35 C
Phnom Penh

នគរបាល​​​ខេត្ត​​​រតន​​​គិរី​​​បញ្ជូន​​​អ្នក​​​ស្វែង​​​រក​​​សិទ្ធិ​​​ជ្រក​​​កោន​​​ម៉ុង​​​តា​​​ញ៉ា​​​បួន​​​នាក់ ​​​ទៅ​​​ប្រទេស​​​វៀតណាម​​​

ដោយ ឌឹ ខេមបូឌា ដេលី

បទវិភាគ

មន្ត្រី​ម្នាក់​បាន​និយាយ​កាលពី​ម្សិលមិញ​ថា អ្នក​ស្វែង​រក​សិទ្ធិ​ជ្រក​កោន​ជនជាតិ​ដើម​ភាគ​តិច​ម៉ុង​តា​​​ញ៉ា​​​បួន​នាក់ ត្រូវ​បាន​ចាប់​ខ្លួន​​ហើយ​បញ្ជូន​ទៅ​ប្រទេស​វៀតណាម​វិញ​កាលពី​ថ្ងៃ​អង្គារ បន្ទាប់ពី​នគរ​បាល​បាន​រក​ឃើញ​ពួកគេ​លាក់​ខ្លួន​ក្នុង​ស្រុក​លំផាត់ ខេត្ត​រតនគិរី។

ដោយ​សំដៅ​ដល់​ពួកគេ​ថា ជា​ “ជន​​​ជាតិ​​ចារ៉ាយ​វៀតណាម” នោះ លោក មឿង ស៊ីនាត ​អ្នក​នាំ​​​ពាក្យ​​សាលា​ខេត្ត​បាន​មាន​ប្រសាសន៍​ថា នគរ​បាល​​ស្រុក​លំផាត់ បាន​ចាប់​ខ្លួន​ជនជាតិ​ដើម​ភាគ​តិច​ម៉ុង​តា​​​ញ៉ា​ទាំង​បួន​នាក់​នេះ​កាលពី​ថ្ងៃ​អង្គារ។

លោក ស៊ីនាត បាន​មាន​ប្រសាសន៍​ថា “យើង​បាន​ចាប់​ខ្លួន​ជនជាតិ​ចារ៉ាយ​វៀត​​​ណាម​បួន​នាក់ ហើយ​បាន​បញ្ជូន​ពួកគេ​ទៅ​​ប្រទេស​​​​វៀតណាម​នៅ​ថ្ងៃ​ដដែល ពីព្រោះ​យើង​ត្រូវ​គោរព​កិច្ច​ព្រមព្រៀង​នៃ​​​ការ​​​​សហការ​រវាង​ប្រទេស​របស់​​​យើង​​​ទាំង​ពីរ”។

លោក​បាន​បន្ថែម​ថា “ខ្ញុំ​សូម​បញ្ជាក់​ថា នគរ​បាល​មិនបាន​រក​អ្នក​ទាំង​នោះឃើញនៅ​ក្នុង​ព្រៃ ប៉ុន្តែ​បាន​ចាប់​ខ្លួន​ពួកគេ​​​នៅ​តាម​ផ្លូវ​ ខណៈ​ពេល​​​​ធ្វើ​ការ​ល្បាត​កាលពី​រសៀល​ម្សិល​​​មិញ”។

បើ​ទោះ​ណា​ជា​លោក ស៊ីនាត បាន​កំណត់​អត្តសញ្ញាណ​​អ្នក​ទាំង​បួន​ថា ជា​ជន​ជាតិ​​ចារ៉ាយ​វៀតណាម​ក៏​ដោយ ​ក៏​កុល​សម្ព័ន្ធ​មួយ​​ក្នុង​ចំណោម​កុល​សម្ព័ន្ធ​ប្រហែល​៣០ ដែល​បង្កើត​ជា​​ជន​​​ជាតិ​ដើម​ភាគ​តិច​ម៉ុង​តា​​​ញ៉ា​​នៅ​ប្រទេស​វៀតណាម​នោះ លោក ស៊ីនាត បាន​អះអាង​ថា ពួកគេ​មិន​មែន​ជា​អ្នក​ស្វែង​​​​រក​សិទ្ធិ​ជ្រក​កោន​ទេ។

លោក​បាន​​​មាន​ប្រសាសន៍​ថា “ខ្ញុំ​ចង់​បញ្ជាក់​ថា…​អ្នក​ទាំង​បួន​មិន​មែន​ជា​ជន​ភៀស​ខ្លួន​ម៉ុង​តា​​​ញ៉ា​ឡើយ។ ពួកគេ​ជា​ជន​ជាតិ​វៀតណាម ដែល​ឆ្លង​ព្រំដែន​ខុស​ច្បាប់”។

ក្រសួង​ការ​បរទេស​វៀតណាម​មិន​បាន​ឆ្លើយ​តប​ចំពោះ​សំណើ​សុំ​អត្ថាធិប្បាយ​ជា​ច្រើន​លើក​​ច្រើន​​​សា​​​នោះ​ឡើយ​។

ជនជាតិ​ដើម​ភាគ​តិច​ម៉ុង​តា​​​ញ៉ា​ទាំង​បួន​នាក់​ ដែល​ត្រូវ​បាន​ចាប់​ខ្លួន​កាលពី​ថ្ងៃអង្គារ គឺ​ជា​ផ្នែក​មួយ​នៃ​មនុស្ស​មួយ​ក្រុម​​មាន​គ្នា​ប្រាំបួន​នាក់ ដែល​បាន​មក​ដល់​ខេត្ត​រតនគិរី​កាលពី​ថ្ងៃ​​​ទី​១០ ខែ​កុម្ភៈ។

អ្នក​ភូមិ​​​ជន​​​ជាតិ​ដើម​ភាគ​តិច​ចារ៉ាយកម្ពុជា ដែល​សុំ​មិន​បញ្ចេញ​ឈ្មោះ ដោយ​ខ្លាច​ការ​រក​រឿង​​បាន​និយាយ​ថា មនុស្ស​ប្រាំ​​​នាក់​ទៀត​ដែល​នៅ​សេស​​​សល់​អាច​រត់​គេច​​​ពី​នគរ​បាល​ ហើយ​ឥឡូវ​នេះ​កំពុង​លាក់​ខ្លួន​ក្នុង​​​ព្រៃ។

អ្នកភូមិ​រូប​នេះ​ដែល​បាន​ជួយ​អ្នក​ស្វែង​រក​សិទ្ធិ​​ជ្រក​កោន​ជនជាតិ​ដើម​ភាគ​តិច​ម៉ុង​តា​​​ញ៉ា​​​ជាង​៦០​នាក់ ដែល​​បាន​ឆ្លង​ចូល​ខេត្ត​នេះ​ចាប់​តាំង​ពី​ខែ​តុលា​មក ក៏​បាន​លើក​ឡើង​ផង​ដែរ​ថា គេអ្នកភូមិ​ស្រុក​អូរយ៉ាដាវ​រាយ​ការណ៍​ថា បាន​ឃើញ​ការ​ដាក់​ពង្រាយ​នគរ​បាល​​នៅ​ក្នុង​តំបន់​នេះ​កាល​​​ពី​ម្សិល​​​មិញ​។

គាត់​បាន​និយាយ​ថា “ខ្ញុំ​ទទួល​បាន​ព័ត៌មាន​ថា នគរ​បាល​​បាន​ជិះ​ម៉ូតូ​១៦​គ្រឿង​ទៅ​ក្នុង​ព្រៃ​ក្នុង​ភូមិ​ខ្វែង ស្ថិត​ក្នុង​ស្រុក​អូរ​យ៉ា​​​ដាវ ដើម្បី​ស្វែង​រក​ជនជាតិ​ដើម​ភាគ​តិច​ម៉ុង​តា​​​ញ៉ា​ទាំង​នេះ​”។

គាត់​បាន​បន្ថែម​ថា “ពួកគេ​ក៏​បាន​យក​​​អង្ករ​មួយ​បាវ​ទៅ​ដាំ​បាយ​ហូប​ក្នុង​ព្រៃ​​​ផង​​​ដែរ ដូច្នេះ​ពួកគេ​​អាច​ឃ្លាំ​មើល​ជនជាតិ​ដើម​ភាគ​តិច​ម៉ុង​តា​​​ញ៉ា​ទាំង​នោះ​នៅ​ពេល​យប់​”។ មន្ត្រី​​នគរ​បាល​ស្រុក និង​ខេត្ត​​​មិន​អាច​ទាក់​ទង​បានទេ។

ឥឡូវ​នេះ​​​មាន​​​​​​ម៉ុង​តា​​​ញ៉ា​​យ៉ាង​តិច​៤១​នាក់ កំពុង​លាក់​ខ្លួន​ក្នុង​ក្រុម​ផ្សេង​គ្នា​ក្នុង​ស្រុក​លំផាត់ និង​ស្រុក​អូរយ៉ាដាវ ខេត្ត​រតនគិរី។​​ ពួកគេ​ទាំង​អស់​លើក​ឡើង​ថា ពួកគេ​រត់​គេច​ខ្លួន​​ពី​ការ​គាប​សង្កត់​របស់​រដ្ឋាភិបាល​វៀតណាម ហើយ​​បាន​អំពាវ​នាវ​ដល់​អង្គការ​សហប្រជាជាតិ​ឲ្យ​​​ជួយ​ពួកគេ​ឲ្យ​បាន​មក​រាជ​​​ធានី​ភ្នំពេញ​ដោយ​សុវត្ថិភាព ដើម្បី​ដាក់ពាក្យ​សុំ​​​សិទ្ធិ​ជ្រក​កោន​។

បេសកកម្ម​របស់​​​អង្គការ​សហប្រជាជាតិ​ ដើម្បី​ជួប​​ម៉ុង​តា​​​ញ៉ា​​ក្នុង​ខេត្ត​រតនគិរី​​​នោះ​​​ បាន​បញ្ចប់​កាលពី​សប្ដាហ៍​មុន បន្ទាប់ពី​អាជ្ញាធរ​​មូល​ដ្ឋាន​​បាន​​បដិសេធ​មិន​អនុញ្ញាត​ឲ្យ​អង្គការ​សហប្រជាជាតិ​ធ្វើ​ដំណើរ​ក្នុង​ខេត្ត​នេះ បើ​គ្មាន​ការ​អនុញ្ញាត​ពី​លោក​អភិបាល​ខេត្ត​ និង​ក្រសួង​មហាផ្ទៃ។

នាយកដ្ឋាន​អន្តោ​​​ប្រវេសន៍​​ក្រសួង​មហាផ្ទៃ​ក្នុង​រាជ​​​ធានី​ភ្នំពេញ បច្ចុប្បន្ន​នេះ​កំពុង​ដំណើរ​ការ​​ពិនិត្យ​​​​ពាក្យ​សុំ​​​សិទ្ធិ​ជ្រក​កោន​​របស់​​​​ម៉ុង​តា​​ញ៉ា​១៣​នាក់ ចំណែក​ឯ​១០​នាក់​ទៀត​ស្ថិត​​​ក្នុង​រាជ​​​ធានី​រង់ចាំ​ដាក់​ពាក្យ​សុំ​​​សិទ្ធិ​ជ្រក​​​កោន​៕ សារុន​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស