កាលពីម្សិលមិញ មន្ត្រីក្រសួងការងារទទួលបន្ទុកផ្នែកដួលសន្លប់នៅរោងចក្រកាត់ដេរ បានប្រកាសការបើកឡើងវិញនូវរោងចក្រមួយក្នុងខេត្តស្វាយរៀងជាទីដែលកម្មករចំនួន១០០នាក់បានដួលសន្លប់ក្នុងរយៈពេលប្រហែលមួយសប្តាហ៍កន្លងមកនេះដោយសារក្លិនសារធាតុគីមី។ រោងចក្រនេះត្រូវបានអនុញ្ញាតឲ្យបើកឡើងវិញ បន្ទាប់ពីបានកែលម្អប្រព័ន្ធខ្យល់ចេញចូលរួច ប៉ុន្តែ ក្រោយពេលបើកឡើងវិញ មានកម្មការិនីបីនាក់បន្ថែមទៀតបានដួលសន្លប់។
រោងចក្រ You Li International គ្រប់គ្រងដោយជនជាតិចិនតៃវ៉ាន់ត្រូវបានបញ្ជាឲ្យបិទបន្ទាប់ពីកម្មករបានដួលសន្លប់ជាច្រើននាក់កាលពីថ្ងៃសុក្រ និងថ្ងៃច័ន្ទ ប៉ុន្តែ ត្រូវបានអនុញ្ញាតឲ្យបើកឡើងវិញកាលពីម្សិលមិញ ដោយសាររោងចក្រនេះបានកែលម្អប្រព័ន្ធខ្យល់ចេញចូលឲ្យបានប្រសើរជាងមុន។
លោក ពុំ សុគន្ធា តំណាងកម្មកររោងចក្រកាត់ដេរមកពីសម្ព័ន្ធសហជីពចលនាកម្ពុជាបានលើកឡើងថា រោងចក្រនេះបានដាក់កង្ហារចំនួន១០បន្ថែមទៀត ហើយថា អ្នកគ្រប់គ្រងរោងចក្របានធានាជួសជុលបង្គន់ឡើងវិញ ហើយប្រភពនៃក្លិនសារធាតុគីមីក៏ត្រូវបានបោសសម្អាតតាមការសន្យាផងដែរ។
លោក សុគន្ធា បាននិយាយតាមទូរស័ព្ទកាលពីម្សិលមិញថា “នៅព្រឹកមិញនេះមានកម្មការិនីចំនួនបីនាក់បន្ថែមទៀតបានដួលសន្លប់ ប៉ុន្តែ ពួកគេត្រូវបានបញ្ជូនត្រឡប់ទៅមន្ទីរពេទ្យវិញ។ ថ្ងៃេនះស្ថានភាពគឺប្រសើរជាងពីមុន”។
លោកបាននិយាយបន្ថែមទៀតថា “យើងបានប្រាប់រោងចក្រឲ្យដឹងពីបញ្ហាមួយចំនួនពីមុនមក ប៉ុន្តែ គេមិនដែលស្តាប់យើងឡើយ។ ប្រសិនបើពួកគេបានធ្វើតាម ម្លេ៉ះប្រហែលជាមិនមានបញ្ហាកើតឡើងដូច[ឥឡូវ]ឡើយ”។
លោក ប៉ុក វណ្ណថាន ប្រធានគណៈកម្មការស្រាវជ្រាវ និងទប់ស្កាត់ការដួលសន្លប់នៅក្រសួងការងារ បានលើកឡើងថា ការថយចុះនៃចំនួនកម្មការិនីដែលដួលសន្លប់ដោយសារក្លិនសារធាតុគីមីកាលពីម្សិលមិញ គឺជាលទ្ធផលដែលបានមកពីការកែលម្អប្រព័ន្ធខ្យល់ចេញចូល។
លោកបានមានប្រសាសន៍ថា “នៅថ្ងៃនេះបញ្ហាភាគច្រើនត្រូវបានដោះស្រាយហើយ” ។ លោកបានបន្ថែមថា លោកជឿជាក់ថា រោងចក្រនៅក្រុងបាវីតនេះគួរតែត្រូវបានផ្តល់សិទ្ធិសេរីភាព។ លោកបានមានប្រសាសន៍បន្តថា “តំបន់នេះកំពុងអភិវឌ្ឍនៅឡើយ ហេតុដូច្នេះសុវត្ថិភាពរោងចក្រក៏នៅមានកម្រិតនៅឡើយដែរ”។
លោកបានមានប្រសាសន៍បន្តទៀតថា “យើងបានចេញបទបញ្ជាឲ្យរោងចក្រដាក់កង្ហារបន្ថែមទៀត ពង្រីកបង្អួចរោងចក្រឲ្យបានធំជាងមុន ដើម្បីឲ្យខ្យល់ចេញចូលបានច្រើន ហើយជួសជុលបង្គន់ដោយដាក់កង្ហារបឺតខ្យល់។ យើងបានប្រាប់សមាជិកសហជីពថា ប្រសិនបើរោងចក្រមិនដោះស្រាយបញ្ហាទាំងនេះទេ សូមជូនដំណឹងមកយើង”។
មន្ត្រីក្រសួងការងាររូបនេះបានលើកឡើងថា កម្មការិនីដែលដួលសន្លប់អាចឈប់ សម្រាកមួយសប្តាហ៍ដោយគ្មានការកាត់ប្រាក់ខែ ហើយគេរំពឹងថា ពួកគេនឹងអាចត្រឡប់មកធ្វើការវិញនៅថ្ងៃច័ន្ទ។ លោកបានមានប្រសាសន៍ថា “កម្មករដែលដួលសន្លប់នឹងទទួលបានការសម្រាកដោយមិនត្រូវបានកាត់ប្រាក់ខែ ព្រោះថាពួកគេដួលសន្លប់ពេលបំពេញការងារ”។ តំណាងរោងចក្របានបដិសេធមិនធ្វើអត្ថាធិប្បាយឡើយ៕ស៊ុយឈាង