ការខ្វែងគំនិតរវាងសម្តេចក្រុមព្រះ នរោត្តម រណឫទ្ធិ ប្រធានបក្សថ្មីរបស់គណបក្សហ៊្វុនស៊ីនប៉ិច និងលោក ញឹក ប៊ុនឆៃ អនុប្រធានបក្សទី២ ទំនងជាកាន់តែខ្លាំងឡើង បន្ទាប់ពីអ្នកគាំទ្របក្សមិនចង់ឲ្យមានការផ្លាស់ប្តូរស្លាកសញ្ញាបក្ស។
នៅក្នុងសន្និសីទកាសែតមួយដែលរៀបចំឡើងនៅឯគេហដ្ឋានរបស់លោកក្នុងក្រុងភ្នំពេញកាលពីរសៀលនេះ លោក ញឹក ប៊ុនឆៃ អនុប្រធានបក្សទី២ បានមានប្រសាសន៍ថា សមាជិកគណបក្សហ៊្វុនស៊ិនប៉ិច សំុឲ្យរក្សាទុកស្លាកសញ្ញាបក្សដដែល ព្រោះថា ស្លាកសញ្ញានេះមានប្រជាពលរដ្ឋក្នុងស្រុកនិងក្រៅស្រុកស្គាល់យូរណាស់មកហើយ ។
លោក ប៊ុនឆៃ បានមានប្រសាសន៍ថា “ប្រជាពលរដ្ឋតាមមូលដ្ឋានភាគច្រើនមិនចង់ឲ្យដូរឡូហ្គូគណបក្ស ហើយក៏មិនឲ្យទម្លាក់ស្លាកគណបក្សហ៊្វុនស៊ិនប៉ិចដែរ។ ខ្ញំុក៏យល់ដូចប្រជាពលរដ្ឋដែរពីព្រោះឡូហ្គូនេះ ប្រជាពលរដ្ឋនិងអន្តរជាតិបានស្គាល់ច្បាស់យូរហើយ”។
កាលពីសប្តាហ៍មុន ការខ្វែងគំនិតគ្នាទាក់ទិននឹងនរណាមានសិទ្ធិចេញលិខិតហ៊្វុនស៊ិនប៉ិចជាផ្លូវការបានផ្ទុះឡើង ចំពេលមានការខិតខំរបស់គណបក្សនេះដើម្បីរួមបញ្ចូលអតីតភាគី ដែលមានជម្លោះផ្ទៃក្នុង បន្ទាប់ពីសម្តេចក្រុមព្រះ នរោត្តម រណឫទ្ធិ បានយាងត្រឡប់មកធ្វើជាមេដឹកនាំវិញកាលពីខែមុន។
លោក ប៊ុនឆៃបានបញ្ជាក់ថា “បើយើងរួបរួមគ្នាមិនបានទេ កំុសង្ឃឹមថាបានកៅអីឲ្យសោះ”។ លោក ប៊ុនឆៃបាននិយាយថា សម្តេចក្រុមព្រះ នរោត្តម រណឫទ្ធិ គួរតែពិភាក្សាជាមួយមន្ត្រីបក្សជាមុនសិន មុននឹងសម្រេចតែងតាំងមន្ត្រីណាម្នាក់នៅក្នុងបក្ស។
សម្តេចក្រុមព្រះ រណឫទ្ធិ បានយាងត្រឡប់មកធ្វើជាប្រធានបក្សហ៊្វុនស៊ិនប៉ិចវិញ កាលពីថ្ងៃទី១៩ ខែមករា ដោយអតីតប្រធាន ព្រះអង្គម្ចាស់ក្សត្រី នរោត្តម អរុណរស្មី និង អគ្គលេខាធិការ លោក ញឹក ប៊ុនឆៃ កាន់តួនាទីជាប្រធានទី១ និងអនុប្រធានទី២។ លោក ប៊ុនឆៃបាននិយាយថា លោកនឹងជួបជាមួយសម្តេចក្រុមព្រះនៅថ្ងៃស្អែកនេះ៕