36 C
Phnom Penh

រដ្ឋាភិបាល​​​មាន​​​គម្រោង​​​សាងសង់​​​វិមាន​​​អនុស្សាវរីយ៍​​​រំឭក​​​ដល់ ​​​កេរ​​​ដំណែល​​​លោក ហ៊ុន​​​ សែន​​​

ដោយ ឌឹ ខេមបូឌា ដេលី

បទវិភាគ

យោង​តាម​បទ​បញ្ជា​របស់​រដ្ឋាភិបាល​ និង​មន្ត្រី​ក្នុង​ជួរ​គណៈកម្មការ​បាន​ឲ្យ​ដឹង​ថា លោក​នាយករដ្ឋមន្ត្រី ហ៊ុន សែន បាន​បង្កើត​គណៈកម្មការ​មួយ​ដែល​មាន​សមាជិក​២០​រូប​​​ដើម្បី​​​រៀប​​​ចំ​​​​​​គម្រោង​​​​សាង​សង់​វិមាន​​អនុស្សាវរីយ៍​មួយ​ក្នុង​ខណ្ឌ​ជ្រោយ​​​ចង្វា រាជធានី​ភ្នំពេញ ដើម្បី​ធានា​ថា កេរ​ដំណែល​របស់​លោក​ត្រូវ​បាន​ថែរក្សា​​​ទុក​​​​ច្រើន​ជំនាន់​ទៀត​។

យោង​តាម​លោក ជុច ភឿន រដ្ឋលេខាធិការ​ក្រសួង​វប្បធម៌ និង​វិចិត្រ​​​សិល្បៈ​បាន​ឲ្យ​ដឹង​ថា វិមាន​អនុស្សាវរីយ៍​គោល​នយោបាយ​ “ឈ្នះ​​​ឈ្នះ” របស់​លោក ហ៊ុន សែន ដែល​លោក​លើក​​​​​​សរសើរ​ពីការ​បញ្ចប់​សង្គ្រាមស៊ីវិលជាច្រើន​ឆ្នាំ​​បន្ទាប់ពី​ការ​ដួល​រលំ​របប​ខ្មែរ​ក្រហម​​​នោះ​​​ នឹង​ត្រូវ​សាង​សង់​លើ​ផ្ទៃ​​​ដី​​​ទំហំ​១៥ហិកតា ​ដែល​ជា​​​អំណោយ​​​របស់​​​លោក លី យ៉ុង​​​ផាត់ សមាជិក​ព្រឹទ្ធសភា​​​គណបក្ស​ប្រជាជន​កម្ពុជា​ ជា​ពាណិជ្ជករ​ម្នាក់​ក្នុង​ចំណោម​ពាណិជ្ជករ​មាន​ទ្រព្យ​ស្ដុក​ស្ដម្ភ​ក្នុង​ប្រទេស​កម្ពុជា​។

លោក ជុច ភឿន ដែល​ស្ថិត​​ក្នុង​​​ក្រុម​​​គណៈកម្មការ​​ដើម្បី​សិក្សា​​​និង​រៀបចំ​ការ​សាង​សង់​​វិមាន​អនុស្សាវរីយ៍​នេះ​បាន​មាន​ប្រសាសន៍​ថា “ក្រុម​ការ​ងារ​កំពុង​ធ្វើ​ផែន​ការ​មេ​នៅឡើយ​។ នឹង​មាន​វិមាន​​ដ៏​​​ធំ​​​មួយ​ស្ថិត​នៅ​ចំកណ្ដាល​​ ហើយ​​វិមាន​នេះ​ព័ទ្ធជុំវិញ​ដោយ​អគារ​ចំនួន​បួន។ យើង​ក៏​​​នឹង​សាង​សង់​សួន​ច្បារ​ផង​ដែរ”។

លោក ជុច ភឿន បាន​​​មាន​ប្រសាសន៍​ថា “វិមាន​នេះ​​​នឹង​​​​សាង​សង់​យ៉ាងតិច​​​កម្ពស់​​៥០​ម៉ែត្រ។ លោក​បាន​​​មាន​ប្រសាសន៍​ថា យើង​នឹង​សាង​សង់​វិមាន​អនុស្សាវរីយ៍​គោល​នយោបាយ​ឈ្នះ​​​ឈ្នះ​នេះ​​​នៅ​ចំកណ្ដាល ហើយ​នៅ​ជាន់​ក្រោម​នឹង​ជា​​​អគារ​ធម្មតា​ ដើម្បី​គាំទ្រ​​វិមាន​ដ៏​​​ធំ​​​នេះ ដែល​នឹង​មាន​កម្ពស់​៥០​ទៅ​​៦០​ម៉ែត្រ​”។

រដ្ឋលេខាធិការ​រូប​នេះ​បាន​មាន​ប្រសាសន៍​ថា នៅ​តាម​ជញ្ជាំង​វិមាន​នឹង​​​មាន​​​ចម្លាក់​​​​ពណ៌នា​អំពី​ការ​វិវឌ្ឍ​របស់​ប្រទេស​កម្ពុជា​ក្រោម​ការ​ដឹកនាំ​របស់​លោក ហ៊ុន សែន ក្នុង​រយៈពេល​៣ទសវត្សរ៍​ចុងក្រោយ​ រួម​មាន​ព្រឹត្តិ​ការ​ណ៍នៃ​​​ការ​បង្កើត​រណសិរ្ស​សាមគ្គី​​​សង្គ្រោះ​ជាតិ​កម្ពុជា ​២​ ធ្នូ ១៩៧៨ និង​ការ​ដួល​រលំ​របប​ខ្មែរ​ក្រហម ​៧ មករា ១៩៧៩ ដែល​​​បន្ទាប់ពី​នោះ​​​​​វៀត​​​ណាម​បាន​លើក​បន្តុប​រដ្ឋាភិបាល​​ដែល​​​រួម​មាន​លោក ហ៊ុន សែន ជា​រដ្ឋមន្ត្រី​ការ​បរទេស​។

លោក ជុច ភឿន បាន​​​មាន​​​ប្រសាសន៍​​​ថា ប៉ុន្តែ​វិមាន​នេះ​ជា​ “សំខាន់​ពណ៌នាអំពី​ថា តើ​​​គោល​​​នយោបាយ​ឈ្នះ​​​ឈ្នះ​របស់​លោក​នាយក​រដ្ឋ​​​មន្ត្រី ហ៊ុន សែន ត្រូវ​បាន​​អនុវត្ត​​​ដូច​​​ម្តេច​​​​នៅ​ក្នុង​រាជ​​​ធានី​ភ្នំពេញ តាម​បណ្ដា​ខេត្ត​ និង​តំបន់​ដែល​មាន​វិវាទ​”។

លោក ជុច ភឿន បាន​មាន​ប្រសាសន៍​ថា អគារ​ដែល​ព័ទ្ធជុំវិញ​វិមាន​ដ៏​​​ធំ​​​នេះ​នឹង​​ជា​​​កន្លែង​​​​សម្រាប់​​​តម្កល់​​​​ឯកសារ​​ប្រវត្តិសាស្ត្រ​ រូប​ថត និង​ខ្សែអាត់​វីដេអូ ដោយ​មាន​កន្លែង​សម្រាប់​ស្រាវ​​​ជ្រាវ និង​ភោជនីយដ្ឋាន​ផង​ដែរ។ លោក​បាន​បន្ថែម​ថា ការ​សាង​សង់​រំពឹង​ថា នឹង​បញ្ចប់​ក្នុង​រយៈ​​​ពេល​​​ពីរ​ឆ្នាំ​។

​យោង​តាម​លោក ទៀ បាញ់ រដ្ឋមន្ត្រី​ក្រសួង​ការ​ពារ​ជាតិ ដែល​ដឹកនាំ​គណៈកម្មការ​សាង​សង់​វិមាន​អនុស្សាវរីយ៍​នេះ​បាន​ឲ្យ​ដឹង​ថា ​បើ​​​ទោះ​ជា​​​ការ​ចំណាយ​ទៅ​លើ​គម្រោង​នេះ​មិន​ទាន់​ត្រូវ​បាន​កំណត់​​​ក៏ដោយ ក៏​ទឹក​ប្រាក់​ភាគ​ច្រើន​​នឹង​​​បាន​មកពី​បុគ្គល​ឯកជន​ដែរ​។

ឧត្ដម​សេនីយ៍​ ទៀ បាញ់ បាន​​មាន​ប្រសាសន៍​​ថា ” ខ្ញុំ​សូម​បញ្ជាក់​ឲ្យ​បាន​ច្បាស់​ថា យើង​នឹង​ប្រើ​ប្រាស់​ថវិកា​របស់​រដ្ឋាភិបាល​មួយ​ភាគ​តូច​ប៉ុណ្ណោះ​​សម្រាប់​ការ​សាង​សង់​វិមាន​អនុស្សា​​​វរីយ៍​គោល​នយោបាយ​ឈ្នះ​​​ឈ្នះ​នេះ”។

លោក​បាន​​​បន្ថែម​ថា “យើង​អំពាវ​នាវ​ដល់​សប្បុរស​ជន​ ​ឲ្យ​​ជួយ​ចូល​រួម​ចំណែក​ក្នុង​ការ​ចំណាយ​នេះ​ ហើយ​ខ្ញុំ​ជឿ​ថា អ្នក​ដែល​ស្រឡាញ់​…​ថែរក្សា​ព្រឹត្តិការណ៍​​​ប្រវត្តិសាស្ត្រ​ និង​ភាព​ជា​អ្នក​ដឹកនាំ​ នឹង​ជួយ​​រួម​ចំណែក​ជា​​​មិន​ខាន​”។

បទបញ្ជា​កាលពី​ថ្ងៃ​​​ទី​២២ ខែ​ធ្នូ​ របស់​រដ្ឋាភិបាល​ដោយការ​​​បង្កើត​គណៈកម្មការ​ដែល​មាន​សមា​​​ជិក​២០​រូប​​​ បាន​​​ហៅ​​​ការ​សាង​សង់​វិមាន​អនុស្សាវរីយ៍​នេះ​ថា​​​ជា​​​”ការ​ចាំបាច់” ណាស់​​​។

ឧត្តម​​​សេនីយ៍​​​ ទៀ បាញ់ ​បាន​​​មាន​ប្រសាសន៍​ថា “យើង​នឹង​សរសេរ​ឈ្មោះថា តើ​​​មាន​​​​មនុស្ស​ប៉ុន្មាន​​​នាក់​​​បាន​​​បូជា​ជីវិត​របស់​ខ្លួន…ដើម្បី​បញ្ចប់​សង្គ្រាម​ស៊ីវិល​ ហើយ​នាំ​មក​នូវ​សន្តិភាព ស្ថិរភាព និង​ការ​អភិវឌ្ឍ​​សព្វ​ថ្ងៃ​នេះ”​៕ សារុន​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស