡើយ​ទេ តែ​នឹង​ចេញ​ឲ្យ​ដឹង​ក្នុង​ពេល​ឆាប់ៗ ប៉ុន្តែ​យោងតាម​ការ​យល់​ដឹង​របស់​យើង ចំនួន​ពលករ​នឹង​កើន​ឡើង​ច្រើន​សម្បើម”។ លោក​ស្រី​បាន​បន្ថែម​ទៀត​ថា ចំនួន​ការ​អនុញ្ញាត​មាន​ការ​ប្រែប្រួល​រាល់​ឆ្នាំ​អាស្រ័យ​លើ​តម្រូវការ​ក្នុង​វិស័យ​ឧស្សាហកម្ម​កូរ៉េ​ខាង​ត្បូង។

លោក​ស្រី​បាន​បន្ថែម​ថា “រដ្ឋាភិបាល​កម្ពុជា​បាន​សំដែង​បំណង​បង្កើន​ចំនួន​ពលករ​ជាច្រើន​លើក ហើយ​រដ្ឋាភិបាល​កូរ៉េ​បាន​យក​បញ្ហា​នេះ​ទៅ​ពិចារណា​រួចហើយ”។

ប៉ុន្តែ​យោងតាម​អង្គការ​សិទ្ធិ​មនុស្ស​លើកលែង​ទោស​អន្តរជាតិ (Amnesty International) ឲ្យ​ដឹង​ថា ពលករ​ចំណាក​ស្រុក​ជាច្រើន​នាក់​ដែល​បាន​ទៅ​ធ្វើ​ការ​ក្នុង​ឧស្សាហកម្ម​កសិកម្ម​របស់​ប្រទេស​កូរ៉េ​ខាង​ត្បូង ទទួល​រង​ការ​រំលោភ​បំពាន។

ក្នុង​របាយការណ៍​មួយ​កាលពី​ឆ្នាំ​មុន អង្គការ​សិទ្ធិ​មនុស្ស​នេះ​បាន​និយាយ​ថា ពលករ​ក្នុង​ឧស្សាហកម្ម​នេះ ក្នុង​នោះ​មាន​ពលករ​ជាច្រើន​នាក់​មកពី​ប្រទេស​កម្ពុជា​ផង បាន​ទទួល​ប្រាក់​ខែ​ទាប​និង​រង​ការ​កេងប្រវ័ញ្ច​តាម​រយៈ​កិច្ច​សន្យា ដែល​បង្ខំ​ពួកគេ​ឲ្យ​ធ្វើការ​លើស​ម៉ោង​ហួស​ប្រមាណ និង​រស់​ក្នុង​ស្ថានភាព​ស្មោក​គ្រោក។

ក្រៅពី​ការ​រំពឹង​លើ​កំណើន​ចំនួន​ពលរដ្ឋ​ខ្មែរ​ទៅ​កូរ៉េ​ខាង​ត្បូង លោក​ស្រី គីម បាន​និយាយ​ថា ទំនាក់​ទំនង​ផ្សេងទៀត​ក៏​កើត​មាន​ដែរ។ លោក​ស្រី​បាន​និយាយ​ថា កូរ៉េ​ខាងត្បូង ដែល​សព្វ​ថ្ងៃ​ជួល​អគារ​ធ្វើ​ស្ថានទូត​របស់​ខ្លួន​ក្នុង​ក្រុង​ភ្នំពេញ កំពុង​សាងសង់​ស្ថានទូត​ថ្មី​លើ​កោះ​ពេជ្រ។

លោក​ស្រី​បាន​និយាយ​ថា “ប្រទេស​កម្ពុជា​ជា​ប្រទេស​សំខាន់​មួយ ហើយ​វត្តមាន​របស់​កូរ៉េ​កាន់តែ​ច្រើន​ឡើង​នៅ​ទីនេះ ដូច្នេះ​យើង​គិត​ថា យើង​ត្រូវការ​ស្ថានទូត​របស់​យើង​ផ្ទាល់​ដើម្បី​ឆ្លុះ​បញ្ចាំង​កិច្ចការ​នេះ”។ លោក​ស្រី​បាន​បន្ថែម​ថា ប្រទេស​កូរ៉េ​ក៏​កំពុង​ពិចារណា​បើក​ស្ថាន​កុងស៊ុល​មួយ​នៅ​ខេត្ត​សៀមរាប​ដែរ។

នៅ​រវាង​ខែ​មករា​និង​ខែ​វិច្ឆិកា​ឆ្នាំ​មុន ទេសចរ​កូរ៉េ​ខាង​ត្បូងមាន​ចំនួន​៣៨៧.០០០​នាក់​បាន​មក​ទស្សនា​ប្រទេស​កម្ពុជា ពោលគឺ​ជិត​១០​ភាគរយ​នៃ​ទេសចរ​ទាំងអស់៕ (រាយការណ៍​បន្ថែម​ដោយ Maria Paula Brito) មានិត

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស