យោងតាមព័ត៌មានម៉ាឡេស៊ីបានឲ្យដឹងថា លោក ទៀ បាញ់ រដ្ឋមន្ត្រីក្រសួងការពារជាតិកាលពីថ្ងៃច័ន្ទបានព្រមព្រៀងគាំទ្រសំណើរបស់ប្រទេសម៉ាឡេស៊ី ក្នុងការបង្កើតកម្លាំងថែរក្សាសន្តិភាពប្រចាំតំបន់ ដោយផ្តល់អ្នកដោះមីនកម្ពុជា ប្រសិនបើផែនការនេះបោះជំហានទៅមុខ។
កាសែតម៉ាឡេស៊ី ឌឹ ស្តា បានរាយការណ៍កាលពីថ្ងៃអង្គារថា ក្នុងជំនួបនៅក្រុងភ្នំពេញ រដ្ឋមន្ត្រីក្រសួងការពារជាតិម៉ាឡេស៊ី លោក ហ៊ីសាមមុតឌីន ហ៊ូសសេន បានមានប្រសាសន៍ថា ឧត្តមសេនីយ៍ ទៀ បាញ់ បានសន្យាផ្តល់ការគាំទ្រផ្នែកយោធា ប្រសិនបើកងកម្លាំងអាស៊ានត្រូវបានបង្កើតឡើង។
លោក ហ៊ីសាមមុតឌីន ត្រូវបានដកស្រង់សម្តីក្នុងសេចក្តីថ្លែងការណ៍ថា “ឧត្តមសេនីយ៍ ទៀ បាញ់ បានលើកឡើងចំពោះមុខខ្ញុំនូវលទ្ធភាពចូលរួមចំណែករបស់ប្រទេសកម្ពុជាសម្រាប់កម្លាំងថែរក្សាសន្តិភាពក្នុងការបោសសម្អាតគ្រាប់មីន”។
ក្នុងពេលប៉ុន្មានឆ្នាំថ្មីៗនេះ ប្រទេសកម្ពុជាបានផ្តល់កម្លាំងថែរក្សាសន្តិភាពដល់បេសកកម្មរបស់អង្គការសហប្រជាជាតិ ក្នុងប្រទេសឆាដ ស៊ូដង់ ស៊ូដង់ខាងត្បូង និងប្រទេសលីបង់។
នៅពេលដាក់ពង្រាយក្នុងប្រទេសទាំងនោះ ជារឿយៗពួកគេមានភារកិច្ចរកនិងដោះគ្រាប់មីន។
កាសែត ឌឹ សាន់ របស់ម៉ាឡេស៊ីបានរាយការណ៍ថា សេចក្តីថ្លែងការណ៍មួយដែលចេញដោយលោក ហ៊ីសាមមុតឌីន បាននិយាយថា កម្លាំងថែរក្សាសន្តិភាពអាស៊ាននឹងបម្រើអង្គការសហប្រជាជាតិ៕ និត