មួយថ្ងៃបន្ទាប់ពីរដ្ឋាភិបាលបាននិរទេសសកម្មជនបរទេសម្នាក់ ដែលប្រឆាំងនឹងគម្រោងសាងសង់ទំនប់វារីអគ្គិសនីក្នុងតំបន់អារ៉ែង ខេត្តកោះកុង កាលពីម្សិលមិញ លោកនាយករដ្ឋមន្ត្រី ហ៊ុន សែន បានជំរុញឲ្យសកម្មជននៅតំបន់អារ៉ែងផ្ដាច់ខ្លួនចេញពីប្រទេសកម្ពុជា ប៉ុន្តែលោកបានព្រមានថា កាំភ្លើងបាញ់រ៉ុកកែតអាចនឹងត្រូវដាក់ពង្រាយប្រសិនបើពួកគេហា៊នធ្វើ។
ថ្លែងទៅកាន់មន្ត្រីរដ្ឋាភិបាលនៅក្នុងពិធីទិវាជាតិទីក្រុងស្អាតនៅកោះពេជ្រ ក្នុងរាជធានីភ្នំពេញ លោកនាយករដ្ឋមន្ត្រី ហ៊ុន សែន បានសំដៅលើលោក អាឡិច ហ្គន់ហ្សាឡេស ដេវីតសុន (Alex Gonzalez-Davison) ជនជាតិអេស្ប៉ាញ ដែលត្រូវបាននិរទេសពីប្រទេសកម្ពុជាកាលពីយប់ថ្ងៃច័ន្ទ និងសកម្មជនផ្សេងៗទៀត ដែលបានបិទផ្លូវរយៈពេលខ្លីរារាំងក្បួនរថយន្តរបស់មន្ត្រីរដ្ឋាភិបាល ដែលធ្វើដំណើរទៅកាន់កន្លែងគ្រោងសាងសង់ទំនប់វារីអគ្គិសនីក្នុងតំបន់តំបន់អារ៉ែង កាលពីខែកញ្ញា។
លោកនាយករដ្ឋមន្ត្រីបានមានប្រសាសន៍ថា “វាហួសហេតុពេកដែលហ៊ានទៅចាប់មន្ត្រីអ្នកមុខអ្នកការ ដែលទៅបំពេញការងារនៅទីនោះ”។
លោកនាយករដ្ឋមន្ត្រី ហ៊ុន សែន បានមានប្រសាសន៍បន្តទៀតថា “ប្រសិនបើចង់បង្កើតអបគមន៍ សូមអញ្ជើញ។ [យើងនឹង] ដាក់ BM២១ ឥឡូវទាន់មានធុនថ្មីៗផង។ យ៉ាប់ពេកម្តង ប៉ុន្តែខ្ញុំមិនចង់ចោទដល់ថ្នាក់ហ្នឹងទេ”។
កាំភ្លើង BM២១ គឺជាជើងទម្របាញ់គ្រាប់រ៉ុកកែតបំពាក់លើរថយន្តផលិតនៅប្រទេសរុស្ស៊ី ដែលកម្ពុជារាប់បញ្ចូលក្នុងចំណោមសព្វាវុធរបស់ខ្លួន។
មុនពេលនិយាយខ្លាំងៗ លោកនាយករដ្ឋមន្ត្រី ហ៊ុន សែន បានលើកឡើងថា លោកធុញនឹងការជជែកវែកញែកដដែលអំពីអនាគតនៃតំបន់អារ៉ែង ហើយបានព្រមានជនបរទេសកុំឲ្យចេះផ្ដល់ដំបូន្មានដល់ពលរដ្ឋខ្មែរអំពីការអភិវឌ្ឍប្រទេស។ លោកបានមានប្រសាសន៍ថា “ខ្ញុំធុញណាស់។ ខ្មែរក៏ចេះដែរ។ យើងមិនចាំឲ្យគេមកប្រដៅទើបចេះធ្វើនោះទេ”។
លោកនាយករដ្ឋមន្ត្រីក៏បានថយមួយជំហានពីអ្វីដែលលោកបានការពារកាលពីលើកមុនចំពោះគម្រោងសាងសង់ទំនប់វារីអគ្គិសនី ដែលនឹងធ្វើឲ្យលិចលង់តំបន់មានទំហំ៩.៥០០ហិកតា ជាជម្រករបស់ប្រភេទសត្វជិតផុតពូជប្រហែល៣០ប្រភេទ ហើយដែលនឹងបង្ខំឲ្យអ្នកភូមិជនជាតិដើមភាគតិចជងជាង១.៣០០នាក់ ត្រូវបោះបង់ចោលដីដូនតារបស់ខ្លួន។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា “ខ្ញុំសូមបញ្ជាក់កុំនិយាយអារ៉ែងតទៅទៀត។ សិក្សាឲ្យច្បាស់មើល។ ពីនេះដល់ឆ្នាំ២០១៨អត់មានទេ អត់មានឲ្យធ្វើទេ។ គំនិតរបស់ខ្ញុំចង់ទុកឲ្យក្មេងជាន់ក្រោយ” ។
នៅក្នុងលិខិតមួយច្បាប់ផ្ញើជូនលោក តែ ចាន់មុនី សមាជិកសភាមកពីគណបក្សប្រឆាំងកាលពីខែមុន លោកនាយករដ្ឋមន្ត្រី ហ៊ុន សែន បាននិយាយសម្រាលពីផលប៉ះពាល់នៃគម្រោងនេះដែលមានទៅលើគ្រួសារអ្នកភូមិជនជាតិដើមភាគតិច ហើយលោកបានលើកសរសើរអំពីអត្ថប្រយោជន៍របស់វា រួមមានចំណូលពន្ធ ការបង្កើតការងារ សក្ដានុពលអេកូទេសចរណ៍ និងការកាត់បន្ថយការបំភាយឧស្ម័នផ្ទះកញ្ចក់នៅពេលអ្នកភូមិមូលដ្ឋានប្ដូរពីការដុតធ្យូងមកប្រើថាមពលវារីអគ្គិសនីវិញ។
ដោយបន្តនិយាយអំពីបញ្ហាបរិស្ថានកាលពីម្សិលមិញ លោកនាយករដ្ឋមន្ត្រី ហ៊ុន សែន ក៏បាននិយាយឡើងវិញផងដែរអំពីកិច្ចប្រជុំកាលពីឆ្នាំ២០១៤ ជាមួយលោក ហ្សង់ហ្វ្រង់ស័រ កូតាំង (Jean-Francois Cautain) ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា នៅភូមិគ្រឹះរបស់លោកនាយករដ្ឋមន្ត្រីផ្ទាល់ ដែលពួកគាត់បានពិភាក្សាអំពីការកាប់បំផ្លាញព្រៃឈើនៅក្នុងតំបន់អឺរ៉ុប និងតំបន់អាស៊ី។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា “ពេលខ្ញុំបានជួបឯកឧត្ដមដំបូង ខ្ញុំនិយាយថា អឺរ៉ុបបានកាប់ឈើតាំងពីណាពីណីមកហើយ ហើយចង់មកប្រដៅគេ។ កម្ពុជាមិនធ្វើដូចអឺរ៉ុបដែលកាប់ព្រៃឈើខ្ទេចអស់អ៊ីចឹងទេ”។
នៅពេលទាក់ទងតាមទូរស័ព្ទ លោក អុិន គង់ចិត្រ អ្នកសម្របសម្រួលនៅអង្គការសិទ្ធិមនុស្សលីកាដូប្រចាំខេត្តកោះកុង បានជំទាស់ទៅនឹងការលើកឡើងរបស់លោក ហ៊ុន សែន ដែលចោទប្រកាន់លោក ហ្គន់ហ្សាឡេស ដេវីតសុន និងអង្គការមាតាធម្មជាតិរបស់លោកអំពីការបិទផ្លូវកាលពីខែកញ្ញា។
លោកបានមានប្រសាសន៍ថា “សកម្មភាពរបស់គាត់វាមិនជ្រុលហួសហេតុពេកទេ ព្រោះមានអ្នកភូមិនៅក្នុងសហគមន៍ ដែលការពារតំបន់អារ៉ែងបានចូលរួមជាមួយលោក អាឡិច ដែរ។ មន្ត្រីមិនបានជូនដំណឹងណាមួយឡើយមុនពេលពួកគេទៅទីនោះ”។
លោក គង់ចិត្រ បានលើកឡើងថា សកម្មជន និងសហគមន៍នៅតំបន់អារ៉ែងគ្មានផែនការ ឬក៏ចង់បង្កើតតំបន់អបគមន៍ណាមួយឡើយ ប៉ុន្តែបានត្រៀមខ្លួនរួចជាស្រេចដើម្បីការពារតំបន់នេះ។
លោកបានមានប្រសាសន៍បន្ថែមទៀតថា “ពួកគាត់បានប្រាប់ខ្ញុំថា ពួកគាត់នឹងតស៊ូរហូតដល់ស្លាប់ប្រសិនបើក្រុមហុ៊ុនចូលមកសាងសង់ទំនប់វារីអគ្គិសនីនៅទីនេះ”។
នៅពេលទាក់ទងកាលពីម្សិលមិញ លោក ហ្គន់ហ្សាឡេស ដេវីតសុន ដែលរស់នៅក្នុងប្រទេសកម្ពុជាអស់រយៈពេល១២ឆ្នាំមកហើយ បានបញ្ជាក់នៅក្នុងអុីម៉េលមួយថា លោកបានទៅដល់ទីក្រុងម៉ាឌ្រីតដោយសុវត្ថិភាពតាមរយៈការធ្វើដំណើរ ដែលអាជ្ញាធរកម្ពុជាជាអ្នករ៉ាប់រង។
នៅពេលសួរអំពីផែនការរបស់លោកក្នុងពេលឆាប់ៗនេះ លោកបានសរសេរថា ” ការងារនឹងបន្ត ហើយកាន់តែខ្លាំងជាងមុនទៀត ខណៈអង្គការមាតាធម្មជាតិទទួលបានកេរ្តិ៍ឈ្មោះយ៉ាងខ្លាំង [ដោយសារលោក ហ៊ុន សែន] នោះ ហេតុដូច្នេះ យើងគ្មានផ្លូវឈប់ទេ”។
លោកបានសរសេរបន្តថា “បើនិយាយអំពីជំហានបន្ទាប់របស់ខ្ញុំ និយាយឲ្យត្រង់ទៅខ្ញុំមិនទាន់ច្បាស់ទេ។ ខ្ញុំនៅមានការតក់ស្លុតនៅឡើយ ព្រោះខ្ញុំរងភាពអយុត្តិធម៌យ៉ាងខ្លាំង ដោយត្រូវបាននិរទេសចេញពីប្រទេសរបស់ខ្ញុំ ដោយសារការតស៊ូដើម្បីការពារធនធានធម្មជាតិនោះ ប៉ុន្តែបើខ្ញុំក្រឡេកមើលអ្វីដែលពលរដ្ឋខ្មែរផ្សេងៗទៀត [ដូចជាលោក ជា វិជ្ជា លោក ឈុត វុទ្ធី ជាដើម] បានទទួលរងវិញ គឺវាមានកម្រិតធ្ងន់ធ្ងរជាងបញ្ហារបស់ខ្ញុំទៅទៀត។ ខ្ញុំក៏ខ្មាស់ខ្លួនឯងដែរ តែគ្មានជម្រើស ប៉ុន្តែខ្ញុំនឹងបន្តទៅមុខទៀត”៕ ស៊ុយឈាង (រាយការណ៍បន្ថែមដោយ Holly Roberson)