32 C
Phnom Penh

ភាព​ស្ទាក់​ស្ទើរ​របស់​រដ្ឋាភិបាល​​ក្នុង​ការ​និរទេស​សកម្មជន​​​​អង្គការ​មាតា​ធម្មជាតិ​

ដោយ ឌឹ ខេមបូឌា ដេលី

បទវិភាគ

មន្ត្រី​អន្តោប្រវេសន៍​ម្នាក់​បាន​និយាយ​​កាលពី​ម្សិលមិញ​ថា នាយកដ្ឋាន​របស់​លោក​​រង់ចាំ​បទ​បញ្ជា​ពី​ប្រធាន​នាយកដ្ឋាន​របស់​ខ្លួន​មុន​ឈាន​ដល់​ការ​បណ្ដេញ​សកម្មជន​បរិស្ថាន​លោក អាឡិច ហ្គន់ហ្សាឡេស ដាវីដ​សុន(Alex Gonzalez-Davidson) ដែល​ទិដ្ឋាការ​របស់​លោក​​​ត្រូវ​រដ្ឋាភិបាល​បដិសេធ​មិន​បន្ត​ឲ្យ​ទេ បន្ទាប់ពី​វា​បាន​​អស់​សុពលភាព​កាលពី​ថ្ងៃសុក្រ។

រដ្ឋាភិបាល​​និយាយ​ថា ខ្លួន​មិន​​បន្ត​ទិដ្ឋាការ​របស់​ជនជាតិ​អេស្ប៉ាញ​រូប​នេះ​ទេ ព្រោះ​គាត់​និង​អង្គការ​មាតា​ធម្មជាតិ​​របស់​គាត់​ បាន​ធ្វើការ​រាំង​ផ្លូវ​ខុស​ច្បាប់​កាលពី​ខែ​កញ្ញា ដោយ​បាន​រារាំង​​ជា​បណ្ដោះ​អាសន្ន​មិន​ឲ្យ​ក្បួន​រថយន្ត​រដ្ឋាភិបាល​​ធ្វើ​ដំណើរ​ចូល​តំបន់​អារ៉ែង ក្នុង​ខេត្ត​កោះ​កុង ជា​ទីតាំង​ទំនប់​វារីអគ្គិសនី​ដែល​ក្រុម​នេះ​បាន​ប្រឆាំង​។

លោក​ ហ្គន់ហ្សាឡេស ដាវីដ​សុន និង​អ្នក​គាំទ្រ​របស់​លោក​សង្ស័យ​ថា រដ្ឋាភិបាល​ចង់​ឲ្យ​គាត់​ចេញពី​ប្រទេស​នេះ​ ដោយ​សារ​គាត់​បាន​ជួយ​ធ្វើ​​ជាប់​គាំង​​គម្រោង​នេះ​ ដែល​មាន​ការ​គាំទ្រ​ពី​សមាជិក​ព្រឹទ្ធសភា​គណបក្ស​កាន់​អំណាច​ម្នាក់​ និង​មាន​ការ​គាំទ្រ​ជា​សាធារណៈ​​ពី​លោក​នាយករដ្ឋមន្ត្រី។

កាលពី​ថ្ងៃ​សុក្រ​ ជា​ថ្ងៃដែល​ទិដ្ឋាការ​របស់​លោក​អស់​សុពលភាព​ អគ្គនាយកដ្ឋាន​អន្តោ​ប្រវេសន៍​ក្រសួង​មហាផ្ទៃ​បាន​ផ្ញើ​លិខិត​​មួយ​ច្បាប់​ទៅ​លោក ហ្គន់ហ្សាឡេស ដាវីដ​សុន ដោយ​ប្រាប់​គាត់​ថា សំណើ​សុំស្នាក់​នៅ​បន្ត​របស់​លោក​ត្រូវ​បាន​បដិសេធ​។

នៅ​ពេល​ទាក់​ទង​កាលពី​ម្សិលមិញ លោក អ៊ុក ហៃសិលា ប្រធាន​ផ្នែក​ស៊ើប​អង្កេត​​នៅ​នាយកដ្ឋាន​អន្តោ​ប្រវេសន៍​ក្រសួង​មហាផ្ទៃ បាន​មាន​ប្រសាសន៍​ថា រដ្ឋាភិបាល​​មិន​ទាន់​បាន​ចាត់​វិធានការ​និរទេស​លោក ហ្គន់ហ្សាឡេស ដាវីដ​សុន ដែល​បាន​ប្ដេជ្ញា​នឹង​មិន​ចាក​ចេញ​ពី​ប្រទេស​កម្ពុជា​ដោយ​ស្ម័គ្រ​ចិត្ត​ឡើយ។

លោក​បាន​មាន​ប្រសាសន៍​ថា “យើង​នឹង​ហៅ​ ហើយ​ណែនាំ​គាត់​ឲ្យ​ចាក​ចេញ​។ យើង​កំពុង​រង់ចាំ​បញ្ជា​ពី​អគ្គនាយក​នៃ​អគ្គ​នាយកដ្ឋាន​​អន្តោប្រវេសន៍​ [សុខ ផល​] បន្ទាប់​មក​យើង​នឹង​អនុវត្ត”។

លោក​ឧត្ដមសេនីយ៍ សុខ ផល មិន​អាច​ទាក់​ទង​បាន​ទេ​កាលពី​ម្សិលមិញ។

លោក​ ហ្គន់ហ្សាឡេស ដាវីដ​សុន ដែល​ស្ថិត​នៅ​ក្នុង​ប្រទេស​កម្ពុជា​នៅ​ឡើយ​ បាន​និយាយ​ថា លោក​បាន​ទទួល​លិខិត​​​ដែល​ប្រាប់​លោក​ថា ទិដ្ឋាការ​របស់​លោក​គេ​មិន​បន្ត​ឲ្យ​ទេ ហើយ​ថា អាជ្ញាធរ​​មិន​ទាន់​ព្យាយាម​និរទេស​រូប​លោក​នៅ​ឡើយ​។ លោក​បាន​និយាយ​ថា លោក​ទទួល​បាន​ការ​ធានា​អះអាង​ដោយ​ក្រុម​អ្នក​ជំនាញ​ច្បាប់​ថា លោក​អាច​បន្ត​ស្នាក់​នៅ​ដោយ​ស្រប​ច្បាប់​ក្នុង​ប្រទេស​នេះ​រយៈ​ពេល​៣៧​ថ្ងៃ​ទៀត ហើយ​នឹង​ប្រើ​ពេល​វេលា​នេះ​​ដើម្បី​សម្រេច​ជំហាន​បន្ទាប់​របស់​ខ្លួន​។

ក្រសួង​មហាផ្ទៃ​​និយាយ​ថា លោក​ ហ្គន់ហ្សាឡេស ដាវីដ​សុន នឹង​ទទួល​បាន​ការ​អនុញ្ញាត​ឲ្យ​ដាក់​ពាក្យ​សុំ​ទិដ្ឋាការ​ថ្មី​ ប្រសិន​បើ​គាត់​ចាក​ចេញ​ដោយ​ស្ម័គ្រ​ចិត្ត​ ប៉ុន្តែ​ជនជាតិ​អេស្បា៉ញ​រូប​នេះ​នៅ​តែ​មាន​មន្ទិល​សង្ស័យ។

លោក​ ហ្គន់ហ្សាឡេស ដាវីដ​សុន បាន​និយាយ​ថា “ខ្ញុំ​ព្រម​សម្រប​សម្រួល​ ហើយ​ចាក​ចេញ​ពី​ប្រទេស​នេះ ប៉ុន្តែ​ប្រសិន​បើ​មាន​​ការ​ធានា​ជាក់​ច្បាស់​ ដូចជា​ថា​ទិដ្ឋាការ​ថ្មី​នឹង​ត្រូវ​ចេញ​ឲ្យ​​ដោយ​មាន​សុពលភាព​ចាប់​ផ្ដើម​ក្នុង​ពេល​ពីរ​បី​សប្ដាហ៍​គិតពី​ពេល​ឥឡូវ​នេះ​ទៅ​ ជាង​ការ​ធានា​ដែល​បង្ហាញ​ក្នុង​លិខិត​​របស់​ក្រសួង​ដែល​ផ្ដល់​ឲ្យ​លោក​តែ​ប៉ុណ្ណោះ”។

​ពេល​ត្រូវ​គេ​សួរ​ថា តើ​រដ្ឋាភិបាល​​មាន​ផែន​ការ​​និរទេស​លោក ហ្គន់ហ្សាឡេស ដាវីដ​សុន ឬយ៉ាង​ណា​ លោក ខៀវ សុភ័គ អ្នក​នាំពាក្យ​ក្រសួង​មហាផ្ទៃ​បាន​​ឆ្លើយ​ថា “ចាំ​មើល​នឹង​ឃើញ​ហើយ​”។ លោក​មិន​បាន​អធិប្បាយ​ច្រើន​ទេ​៕និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស