ព្រះអង្គម្ចាស់ នរោត្ដម រណឫទ្ធិ ជាប្រធានគណបក្សបក្សរាជានិយមហ្វុ៊នស៊ិនប៉ិចដែលត្រូវបានតែងតាំងតែងតាំងថ្មីៗ និងលោក ញឹក ប៊ុនឆៃ អនុប្រធានទី២គណបក្សបានខ្វែងគំនិតគ្នាកាលពីម្សិលមិញជុំវិញសុពលភាពនៃការតែងតាំងលោក សាយ ហាក់ អតីតអភិបាលខេត្តព្រះសីហនុ ជាអគ្គលេខាធិការគណបក្ស។
លោកទាំងពីរបានខ្វែងគំនិតគ្នាជាសាធារណៈកាលពីចុងសប្ដាហ៍អំពីអ្នកដែលអាចចេញលិខិតផ្លូវការរបស់គណបក្សហ្វុ៊នស៊ិនប៉ិច ដោយលោក សាយ ហាក់ ជាសម្ពន្ធមិត្តរបស់ព្រះអង្គម្ចាស់ និងលោក ញឹក ប៊ុនឆៃ ដែលលោកទាំងពីរអះអាងថា សេចក្ដីថ្លែងការណ៍របស់ខ្លួនទៅវិញទៅមកសរសេរដោយមានក្បាលលិខិតរបស់គណបក្សនោះ មិនមែនជាឯកសារផ្លូវការរបស់គណបក្សឡើយ។
លោក ញឹក ប៊ុនឆៃ បានមានប្រសាសន៍ថា តាមពិតលោក សាយ ហាក់ មិនមែនជាអគ្គលេខាធិការគណបក្សហ្វុ៊នស៊ិនប៉ិចទេ ចំណែកឯលោក សាយ ហាក់ បានលើកឡើងថា លោក ញឹក ប៊ុនឆៃ មិនអាចចេញសេចក្ដីថ្លែងការណ៍ដោយគ្មានព្រះហត្តលេខារបស់ព្រះអង្គម្ចាស់បានឡើយ។
កាលពីម្សិលមិញ អគ្គលេខាធិការដ្ឋានគណបក្សបានចេញសេចក្ដីថ្លែងការណ៍មួយបញ្ជាក់អះអាងជាថ្មីអំពីការតែងតាំងលោក សាយ ហាក់ ហើយបានបន្ទោសលោក ញឹក ប៊ុនឆៃ និងព្រះអង្គម្ចាស់ក្សត្រី នរោត្ដម អរុណរស្មី ជាអនុប្រធានទី១ថា បានជ្រៀតជ្រែកការតែងតាំងអតីតអភិបាលខេត្តរូបនេះរបស់ព្រះអង្គម្ចាស់ រណឫទ្ធិ។
លិខិតដែលមានត្រារបស់អគ្គលេខាធិការដ្ឋានគណបក្សមានខ្លឹមសារថា “មានថ្នាក់ដឹកនាំ និងសមាជិកហ្វុ៊នស៊ិនប៉ិចមួយចំនួន ដែលបានរិះគន់ព្រះអង្គម្ចាស់ នរោត្ដម រណឫទ្ធិ ប្រធានគណបក្សហ្វុ៊នស៊ិនប៉ិច ចំពោះការតែងតាំងលោក សាយ ហាក់ ជាអគ្គលេខាធិការប្រតិបត្តិរបស់គណបក្សហ្វុ៊នស៊ិនប៉ិច”។
សេចក្ដីថ្លែងការណ៍ដដែលនេះបន្តថា “នៅក្នុងកិច្ចប្រជុំកាលពីថ្ងៃទី២២ ខែកុម្ភៈ ឆ្នាំ២០១៥…ព្រះអង្គម្ចាស់ នរោត្តម រណឫទ្ធិ បានអំពាវនាវឲ្យព្រះអង្គម្ចាស់ក្សត្រី នរោត្តម អរុណរស្មី និងលោក ញឹក ប៊ុនឆៃ បញ្ឈប់សកម្មភាពជំទាស់ទាំងស្រុង ហើយងាកមករួបរួមកម្លាំងគ្នាជាមួយព្រះអង្គម្ចាស់ ដើម្បីពង្រឹងគណបក្សហ្វុ៊នស៊ិនប៉ិច”។
ទោះជាយ៉ាងណា លោក ញឹក ប៊ុនឆៃ ដែលធ្វើឲ្យមានការបណ្ដេញព្រះអង្គម្ចាស់ពីមេដឹកនាំគណបក្សរាជានិយមនេះកាលពីឆ្នាំ២០០៦ ហើយបានកាន់តួនាទីជាអគ្គលេខាធិការគណបក្សមុនពេលព្រះអង្គម្ចាស់យាងត្រឡប់មកធ្វើជាប្រធានគណបក្សនេះវិញកាលពីខែមុននោះ កាលពីម្សិលមិញបានបញ្ជាក់ឡើងវិញថា ការតែងតាំងលោក សាយ ហាក់ គ្មានសុពលភាពទេ។
លោក ញឹក ប៊ុនឆៃ បានមានប្រសាសន៍ថា “ត្រូវធ្វើឡើងតាមរយៈការបោះឆ្នោតនៅក្រុមប្រឹក្សាជាតិ ហេតុនេះហើយវាមិនស្របច្បាប់ឡើយ”។
លោកបានមានប្រសាសន៍ថា “លោក សាយ ហាក់ មិនទាន់ក្លាយជាសមាជិកគណបក្សហ្វុ៊នស៊ិនប៉ិចនៅឡើយទេ។ ទី២ បើតាមបទបញ្ជាផ្ទៃក្នុងរបស់គណបក្សហ្វុ៊នស៊ិនប៉ិច…បានចែងយ៉ាងច្បាស់ថា ក្រុមប្រឹក្សាជាតិជាអ្នកតែងតាំងអគ្គលេខាធិការ ហើយព្រះអង្គម្ចាស់ នរោត្តម រណឫទ្ធិ មិនអាចតែងតាំងបានឡើយ”។
លោក ញឹក ប៊ុនឆៃ បានមានប្រសាសន៍ថា “និយាយឲ្យច្បាស់ទៅ នេះគឺជាបញ្ហាចម្រូងចម្រាស ហើយការច្របាច់បញ្ចូលគ្នាមិនអាចកើតឡើងទេ”។
ព្រះអង្គម្ចាស់ រណឫទ្ធិ មិនអាចទាក់ទងបានទេកាលពីម្សិលមិញ។
កាលពីខែមុន គណបក្សហ្វុ៊នស៊ិនប៉ិចបានប្រកាសពី ” ការផ្សះផ្សាជាតិ” ជាមួយព្រះអង្គម្ចាស់ រណឫទ្ធិ ដែលរម្លាយគណបក្សរាជានិយមរបស់ព្រះអង្គផ្ទាល់ចូលរួមជាមួយគណបក្សហ្វុ៊នស៊ិនប៉ិច និងបានយាងត្រឡប់មកធ្វើជាមេដឹកនាំគណបក្សនេះវិញ៕ សារុន