កាលពីម្សិលមិញ លោកនាយករដ្ឋមន្ត្រី ហ៊ុន សែន បានបដិសេធថា គណបក្សប្រជាជនកម្ពុជាមិនបាន “ទិញ” តំណាងរាស្ត្រគណបក្សសង្គ្រោះជាតិម្នាក់ដែលបានចុះចូលគណបក្សកាន់អំណាចកាលពីសប្ដាហ៍មុនឡើយ ដោយមានប្រសាសន៍ថា តាមពិតលោកបានផ្ដល់ដំបូន្មានដល់មន្ត្រីរត់ចោលបក្សរូបនេះឲ្យនៅក្នុងគណបក្សប្រឆាំងដដែល ហើយចាំធ្វើការជាមួយលោកចេញពីគណបក្សនោះ។
លោក ហ៊ុន សែន បានថ្លែងទៅកាន់និស្សិតសាកលវិទ្យាល័យដែលបញ្ចប់ការសិក្សាប្រមាណ១.៧០០នាក់ នៅវិទ្យាស្ថានជាតិអប់រំក្នុងរាជធានីភ្នំពេញថា លោក វ៉ាន់ សំអឿន ដែលជាតំណាងរាស្ត្រគណបក្សសង្គ្រោះជាតិ បានទទូចចង់ផ្លាស់ប្ដូរគណបក្ស។
លោកបានមានប្រសាសន៍ថា “កាលពីសប្ដាហ៍មុន មានសមាជិកសភាមួយរូបមកពីគណបក្សសង្គ្រោះជាតិ គឺឯកឧត្ដម វ៉ាន់ សំអឿន តំណាងរាស្ត្រមណ្ឌលកំពត ដែលបានសុំលាឈប់ពីគណបក្សរបស់គាត់ និងពីសមាជិកសភា ហើយមកចូលរួមជាមួយគណបក្សប្រជាជន។ គណបក្សមិនបានចេញសេចក្ដីថ្លែងការណ៍ណាមួយទេ ប៉ុន្តែយើងទទួលបានព័ត៌មានពាក់ព័ន្ធនឹងមនុស្សនៅក្នុងគណបក្សសង្គ្រោះជាតិ ហើយខ្ញុំចង់បញ្ជូនសារត្រឡប់ទៅវិញថា មានគេនិយាយថា ខ្ញុំបានទិញអ្នកដទៃ [ប៉ុន្តែ] មនុស្សមិនមែនជាទំនិញទេ។ ឯកឧត្ដម វ៉ាន់ សំអឿន ក៏មិនចាត់ទុកខ្លួនឯងជាទំនិញដែរ”។
លោក ហ៊ុន សែន បានបញ្ជាក់ថា លោកបានជួបជាមួយមន្ត្រីចុះចូលរូបនេះតាមការរៀបចំដោយលោក សេរី កុសល អតីតមេបញ្ជាការនៃចលនាតស៊ូប្រឆាំងរដ្ឋាភិបាលក្រុងភ្នំពេញនៅទសវត្សរ៍ឆ្នាំ១៩៨០ និងជាមន្ត្រីជាន់ខ្ពស់ក្នុងគណបក្សហ្វុ៊នស៊ិនប៉ិច ដែលក្រោយមកបានចុះចូលជាមួយគណបក្សប្រជាជនកម្ពុជា។
លោកបានមានប្រសាសន៍យ៉ាងដូច្នេះថា “ខ្ញុំបាននិយាយថា ‘បងនៅទីនោះហើយ ហើយបងអាចសរសេរមកខ្ញុំបាន បើបងមានគំនិតអ្វីមួយពាក់ព័ន្ធនឹងការអភិវឌ្ឍប្រទេស ពីព្រោះប្រទេសជារបស់យើងទាំងអស់គ្នា។ គាត់និយាយថា ‘បើខ្ញុំធ្វើបែបនោះ ខ្ញុំធ្វើហាក់ដូចជាមិនពេញមុខពេញមាត់ទេ’ ហើយបានទទូចឲ្យខ្ញុំអនុញ្ញាតឲ្យគាត់មកនៅជាមួយ [គណបក្សប្រជាជន]។ ខ្ញុំបាននិយាយថា ‘បើអញ្ចឹងក៏អញ្ចឹងហ្មង’។ គាត់មិនបាននិយាយអ្វីអាក្រក់ពីគណបក្សរបស់គាត់ទេ។ ដូច្នេះហើយខ្ញុំក៏បានប្រាប់បង វ៉ាន់ សំអឿន ថា ‘ បងខ្ញុំសុំអញ្ជែក បើបងមកចូលរួមជាមួយគណបក្សប្រជាជន មេត្តាកុំវាយប្រហារគណបក្សដើមរបស់បង។ នេះជាអ្វីដែលខ្ញុំបាននិយាយ។ ហើយខ្ញុំបានវ៉ៃ SMS ទៅអ្នកនាំពាក្យគណបក្សប្រជាជនកុំឲ្យនិយាយច្រើនពេកក្រៅពីគោរពសេរីភាពបុគ្គល”។
បន្ទាប់មកលោក ហ៊ុន សែន បានច្រានចោលគំនិតដែលយល់ឃើញថា វាអាចទៅរួចឬមានផលប្រយោជន៍ក្នុងការទិញតំណាងរាស្ត្រគណបក្សសង្គ្រោះជាតិឲ្យចុះចូល។ លោកបានមានប្រសាសន៍យ៉ាងដូច្នេះថា “ហេតុអីក៏ក្បាលមនុស្សថោកម្លេ៉ះ? ហើយខ្ញុំគ្មានលុយច្រើនសម្រាប់ទិញទេ។ តើទិញតែមនុស្សម្នាក់មកធ្វើអីបាន បើគណបក្សប្រជាជនមានបណ្ឌិតរាប់មិនអស់ទៅហើយនោះ?”។
លោក វ៉ាន់ សំអឿន បានចុះចូលគណបក្សប្រជាជនកម្ពុជាកាលពីថ្ងៃសុក្រ ដោយសរសេរនៅក្នុងលិខិតលាឈប់របស់លោកថា លោក “គ្មានឱកាសនឹងបម្រើប្រទេសជាតិតាមឆន្ទៈ និងបទពិសោធន៍របស់ខ្ញុំទេ” ក្នុងឋានៈជាតំណាងរាស្ត្រមួយរូបក្នុងចំណោមតំណាងរាស្ត្រទាំង៥៥រូបរបស់គណបក្សប្រឆាំង។
កាលពីថ្ងៃច័ន្ទ គណបក្សសង្គ្រោះជាតិបានផ្ញើលិខិតមួយច្បាប់ទៅគណៈកម្មាធិការជាតិរៀបចំការបោះឆ្នោត (គ.ជ.ប.) ឲ្យលោក ដាង ចំរើន វ័យ៣៩ឆ្នាំ ជាអ្នកស្រុកខេត្តកំពត ដែលជាបេក្ខជនលេខរៀងបន្ទាប់របស់គណបក្សប្រឆាំងនៅក្នុងការបោះឆ្នោតក្នុងពេលកន្លងទៅ ដើម្បីជំនួសតំណែងលោក វ៉ាន់ សំអឿន។ ចំណែកឯលោក វ៉ាន់ សំអឿន មិនអាចទាក់ទងសុំការបំភ្លឺបានទេពាក់ព័ន្ធនឹងបញ្ហានេះ៕ សុខុម