មន្ត្រីសិទ្ធិមនុស្សនិងអ្នកភូមិបាននិយាយកាលពីថ្ងៃសុក្រថា ម៉ុងតាញ៉ាមួយក្រុមមានគ្នា៣៦នាក់ ដែលបានប៉ុនប៉ងគេចចេញពីកន្លែងលាក់ខ្លួននៅក្នុងព្រៃនៅក្នុងខេត្តរតនគិរី ដោយធ្វើដំណើរតាមរថយន្តឆ្ពោះមកកាន់ក្រុងភ្នំពេញ បានបាត់ខ្លួនអស់រយៈពេលពីរថ្ងៃមកហើយ។
លោក ឆាយ ធី អ្នកសម្របសម្រួលរបស់សមាគមការពារសិទ្ធិមនុស្ស អាដហុក ខេត្តរតនគិរី បាននិយាយថា អ្នកភូមិជនជាតិភាគតិចចារ៉ាយបានប្រាប់លោកថា ពួកគេបានបាត់ដំណឹងពីអ្នកស្វែងរកសិទ្ធិជ្រកកោន បន្ទាប់ពីក្រុមម៉ុងតាញ៉ានេះបានព្យាយាមគេចខ្លួនពីខេត្តភាគឦសានមួយនេះកាលពីយប់ថ្ងៃពុធ។
លោក ធី បាននិយាយថា “មានចារ៉ាយវៀតណាមចំនួន៣៦នាក់ រួមមានស្ត្រី៣នាក់ផងដែលបានធ្វើដំណើរតាមរថយន្ត ដើម្បីចាកចេញពីខេត្តរតនគិរី ប្រហែលពាក់កណ្តាលអធ្រាត្រថ្ងៃពុធមកកាន់ភ្នំពេញ”។ លោក ធី បាននិយាយថា “រហូតមកដល់ពេលនេះយើងមិនទាន់ទទួលបានព័ត៌មានណាមួយពីពួកគេនៅឡើយទេ ហើយយើងមិនដឹងថា គេបាត់ខ្លួននៅកន្លែងណាដែរ”។ អ្នកសម្របសម្រួលរបស់សមាគមការពារសិទ្ធិមនុស្ស អាដហុករូបនេះបានបញ្ជាក់ថា លោកបានជូនដំណឹងដល់អង្គការសហប្រជាជាតិ និងស្ថានទូតអាមេរិកអំពីការបាត់ខ្លួននេះ។
អ្នកភូមិជនជាតិចារ៉ាយអាយុ៤៨ឆ្នាំម្នាក់ដែលសុំមិនបញ្ចេញឈ្មោះ ព្រោះខ្លាចអាជ្ញាធរធ្វើបាប បាននិយាយថា មិត្តភក្តិរបស់គាត់ម្នាក់ជាចារ៉ាយបានស្ថិតនៅក្នុងក្រុមម៉ុងតាញ៉ាដែលធ្វើដំណើរតាមរថយន្តនោះដែរ។
អ្នកភូមិចារ៉ាយរូបនេះបាននិយាយថា “គាត់បានប្រាប់ខ្ញុំថា គាត់បាននាំចារ៉ាយវៀតណាម៣៦នាក់មកភ្នំពេញ ប៉ុន្តែគាត់មិនបានប្រាប់ខ្ញុំថា ហេតុអីបានជាគាត់យកពួកគេមកទីនោះ”។ អ្នកភូមិរូបនេះបាននិយាយថា អ្នកបើកបររថយន្តបានទៅទទួលយកមនុស្ស១៨នាក់ពីស្រុកអូរយ៉ាដាវ ៨នាក់មកពីស្រុកបរកែវ និង១០នាក់ផ្សេងទៀតពីស្រុកលំផាត់។
អ្នកភូមិរូបនេះបាននិយាយថា “ពួកគេបានបាត់ខ្លួន ខ្ញុំបានព្យាយាមទាក់ទងពួកគេតាមទូរស័ព្ទ ប៉ុន្តែមិនអាចទាក់ទងបានទេ”។
លោក ម៉ឹង ស៊ីនាត អ្នកនាំពាក្យសាលាខេត្តរតនគិរី បាននិយាយថា លោកមិនបានទទួលដំណឹងអំពីការបាត់ខ្លួនរបស់ពួកគេទេ ប៉ុន្តែអាជ្ញាធរកំពុងបន្តស្វែងរកម៉ុងតាញ៉ានៅក្នុងព្រៃ។
លោក ស៊ីនាត បាននិយាយថា “ឥឡូវហាក់ដូចជាស្ងាត់ឈឹង។ អាជ្ញាធរកំពុងស្វែងរកពួកគេដើម្បីធានាសុវត្ថិភាពនិងផ្តល់ម្ហូបអាហារដល់ពួកគេ”។
ការបាត់ខ្លួនម៉ុងតាញ៉ាមួយរថយន្តបានកើតឡើងក្រោយពីម៉ុងតាញ៉ា៤នាក់ត្រូវបញ្ជូនទៅវៀតណាមវិញកាលពីថ្ងៃអង្គារក្រោយពីការចាប់ខ្លួននៅក្នុងស្រុកលំផាត់។
លោក ស៊ីនាត បានអះអាងកាលពីថ្ងៃពុធថា ក្រុមនោះមិនមែនជាម៉ុងតាញ៉ាទេ ប៉ុន្តែ”ជាវៀតណាមដែលឆ្លងដែនខុសច្បាប់”។
ក្រុមរបស់ពួកគេគឺជាផ្នែកនៃម៉ុងតាញ៉ា៤១នាក់ដែលកំពុងលាក់ខ្លួននៅខេត្តរតនគិរី បន្ទាប់ពីឆ្លងដែនពីប្រទេសវៀតណាមកាលពីប៉ុន្មានខែថ្មីៗនេះ។ ពួកគេអះអាងថា ពួកគេរត់គេចពីការធ្វើទុក្ខបុកម្នេញនៅក្នុងមាតុប្រទេសរបស់គេ ហើយបានស្នើសុំម្តងហើយម្តងទៀតនូវជំនួយសហប្រជាជាតិក្នុងការជួយពួកគេឲ្យធ្វើដំណើរមកដល់ភ្នំពេញដោយសុវត្ថិភាព ដើម្បីឲ្យពួកគេអាចចាប់ផ្តើមដាក់ពាក្យសុំសិទ្ធិជ្រកកោន។
បេសកកម្មសហប្រជាជាតិថ្មីៗបំផុតដើម្បីទាក់ទងម៉ុងតាញ៉ានៅខេត្តរតនគិរី បានបញ្ចប់កាលពីសប្តាហ៍មុន ក្រោយពីអាជ្ញាធរមូលដ្ឋានបានរារាំងមន្ត្រីសហប្រជាជាតិមិនឲ្យធ្វើដំណើរនៅក្នុងខេត្តនេះ ដោយនិយាយថា បេសកកម្មនោះមិនទទួលបានការអនុញ្ញាតពីចៅហ្វាយខេត្ត ឬ ពីក្រសួងមហាផ្ទៃទេ។
ការហូរចូលនៃក្រុមម៉ុងតាញ៉ាថ្មីៗបំផុតពីប្រទេសវៀតណាមបានចាប់ផ្តើមនៅខែតុលា ហើយគេឃើញមានពួកគេជាង៦០នាក់ដែលបានឆ្លងច្រកព្រំដែន ដើម្បីស្វែងរកសិទ្ធិជ្រកកោន។
អគ្គនាយកដ្ឋានអន្តោប្រវេសន៍របស់ក្រសួងមហាផ្ទៃនាពេលបច្ចុប្បន្ននេះកំពុងដំណើរការលើពាក្យសុំសិទ្ធិជ្រកកោនរបស់ម៉ុងតាញ៉ា១៣នាក់ ចំណែកឯ១០នាក់ផ្សេងទៀតកំពុងស្ថិតនៅក្នុងភ្នំពេញ ដោយរង់ចាំដាក់ពាក្យសុំសិទ្ធិជ្រកកោន។
លោក អ៊ុក ហៃសិលា ប្រធានផ្នែកស៊ើបអង្កេតនៅនាយកដ្ឋានអន្តោប្រវេសន៍ក្រសួងមហាផ្ទៃបានមានប្រសាសន៍ថា លោកមិនមានព័ត៌មានទាក់ទងនឹងការបាត់ខ្លួនក្រុមម៉ុងតាញ៉ាទេ ប៉ុន្តែប្រសិនបើពួកគេត្រូវរកឃើញនឹងចាត់ទុកជាអន្តោប្រវេសន៍ខុសច្បាប់នោះ នាយកដ្ឋានរបស់លោក “នឹងចាត់វិធានការតាមផ្លូវច្បាប់”។
លោកស្រី វីវៀន តាន (Vivian Tan) មន្ត្រីផ្នែកព័ត៌មានប្រចាំតំបន់នៅការិយាល័យឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បាននិយាយថា អ្នកស្រីមិនទទួលបានព័ត៌មានណាមួយដែលទាក់ទងនឹងម៉ុងតាញ៉ា៣៦នាក់នោះទេ។ ការិយាល័យឧត្តមស្នងការទទួលបន្ទុកសិទ្ធិមនុស្សរបស់សហប្រជាជាតិនៅក្រុងភ្នំពេញមិនបានឆ្លើយតបទៅនឹងសំណើសុំអត្ថាធិប្បាយឡើយ៕ (រាយការណ៍បន្ថែមដោយ George Wright) រើន និង និត