35 C
Phnom Penh

មន្ត្រី​​គណបក្ស​​​សង្គ្រោះ​​​ជាតិ​​​​​​តវ៉ា​​​ប្រឆាំង​​​​​​ប្រធាន​​​គណបក្ស​​ខេត្ត​​​សៀម​​​រាប

ដោយ ឌឹ ខេមបូឌា ដេលី

បទវិភាគ

មន្ត្រី​​​គណបក្ស​​​សង្គ្រោះ​​​ជាតិ​​​ជាង​​​៥០​​​នាក់ស្វះ​​​ស្វែង​​​ឲ្យ​​​ដក​​​លោកស្រី កែ សុវណ្ណរតន៍​​​ សមាជិក​​​សភា​​​ពី​​​ប្រធាន​​​គណបក្ស​​​នេះ​​​ក្នុង​​​ខេត្ត​​​សៀម​​​រាប​​​​​​ដែល​​​បាន​​​ធ្វើ​​​ឡើង​​​តាម​​​រយៈ​​​ការ​​​គំរាម​​​កំហែង​​​ថា នឹង​​​នាំ​​​យក​​​ករណី​​​របស់​​ខ្លួន​​​​​​មក​​​កាន់​​​រាជ​​​ធានី​​​ភ្នំពេញ ដោយ​​​បាន​​​ធ្វើការ​​​តវ៉ា​​​កាល​​​ពី​​​ម្សិលមិញ​​​រយៈពេល​​​ពីរ​​​ម៉ោង​​​​​​នៅ​​​ខាងក្រៅ​​​​​​ទី​​​ស្នាក់​​​ការ​​​កណ្តាល​​​គណបក្ស​​​ប្រឆាំង​​​ស្ថិត​​​ក្នុង​​​ខណ្ឌ​​​មាន​​​ជ័យ​​​។cam-photo-sovannaroth

ក្រុម​​​អ្នក​​​តវ៉ា​​​រួមមាន​​​មន្ត្រី​​​ដែល​​​មាន​​​តួនាទី​​​ប្រតិបត្តិ​​​ថ្នាក់​​​ស្រុក​​​និង​​​ថ្នាក់​​​ខេត្ត​​​របស់​​​គណបក្ស​​​សង្គ្រោះ​​​ជាតិ​​​ ហើយ​​​បាន​​​ចោទ​​​ប្រកាន់​​​លោកស្រី សុវណ្ណ​​​រតន៍ ដែល​​​ជា​​​ភរិយា​​​របស់​​​លោក យឹម សុវណ្ណ ប្រធាន​​​គណៈកម្មាធិការ​​​ប្រតិបត្តិ​​​របស់​​​គណបក្ស​​​ថា បក្ខពួក​​​និយម និង​​​ចាយវាយ​​​​​​ថវិកា​​​ខុស​​​​​​ប្រក្រតី។

លោក សេង រដ្ឋា អនុ​​​ប្រធាន​​​ក្រុម​​​សម្រប​​​សម្រួល​​​គណបក្ស​​​ប្រឆាំង​​​​​​ក្នុង​​​ស្រុក​​​​​​ក្រឡាញ់​ខេត្ត​​​សៀម​​​រាប​​​​​​បាន​​​មាន​​​ប្រសាសន៍​​​ថាមន្ត្រី​​​គណបក្ស​​​​​​បាន​​​ធ្វើ​​​ដំណើរ​​​មក​​​រាជ​​​ធានី​​​ភ្នំពេញ​​​ស្នាក់​​​នៅ​​​មួយ​​​យប់​​​​​​ដើម្បី​​​ដាក់​​​​ករណី​​​របស់​ខ្លួន​​​ដោយ​​​ផ្ទាល់​​​ទៅ​​​​​​មេដឹកនាំ​គណបក្ស​។

លោក​បាន​​​មាន​ប្រសាសន៍​ថា “គោល​បំណង​សំខាន់​របស់​យើង​នៅ​ថ្ងៃ​នេះ គឺ​មក​ជួប​លោក សម រង្ស៊ី ប្រធាន​គណបក្ស​សង្គ្រោះ​ជាតិ និង​លោក កឹម សុខា អនុប្រធាន​គណបក្ស​ ដើម្បី​សុំ​ឲ្យ​លោក​ទាំងពីរ​ផ្លាស់​ប្ដូរ​លោកស្រី កែ សុវណ្ណរតន៍ សមាជិក​សភា​មណ្ឌល​សៀមរាប ដោយ​ដក​លោកស្រី​ចេញពី​ប្រធាន​ក្រុម​ការ​ងារ​ ហើយ​ដាក់​ជំនួស​ដោយ​សមាជិក​សភា​មួយ​រូប​​​ផ្សេង​​​​ទៀត​”។

លោក រដ្ឋា បាន​​​មាន​ប្រសាសន៍​ថា លោក​​​បារម្ភ​ថា លោកស្រី សុវណ្ណរតន៍ នឹង​ដឹកនាំ​គណបក្ស​សង្គ្រោះ​ជាតិ​តាម​លំអាន​ដូច​គ្នា​នឹង​គណបក្ស​ប្រជាជន​កម្ពុជា​។

លោក​ រដ្ឋា បាន​មាន​ប្រសាសន៍​ថា “យើង​បាន​ឃើញ​គណបក្ស​ប្រជាជន​កម្ពុជា​ដឹក​នាំ​ដោយ​មាន​ការ​ប្រកាន់​បក្ខពួក​និយម និង​បំផ្លាញ​ប្រទេស​ជាតិ ហើយ​យើង​ក៏​បាន​ឃើញ​ចំណុច​តូចៗ​មួយ​ចំនួន​ទៀត​ផង​ដែរ​នៅ​ក្នុង​​គណបក្ស​សង្គ្រោះ​ជាតិ​ក្នុង​ខេត្ត​សៀមរាប ដែល​ពួកគេ​​ចង់​ធ្វើ​ដូច​នេះ​ដែរ​ ប៉ុន្តែ​យើង​ចង់​ឲ្យ​មាន​ការ​ដឹក​​​នាំ​តាម​បែប​ប្រជាធិប​​​តេយ្យ​”។

លោក ប្លេក សុធា សមាជិក​ក្រុម​ការ​ងារ​គណបក្ស​សង្គ្រោះ​ជាតិ​ខេត្ត​សៀមរាប​បាន​​​មាន​ប្រសាសន៍​ថា បើ​ទោះ​ជា​លោកស្រី សុវណ្ណរតន៍ បាន​ដឹក​​​នាំ​​​គណបក្ស​ប្រឆាំង​រយៈ​ពេល​ជាង​១ទសវត្សរ៍​​ក្នុង​ខេត្ត​នេះ​ក៏​ដោយ ក៏​លោកស្រី​​បាន​ធ្វើ​​​ការ​​​ងារ​​​តិច​​​តួច​តែ​​​ប៉ុណ្ណោះ​​​​ដើម្បី​​​កែ​​​លម្អ​គណៈ​​​រចនា​​​សម្ព័ន្ធ​​​គណបក្ស​នៅ​ទីនោះ។

លោក សុធា បាន​​​មាន​ប្រសាសន៍​ថា លោកស្រី​បាន​ដឹកនាំ​​បី​អាណត្តិ​មក​ហើយ ប៉ុន្តែ​មិន​បាន​​អភិវឌ្ឍ​អ្វី​ទេ។ លោក​​​ស្រី​បក្ខ​​​ពួក​និយម​ ហើយ​លោក​​​ស្រី​តែង​តាំង​អ្នក​ដែល​ជិត​ស្និទ្ធ ​ឬ​​​គាំទ្រ​​​លោក​​​ស្រី។ លោកស្រី​ចោទ​សមាជិក​ដទៃ​​​ទៀត​​ថា បាន​គាំទ្រ​​គណបក្ស​នេះ​ ឬ​គណបក្ស​នោះ”។

លោក​បាន​បន្ថែម​ថា “លោកស្រី​បាន​ដក​សកម្មជន​ជាង​១០​នាក់ ដែល​បាន​បូជា​កម្លាំង​កាយ​ចិត្ត​ និង​​​លះ​​​បង់​​​​ទ្រព្យ​សម្បត្តិ​របស់​ខ្លួន​ដើម្បី​គណបក្ស​ ហើយ​បាន​តែង​តាំង​​មន្ត្រី​របស់​​​​ខ្លួន​ ពីព្រោះ​ពួកគេ​ជា​មន្ត្រី​ដែល​​ចាំ​តែ​ ‘ហៃអើ​’ ប៉ុណ្ណោះ”។

បន្ទាប់ពី​ការ​តវ៉ា​នៅ​មុខ​ការិយាល័យ​​របស់​លោក​​រយៈ​ពេល​ប្រហែល​ពីរ​​ម៉ោង​មក លោក​ សម រង្ស៊ី មេដឹកនាំ​គណបក្ស​ប្រឆាំង​បាន​ចេញ​មក​និយាយ​ជាមួយ​អ្នក​តវ៉ា ដោយ​អបអរ​សាទរ​ដល់​ពួក​​​គាត់​​​ដែល​បាន​មក​ដល់​រាជធានី​ភ្នំពេញ ប៉ុន្តែ​បាន​លើក​ឡើង​ថា លោក​ត្រូវ​ពិចារណា​ពី​យោបល់​របស់​អ្នក​ផ្សេង​ទៀត​នៅ​ក្នុង​ខេត្ត​សៀមរាប​សិន។

លោក​ សម រង្ស៊ី បាន​និយាយ​ទៅ​កាន់​អ្នក​តវ៉ា​ថា “អរគុណ​បង​ប្អូន​ទាំង​អស់​ដែល​ស្រឡាញ់​គណបក្ស ហើយ​មាន​​យោបល់​​​ថា​​​តើ​​​ត្រូវ​​​ពង្រឹង​គណបក្ស​របៀប​​​ណា​​​ឲ្យ​ទទួល​បាន​ជ័យ​ជម្នះ​នៅ​ការ​បោះ​ឆ្នោត​លើក​ក្រោយ” ដោយ​លោក​បាន​ពន្យល់​ថា លោក​នឹង​ធ្វើ​ដំណើរ​ទៅ​ខេត្ត​សៀមរាប​នៅ​ពេល​ឆាប់ៗ​នេះ ដើម្បី​ស្ទាប​ស្ទង់​មតិយោបល់​របស់​ប្រជា​​​ពល​រដ្ឋ។

លោក​បាន​​​មាន​ប្រសាសន៍​ថា “យើង​ត្រូវ​ជួប​​ប្រជុំ​គ្នា​ម្ដង​ទៀត​ក្នុង​ខេត្ត​សៀមរាប ហើយ​យើង​នឹង​កោះ​ហៅ​មនុស្ស​មក​ពី​គ្រប់​ទីកន្លែង​ទាំង​អស់​ដែល​មាន​មតិ​យោបល់​ខុសៗ​គ្នា ហើយ​យើង​នឹង​ស្ដាប់​យោបល់​​​ទាំង​​​នោះ​​​​ទាំង​អស់​គ្នា”។

លោកស្រី សុវណ្ណរតន៍ បាន​មាន​ប្រសាសន៍​តាម​ទូរស័ព្ទ​បន្ទាប់ពី​ការ​តវ៉ា​ថា លោកស្រី​បាន​ឃើញ​ការ​កើន​ឡើង​​សំឡេង​ឆ្នោត​របស់​គណបក្ស​​ប្រឆាំង​ក្នុង​ខេត្ត​សៀមរាប​ពី​២៩.០០០​សំឡេង​ក្នុង​ឆ្នាំ​២០០៣ ដល់​ជាង​១៤០​.០០០​សំឡេង​​ក្នុង​ឆ្នាំ​២០១៣ ហើយ​លោក​ស្រី​មិន​បារម្ភ​ពី​ការ​ស៊ើបអង្កេត​លើ​សកម្មភាព​របស់​លោកស្រី​ឡើយ​។

លោកស្រី​ សុវណ្ណរតន៍ បាន​​​មាន​ប្រសាសន៍​ថា “គណបក្ស​ប្រឆាំង​មិន​ដែល​ប្រព្រឹត្ត​អំពើ​ពុក​​​រលួយ​ទេ ពីព្រោះ​យើង​មិន​បាន​កាប់​ឈើ ​ឬ​​​ធ្វើ​អ្វី​ខុស​ឡើយ”។ លោក​ស្រី​បាន​បន្ថែម​ថា “សូម​បង្ហាញ​ភ័ស្តុ​តាង​ពី​ការ​ចោទ​ប្រកាន់​ដែល​ថា ខ្ញុំ​បាន​ចាយ​​​វាយ​​​លុយ​ដោយ​គ្មាន​តម្លាភាព​មក​។ ខ្ញុំ​នឹង​ទុក​ឲ្យ​ថ្នាក់​ដឹកនាំ​មូលដ្ឋាន​ និង​ថ្នាក់​​​ជាតិ​របស់​គណបក្ស​សង្គ្រោះ​ជាតិ​វាយ​តម្លៃ​រូប​ខ្ញុំ​​​ចុះ​​​”៕ សារុន​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស