លោកនាយករដ្ឋមន្ត្រី ហ៊ុន សែន បានមានប្រសាសន៍កាលពីព្រឹកមិញថា រដ្ឋាភិបាលកម្ពុជាព្រមទទួលយកជនភៀសខ្លួនពីប្រទេសអូស្ត្រាលី ដែលកំពុងឃាត់ខ្លួនទុកនៅក្នុងប្រទេសដែនកោះណូរូ តាមគោលការណ៍ស្ម័គ្រចិត្ត ដោយមិនមានការបង្ខិតបង្ខំអ្វីឡើយ។
ថ្លែងនៅក្នុងសន្និសីទអន្តរជាតិស្តីពីខួបលើកទី១០នៃការទទួលខុសត្រូវក្នុងការការពារមនុស្សជាតិ វឌ្ឍនភាព បញ្ហាប្រឈម និងកាលានុវត្តភាពនៅអាស៊ីប៉ាស៊ីហ្វិកនៅឯសណ្ឋាគារភ្នំពេញកាលពីព្រឹកមិញនេះ លោក ហ៊ុន សែន បានមានប្រសាសន៍ថា “ខ្ញុំនិយាយត្រង់តែម្តង រឿងអូស្ត្រាលីមកជួបជាមួយខ្ញុំ ដើម្បីនឹងសុំនាំជនភៀសខ្លួនមួយចំនួន។ មួយចំនួននាំគ្នាទិតៀននៅឯអូស្ត្រាលី ហើយមកទិតៀនខ្មែរទៀត”។
លោក ហ៊ុន សែន បានមានប្រសាសន៍បន្ថែមថា “ខ្ញុំផ្អែកលើគោលការណ៍ស្ម័គ្រចិត្ត។ មកបានប៉ុន្មាន យកប៉ុណ្ណឹង។ មិនមកទេ អាហ្នឹងស្រេចលើគេស្ម័គ្រចិត្តតើ អត់អ្នកណាចាប់បង្ខំមកទេ”។
អង្គការអន្តរជាតិទេសន្តរប្រវេសន៍បានចេញសេចក្តីថ្លែងការណ៍មួយកាលពីថ្ងៃច័ន្ទ ដោយនិយាយថាខ្លួនត្រៀមរៀបចំកម្មវិធីជួយតាំងទីលំនៅដល់ជនភៀសខ្លួនពីប្រទេសដែនកោះណូរូ ដែលមកកាន់ប្រទេសកម្ពុជា។
កាលពីខែកញ្ញា រដ្ឋាភិបាលក្រុងភ្នំពេញ បានទទួលយកសំណើរបស់ក្រុងកង់ប៊ឺរ៉ាក្នុងការតាំងទីលំនៅជនភៀសខ្លួនមួយចំនួន ដែលប្រទេសអូស្ត្រាលី កំពុងឃាត់ទុកនៅក្នុងប្រទេសដែនកោះណូរូ ជាថ្នូរនឹងជំនួយជាទឹកប្រាក់ចំនួន៣៥លានដុល្លារ បន្ថែមទៀតសម្រាប់រយៈពេល៤ឆ្នាំទៀត។
នៅពេលដែលព័ត៌មាននៃការចរចាគ្នា បានលេចឮខ្ចរខ្ចារកាលពីដើមឆ្នាំទៅមិញនោះ គម្រោងនេះបានទទួលរងការរិះគន់យ៉ាងខ្លាំងពីសំណាក់តំណាងរាស្ត្រគណបក្សប្រឆាំង និងក្រុមអង្គការសិទ្ធិមនុស្សនៅក្នុងប្រទេសទាំងពីរ ដែលបានចោទប្រទេសអូស្ត្រាលីថា គេចវេះពីការទទួលខុសត្រូវរបស់ខ្លួន ដោយស្វែងរកការបញ្ជូនជនភៀសខ្លួនទៅកាន់ប្រទេសមួយដ៏ក្រតោកយាក និងពុករលួយបំផុតនៅក្នុងតំបន់។
មន្ត្រីអន្តោប្រវេសន៍ខ្មែរបានធ្វើដំណើរទៅប្រទេសណូរូកាលពីខែមុន ប៉ុន្តែគ្មានជនភៀសខ្លួនណាម្នាក់នៅលើកោះនោះ បានយល់ព្រមមករស់នៅក្នុងប្រទេសកម្ពុជាទេ។រើន