កាលពីម្សិលមិញ បុរសពីរនាក់បងប្អូនប្រុសបានចូលខ្លួនទៅសាលាដំបូងខេត្តកំពត ហើយត្រូវបានចោទប្រកាន់ពីបទរារាំងមន្ត្រីសាធារណៈ បន្ទាប់ពីពួកគេបានបើករថយន្តវែនទម្លុះរបាំងប៉ុស្តិ៍ត្រួតពិនិត្យរបស់នគរបាលចរាចរនៅក្នុងស្រុកឈូក ខេត្តកំពត ហើយបន្ទាប់មកថែមទាំងបានវាយនគរបាលដែលផាកពិន័យពួកគេទៀតផង។
ចៅក្រមស៊ើបសួរ ហង្ស សុគន្ធវឌ្ឍនា បានមានប្រសាសន៍ថា សេ តូ អាយុ២៩ឆ្នាំ និងប្អូនប្រុសឈ្មោះ សេ យ៉ា អាយុ២៦ឆ្នាំ ត្រូវបានបញ្ជូនខ្លួនទៅកាន់ពន្ធនាគារខេត្ត បន្ទាប់ពីត្រូវបានចោទប្រកាន់។
លោកបានមានប្រសាសន៍ថា “បន្ទាប់ពីសាកសួរពួកគេនៅរសៀលនេះរួចយើងបានសម្រេចចោទប្រកាន់ពួកគេពីបទរារាំងមន្ត្រីសាធារណៈតាមមាត្រា៥០៣នៃក្រមព្រហ្មទណ្ឌ “។
យោងតាមមាត្រានេះ បងប្អូនទាំងពីរនាក់នេះត្រូវប្រឈមការជាប់ពន្ធនាគារពីមួយខែទៅបីខែ និងពិន័យជាប្រាក់ចំនួន៥០០.០០០រៀល (ប្រហែល១២៥ដុល្លារ) ប្រសិនបើតុលាការសម្រេចឲ្យជាប់ទោសតាមការចោទប្រកាន់នេះ។
ទោះបីជានគរបាលមិនកាន់ជើងខាងណាក្នុងបញ្ហានេះក្តី ក៏លោក ម៉ៅ ចាន់ម៉ាធុរិទ្ធ ស្នងការរងខេត្តកំពត បានមានប្រសាសន៍ថា លោកសប្បាយចិត្តដែលបងប្អូនប្រុសពីរនាក់នេះជាប់ពន្ធនាគារ។
លោកបានមានប្រសាសន៍បន្ថែមថា “ជនសង្ស័យត្រូវតែជាប់គុក ពីព្រោះពួកគេវ៉ៃមន្ត្រីសាធារណៈ។ យើងមិនកាន់ជើងមន្ត្រីរបស់យើងទេ យើងដោះស្រាយករណីនេះតាមផ្លូវច្បាប់ ហើយបើមន្ត្រីនគរបាលរបស់យើងប្រព្រឹត្តបទល្មើស ពួកគេក៏ត្រូវប្រឈមចំពោះមុខច្បាប់ដែរ”៕សុខុម