ក្រោយជំនួបជាមួយគណៈកម្មការបរិស្ថាន និងអភិវឌ្ឍន៍ជនបទនៃរដ្ឋសភាអគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា (CDC) បានមានប្រសាសន៍ថា ប្រទេសកម្ពុជាទទួលបានវិនិយោគផ្ទាល់ពីបរទេស (FDI) ប្រមាណ៤ពាន់លានដុល្លារកាលពីឆ្នាំមុន ពោលគឺមានចំនួនប្រហាក់ប្រហែលនឹងឆ្នាំ២០១៣។
លោក សុខចិន្តា សោភា អគ្គលេខាធិការ ក្រុមប្រឹក្សាអភិវឌ្ឍន៍កម្ពុជាបានថ្លែងទៅកាន់ក្រុមអ្នកយកព័ត៌មាននៅរដ្ឋសភាក្រោយជំនួបបិទទ្វារថា បណ្តាវិនិយោគិនចិនបានបោះទុនច្រើនជាងគេបំផុតកាលពីឆ្នាំមុន បន្ទាប់មកគឺប្រទេសម៉ាឡេស៊ី និងប្រទេសជប៉ុន។
លោកបានក្រើនរំឭកថា ការចូលរបស់កម្ពុជាទៅក្នុងសហគមន៍សេដ្ឋកិច្ចអាស៊ាននៅដំណាច់ឆ្នាំនេះ នឹងបង្កើនការប្រកួតប្រជែងដណ្តើមយកវិនិយោគទុនបរទេស។
លោកបានមានប្រសាសន៍ទៀតថា “គ្រប់ប្រទេសទាំងអស់នៅក្នុងអាស៊ានចង់ទាក់ទាញការវិនិយោគឲ្យបានកាត់តែច្រើនពីប្រទេសផ្សេងៗ ហើយមានកត្តាជាច្រើនដែលអាចទាក់ទាញការចាប់អារម្មណ៍របស់វិនិយោគិន រួមមានប្រាក់ឈ្នួលអប្បបរមា តម្លៃអគ្គិសនី ថ្លៃដឹកជញ្ជូន ការជួលដី ។ល។”។
ទោះជាយ៉ាងណា លោក ប៉ុល ហំម តំណាងរាស្ត្រមកពីគណបក្សសង្គ្រោះជាតិ ដែលជាប្រធានគណៈកម្មការបរិស្ថាននៃរដ្ឋសភា បានថ្លែងទៅកាន់អ្នកយកព័ត៌មានថា ពេលខ្លះគម្រោងវិនិយោគបរទេសបានបង្កឲ្យមានផលប៉ះពាល់ជាអវិជ្ជមាន។
លោកបានបញ្ជាក់យ៉ាងដូច្នេះថា “ឧទាហរណ៍ប្រជាពលរដ្ឋនៅខេត្តស្វាយរៀង អាចទទួលបានការងារធ្វើនៅក្នុងតំបន់សេដ្ឋកិច្ចពិសេសម៉ានហាតាន ក្នុងក្រុងបាវិត ប៉ុន្តែ ក្រុមហ៊ុន7NG បានធ្វើផ្លូវកាត់ដីរបស់ប្រជាពលរដ្ឋ”៕សុខុម