30 C
Phnom Penh

ស្ត្រី​និង​ក្មេងស្រី​ខ្មែរ​ឥស្លាម​ត្រឡប់មកពី​ប្រទេស​ម៉ាឡេស៊ី​វិញ

ដោយ ឌឹ ខេមបូឌា ដេលី

បទវិភាគ

មួយ​ថ្ងៃ​បន្ទាប់ពី​មេដឹកនាំ​គណបក្ស​ប្រឆាំង លោក សម រង្ស៊ី បាន​លើក​ឡើងជា​សាធារណៈ​នោះ ស្ត្រី​និង​ក្មេងស្រី​​ខ្មែរ​ឥស្លាម​ពីរ​នាក់​ត្រូវ​បាន​គេ​ធ្វើ​មាតុភូមិ​និវត្តន៍​កាលពី​ថ្ងៃ​អង្គារ ក្រោយពី​ពួកគេ​ត្រូវ​បាន​គេ​ជួញដូរ​ឲ្យ​លក់​ផ្លូវ​ភេទ​នៅ​ប្រទេស​ម៉ាឡេស៊ី ហើយ​អ្នក​ទាំងពីរ​ទទួល​បាន​ការ​ស្វាគមន៍​ពី​លោក ហោ ណាំហុង រដ្ឋមន្ត្រី​ក្រសួង​ការ​បរទេស។

ជន​រងគ្រោះ មាន​អាយុ​១៥​ឆ្នាំ​និង​២៣​ឆ្នាំ បាន​ត្រឡប់​មកដល់​ស្រុក​វិញ​នៅ​ម៉ោង​៨​ព្រឹក​ថ្ងៃ​អង្គារ ហើយ​នៅ​ក្រុង​ភ្នំពេញ ពួកគេ​បាន​ជួប​ម្តាយ​របស់​ខ្លួន និង​លោក រង្ស៊ី ដែល​បាន​ធ្វើ​យុទ្ធនាការ​ក្នុង​នាម​ពួកគេ​កាលពី​ថ្ងៃ​ច័ន្ទ បន្ទាប់ពី​ឮ​ថា អាជ្ញាធរ​មិន​យកចិត្ត​ទុកដាក់​នឹង​ការ​អង្វរករ​សុំ​ជំនួយ​ពី​គ្រួសារ​របស់​ជន​រងគ្រោះ។

បន្ទាប់ពី​ជួប​ជាមួយ​លោក ហោ ណាំហុង នៅ​ក្រសួង​ការបរទេស​នា​ម៉ោង​ប្រហែល​៩​ព្រឹក លោក កុយ គួង អ្នក​នាំពាក្យ​ក្រសួង បាន​ប្រាប់​អ្នក​កាសែត​ថា ការ​ធ្វើ​មាតុភូមិ​និវត្តន៍​នេះ​ជា​គំរូ​មួយ​នៃ “ការ​ពង្រឹង​វប្បធម៌​សន្ទនា” រវាង​រដ្ឋាភិបាល​និង​គណបក្ស​ប្រឆាំង។

លោក​បាន​និយាយ​ថា “[លោក ណាំហុង] បាន​បញ្ជាក់​ថា ជារឿយៗ​លោក​ណែនាំ​ស្ថានទូត​និង​អគ្គ​ស្ថាន​កុងស៊ុល​កម្ពុជា ជាពិសេស​ក្នុង​តំបន់​ដែល​មាន​ពលរដ្ឋ​កម្ពុជា​រស់​នៅ និង​កន្លែង​ដែល​ពលរដ្ឋ​កម្ពុជា​ងាយ​រងគ្រោះ​និង​មាន​គ្រោះ​ថ្នាក់​បំផុត ឲ្យ​យក​ចិត្ត​ទុកដាក់​ជួយ សង្គ្រោះ និង​ថែរក្សា​ពួកគេ​ឲ្យ​អស់​ពីចិត្ត”។

យោងតាម​ម្តាយ​របស់​ក្មេងស្រី​អាយុ​១៥​ឆ្នាំ​បាន​ឲ្យ​ដឹង​ថា ទោះជា​យ៉ាង​នេះ​ក្តី ការ​វិល​មក​ស្រុក​វិញ​កាលពី​ព្រឹក​ថ្ងៃ​អង្គារ​នឹង​មិន​កើត​ឡើង​ទេ ប្រសិនបើ​មិន​មាន​លោក រង្ស៊ី​ ជួយ​ជ្រោមជ្រែង​ទេ​នោះ។

អ្នកស្រី​បាន​និយាយ​ថា “កូន​ស្រី​របស់​ខ្ញុំ​បាន​វិល​មក​វិញ​ដោយ​សុវត្ថិភាព​ព្រោះ​មាន​ការ​ជួយ​ពី​[លោក រង្ស៊ី] ដែល​បាន​ចេញ​ថ្លៃ​សំបុត្រ​យន្តហោះ​សម្រាប់​ការ​ត្រឡប់​មកវិញ​របស់​ពួកគេ”។ អ្នក​ស្រី​បាន​បន្ថែម​ថា ស្ត្រី​ខ្មែរ​ម្នាក់​នៅ​ប្រទេស​ម៉ាឡេស៊ី​បាន​ជួយ​រក​ឃើញ​កូន​ស្រី​របស់​អ្នកស្រី។

ពេល​និយាយ​តាម​ទូរស័ព្ទ ក្មេងស្រី​អាយុ​១៥​ឆ្នាំ​បាន​ឲ្យ​ដឹង​ថា គេ​បាន​លក់​នាង​ទៅ​ឲ្យ​គ្រួសារ​ចិន ហើយ​ត្រូវ​គេ​ប្រើ​ជា​ទាសករ​ផ្លូវ​ភេទ មុន​ពេល​លក់​បន្ត​ទៅ​ឲ្យ​បុរស​ចិន​ពីរ​នាក់​ផ្សេង​ទៀត។

នាង​បាន​និយាយ​ថា “ពេល​ដែល​ស្ត្រី​ម្នាក់​ប្រាប់​ខ្ញុំ​នៅ​ប្រទេស​ម៉ាឡេស៊ី​ថា ខ្ញុំ​អាច​ត្រឡប់​មក​ប្រទេស​កម្ពុជា​វិញ​នោះ​ ខ្ញុំ​គិត​ថា ‘ខ្ញុំ​កើត​ជាថ្មី​ហើយ’ “។

កាលពី​ព្រឹក​ថ្ងៃ​អង្គារ លោក រង្ស៊ី បាន​មាន​ប្រសាសន៍​ថា លោក​និង​លោក ណាំហុង បាន​ព្រមព្រៀង​គ្នា​ក្នុង​ការ​សន្ទនា​តាម​ទូរស័ព្ទ​នៅ​ថ្ងៃ​នោះ​ថា មាន​តម្រូវ​ការ​បន្ទាន់​ដើម្បី​ប្រយុទ្ធ​នឹង​បណ្តាញ​ឧក្រិដ្ឋកម្ម​ដែល​មាន​ការ​ចាត់​តាំង ដែល​ធ្វើ​ឲ្យ​មាន​ការ​រង​ទុក្ខ​ដល់​អ្នក​ទាំង​ពីរ។

មេដឹកនាំ​បក្ស​ប្រឆាំង​រូបនេះ​បាន​និយាយ​ថា “ខ្ញុំ​បាន​ទទួល​ការ​ហៅ​ទូរស័ព្ទ​ពី​ឯក​ឧត្តម ហោ ណាំហុង ប្រាប់​ខ្ញុំ​ថា រដ្ឋាភិបាល​កំពុង​យក​ចិត្ត​ទុកដាក់​បំផុត​លើ​ករណី​នេះ ហើយ​គាត់​បាន​បង្គាប់​លោក ស ខេង រដ្ឋមន្ត្រី​ក្រសួង​មហាផ្ទៃ ឲ្យ​ចាប់​ពួក​មេខ្លោង”។

លោក រង្ស៊ី បាន​និយាយ​ថា លោក​នាយក​រដ្ឋមន្ត្រី ហ៊ុន សែន ក៏​បាន​ផ្ញើ​សារ​មួយ​សន្យា​គាំទ្រ​របស់​លោក​ដែរ។ លោក​បាន​និយាយ​ថា “ក្រោយមក​ទៀត ខ្ញុំបាន​ទទួល​សារ SMS ពី​សម្តេច ហ៊ុន សែន ប្រាប់​ខ្ញុំ​ថា គាត់​បាន​បញ្ជា​រដ្ឋមន្ត្រី​ក្រសួង​មហាផ្ទៃ លោក ស ខេង ​ឲ្យ​អន្តរាគមន៍​ក្នុង​ករណី​នេះ”។លោក​បាន​បន្ថែម​ថា “នេះ​បញ្ជាក់​ថា ថ្នាក់ដឹកនាំ​កំពូល​របស់​រដ្ឋាភិបាល​មិនមែន​មិន​អើពើ​នឹង​ករណី​នេះ​ទេ ហើយ​ពួកគេ​យកចិត្ត​ទុកដាក់​ណាស់​ក្នុង​ការ​ជួយ​ជន​រងគ្រោះ”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស