29 C
Phnom Penh

​សាលា​រាជធានី​​​នៅ​មិន​ទាន់​មាន​ដំណោះ​ស្រាយ​​ ខណៈ​អ្នកភូមិ​ទាម​ទារ​​ឲ្យ​មាន​ការ​ធ្វើ​​អន្តរាគមន៍​ក្នុង​វិវាទ​ដីធ្លី​របស់​ខ្លួន​

ដោយ ឌឹ ខេមបូឌា ដេលី

បទវិភាគ

អ្នក​ភូមិ​ប្រហែល៥០​នាក់ ដែលអះអាង​សិទ្ធិ​កាន់​កាប់​ដី​កំពង់​អភិវឌ្ឍ​នៅ​តំបន់​ជ្រោយ​ចង្វារ​ ក្នុង​រាជធានី​ភ្នំពេញ បាន​ធ្វើ​ការ​តវ៉ា​នៅ​ខាង​មុខ​​​សាលា​រាជធានី​កាលពី​ម្សិលមិញ ​ដោយ​​​ដាក់​ញត្តិ​ជួសមុខ​ឲ្យ​អ្នក​ភូមិ​ជាង​១០០គ្រួសារ​ ដើម្បី​ទាមទារ​​ឲ្យ​មាន​ការ​ធ្វើ​អន្តរាគមន៍​នៅ​ក្នុង​វិវាទ​ដីធ្លី​របស់​ខ្លួន​​​​​ជាមួយ​ក្រុម​ហ៊ុន​វិនិយោគទុន​អណិកជន​កម្ពុជា​ (OCIC)។

នៅ​ម៉ោង​ប្រហែល​៩ព្រឹក​ម្សិលមិញ អ្នក​តវ៉ា​បាន​ប្រមូល​ផ្ដុំគ្នា​នៅ​មុខ​សាលា​​រាជធានី​​ភ្នំពេញ ដោយ​មាន​លើក​បដា​ទាមទារ​​ឲ្យ​មាន​ការ​ផ្ដល់​ប្រាក់​សំណង​សម្រាប់​ដី​ដែល​​​ខ្លួន​អះអាង​ថា បាន​រស់​នៅ​តាំងពី​ដើម​ទសវត្សរ៍​ឆ្នាំ​១៩៩០​មក​ក្នុង​១ម៉ែត្រ​​ការ៉េ​ចំនួន​៤០០​ដុល្លារ។ ក្រុម​អ្នក​តវ៉ា​ទាំង​នេះ​ក៏​បាន​ជំទាស់​ទៅ​នឹង​ការ​លើក​ឡើង​របស់​លោក ពុង ខៀវសែ ប្រធាន​ក្រុម​ហ៊ុន​​ OCIC ដែល​​ត្រូវ​បាន​ចុះ​ផ្សាយ​តាម​​ប្រព័ន្ធ​ផ្ស​ព្វផ្សាយ​ក្នុង​ស្រុក​​ដោយ​លើក​ឡើង​ថា ​ការ​អភិវឌ្ឍ​កំពុង​មាន​ដំណើរ​​​ការ​ទៅ​មុខ​ “យ៉ាង​រលូន​” នោះ​ផង​ដែរ​។

កាលពី​ខែ​មុន សាលា​រាជធានី​បាន​ប្រកាស​ថា ខ្លួន​នឹង​ដោះស្រាយ​វិវាទ​ដីធ្លី​នេះ​ ដោយ​បែង​ចែក​​ដី​មួយ​ភាគ​ធំ​នៅ​ក្នុង​តំបន់​អភិវឌ្ឍន៍​​ទំហំ​៣៨៧​ហិកតា​ ក្នុង​នោះ​ផ្ដល់​១០ភាគ​រយ​ទៅ​ឲ្យ​អ្នកភូមិ ៤០ភាគ​រយ​ទៅ​ឲ្យ​ក្រុម​ហ៊ុន​ OCIC និង​៥០​ភាគរយ​ទុក​សម្រាប់​សាលា​រាជធានី។ តែ​ទោះជាយ៉ាង​ណា សាលា​រាជធានី​នៅ​មិន​ទាន់​ប្រាប់​​ឲ្យ​ដឹង​​ថា តើ​ដី​ដែល​ត្រូវ​បែង​ចែក​នោះ​មាន​ទំហំ​ប៉ុន្មាន​ ឬ​ថា​តើ​សាលា​រាជធានី​នឹងយក​​ដី​ចំណែក៥០​ភាគរយ​របស់​ខ្លួន​​ទៅធ្វើ​អ្វី​នោះ​នៅ​ឡើយទេ​​។

លោក ជា សុផាត អាយុ​៦២​ឆ្នាំ តំណាង​របស់​សហគមន៍​ដែល​រង​ការ​គំរាម​កំហែង​នៅ​តំបន់​ជ្រោយចង្វារ បាន​លើក​ឡើងថា ញត្តិ​របស់​អ្នក​តវ៉ា​បាន​អំពាវ​នាវ​ឲ្យ​សាលា​រាជធានី​ពន្លឿន​ការ​ងារ​របស់​ខ្លួន ដោយ​សម្រប​សម្រួល​នៅ​ក្នុង​វិវាទ​ដីធ្លី​នេះ។

លោក សុផាត បាន​និយាយ​ថា “ប្រសិនបើ​សាលា​រាជធានី​កាត់​ដី​៥០​ភាគ​រយ​សម្រាប់​រដ្ឋ ៤០​ភាគរយ​សម្រាប់​ក្រុម​ហ៊ុន និង​១០ភាគរយ​សម្រាប់​យើង ខ្ញុំ​នឹង​មិន​យល់​ព្រមឡើយ​ ព្រោះ​ខ្ញុំ​មិន​មែន​រាន​យក​ដី​នេះ​ដោយ​ខុស​ច្បាប់​ទេ​។ ខ្ញុំ​មិន​ដឹង​ថា តើ​លោក ពុង ខៀវសែ អាច​និយាយ​ថា ការ​អភិវឌ្ឍ​កំពុង​​មាន​ដំណើរ​ការ​ទៅ​មុខ​ដោយ​រលូន​យ៉ាង​ដូច​ម្ដេច​ឡើយ បើ​ឥឡូវ​យើង​កំពុង​តែ​ធ្វើ​ដំណើរ​​លើ​ផ្លូវ​មួយ​ដ៏រដិបរដុប​នោះ”។

លោក ទូច សំណាង អ្នក​គ្រប់​គ្រង​គម្រោង​នៅ​ក្រុម​ហ៊ុន OCIC បាន​លើក​ឡើង​​ថា សាលា​រាជធានី​គឺ​ជា​អ្នក​ទទួល​ខុស​ត្រូវ​សម្រាប់​ការ​ចរចា​ប្រាក់​សំណង​ជាមួយ​គ្រួសារ​អ្នកភូមិ។

លោក ឡុង ឌីម៉ង់ អ្នក​នាំពាក្យ​សាលា​រាជធានី​បាន​លើក​ឡើង​ថា មន្ត្រី​កំពុង​ធ្វើ​ការ​សិក្សា​ស្រាវជ្រាវ​អំពី​វិវាទ​ដីធ្លី​នេះ​នៅ​ឡើយ​ ប៉ុន្តែ​ថា គ្រួសារ​ស្ទើរ​ទាំង​អស់​គ្មាន​ឯកសារ​ផ្លូវ​ច្បាប់​ ដើម្បី​បញ្ជាក់ពី​​សិទ្ធិ​កាន់​កាប់ដី​របស់​ខ្លួន​ឡើយ​។

លោក​បានមាន​ប្រសាសន៍​ថា “តើ​យើង​អាច​បែង​ចែក​ដី​ឲ្យ​អ្នកភូមិ​ម្ដេច​នឹង​កើត​ទៅ ប្រសិន​បើ​ពួកគាត់​ស្ទើរ​ទាំង​អស់​គ្មាន​ឯកសារ​​ ឬ​ប័ណ្ណ​កម្មសិទ្ធិ​ដីធ្លី​សម្រាប់​យើង​​ដើម្បី​​​អនុម័ត​នោះ​?”៕ ស៊ុយឈាង​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស