40.2 C
Phnom Penh

តុលាការ​​​សាក​​​សួរ​​​ព្រះ​​​សង្ឃ​​​ពីរ​​​អង្គ​​ទាក់​​​ទង​​​​​​ករណី​​​ធ្វើគត​​​​​​គ្រូ​​​សូត្រ​​​ឆ្វេង​​​នៅ​​​វត្ត​​​សាមគ្គី​​​រង្សី

ដោយ ឌឹ ខេមបូឌា ដេលី

បទវិភាគ

កាល​​​ពី​​​ម្សិលមិញ ព្រះ​​​សង្ឃ​​​ពីរ​​​អង្គ​​​បាន​​​បង្ហាញ​​​វត្ត​​​មាន​​​នៅ​​​សាលា​​​ដំបូង​​​រាជ​​​ធានី​​​ភ្នំពេញ​​​​​​សម្រាប់​​​ការ​​​សាក​​​សួរ​​​​​​ទាក់ទង​​​ទៅ​​​នឹង​​​ការ​​​ធ្វើគត​​​ព្រះ​​​តេជ​​​គុណ​​​ ថាច់ ខាន់ ព្រះ​​​សង្ឃ​​​ជាន់ខ្ពស់​​​គង់​​​នៅ​​​វត្ត​​​សាមគ្គី​​​រង្សី ​​​ដោយ​​​អតីត​​​សាមណេរ​​​ម្នាក់​​​​​​កាលពី​​​ខែ​​​មករា។

អតីត​​​សាមណេរ​​​ឈ្មោះ ចាន់ សុភក្ត្រ អាយុ​​​១៨ឆ្នាំ​​​​​​ត្រូវ​​​បាន​​​ចោទ​​​ប្រកាន់​​​ពី​​​បទ​​​ធ្វើ​​​គត​​​ព្រះ​​​តេជ​​​គុណ ថាច់ ខាន់ គ្រូ​​​សូត្រ​​​ឆ្វេង​​​គង់​​​នៅ​​​វត្ត​​​នេះ​​​ដោយ​​​ប្រើ​​​កូន​​​កាំបិត​​​​​​អំឡុង​​​ពេល​​​មាន​​​អធិករណ៍​​​កើតឡើង​​​នៅ​​​វត្ត​​​នេះ​​​ស្ថិតនៅ​​​ក្នុង​​​ខណ្ឌ​​​មានជ័យ​​​កាលពី​​​ថ្ងៃ​​​ទី​​​១២ ខែ​​​មករា។

កាលពី​​​ម្សិលមិញ ព្រះ​​​តេជ​​​គុណ ថាច់ សុធន ព្រះ​​​ជន្ម​​​៣៤វស្សា​​​ត្រូវ​​​ជា​​​បងប្អូន​​​ជីដូន​មួយ​​​នឹង​​​ជន​​​រងគ្រោះ​​​ ដែល​​​ក៏​​​ជា​​​ព្រះសង្ឃ​​​គង់​​​នៅ​​​វត្ត​​​សាមគ្គី​​​រង្សី​​​​​​ដែរ​​​​​​​​​ ប៉ុន្តែ​​​មិន​​​បាន​​​ឃើញ​​​ហេតុ​​​ការណ៍​​​នេះ​​​ដោយ​​​ផ្ទាល់​​​ព្រះ​​​ភក្ត្រ​​​របស់​​​ព្រះ​​​អង្គ​​​​​​ បាន​​​បង្ហាញ​​​វត្ត​​​មាន​​​នៅ​​​សាលាដំបូង​​​រាជធានី​​​ភ្នំពេញ​​​ក្នុង​​​នាម​​​ជា​​​ភាគី​​​ដើម​​​បណ្តឹង​​​​​​រដ្ឋប្ប​​​វេណី ចំពោះ​​​ករណី​​​នេះ។

នៅ​​​ពេល​​​ត្រូវ​​​បាន​​​ទាក់​​​ទង​​​​​តាម​​​ទូរស័ព្ទ​​​នៅ​​​ពេល​​​ក្រោយ​​​មក ព្រះ​​​តេជគុណ ថាច់ សុធន បាន​​​មាន​​​សង្ឃដីកា​​​ថា ព្រះសង្ឃ​​​ទាំង​​​ពីរ​​​អង្គ​​​នេះ​​​មិន​​​ដែល​​​មាន​​​មាន​​​បញ្ហា​​​ណា​​​មួយ​​​ទេ ​​​មុន​​​ពេល​​​ ព្រះ​​​តេជគុណ​​​ ថាច់ ខាន់ បាន​​​ហៅ​​​អតីត​​​សាមណេរ​​​នោះ​​​មក​​​សួរនាំ​​​​​​បន្ទាប់​​​ពី​​​អតីត​​​សាមណេរ​​​រូប​​​នេះ​​​បាន​​​ហែក​​​សេច​​​ក្តី​​​ប្រកាស​​​របស់​​​សង្ឃ​​​​​​ដែល​​​ហាម​​​ឃាត់ អាចារ្យ​​​ម្នាក់ ដែល​​​ត្រូវ​​​បាន​​​ចោទប្រកាន់​​​ថា បាន​​​ប្រើ​​​ឈ្មោះ​​​វត្ត​​​​​​ទៅ​​​រៃអង្គាស​​​បច្ច័យ​​​សម្រាប់​​​ខ្លួន​​​ឯង  មិន​​​ឲ្យ​​​ចូល​​​ក្នុង​​​វត្ត​​​។

ព្រះ​​​តេជ​​​គុណ​​​បាន​​​មាន​​​សង្ឃដីកា​​​ថា “វា​​​ជា​​​ការ​​​ធម្មតា​​​ទេ​​​សម្រាប់​​​គ្រូ​​​សូត្រ​​​ឆ្វេង​​​ក្នុង​​​ការ​​​ហៅ​​​ព្រះ​​​សង្ឃ​​​មក​​​​​​ណែនាំ​​​នៅ​​​ពេល​​​ព្រះសង្ឃ​​​ធ្វើ​​​ខុស​​​នោះ”។

ព្រះ​​​តេជ​​​គុណ ថាច់ សុធន បាន​​​មាន​​​សង្ឃ​​​ដីកា​​​ថា ព្រះអង្គ​​​ក៏​​​បាន​​​អំពាវនាវ​​​ឲ្យ​​​តុលាការ​​​ជំរុញ​​​ករណី​​​នេះ​​​ឲ្យ​​​បាន​​​ឆាប់​​​ដើម្បី​​​ស្វែងរក​​​យុត្ត​​​ិធម៌​​ជូន​​​បងប្អូន​​​ជីដូនមួយ​​​របស់​​​ព្រះ​​​អង្គ ដែល​​​ព្រះ​​​អង្គ​​​ជឿថា ​​​ជា​​​ជន​​​រងគ្រោះ​​​ដោយសារ​​​ការ​​​រៀបចំផែនការ​​ទុក​​​ជាមុន​​​ ហើយ​​​បាន​​​ស្នើ​​សុំ​​​ប្រាក់​​​សំណង​​​ចំនួន​​​​​​២០.០០០ដុល្លារ​​​។

ព្រះ​​​តេជគុណ ថាច់ សុធន ​​​បាន​​​មាន​​​សង្ឃ​​​ដីកា​​​ថា “​​​អាត្មា​​​បាន​​​ទាម​​​ទារ​​​សំណង​​​ចំនួន​​​​​​២០.០០០ដុល្លារ​​​ដើម្បី​​យក​​​ទៅ​​​សាងសង់​​​ចេតិយ​​​សម្រាប់​​​ដាក់​​​អដ្ឋិធាតុ​​​របស់​​​ព្រះ​​​អង្គ”។

ព្រះ​​​អង្គ​​​បាន​​​មាន​​​សង្ឃដីកា​​បន្ថែម​​​ថា “អាច​​​មាន​​​នរណា​​​ម្នាក់​​​នៅ​​​ពីក្រោយ​​​​​​រឿង​​​នេះ ពីព្រោះ​​​អាត្មា​​​គិត​​​ថា​​​ លោក​​​តែមួយ​​​អង្គ​​​ឯង​​​​​​មិន​​​អាច​​​ធ្វើ​​​រឿង​​​នេះ​​​កើត​​​ទេ។ព្រះ​​​សង្ឃ​​​អង្គនេះ​​​នៅ​​​ក្មេង ហើយ​​​ទើប​​​តែ​​​មក​​​គង់​​​នៅ​​​ក្នុង​​​វត្ត​​​នេះ​​​ថ្មីៗ​​​តែប៉ុណ្ណោះ”។

ព្រះ​​​សង្ឃ​​​មួយ​​​អង្គ​​​ទៀត​​​គង់​​​នៅ​​​វត្ត​​​នេះ​​​ដែរ ព្រះនាម ថាច់ វណ្ណា ព្រះ​​​ជន្ម​​​​​​២០វស្សា ដែលមិន​​​មែន​​​ជា​​​សាច់​​​ញាតិ​​​របស់​​ព្រះសង្ឃ​​​​​​រងគ្រោះ​​​​​​​​​នោះ បាន​​​មាន​​​វត្ត​​​មាន​​​នៅ​​​តុលាការ​​​ដែរ​​​កាលពី​​​ម្សិល​​​មិញ​​​ក្នុង​​​នាម​​​ជា​​​សាក្សី។

ព្រះ​​​អង្គ​​​បាន​​​មាន​​​សង្ឃដីកា​​​បន្ទាប់​​​ពី​​​ការ​​​សាកសួរ​​​ថា ព្រះ​​​អង្គ​​​មិន​​​បាន​​​ឃើញ​​​ហេតុ​​​ការ​​​ណ៍​​​នេះ​​​កើត​​​ឡើង​​​ទេ ប៉ុន្តែ​​​ដឹង​​​ថា ព្រះ​​​សង្ឃ​​​ទាំង​​​ពីរ​​​អង្គ​​​មាន​​​អធិករណ៍​​​នឹង​​​គ្នា​​​ពីមុន​​​មក។

ព្រះ​​​តេជគុណ ថាច់ វណ្ណា បាន​​​មាន​​​សង្ឃ​​​ដីកា​​​ប្រាប់​​​តុលាការ​​​ថា “​​​អាត្មា​​​បាន​​​រត់ចេញ​​​មក​​​ក្រៅ ហើយ​​​បាន​​​ឃើញ​​​​​​ព្រះ​​​តេជគុណ ថាច់ ខាន់ ជា​​​គ្រូ​​​សូត្រ​​​ឆ្វេង​​​​​​។ ព្រះ​​​អង្គ​​​ដេក​​​ដួ​​ល​​​លើ​​​ដី ហើយ​​​មាន​​​ឈាម​​​​​​ហូរ​​​ទៀត​​​ផង”៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស