មន្ត្រីរដ្ឋាភិបាលមូលដ្ឋានក្នុងខេត្តរតនគិរីបានរារាំងបុគ្គលិកអង្គការសហប្រជាជាតិមួយក្រុមនៅក្នុងតំបន់នេះមិនឲ្យព្យាយាមទៅជួបអ្នកស្វែងរកសិទ្ធិជ្រកកោនជនជាតិវៀតណាមដែលលាក់ខ្លួនក្នុងខេត្តេនះ ដែលចំនួនរបស់ពួកគេបានកើនឡើងក្នុងសប្តាហ៍នេះ ហើយឥឡូវនេះបានឡើងដល់៣៨នាក់ហើយ។
យោងតាមមន្ត្រីមូលដ្ឋាននិងអង្គការសិទ្ធិមនុស្សអាដហុកបានឲ្យដឹងថា ជនជាតិដើមភាគតិចម៉ុងតាញ៉ាប្រាំមួយនាក់ទៀតបានឆ្លងព្រំដែនចូលខេត្តភាគឦសាននេះកាលពីថ្ងៃអង្គារ ពីអ្វីដែលពួកគេអះអាងថា ជាការធ្វើទុក្ខបុកម្នេញផ្នែកនយោបាយក្នុងប្រទេសវៀតណាមដោយសារការគោរពសាសនារបស់ខ្លួន ហើយបានសហការជាមួយក្រុមតស៊ូមតិជនជាតិដើមភាគតិចម៉ុងតាញ៉ា ដែលមានមូលដ្ឋាននៅសហរដ្ឋអាមេរិក។
លោក គង់ ស្រុន អភិបាលស្រុកលំផាត់បានមានប្រសាសន៍ថា “ខ្ញុំទទួលបានព័ត៌មានពីការមកដល់របស់ជនទាំងនេះនៅក្នុងស្រុកលំផាត់ ហើយខ្ញុំបានបញ្ជាឲ្យកម្លាំងរបស់ខ្ញុំស្វែងរកពួកគេរួចហើយ”។
បុគ្គលិកអង្គការសហប្រជាជាតិមួយក្រុមមានគ្នាបីនាក់ដែលបានមកដល់ខេត្តនេះកាលពីថ្ងៃអាទិត្យ ដោយសង្ឃឹមថា នឹងជួបអ្នកស្វែងរកសិទ្ធិជ្រកកោនទាំង៣៨នាក់ ហើយនាំពួកគេដោយសុវត្ថិភាពទៅរាជធានីភ្នំពេញដើម្បីឲ្យពួកគេដំណើរការដាក់ពាក្យសុំសិទ្ធិជ្រកកោននោះ ត្រូវបានបដិសណ្ឋារកិច្ចពីសំណាក់មន្ត្រីមូលដ្ឋាន។
លោក ជួប វណ្ណារក្ស អធិការនគរបាលស្រុកអូរយ៉ាដាវ បានមានប្រសាសន៍ថា “ខ្ញុំបានរារាំងមន្ត្រីរបស់អង្គការសហប្រជាជាតិមិនឲ្យធ្វើការសាកសួរ ពីព្រោះយើងឃើញថា ពួកគេបានធ្វើដំណើរគ្រប់ទីកន្លែងនៅក្នុងទឹកដីរបស់យើង”។
លោកបានបន្ថែមថា “ពួកគេមិនត្រូវបានអនុញ្ញាតឲ្យធ្វើដំណើរដូចដែលពួកគេចង់នៅក្នុងទឹកដីនេះក្រោមសមត្ថកិច្ចរបស់ខ្ញុំឡើយ ពីព្រោះពួកគេមិនមានលិខិតអនុញ្ញាតពីអាជ្ញាធរខេត្តនិងក្រសួងមហាផ្ទៃ”។
លោកបានមានប្រសាសន៍ថា “ខ្ញុំបានប្រាប់ពួកគេថា ពួកគេត្រូវគោរពច្បាប់ខ្មែរផង មុននឹងធ្វើអ្វីៗ ហើយពួកគេត្រូវគោរពអាជ្ញាធរមូលដ្ឋាន ជាពិសេសលោក ថោង សាវុន ជា
អភិបាលខេត្ត”។
ទោះជាយ៉ាងណា ចាប់តាំងពីជនជាតិដើមភាគតិចម៉ុងតាញ៉ា បានមកដល់ក្នុងខេត្តនេះកាលពីខែវិច្ឆិកាមក បណ្តាលឲ្យអង្គការសហប្រជាជាតិប្រឹងប្រែងជួយពួកគេធ្វើយ៉ាងណាឲ្យទទួលបានឋានៈជាជនភៀសខ្លួន ហើយលោក ថោង សាវុន បានប្រកាន់ជំហរមឺុងម៉ាត់មិនសហការឡើយ។
លោកស្រី វ៉ាន់ ហៀលី តំណាងប្រចាំប្រទេសនៃការិយាល័យឧត្តមស្នងការអង្គការប្រជាជាតិទទួលបន្ទុកសិទ្ធិមនុស្សបានមានប្រសាសន៍ថា ឥឡូវនេះក្រុមរបស់លោកស្រីត្រូវបានរារាំងក្នុងខេត្តរតនគិរី។
លោកស្រី លី បានមានប្រសាសន៍ថា “បច្ចុប្បន្ននេះបេសកកម្មរបស់ឧត្តមស្នងការសហប្រជាជាតិទទួលបន្ទុកសិទ្ធិមនុស្សក្នុងខេត្តរតនគិរីត្រូវនគរបាលខេត្តរារាំងមិនឲ្យធ្វើដំណើរនៅក្នុងខេត្តនេះ លើកលែងតែការចាកចេញ។ លោកអភិបាលខេត្តមិនបានឆ្លើយតបចំពោះការប្រឹងប្រែងរបស់យើងក្នុងការទាក់ទងរូបលោកឡើយ”។
លោកស្រីបានបន្ថែមថា “យើងនឹងបន្តទំនាក់ទំនងទូលំទូលាយជាមួយក្រសួងមហាផ្ទៃ
និងអាជ្ញាធរខេត្តដើម្បីស្វែងរកដំណោះស្រាយឆាប់ៗតាមដែលអាចធ្វើទៅបាន”។
យោងតាមលោកស្រី វីវៀន តាន មន្ត្រីទំនាក់ទំនងប្រចាំតំបន់នៃឧត្តមស្នងការសហប្រជាជាតិទទួលបន្ទុកជនភៀសខ្លួនបានឲ្យដឹងថា ក្នុងចំណោមជនជាតិដើមភាគតិចម៉ុងតាញ៉ាទាំងនោះ ជនជាតិភាគដើមភាគតិចមកពីតំបន់ខ្ពស់រាបកណ្តាលប្រទេសវៀតណាមដែលបានចូលមកប្រទេសកម្ពុជា ចាប់តាំងពីថ្ងៃទី២៣ ខែវិច្ឆិកា បានធ្វើដំណើរមកកាន់រាជធានីភ្នំពេញដើម្បីឲ្យពួកគេដាក់ពាក្យសុំឋានៈជាជនភៀសខ្លួននៅក្រសួងមហាផ្ទៃ។
លោកស្រី តាន បានមានប្រសាសន៍ថា “នៅក្នុងរាជធានីភ្នំពេញ ជនជាតិភាគតិចម៉ុងតាញ៉ា១៣នាក់កំពុងដាក់ពាក្យសុំឋានៈជាជនភៀសខ្លួនជាមួយនាយកដ្ឋានជនភៀសខ្លួន ហើយ១០នាក់ទៀតកំពុងរង់ចាំការចុះឈ្មោះជាអ្នកស្វែងរកសិទ្ធិជ្រកកោន”។
ទន្ទឹមនឹងនោះ ដែរអ្នកស្វែងរកសិទ្ធិជ្រកកោនទាំង៣៨នាក់ក្នុងខេត្តរតនគិរីកំពុងព្យាយាមរត់គេចពីអាជ្ញាធរដែលមានបំណងនិរទេសពួកគេទៅប្រទេសវៀតណាមវិញ។
អ្នកភូមិជនជាតិដើមភាគតិចចារ៉ាយម្នាក់ក្នុងស្រុកអណ្តូងមាសដែលសុំមិនបញ្ចេញឈ្មោះដោយខ្លាចការរករឿងពីសំណាក់អាជ្ញាធរបាននិយាយថា គាត់បានជួបអ្នកមកដល់ថ្មីម្នាក់ក្នុងចំណោមអ្នកមកដល់ថ្មីទាំងនោះ នៅពេលគាត់ទៅដកដំឡូងមីកាលពីព្រឹកថ្ងៃពុធ។
គាត់បាននិយាយថា ខ្ញុំមិនចង់ឲ្យបុរសរូបនេះរស់នៅជិតផ្ទះរបស់ខ្ញុំទេ ពីព្រោះខ្ញុំខ្លាចអាជ្ញាធរព្យាយាមស្វែងរកចាប់ខ្លួនគាត់”។ គាត់បានបន្ថែមថា “ប៉ុន្តែ ខ្ញុំបានឲ្យឆ្នាំងគាត់មួយ និងអង្ករពីរបីកំប៉ុង ដើម្បីឲ្យគាត់ដាំបាយហូបនៅក្នុងព្រៃ”៕សារុន