32 C
Phnom Penh

ប្រធាន​តុលាការ​ក្រុងត្រូវ​ដក​ពីតំណែង ​ចំពេល​មាន​ការ​អះអាង​ថា​មាន​អំពើ​ពុករលួយ

ដោយ ឌឹ ខេមបូឌា ដេលី

បទវិភាគ

អ្នក​នាំ​ពាក្យ​រដ្ឋាភិបាល លោក ផៃ ស៊ីផាន បាន​និយាយ​ថា ប្រធាន​តុលាការ​ក្រុង​ភ្នំពេញ​លោក អាំង មាលតី ត្រូវ​បាន​ដក​ចេញ​ពី​តំណែង​កាលពី​ល្ងាច​ថ្ងៃ​អង្គារ ដោយ​រង់ចាំ​ការ​ស៊ើប​អង្កេត​ក្នុង​រឿង​ពុករលួយ​ដ៏​រាលដាល​ក្នុង​តុលាការ​នេះ ចាប់តាំងពី​លោក​បាន​ធ្វើ​ជា​ប្រធាន​តុលាការ​ក្នុង​រយៈ​ពេល​មិន​ដល់​មួយ​ឆ្នាំ​ផង។

សេចក្តី​សម្រេច​នេះ​បាន​ធ្វើ​ឡើង​តែ​ប៉ុន្មាន​ម៉ោង​ប៉ុណ្ណោះ​ បន្ទាប់ពី​លោក​នាយក​រដ្ឋមន្ត្រី ហ៊ុន សែន បាន​រិះគន់​ធ្ងន់ៗ​លើ​តុលាការ​ដែល​បាន​​ដោះលែង​ឪពុក​ម្តាយរបស់​​ឧត្តមសេនីយ៍​រត់គេច​ខ្លួន ថោង សារ៉ាត់ ដែល​ជាប់​ចោទ​ពី​បទ​បាញ់​សម្លាប់​ឧកញ៉ា អឹុង​​​ ម៉េង​​​ជឺ កាលពី​ខែ​វិច្ឆិកា។

លោក ផៃ ស៊ីផាន បាន​និយាយ​​អំពី​ចៅក្រម មាលតី​ ថា “គាត់​ត្រូវ​ដក​ចេញ​ដើម្បី​ស៊ើប​អង្កេត។ មនុស្ស​មួយ​ចំនួន​បាន​ចូលរួម​អបអរ​បន្ទាប់ពី​ឮ​អំពី​ការ​ដក​តំណែង​ប្រធាន​តុលាការ​ក្រុង​ភ្នំពេញ ហើយ​អ្នក​ទាំង​នោះ​បាន​ប្រាប់​ខ្ញុំ​ថា មាន​អំពើ​ពុករលួយ​ច្រើន​នៅ​ទីនោះ”។

លោក ស៊ីផាន បាន​និយាយ​ថា ការ​ដក​ចៅក្រម មាលតី ចេញ​ពី​មុខ​តំណែង​គឺ​ត្រូវ​ធ្វើ​យូរ​មក​ហើយ ដោយសារ​លក្ខណៈ​គោលការណ៍​ច្បាប់​ប្លែក​របស់​ចៅក្រម​រូប​នេះ។

លោក​បាន​និយាយ​ថា “អ្វី​ដែល​គាត់​ធ្វើ អ្វី​ដែល​គាត់​បាន​ធ្វើ គឺ​យោង​ទៅតាម​ឆន្ទា​នុសិទ្ធិ មិន​មែន​យោងតាម​នីតិ​វិធី និង​មិន​យោងតាម​ច្បាប់​ទេ ឬ​អ្វី​ដែល​យើង​ហៅ​ថា​ស្មារតី​នៃ​ច្បាប់។ គ្រប់គ្នា​សប្បាយ​ណាស់​ឥឡូវ​នេះ”។ “ខ្ញុំ​ចង់​ឲ្យ​ករណី​ទាំងអស់​ក្រោម​ការ​ដឹកនាំ​របស់​គាត់​នឹង​ត្រូវ​ពិនិត្យ​ឡើង​វិញ ពីព្រោះ​ខ្ញុំ​បាន​ឮ​ថា មាន​ភាព​មិន​ប្រក្រតីនៅ​ទីនោះ។ ស្រង់​សម្តី​ខ្ញុំ​ទៅ”។

លោក ជួន ណារិន ស្នង​ការ​​រង​នគរ​បាល​រាជធានី​​បាន​មាន​ប្រសាសន៍​ថា លោក តាំង ស៊ុនឡាយ អនុប្រធាន​តុលាការ​ភ្នំពេញ នឹង​ទទួល​បាន​ការ​តែងតាំង​នៅ​ថ្ងៃ​ពុធ​នេះ​ឲ្យ​ជំនួស​លោក​ អាំង មាលតី។

ឧត្តមសេនីយ៍​ត្រី ជួន ណារិន បាន​និយាយ​ថា “ខ្ញុំ​នឹង​ចូល​រួម​ពិធី​ផ្ទេរ​តំណែង​ពី​លោក អាំង មៀលតី ទៅ​លោក តាំង ស៊ុនឡាយ នៅ​ម៉ោង​២​និង​៣០​នាទី​រសៀល នៅ​តុលាការ​ក្រុង​ភ្នំពេញ។ មន្ត្រី​តុលាការ​បាន​អញ្ជើញ​ខ្ញុំ​ចូលរួម​នៅ​រសៀល​នេះ”។

នៅ​ពេល​ទាក់​ទង​តាម​ទូរស័ព្ទ ចៅក្រម មាលតី មិន​ធ្វើ​អធិប្បាយ​អំពី​ការ​ដក​រូប​លោក​ចេញ​ទេ។ លោក សំ ប្រជាមានិត អគ្គលេខាធិការ​នៃ​ឧត្តម​ក្រុមប្រឹក្សា​នៃ​អង្គចៅក្រម ដែល​តែងតាំង មើល​ខុសត្រូវ និង ដាក់​វិន័យ​ចៅក្រម​របស់​ប្រទេស​កម្ពុជា ក៏​បាន​បដិសេធ​មិន​ធ្វើ​អត្ថាធិប្បាយ​ដែរ។

អ្នក​នាំពាក្យ​ក្រសួង​យុត្តិធម៌ លោក គឹម សន្តិភាព បាន​មាន​ប្រសាសន៍​ថា ក្រុមប្រឹក្សា​នេះ​កំពុង​ដោះស្រាយ​ជាមួយ​ ចៅក្រម មាលតី។ លោក សន្តិភាព បាន​និយាយ​ថា “ករណី​នេះ​កំពុង​ដំណើរ​ការ​ក្រោម​ការ​មើល​ខុសត្រូវ​របស់​ឧត្តម​ក្រុមប្រឹក្សា​នៃ​អង្គចៅក្រម”។

យ៉ាងណា​ក៏ដោយ លោក ស៊ីផាន បាន​លើក​ឡើង​ថា ការ​បណ្តេញ​ចៅក្រម មាលតី ដែល​កាលពី​ខែ​មេសា​ត្រូវ​បាន​ផ្ទេរ​មក​តុលាការ​ក្រុង​ភ្នំពេញ​ពី​តុលាការ​ខេត្ត​បន្ទាយ​មាន​ជ័យ ដែល​នៅ​ទីនោះ​លោក​ក៏​បាន​ប្រឈម​មុខ​នឹង​បទ​ពុករលួយ​ក្នុង​នាម​លោក​ជា​ប្រធាន​តុលាការ​ដែរ​នោះ ត្រូវ​បាន​បញ្ជា​ដោយ​លោក​នាយក​រដ្ឋមន្ត្រី។

លោក ស៊ីផាន បាន​និយាយ​ថា “តាំងពី​លោក​នាយក​រដ្ឋមន្ត្រី​បាន​លើក​បញ្ហា​នៃ​ភាព​មិន​ប្រក្រតី​ក្នុង​តុលាការ​ក្រុង​ភ្នំពេញ​មក វា​ក៏​បាន​កើត​ឡើង។ [លោក ហ៊ុន សែន] បាន​ស្នើ គាត់​បាន​លើក​រឿង​នេះ​ឡើង​ព្រឹក​នេះ គឺ​ឆន្ទានុសិទ្ធិ​និង​ឯករាជ្យ​ភាព​តុលាការ”។

ក្នុង​សុន្ទរកថា​កាលពី​ព្រឹក​ថ្ងៃ​អង្គារ ​លោក​នាយក​រដ្ឋមន្ត្រី​លោក​ ហ៊ុន សែន បាន​ស្តី​បន្ទោស​តុលាការ​ក្រុងភ្នំពេញ​​ដែល​បាន​​ដោះលែង​ម្តាយ​ឪពុក​របស់​ឧត្តមសេនីយ៍​ទោ សារ៉ាត់ ដែល​កំពុង​រត់​គេច​ខ្លួន ចំណែក​ឯ​អង្គរក្ស​បួន​នាក់​របស់​លោក​កំពុង​រង់ចាំ​ការកាត់​ក្តី​ក្នុង​ពន្ធនាគារ​ជំុ​វិញ​ការ​ពាក់ព័ន្ធ​​ក្នុង​ឃាតកម្ម​លោក​ឧកញ៉ា អុឹង ម៉េងជឺ។

ដោយ​សំដៅ​លើ​ឪពុក​ម្តាយ​និង​អង្គរក្ស​របស់​ឧត្តមសេនីយ៍​ទោ សារ៉ាត់ លោក ហ៊ុន សែន បាន​មាន​ប្រសាសន៍​ថា “រដ្ឋាភិបាល​ខំ​ធ្វើ​ការ​ដុតដៃ​ដុត​ជើង​ បញ្ជា​កម្លាំង​តាម​រក​ឃាតករ​សម្លាប់​លោក​ឧកញ៉ា អុឹង ម៉េងជឺ ហើយ​នៅ​ទី​បញ្ចប់​យើង​ចាប់​បាន​មួយ​សំបុក”។

លោក​បាន​មាន​ប្រសាសន៍​ថា “រាជរដ្ឋាភិបាល​​​ប្រឹង​​​ដុត​​​ដៃ​​​ដុត​​​ជើង បញ្ជា​​​កម្លាំង​​​ដើម្បី​​ ​តាម​​​រក​​​​​​ឃាតករ​​​សម្លាប់​​​ឧកញ៉ា អ៊ឹង ម៉េងជឺ ទី​បំផុត​​​យើង​​​ចាប់​បាន​​​មួយ​​​សំបុក​​​ ប៉ុន្តែ​​​រឿង​​​ដែល​​​មិន​​​យល់​​​ នៅត្រង់​​​ថា​ ​​ឲ្យ​​​ឪពុក​​​ម្តាយ​​​របស់​​​មេ​​​ក្លោង​​​ដែល​​​បញ្ជា​​​ឃាតករ​​​ ដែល​​​ ជាប់​​​ពិរុទ្ធភាពលើ​​​បទ​​​ចោទ​​​នេះ ឲ្យ​​​នៅ​​​ក្រៅ​​​ឃំុ។ ហើយ​​​នៅ​​​ក្រៅ​​​ឃំុ​​​នេះ​​​ បើ​​​ធ្វើ​​​ត្រូវ​​​នីតិ​​​វិធី​​​ មិន​​​អី​​​ទេ​​​  ប៉ុន្តែ​​​វា​​​ខុស​​​នីតិ​​​វិធី​​​ទៅ​​​ទៀត”។

ឪពុក​ម្តាយ​របស់​ ថោង សារ៉ាត់ ជាប់​ចោទ​​​​​​​ពី​​​បទ​​​កាន់​​​កាប់​​​អាវុធ​​​ខុស​​​ច្បាប់ មិន​យូរ​ប៉ុន្មាន​បន្ទាប់ពី​កូន​ប្រុស​របស់​ពួកគាត់​បាន​លាក់​ខ្លួន​កាលពី​ខែ​វិច្ឆិកា ហើយ​អ្នក​ទាំង​ពីរ​ត្រូវ​បាន​ចាប់​ខ្លួន​សាជា​ថ្មី​ ពេល​ព្យាយាម​គេច​ខ្លួន​ទៅ​ប្រទេស​វៀតណាម​តាម​ឡាន​ពេទ្យ​កាលពី​យប់​ថ្ងៃ​អាទិត្យ បន្ទាប់ពី​បាន​នៅ​ក្រៅ​ឃុំ​កាលពី​ដើម​ខែ​នេះ។

លោក ហ៊ុន សែន បាន​មាន​ប្រសាសន៍​ថា វា​ចម្លែក​ដែល​ការ​ប្តឹង​សុំ​នៅ​ក្រៅ​ឃុំ​របស់​ពួកគេ​ប្តឹង​ទៅ​តុលាការ​កំពូល​នៅ​ថ្ងៃ​ទី​២១​មករា ជា​ថ្ងៃ​ដែល​សាលា​ឧទ្ធរណ៍​តម្កល់​ការ​បដិសេធ​សុំ​នៅ​ក្រៅ​ឃុំ​របស់​តុលាការ​ក្រុង គឺបាន​​ដក​បណ្តឹង​នោះ​ភ្លាម​មកវិញ​នៅ​ថ្ងៃ​ទី​៥​កុម្ភៈ ដោយ​មិន​មាន​ហេតុ​ផល​ច្បាស់លាស់។

លោក ហ៊ុន សែន​ បាន​មាន​ប្រសាសន៍​ថា “ល្បឿន​នៃ​ការ​ដោះស្រាយ​បញ្ហា​នេះ​លឿន​ណាស់។ លឿន​រហូត​ធ្វើ​ឲ្យ​យើង​សង្ស័យ។ ខ្ញុំ​មិន​សុខ​ចិត្តទេ ខ្ញុំ​ស្នើ​ឧត្តម​ក្រុម​ប្រឹក្សា​នៃ​អង្គ​ចៅក្រម​ចាត់​វិធានការ​ជា​បន្ទាន់”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស