34 C
Phnom Penh

ធនាគារ​​​ពិភព​​​លោក​​​ច្រាន​​​ចោល​​​សំណើ​​​សុំ​​​ឲ្យ​​​រៀប​​​ចំ​​​កិច្ច​​​ប្រជុំ​​​ជាមួយ​​​គ្រួសារ​​​ដែល​​​ត្រូវបាន​​​​​​បណ្តេញ​​​ចេញ​​​ពីដីធ្លី​​​

ដោយ ឌឹ ខេមបូឌា ដេលី

បទវិភាគ

ធនាគារ​​​ពិភព​​​លោក​​​បាន​​​ច្រាន​​​ចោល​​​​​​សំណើ​​​មួយ​​​ដែល​​​​​​ស្នើ​​​ឲ្យ​​​ខ្លួន​​​រៀប​​​ច​​​ំ​​​កិច្ចប្រជុំ​​​​​​នៅ​​​កន្លែង​​​មួយ​​​ក្រៅ​​​ប្រទេស​​​កម្ពុជា​​​​​​ជា​​​មួយ​​​តែ​​​គ្រួសារ​​​ដែល​​​ត្រូវ​​​បាន​​​បណ្តេញ​​​ចេញ​​​ដោយ​​​បង្ខំ​​​ពី​​​ដីធ្លី​​​របស់​​​ខ្លួន​​​មុន​​​ពេល​​​ធនាគារ​​​សម្រេច​​​ថា តើ​​​ត្រូវ​​​លុប​​​ចោល​​​ឬមិន​​​លុប​​​ចោល​​​ការ​​​ផ្អាក​​​ការ​​​​​​​​​ផ្តល់​​​ប្រាក់​​​កម្ចី​​​ថ្មី​​​ដល់​​​​​​ប្រទេស​​​កម្ពុជា​​​។

ធនាគារ​​​ពិភព​​​លោក​​​បាន​​​ប្រកាស​​​ផ្អាក​​​ផ្តល់​​​ប្រាក់​​​កម្ចី​​​ថ្មី​​​នៅក្នុង​​​ខែ​​​សីហា ឆ្នាំ​​​២០១១ ដើម្បី​​​ឆ្លើយ​​​តប​​​ទៅ​​​នឹង​​​ការ​​​បដិសេធ​​​របស់​​​រដ្ឋាភិបាល​​​មិនព្រម​​​​​​ចេញ​​​ប័ណ្ណ​​​កម្មសិទ្ធិ​​​ដី​​​ធ្លី​​​ដល់​​​គ្រួសារ​​​ដែល​​​រស់​​​នៅ​​​សហគមន៍​​​បឹង​​​កក់​​​ក្នុង​​​រាជ​​​ធានីភ្នំពេញ​​​​​​ជា​​​តំបន់​​​ដែល​​​អ្នក​​​ភូមិ​​​ភាគ​​​ច្រើន​​​ក្នុង​​​ចំណោម​​​អ្នក​​​ភូមិ​​​ប្រមាណ​​​៣.០០០គ្រួសារ​​​ ត្រូវ​​​បាន​​​បណ្តេញ​​​ដោយ​​​បង្ខំ​​​ ដើម្បី​​​បើក​​​ផ្លូវ​​​សម្រាប់​​​គម្រោង​​​អចលនទ្រព្យ​​​ឯកជន​​​របស់​​​លោក​​​ ឡាវ ម៉េងឃិន សមាជិក​​​ព្រឹទ្ធសភា​​​មក​​​ពី​​​គណបក្ស​​​ប្រជា​​ជន​​​កម្ពុជា​​​។

ថ្មី​​​ៗ​​​នេះ​​​ ធនាគារ​​​នេះ​​​កំពុង​​​ពិចារណា​​​គម្រោង​​​ថ្មី​​​មួយ​​​នៅ​​​​​​ក្នុង​​​ប្រទេស​​​កម្ពុជា​​​ដែលនឹង​​​​​​ឈាន​​​​​​ដល់​​​ការ​​​លុប​​​ចោល​​​​​​​​កា​​​រផ្អាក​​​ការ​​​ផ្តល់​​​ប្រាក់​​​កម្ចី​​​ថ្មី​​​នេះ​​​ ហើយ​​​បាន​​​ប្រកាស​​​ពី​​​ផែន​​​ការ​​​​​រៀប​​​ចំ​​​កិច្ច​​​ប្រជុំ​​​ចំនួន​​​១១​​​នៅ​​​​​​ទូទាំង​​​ប្រទេស​​​កម្ពុជា​​​ជា​​​មួយ​​​ភាគី​​​ពាក់​​​ព័ន្ធ​​​សំខាន់​​​ៗ​​​ចំនួន​​​ប្រាំ​​​ពីរ​​​ ប៉ុន្តែ ក្នុង​​​ចំណោម​​​ភាគី​​​ពាក់​​​ព័ន្ធ​​​ទាំង​​​នេះ​​​មិន​​​រួម​​​បញ្ចូល​​​គ្រួសារ​​​ដែល​​​ត្រូវ​​​គេ​​​បណ្តេញ​​​ចេញ​​​ឡើយ​​​។

នៅ​​​ក្នុង​​​លិខិត​​​ចុះ​​​ថ្ងៃ​​​ទី​​​៣ ខែ​​​កុម្ភៈ ផ្ញើ​​​ជូន​​​ធនាគារ​​​ពិភព​​​លោក លោក Morton Sklar ​​​​​​មេធាវី​​​ជន​​​ជាតិ​​​អាមេរិក​​​ដែល​​​ធ្វើ​​​ការ​​​ជាមួយ​​​អង្គការ​​​សិទ្ធិមនុស្ស​​​​​​ក្នុង​​​ស្រុក​​​​​​បាន​​​ស្នើ​​​ឲ្យ​​​ធនាគារ​​​រៀប​​​ចំ​​​កិច្ច​​​ប្រជុំ​​​បន្ថែម​​​ជា​​​មួយ​​គ្រួសារ​​​ដែល​​​ត្រូវ​​​គេ​​​បណ្តេញ​​​ចេញ​​​ពី​​​ដី​​​ធ្លី​​​នៅ​​​ក្រៅ​​​ប្រទេស​​​កម្ពុជា​​​ ហេតុ​​​ដូច្នេះ​​​ពួក​​​គាត់​​​ហ៊ាន​​​និយាយ​​​ស្តី​​​ដោយ​​​មិន​​​ខ្លាច​​​ការ​​​បំភិត​​​បំភ័យពី​​​​​​រដ្ឋាភិបាល​​​។

នៅ​​​ក្នុង​​​លិខិត​​​ឆ្លើយ​​​តប​​​ចុះ​​​ថ្ងៃ​​​ទី​​​២០ ខែ​​​កុម្ភៈ ដែល​​​ទទួល​​​បាន​​​នៅ​​​ក្នុង​​​សប្តាហ៍​​​នេះ​​​ លោក​​​ Alassane Sow អ្នក​​​គ្រប់​​​គ្រង​​​ប្រចាំ​​​ប្រទេស​​​របស់​​ធនាគារ​​​ពិភព​​​លោក​​​បាន​​​ប្រាប់​​​លោក Sklar ថា ធនាគារ​​​នឹង​​​បន្ត​​​ផែន​​​ការ​​​ដំបូង​​​របស់​​​ខ្លួន​​​។

លោក Sow បាន​​​មានប្រសាសន៍​​​ថា “ការ​​​ពិភាក្សា​​​ពិគ្រោះ​​​យោបល់​​​ទាំង​​​អស់​​​នឹង​​​ត្រូវ​​​រៀប​​​ចំ​​​ធ្វើ​​​ឡើង​​​នៅ​​​ក្នុង​​​ប្រទេស​​​កម្ពុជា​​​ ហើយ​​​កិច្ច​​​ប្រជុំ​​​នឹង​​​ត្រូវ​​​ធ្វើ​​​ឡើង​​​ជា​​​មួយ​​​ភាគី​​​ពាក់​​​ព័ន្ធ​​​ដូច​​​ដែល​​​បាន​​​បង្ហាញ​​​នៅ​​​ក្នុង​​​ផែនការ​​​ពិភាក្សា​​​ពិគ្រោះ​​​យោបល់​​​”។

លិខិត​​​​​​ឆ្លើយ​​​តប​​​នេះ​​​មិន​​​បាន​​ផ្តល់​​​ការ​​​​ពន្យល់​​​​​​​​​អំពី​​​សេចក្តី​​​សម្រេច​​​របស់​​​ធនាគារ​​​ឡើយ​​​។ ហើយ​​​នៅ​​​ពេល​​​ត្រូវ​​​បាន​​​សួរ​​​ទាក់​​​ទិន​​​នឹង​​​សេចក្តី​​​សម្រេច​​​ លោក ប៊ូ សារឿន អ្នក​​​នាំ​​​ពាក្យ​​​ប្រចាំ​​​ប្រទេស​​​របស់​​​ធនាគារ​​​ពិភព​​​លោក​​​បាន​​​លើក​​​ឡើ​​​ងថា លិខិត​​​របស់​​​លោក Sow “បាន​​​និយាយ​​​​​​រួច​​​ហើយ​​​”។

ដោយ​​​មាន​​​ប្រតិកម្ម​​​តប​​​ទៅ​​​នឹង​​​លិខិត​​​ឆ្លើយ​​​តប​​​នេះ​​​ លោក Sklar បាន​​​លើក​​​ឡើង​​​ថា សេចក្តី​​​សម្រេច​​​របស់​​​ធនាគារ​​​ពិភព​​​លោក​​​មិនព្រម​​​រៀប​​​ចំ​​​កិច្ច​​​ប្រជុំ​​​ជា​​​មួយ​​​គ្រួសារ​​​ដែល​​​ត្រូវ​​​គេ​​​បណ្តេញ​​​ចេញ​​​ពី​​​ដី​​​ធ្លី​​​ គឺ​​​ជា​​​ “លទ្ធផល​​​ដ៏​​​គួរ​​​ឲ្យ​​​ព្រួយ​​​បារម្ភ និង​​​តក់​​​ស្លុត​​​បំផុត​​​”។

លោក Sklar បាន​​​មានប្រសាសន៍​​​ថា “របាយការណ៍​​​របស់​​​ក្រុម​​​អធិការកិច្ច​​​នៃ​​​ធនាគារ​​​ពិភព​​​​​​ផ្ទាល់​​​ដែល​​​ប្រើជា​​​មូលដ្ឋាន​​​ដើម្បី​​​ផ្អាក​​​ការ​​​​​​ផ្តល់​​​ប្រាក់​​​កម្ចី​​​​​​កាល​​​ពី​​​ឆ្នាំ​​​២០១១​​​ បាន​​​ចាត់​​​ទុក​​​​​​បញ្ហា​​​​​​បណ្តេញ​​​ចេញ​​​ពីដីធ្លី​​​ជា​​​បញ្ហា​​​​​​ចម្បង​​​ ចុះ​​​ហេតុ​​​អ្វី​​​ធនាគារ​​​ពិភព​​​លោក​​​​​​មិន​​​រង់​​​ចាំ​​​រដ្ឋាភិបាល​​​ធ្វើ​​​កំណែ​​​ទម្រង់​​​គោល​​​នយោបាយ​​​ដីធ្លី​​​សិន​​​ទៅ​​​​​​ មុន​​​នឹង​​​​​​​​ផ្ដល់​​​ការ​​​គាំទ្រ​​​បន្ថែម​​​ដល់​​​ប្រទេស​​​កម្ពុជា”។

កាល​​​ពី​​​ឆ្នាំ​​​មុន​​​ធនាគារ​​​ពិភព​​​លោក​​​បាន​​​លើក​​​ឡើង​​​ថា កិច្ច​​​ប្រជុំ​​​នឹង​​​ចាប់​​​ផ្ដើម​​​នៅ​​​ចុង​​​ឆ្នាំ​​​២០១៤ ឬ​​​ដើម​​​ឆ្នាំ​​​២០១៥​​​ ប៉ុន្តែ មក​​​ទល់​​​នឹង​​​ពេល​​​នេះ​​​មិន​​​ទាន់​​​កំណត់​​​កាល​​​បរិច្ឆេទ​​​សម្រាប់​​​កិច្ច​​​ប្រជុំ​​​ណា​​​មួយ​​​នៅ​​​ឡើយ​​​ទេ​​​៕ស៊ុយ​​​ឈាង​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស