33 C
Phnom Penh

បុរស​ជនជាតិ​ដើមភាគតិច​ម្នាក់​​​រត់​គេច​ខ្លួន​បន្ទាប់ពី​ចាក់​គេ​ឲ្យ​របួស​ពីរ​នាក់​នៅ​មន្ទីរពេទ្យ​

ដោយ ឌឹ ខេមបូឌា ដេលី

បទវិភាគ

នគរ​បាល​​ និង​សាក្សី​បាន​ឲ្យ​ដឹង​កាលពី​ម្សិលមិញ​ថា បុរស​ម្នាក់​​ដែល​មកដេក​កំដរ​​ប្អូន​ប្រុស​​របស់​ខ្លួន​នៅ​ក្នុង​មន្ទីរ​ពេទ្យ​មិត្តភាព​ខ្មែរ-សូវៀត ក្នុង​រាជធានី​ភ្នំពេញ បាន​ចាក​មនុស្ស​ពីរ​នាក់​​នៅ​ក្នុង​បន្ទប់​ផ្នែក​ក្រពះពោះវៀន កាលពី​រសៀល​ថ្ងៃសុក្រ មុន​ពេល​គេច​ខ្លួន​ចេញពី​អគារ​មន្ទីរ​ពេទ្យ​នេះ​។

យោង​តាម​លោក ផន អូន នាយ​​ប៉ុស្តិ៍​​សង្កាត់​ទំនប់ទឹក ខណ្ឌចំការមន បាន​ឲ្យ​ដឹង​ថា បុរស​ម្នាក់​ឈ្មោះ រចំ យំ អាយុ​៣៥​ឆ្នាំ បាន​នៅ​ក្នុង​បន្ទប់​របស់​​ប្អូន​ប្រុស​ខ្លួន​​មួយ​ភ្លែត​​នៅ​វេលា​ម៉ោង​ប្រហែល​១២និង​៣០​នាទី​​រសៀល​​ នៅពេល​ជននេះ​បាន​ដក​កាំបិត​ពី​កាតាប​របស់​ខ្លួន​ភ្លាមៗ​ ហើយ​ចាក់​បុរស​ម្នាក់​ដែល​ជិត​ជា​សះស្បើយ​ពី​របួស​ដោយ​សារ​គ្រោះ​ថ្នាក់​ចរាចរណ៍​ និង​ស្ត្រី​​វ័យ​ក្មេង​ម្នាក់​ទៀត​ ដោយ​ធ្វើ​ឲ្យ​ពួកគេ​ទាំង​ពីរ​នាក់​នេះ​រង​របួស​ធ្ងន់​។

លោក ផន អូន បាន​លើក​ឡើង​ថា រចំ យំ ដែល​ជា​អ្នកភូមិ​ជនជាតិ​ដើម​ភាគ​តិច​ចារ៉ាយ និង​ដែល​រស់​នៅ​ក្នុង​ខេត្ត​រតនគិរី កំពុង​រត់​គេច​ខ្លួន​។

លោក​បានមាន​ប្រសាសន៍​ថា “យើង​មិន​ដឹង​ថា ​តើ​មូល​ហេតុ​អ្វី​ដែល​បណ្ដាល​ឲ្យ​ជន​សង្ស័យ​ធ្វើ​ដូច្នេះ​ឡើយ​ ហើយ​នគរ​បាល​កំពុង​តែ​ធ្វើ​ការ​លើ​រឿង​នេះ​។ ស្ត្រី​រងគ្រោះ​​ត្រូវ​បាន​បញ្ជូន​ទៅ​កាន់​មន្ទីរ​ពេទ្យ​កាល់ម៉ែត្រ​នៅ​ថ្ងៃ​ដដែល ព្រោះ​​គាត់​រង​របួស​ធ្ងន់​ក្បែរ​បេះដូង”។

សួង ច័ន្ទស្រីរ័ត្ន ក្មួយ​ស្រី​របស់​​បុរស​រងគ្រោះ​បាន​ឲ្យ​ដឹង​ថា ឪពុក​មា​របស់​នាង​​ឈ្មោះ មុំ រតនៈ អាយុ​៥០​ឆ្នាំ ត្រូវ​ជនសង្ស័យ​ចាក់​យ៉ាង​តិច​ប្រាំកាំបិត​ ខណៈ​កំពុង​ដេក​សម្រាក​ព្យាបាល​នៅ​ក្នុង​បន្ទប់ជាមួយ​​ប្អូន​ប្រុស​ជន​សង្ស័យ។

ច័ន្ទស្រីរ័ត្ន បាន​និយាយ​ថា “គាត់​គ្រោង​នឹង​ចាក​ចេញពី​មន្ទីរ​ពេទ្យ​នៅ​ថ្ងៃសុក្រ ប៉ុន្តែ​វា​បែរ​ជា​កើត​រឿង​ដូច្នេះ​ទៅវិញ។ ខ្ញុំ​មាន​ការ​តក់​ស្លុត​ខ្លាំង​ណាស់”។ ច័ន្ទស្រីរ័ត្ន បាន​បន្ថែម​ថា ​ឪពុក​មារបស់​នាង​កំពុង​ជា​សះស្បើយ​ជា​បណ្ដើរ​ៗ​ពី​របួស​នៅ​ត្រង់​ក ទ្រូង ថ្ពាល់ ភ្លៅ និង​ដៃ​ហើយ។

អ្នកស្រី​ ជុំ សំបូរ អាយុ​៤៧​ឆ្នាំ ដែល​មក​​សួរ​សុខទុក្ខ​ក្មួយ​ប្រុស​​​របស់​ខ្លួន​នៅ​ក្នុង​មន្ទីរ​ពេទ្យ​នេះ និង​ដែល​បាន​ឃើញ​ហេតុការណ៍​​បាន​ឲ្យ​ដឹង​ថា ស្ត្រី​រងគ្រោះ​​ត្រូវ​ជន​សង្ស័យ​ចាក់​នៅ​រាន​ហាល​។ អ្នកស្រី​បាន​និយាយ​ថា ” នាង​ត្រូវ​ជនសង្ស័យ​យក​កាំបិត​ចាក់​ចំ​ដើម​ទ្រូង ខណៈ​កំពុង​ដេក​នៅ​លើ​បង់​ ហើយ​នាង​បាន​រត់​ចូល​ក្នុង​បន្ទប់​ហៅ​ឲ្យ​គេ​ជួយ​ទាំង​ខ្លួន​កំពុង​ប្រឡាក់​សុទ្ធ​តែ​ឈាម​”។អ្នកស្រី​បាន​បន្ថែម​ថា ស្ត្រី​រងគ្រោះ​បាន​ទៅ​មន្ទីរ​ពេទ្យ​ដើម្បី​សួរ​សុខទុក្ខ​ម្ដាយ​របស់​នាង។

លោក រចំ តឹង អាយុ​៣២​ឆ្នាំ ជា​ប្អូន​ប្រុស​ជន​សង្ស័យ​​ដែលមក​​ឆ្លុះ​អេកូពោះ​អំឡុង​ពេល​កើត​ហេតុ​បាន​ឲ្យ​ដឹង​ថា ខ្លួន​មាន​ការ​តក់​ស្លុត​​នៅ​ពេល​ដឹង​អំពី​អ្វី​ដែល​បង​បង្កើត​របស់​ខ្លួន​បាន​ធ្វើ។ លោក​បាន​និយាយ​ថា “ខ្ញុំ​សោក​ស្ដាយ​​ រន្ធត់ និង​ខ្លាច​ខ្លាំង​ណាស់ ហើយ​ខ្ញុំ​ថែម​ទាំង​បាន​យំ​ទៀត​ផង។ ខ្ញុំ​មិន​នឹក​ស្មាន​សោះ​ថា គាត់​​ធ្វើ​ដូច្នេះ”។

លោក​បាន​បន្ថែម​ទៀត​ថា បង​ប្រុស​របស់​ខ្លួន​ចាប់​ផ្ដើម​​បញ្ចេញ​ចរិត​ប្លែក​នៅពេល​​​​មក​ដល់​មន្ទីរ​ពេទ្យកាលពី​​ថ្ងៃពុធ បន្ទាប់ពី​​ធ្វើ​ដំណើរ​ពី​ខេត្ត​រតនគិរី​មក ដោយ​មិន​ព្រម​ញ៉ាំ​អ្វី​ទាល់​តែសោះ ហើយ​ចេះ​តែ​ខ្លាច​ថា​​ គេ​នឹង​មក​ចាប់​ខ្លួន​​ក្នុង​ពេល​ឆាប់ៗ។

លោក រចំ តឹង បាន​និយាយ​បន្ថែម​ថា “បង​ប្រុស​របស់​ខ្ញុំ​និយាយ​ជាមួយ​គេ​ឯង​នៅ​ក្នុង​មន្ទីរ​ពេទ្យ​​ដោយ​មិន​ដឹង​ខុស​ត្រូវ​ឡើយ​”។ លោក​បាន​បន្ត​ទៀត​ថា បង​ប្រុស​របស់​ខ្លួន​មាន​ជំងឺ​ឆ្កួត​ជ្រូក៕ ស៊ុយឈាង​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស