38 C
Phnom Penh

នគរ​បាល​និរទេស​ម៉ុងតាញ៉ា​​៣៦​នាក់ បន្ទាប់ពី​ពួកគេ​ប៉ុនប៉ងធ្វើដំណើរមកភ្នំពេញ

ដោយ ឌឹ ខេមបូឌា ដេលី

បទវិភាគ

អង្គការ​សហប្រជាជាតិ​ និង​អ្នកភូមិ​មូលដ្ឋាន​​បាន​ឲ្យ​ដឹង​កាលពី​ម្សិលមិញ​ថា អ្នក​ស្វែង​រក​សិទ្ធិ​ជ្រក​កោន​ជនជាតិ​ភាគ​តិច​ម៉ុងតាញ៉ា​ចំនួន​៣៦​នាក់ ដែល​បាត់​ខ្លួន​កាលពី​សប្ដាហ៍​មុន​ បន្ទាប់ពី​ពួកគេ​បាន​ចាក​ចេញ​ពី​កន្លែង​លាក់​ខ្លួន​នៅ​ក្នុង​ព្រៃ​ខេត្ត​រតនគិរី ត្រូវ​បាន​ចាប់​ខ្លួន​ និង​និរទេស​ត្រឡប់ទៅ​ប្រទេស​វៀតណាម​វិញ។

លោកស្រី វ៉ានហៀ លី (Wan-Hea Lee) តំណាង​ប្រចាំប្រទេស​​​នៅ​ការិយាល័យ​ឧត្ដម​ស្នង​ការ​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស បាន​លើក​ឡើង​​តាម​រយៈ​អុីម៉េល​មួយ​ថា ក្រុម​ជនជាតិ​ភាគ​តិច​ម៉ុងតាញ៉ា​នេះ​ ដែល​ប៉ុន​ប៉ង​ចាក​ចេញ​ពី​ខេត្ត​រតនគិរី​ទៅ​រាជធានី​ភ្នំពេញ​កាលពី​យប់​ថ្ងៃពុធ ត្រូវ​បាន​​និរទេស​នៅ​ក្នុង​ថ្ងៃ​ដដែល​។

លោកស្រី​​បាន​មាន​ប្រសាសន៍​ថា “តាម​​អ្វី​ដែល​យើង​បាន​ដឹង​ច្បាស់ ការ​និរទេស​ខ្លួន​នេះ​ត្រូវ​បាន​​ធ្វើ​ឡើង​នៅ​ថ្ងៃ​ទី​២៤​ និង​ថ្ងៃទី​២៥ ខែកុម្ភៈ”។

កាលពី​សប្ដាហ៍​មុន លោក មឿង ស៊ីនាថ អ្នក​នាំពាក្យ​សាលា​ខេត្ត​រតនគិរី បាន​លើក​ឡើង​ថា ជនជាតិ​​ភាគ​តិច​ម៉ុងតាញ៉ា​​ដែល​ជាក្រុម​ជនជាតិ​ភាគ​តិច​មក​ពី​តំបន់​ខ្ពង់រាប​ភាគកណ្ដាល​ប្រទេស​វៀតណាម​ចំនួន​បួន​នាក់​ផ្សេង​ទៀត​​ត្រូវ​បាន​ចាប់​ខ្លួន​កាលពី​​ថ្ងៃ​អង្គារ ហើយ​ត្រូវ​បាន​ប្រគល់​​ទៅ​ឲ្យ​អាជ្ញាធរ​វៀតណាម​។

គេ​មិន​អាច​ទាក់​ទង​លោក ស៊ីនាថ បាន​ទេ​កាលពី​ម្សិលមិញ​។

អ្នកភូមិ​ជនជាតិ​ដើម​ភាគ​តិច​ចារ៉ាយ​ម្នាក់​ ដែល​ស្នើ​សុំ​មិន​បញ្ចេញ​ឈ្មោះ​ ព្រោះ​ខ្លាច​ក្រែង​មាន​ការ​ធ្វើ​ទុក្ខ​បុក​ម្នេញ​ពី​នគរ​បាល​​បាន​ឲ្យ​ដឹង​ថា ជនជាតិ​ភាគ​តិច​ម៉ុង​តាញ៉ា​ទាំង​៣៦​នាក់​នេះ បាន​​ធ្វើ​ដំណើរ​ដោយ​ថ្មើ​ជើង​ចាក​ចេញពី​ស្រុក​អូរ​យ៉ាដាវ និង​ស្រុក​លំផាត់ ជា​ពីរក្រុម​ ដោយ​មួយ​ក្រុមៗ​មានគ្នា​១៨​នាក់។

អ្នក​ភូមិ​ជនជាតិ​ដើម​ភាគ​តិច​ចារ៉ាយ​រូប​នេះ​បាន​និយាយ​ថា “យើង​សម្រេច​បញ្ជូន​​ជន​ភៀស​ខ្លួន​ជនជាតិ​ភាគ​តិច​ម៉ុងតាញ៉ា​ទៅ​ភ្នំពេញ ព្រោះ​​យើង​គ្មាន​មនុស្ស​ទៅ​មើល​ថែទាំ​ពួកគេ​។ អ្នកភូមិ​ខ្លះ​មិន​ហ៊ាន​ទៅ​មើល​ថែទាំពួកគេ​ទេ ព្រោះ​​ខ្លាច​ក្រែង​ត្រូវ​បាន​ចាប់​ខ្លួន​ដោយ​សារ​ជួយ​ជនជាតិ​ភាគ​តិច​ម៉ុងតាញ៉ាទាំង​នេះ​”។

អ្នកភូមិ​រូប​នេះ​បាន​ឲ្យ​ដឹង​ទៀត​ថា នគរ​បាល​បាន​ចាប់​ខ្លួន​ក្រុម​ទាំង​ពីរ​នេះ​នៅ​ពាក់​កណ្ដាល​អធ្រាត្រ​ថ្ងៃ​សុក្រ ​នៅភាគខាង​លិច​ស្រុក​កូនមុំ។ អ្នកភូមិ​រូប​នេះ​បាន​បន្ថែម​ថា នៅ​មាន​​ជនជាតិ​ភាគ​តិច​ម៉ុងតាញ៉ា​​ចំនួន​ប្រាំនាក់​ទៀត​កំពុង​លាក់​ខ្លួន​ក្នុង​ស្រុក​អូរយ៉ាដាវ។

លោក ឆាយ ធី អ្នក​សម្រប​សម្រួល​​នៅ​អង្គការ​សិទ្ធិ​មនុស្ស​អាដហុក​ប្រចាំ​ខេត្ត​នេះ បាន​លើក​ឡើង​ថា លោក​ ខ្លាន ហឿន អាយុ​៤២​ឆ្នាំ ជា​អ្នកភូមិ​ជនជាតិ​ដើមភាគ​តិច​ចារ៉ាយ មក​ពី​ស្រុក​អូរយ៉ាដាវ ​ត្រូវ​បាន​ចាប់​ខ្លួន​​ពេល​ទៀប​ភ្លឺ​ឈាន​ចូល​ព្រឹក​ថ្ងៃ​សុក្រ​ ខណៈ​ប៉ុន​ប៉ង​ជួយ​​​ជនជាតិ​ភាគ​តិច​ម៉ុងតាញ៉ា​ទាំង​នេះ​ឲ្យ​មក​ភ្នំពេញ​។

លោក​បាន​មាន​ប្រសាសន៍​ថា “ជន​ភៀស​ខ្លួន​ម្នាក់​ក្នុង​ចំណោម​ជន​ភៀស​ខ្លួន​ទាំង​នេះ​បាន​ទៅ​ដល់​ប្រទេស​វៀតណាម​ហើយ ហើយ​បាន​​ទូរស័ព្ទ​​ប្រាប់​យើង​ថា នគរ​បាល​​បាន​ចាប់​ខ្លួន​ពួកគេ​ ហើយ​បញ្ជូន​ចូល​​រថយន្ត។ ពួកគេ​​ក៏​បាន​ចាប់​ខ្លួន​លោក ខ្លាន ហឿន ហើយ​​ដឹក​តាម​រថយន្ត​មួយ​ដាច់​ដោយឡែក​ផ្សេង​ទៀត​ចេញទៅ​បាត់​”។

លោក ឆាយ ធី បាន​លើក​ឡើង​ទៀត​ថា ប្អូន​ប្រុស​របស់​លោក ខ្លាន ហឿន ឈ្មោះ ខ្លាន ដុំ អាយុ​៣៨​ឆ្នាំ​ បាន​​ដាក់​ពាក្យ​បណ្ដឹង​មក​កាន់​អង្គការ​សិទ្ធិ​មនុស្ស​អាដហុក​កាលពី​ថ្ងៃសៅរ៍។ នៅ​ពេល​ទាក់​ទង​កាលពី​ម្សិលមិញ លោក ខ្លាន ដុំ បាន​លើក​ឡើង​ថា លោក​សង្ឃឹម​ថា អង្គការ​សិទ្ធិ​មនុស្ស​នេះ​​នឹង​អាច​ជួយ​គាត់​ក្នុង​ការ​ស្វែងរក​បង​ប្រុស​​ខ្លួន​។

លោក​បាន​និយាយ​ថា “ខ្ញុំ​គិត​ថា នគរ​បាល​ប្រហែល​ជា​ចាប់​ខ្លួន​បង​ប្រុស​របស់​ខ្ញុំ ដោយ​សារ​គាត់​​ដឹក​នាំ​ក្រុម​ភៀស​ខ្លួន​ជនជាតិ​ភាគ​តិច​ម៉ុងតាញ៉ា​ទាំង​៣៦​នាក់​នេះ។ ខ្ញុំ​ចង់​ឲ្យ​អង្គការ​អាដហុក​ជួយ​ខ្ញុំ​រក​ការ​ពិត​ ទោះបីជា​ឥឡូវ​នេះ​គាត់​​កំពុង​ស្ថិត​ក្រោម​ការ​​ចាប់​ខ្លួន​ក៏ដោយ​”។

ទាំង​មន្ត្រី​ថ្នាក់​ស្រុក និង​មន្ត្រី​ថ្នាក់​ខេត្ត​សុទ្ធ​តែ​បដិសេធ​មិន​ធ្វើ​អត្ថាធិប្បាយ​ ឬ​មិន​អាច​ទាក់​ទង​បាន​ឡើយ​កាលពី​ម្សិលមិញ​។

អ្នកភូមិ​​ជនជាតិ​ភាគ​តិច​ចារ៉ាយ​ម្នាក់​ទៀត​អាយុ​៤៥​ឆ្នាំ ដែល​រស់​នៅ​ក្នុង​ឃុំ​យ៉ាទុង ស្រុក​អូរយ៉ាដាវ បាន​លើក​ឡើង​ថា ខ្លួន​បាន​និយាយ​ជាមួយ​ជនជាតិ​ភាគ​តិច​ម៉ុងតាញ៉ា​ម្នាក់​​​ឈ្មោះ សៀវ សល់ ដែល​គេ​និរទេស​ខ្លួន​ទៅវិញ​តាម​រយៈ​ទូរស័ព្ទ​កាលពី​ថ្ងៃសៅរ៍។

អ្នកភូមិ​រូប​នេះ​បាន​និយាយ​ថា ” គាត់​​ប្រាប់​ខ្ញុំ​ថា គាត់​​បាន​ទៅ​ដល់​ស្រុក​កំណើត​ក្នុង​ប្រទេស​វៀតណាម​វិញ​ហើយ។ ស្ត្រី​រូប​នេះ​បាន​ប្រាប់​ខ្ញុំ​​បន្ទាប់ពី​ទៅ​ដល់​ស្រុក​កំណើត​វិញ​ថា គាត់​​មិន​អី​ទេ ប៉ុន្តែ​​អាជ្ញាធរ​​បាន​ខឹង​យ៉ាង​ខ្លាំង ដោយ​សារ​នាង​រត់​ចេញពី​ប្រទេស​វៀតណាម”។

អ្នកភូមិ​រូប​នេះ​បាន​លើក​ឡើង​ទៀត​ថា អ្នកស្រី សល់ បាន​និយាយ​ថា គាត់​មកពី​ស្រុក​ Chu Puh ខេត្ត​ Gia Lai ​ប្រទេស​វៀតណាម ហើយ​មិន​ដឹង​ថា​អ្វី​បាន​កើត​ឡើង​​លើ​​ជនជាតិ​ភាគ​តិច​ម៉ុងតាញ៉ា​ចំនួន​៣៥​នាក់​ផ្សេង​ទៀត​ឡើយ​។

ក្រៅពី​ជនជាតិ​ភាគ​តិច​ម៉ុងតាញ៉ា​ចំនួន​ប្រាំ​នាក់​ដែល​កំពុង​លាក់​ខ្លួន​នៅ​ក្នុង​ខេត្ត​រតនគិរី​នៅឡើយ ​មាន​​ជនជាតិ​ភាគ​តិច​ម៉ុងតាញ៉ា​ចំនួន​១៣​នាក់​ សព្វ​ថ្ងៃ​​កំពុង​រស់​នៅ​ក្នុង​រាជធានី​ភ្នំពេញ​ និង​កំពុង​​ស្ថិត​ក្នុង​ដំណើរ​ការ​ដាក់ពាក្យ​ស្នើ​សុំសិទ្ធិ​ជ្រក​កោន​ពី​​នាយក​ដ្ឋាន​ជនភៀស​ខ្លួន​នៅ​ក្រសួង​មហាផ្ទៃ។ ហើយ​ជនជាតិ​ភាគ​តិច​ម៉ុងតាញ៉ា​ចំនួន​១០​នាក់​ផ្សេងទៀត​កំពុង​តែ​រង់ចាំ​នៅ​ក្នុង​រាជធានី​​ ដើម្បីទទួល​បាន​ការ​អនុញ្ញាត​ឲ្យ​ដាក់​ពាក្យ​សុំ​សិទ្ធិ​ជ្រក​កោន​។

លោក សុខ​ ផល អគ្គនាយក​នៃ​អគ្គនាយកដ្ឋាន​អន្តោប្រវេសន៍​​បាន​បដិសេធ​មិន​ធ្វើ​អត្ថាធិប្បាយ​ឡើយ​។

ជនជាតិ​ភាគ​តិច​ម៉ុងតាញ៉ា​ជាង​៧០​នាក់ បាន​​ឆ្លង​កាត់​ព្រំដែន​ចូល​មក​ប្រទេស​កម្ពុជា​តាំង​ពី​ខែ​តុលា​មក​ម្លេ៉ះ ហើយ​​​ពួកគេ​ទាំង​អស់​សុទ្ធ​តែ​អះអាង​ថា ខ្លួន​រត់គេច​ចេញពី​ការ​កៀប​សង្កត់​ផ្នែក​នយោបាយ និង​សាសនា​នៅ​ក្នុង​ប្រទេស​វៀតណាម។ ប៉ុន្តែ​អាជ្ញាធរ​នៅ​ក្នុង​ខេត្ត​រតនគិរី​តែង​តែ​ចាត់ទុក​ក្រុម​នេះ​ម្ដង​ហើយ​ម្ដង​ទៀត​ថា ជា​ “ជន​អន្តោប្រវេសន៍​ខុស​ច្បាប់” ដោយ​គំរាម​និរទេស​ពួកគេ​ និង​ចាប់​ខ្លួន​អ្នកភូមិ​មូលដ្ឋាន​ជន​ជាតិ​ខ្មែរ​ណា​ដែល​​រក​ឃើញ​ថា កំពុង​ជួយ​ឬលាក់ពួកគេ​។

ថ្វីបើ​ខ្លួន​ខ្វះ​មេត្តាធម៌​ចំពោះ​អ្នក​ស្វែង​រក​​សិទ្ធិ​ជ្រក​កោន​ក៏ដោយ តែ​កាលពី​ខែ​កញ្ញា រដ្ឋាភិបាល​​បាន​ចុះ​ហត្ថលេខា​លើ​កិច្ច​ព្រមព្រៀង​ដែល​មាន​ការ​រិះគន់​យ៉ាង​ខ្លាំង​មួយ​ជាមួយ​អូស្ត្រាលី​ ដើម្បី​អនុញ្ញាត​ឲ្យ​មាន​ការ​​ទទួល​ស្គាល់​ជា​ផ្លូវ​ការ​នូវ​​ជនភៀស​ខ្លួនដែល​កំពុង​ត្រូវ​បាន​ឃុំខ្លួន​នៅក្នុង​​ប្រទេស​​ដែន​កោះ​ណូរូ និង​ដើម្បី​ឲ្យ​មាន​ការ​តាំង​​ទីលំនៅ​ថ្មី​នៅ​ក្នុង​ប្រទេស​កម្ពុជា ជា​ថ្នូរ​នឹង​​ជំនួយ​ជា​ទឹក​ប្រាក់​បន្ថែម​ចំនួន​៣៥លាន​ដុល្លារសម្រាប់​​រយៈ​ពេល​បួន​ឆ្នាំ​ក្រោយ​។

លោក ភៀល រ៉ូបឺតសុន (Phil Robertson) អនុប្រធាន​​អង្គការ​ឃ្លាំមើល​សិទ្ធិ​​មនុស្ស​ប្រចាំ​តំបន់​អាស៊ី​បាន​លើក​ឡើង​តាម​រយៈអុីម៉េល​មួយ​កាលពី​ម្សិលមិញ​ថា ជំហរ​របស់​ប្រទេស​កម្ពុជា​ចំពោះ​ជនជាតិ​ភាគ​តិច​ម៉ុងតាញ៉ា​ គឺ​ទទួល​រង​ឥទ្ធិពល​តែ​មួយ​គត់​ដោយ​ទំនាក់​​ទំនង​យ៉ាង​ជិត​ស្និទ្ធ​របស់​ខ្លួន​ជាមួ​យរដ្ឋាភិបាល​ក្រុង​ហាណូយ។

លោក​បានមាន​ប្រសាសន៍​ថា “កម្ពុជា​កំពុង​វាយ​តម្លៃ​ការ​ការ​ពារ​ជនភៀស​ខ្លួន​ ដោយ​ផ្អែក​លើ​ភាព​មិន​ច្បាស់​លាស់​ ហើយ​ជនជាតិ​ភាគ​តិច​ម៉ុង​តាញ៉ាមាន​ជោគ​វាសនា​មិន​ល្អ​ ដែល​រស់​នៅ​ក្នុង​ប្រទេស​ជិត​ខាង​ក្រោម​ច្បាប់​របស់​រដ្ឋាភិបាល​​ផ្ដាច់​​ការ​​ ដែលមាន​ទំនាក់ទំនង​ជាមួយ​​រដ្ឋាភិបាល​ក្រុង​ភ្នំពេញ។ តើ​យុត្តិធម៌​នៅ​ឯណាទៅ?”៕ ស៊ុយឈាង​ (រាយការណ៍​បន្ថែម​ដោយ Chris Mueller)​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស