មន្ត្រីម្នាក់បាននិយាយកាលពីម្សិលមិញថា អាជ្ញាធរខេត្តក្រចេះបានងាកទៅឃាត់ក្បួនរថយន្តជាច្រើនគ្រឿងរបស់ឧកញ៉ា ទ្រី ភាព ដែលដឹកឈើប្រភេទលេខ១លើសទម្ងន់កាលពីថ្ងៃអាទិត្យ ប៉ុន្តែអាចឃាត់បានតែរថយន្តប្រាំគ្រឿងប៉ុណ្ណោះ ដែលត្រូវបានរកឃើញ ដឹកលើសទម្ងន់ជិតពីរដង ដែលអនុញ្ញាតដោយច្បាប់។
លោក ស្រី សាខុន ប្រធានមន្ទីរសាធារណការ និងដឹកជញ្ជូនខេត្តបានមានប្រសាសន៍ថា មន្ត្រីរបស់លោកទទួលបានព័ត៌មានថា រថយន្តក្រុមហ៊ុន ទ្រី ភាព ១៦គ្រឿងបានបើកបរឆ្ពោះទៅទិសខាងត្បូងពីក្រុងស្ទឹងត្រែងមកកាន់រាជធានីភ្នំពេញ តាមផ្លូវជាតិលេខ៧ ហើយប្រញាប់ប្រញាល់ដាក់ជញ្ជីងថ្លឹងតាមផ្លូវហាយវេក្នុងស្រុកសំបូរ ខេត្តក្រចេះ។ ប៉ុន្តែមានរថយន្តប្រាំគ្រឿងប៉ុណ្ណោះបានមកដល់ចំណុចត្រួតពិនិត្យនេះ។
លោកបានមានប្រសាសន៍ថា “យើងបានឃាត់រថយន្តទាំងនេះ ហើយធ្វើការថ្លឹងដោយរកឃើញថា រថយន្តមួយគ្រឿងៗដឹកលើសទម្ងន់៣០តោន។ យើងបានបញ្ជាឲ្យតំណាងក្រុមហ៊ុនផ្ទេរទំនិញដែលផ្ទុកលើសទម្ងន់នោះទៅរថយន្តទទេ ហើយយើងបានអនុញ្ញាតឲ្យរថយន្តទាំងនោះចាកចេញនៅថ្ងៃដដែល បន្ទាប់ពីពួកគេបានបង់ប្រាក់ចំនួន៦០លានរៀល។
លោក សាខុន បានមានប្រសាសន៍ថា រថយន្តរបស់លោក ទ្រី ភាព ១១គ្រឿងទៀតបានបើកគេចពីអាជ្ញាធរ ពីព្រោះពួកគេទទួលបានព័ត៌មានពីការដាក់ជញ្ជីងថ្លឹងនេះ ហើយបានបើកវាងតាមផ្លូវលំ។
ការស៊ើបអង្កេតរបស់អង្គការក្លូបលវីតណេស ជាអង្គការឃ្លាំមើលបរិស្ថានដែលមានមូលដ្ឋាននៅប្រទេសអង់គ្លេស កាលពីឆ្នាំមុនបានរកឃើញថា លោក ទ្រី ភាព ដែលមានសិទ្ធិផ្ដាច់មុខដឹកឈើដែលកាប់រួចខុសច្បាប់ទាំងអស់ ដែលអាជ្ញាធររឹបអូសបានគ្រប់កន្លែងនៅក្នុងប្រទេសនោះ ចំពេលមានប្រតិបត្តិការកាប់ឈើខុសច្បាប់ទ្រង់ទ្រាយធំ ដែលជំរុញឲ្យប្រភេទឈើការពារក្នុងប្រទេសកម្ពុជាប្រឈមនឹងការជិតផុតពូជ។ ក្នុងរយៈពេល១ខែ អ្នកស្រាវជ្រាវរបស់អង្គការនេះបានឃើញកុងតឺន័រយ៉ាងតិច៣០គ្រឿង ជាកម្មសិទ្ធិរបស់ក្រុមហ៊ុនលោក ទ្រី ភាព បើកចូលកំពង់ផែក្រុងព្រះសីហនុរាល់ថ្ងៃ។
លោក ហេង ភារក្ស អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តក្រចេះ បានមានប្រសាសន៍ថា កំណាត់ផ្លូវជាតិលេខ៧ចាប់ពីអូរពងមាន់ ជាតំបន់ភ្ជាប់ទៅផ្នែកខាងត្បូងក្រុងស្ទឹងត្រែង និងក្រុងក្រចេះបានខូចរហូតដោយសាររថយន្តផ្ទុកលើសទម្ងន់របស់លោក ទ្រី ភាព។
លោកបានមានប្រសាសន៍ថា “យើងបានឃើញផ្លូវពីអូរពងមាន់ដល់ទីប្រជុំជនខេត្តក្រចេះ បានខូចបន្ទាប់ពីក្រុមហ៊ុន ទ្រី ភាព ទទួលបានអាជ្ញាប័ណ្ណដឹកឈើពីបណ្ដាខេត្តនានាមកកាន់រាជធានីភ្នំពេញ”។
លោក ភារក្ស បានមានប្រសាសន៍ថា កំណាត់ផ្លូវហាយវេនោះ ត្រូវបានក្រាលកៅស៊ូឡើងវិញកាលពីឆ្នាំ២០១២ ប៉ុន្តែត្រូវបានក្រាលកៅស៊ូម្ដងទៀតកាលពីឆ្នាំ២០១៤ គឺខូចដោយសាររថយន្តធុនធំក្នុងចន្លោះឆ្នាំនោះ។
លោកបានមានប្រសាសន៍ថា “ខ្ញុំគិតថា ផ្លូវនឹងត្រូវខូចជាថ្មីម្ដងទៀតនៅពេលឆាប់ៗនេះ ប្រសិនបើមន្ទីរសាធារណការ និងដឹកជញ្ជូនខេត្តមិនចាត់វិធានការឲ្យបានតឹងរ៉ឹងលើរថយន្តដែលដឹកលើសទម្ងន់របស់ក្រុមហ៊ុន ទ្រី ភាព ទេនោះ”។
លោក សោម ផានី ប្រធានការិយាល័យរដ្ឋបាលក្រុមហ៊ុន ទ្រី ភាព ក្នុងរាជធានីភ្នំពេញបានបដិសេធមិនធ្វើអត្ថាធិប្បាយទេ៕ សារុន