29 C
Phnom Penh

អតីត​ឆ្មាំគុក​នៅ​សម័យ​ខ្មែរ​ក្រហម​បន្ទោស​មេគុក​ថា ជា​អ្នក​ប្រព្រឹត្ត​បទ​ឧក្រិដ្ឋ​

ដោយ ឌឹ ខេមបូឌា ដេលី

បទវិភាគ

អតីត​ឆ្មាំគុក និង​អ្នក​នាំសារ​ម្នាក់​នៅ​មន្ទីរ​សន្តិសុខ​ក្រាំង​តាចាន់ ​ក្នុង​ខេត្ត​តាកែវ បាន​ប្រាប់​សាលា​ក្ដី​ខ្មែរ​ក្រហម​កាលពី​ម្សិលមិញ​ថា ការ​​សម្លាប់​​ទាំង​អស់​នៅ​កន្លែង​នោះ​​គឺ​​សុទ្ធតែ​ជា​ស្នាដៃ​របស់​មេគុក​មួយ​ក្រុម ដែល​មានគ្នា​ប្រាំមួយ​នាក់ ហើយ​ថា ខ្លួន​ប្រហែល​ជា​ត្រូវ​បាន​​គេ​សម្លាប់​ប្រសិន​បើបាន​មើល​សំបុត្រ​ណាមួយ​ ដែល​​ត្រូវ​យក​ទៅ​ឲ្យ​គេ​។

លោក វ៉ាន សឿន ហៅ “សួន” បាន​អះអាង​ថា គាត់​ត្រូវ​គេ​បង្ខំ​ឲ្យ​ចូល​រួម​ជាមួយ​ខ្មែរ​ក្រហម​តាំង​ពី​ក្មេង​មក​ម្លេ៉ះ បន្ទាប់ពី​ទាហាន​ខ្មែរ​ក្រហម​បាន​ចូល​កាន់​កាប់​ខេត្ត​តាកែវ ក្នុង​ឆ្នាំ​១៩៧៤ ហើយ​ដំបូង​ឡើយ​គាត់​ត្រូវ​បាន​គេ​​​ប្រគល់​​តួនាទី​ឲ្យ​ធ្វើ​ជា​អ្នក​ឈ្លប​មើល​សត្រូវ​នៅ​តាម​​ជើង​ភ្នំដំរីរមៀល មុនពេល​ត្រូវ​បាន​បញ្ជូន​ឲ្យ​មក​ឈរ​ជើង​នៅ​មន្ទីរ​សន្តិសុខ​ក្រាំង​តាចាន់​នេះ​។

ក្រៅពី​តួនាទី​ដើរ​ឈ្លប​មើល​តាម​បរិវេណ​​ខាង​ក្រៅ​គុក​ លោក សឿន បាន​​ឲ្យ​ដឹង​ថា គាត់​ទទួល​បន្ទុក​ខាងចែក​សំបុត្រ​ពី​គុក​ក្រាំងតាចាន់ ទៅ​កាន់​ការិយាល័យ​មូលដ្ឋាន​ ប៉ុន្តែ​​គាត់​មិន​ដែល​ហ៊ាន​មើល​សំបុត្រ​នោះ​ទេ ព្រោះ​ខ្លាច​ក្រែង​គេ​សម្លាប់​ចោល​។

លោក សឿន បាន​និយាយ​ថា “នៅ​ពេល​នោះ តាម​ការ​អង្កេត​របស់​ខ្ញុំ គេ​មិន​មែន​គំរាម​ទេ​ គឺ​សម្លាប់​តែ​ម្ដង​។ ប្រសិន​បើ​ខ្ញុំ​ហែក​សំបុត្រ​មើល ម្លេ៉ះ​ខ្ញុំ​ប្រហែល​​ជា​ត្រូវ​គេ​សម្លាប់​បាត់​ទៅ​ហើយ​”។ លោក សឿន បាន​អះអាង​ទៀត​​ថា គាត់​បាន​ឃើញ​មេគុក​ឈ្មោះ​ តា អាន ចុះ​ហត្ថលេខា​លើ​សំបុត្រ​បន្ទាប់ពី​ “ឌុចតូច” ហៅ ស្រីថាន ដែល​បាន​បង្ហាញ​ខ្លួន​នៅ​សាលា​ក្ដី​ក្នុង​នាម​ជា​សាក្សី​​កាលពី​ខែ​មុន បាន​វាយលិខិត​ទាំង​នោះ​​រួច​។

លោក សឿន បាន​អះអាង​បន្ថែម​ទៀត​ថា គាត់​ក៏​ស្ថិត​ក្នុង​ចំណោម​ឆ្មាំគុក​មាន​សមាជិក​ចំនួន​ប្រាំមួយ​នាក់ រួមទាំង​ ឌុចតូច ដែល​​ត្រូវ​បាន​ចោទ​ប្រកាន់​ដោយ​អតីត​មេគុក​ឈ្មោះ សយ សែន ពីបទ​​រំលោភ​ និង​សម្លាប់​អំឡុង​​​​របប​កម្ពុជា​ប្រជាធិបតេយ្យ​​​ផង​ដែរ​ ប៉ុន្តែ​​គាត់​បាន​ទម្លាក់​​រាល់​ការ​ទទួល​ខុស​ត្រូវ​ទាំងអស់​ ដូច​ជា​ ការ​សម្លាប់ ការ​សួរចម្លើយ​លើ​មេគុកទាំង​ប្រាំមួយ​នាក់​​នោះ​។

លោក សឿន បាន​​កំណត់​អត្តសញ្ញាណ​មេគុក​ទាំង​នោះ​ថា មាន​ឈ្មោះ​ដូច​ជា តា អាន ចេង ពេញ ជាង មឿន និង​ ឈឿន។

នៅពេល​លោក Vicent de Wilde ជំនួយ​ការ​​​ជាន់​ខ្ពស់​​របស់​ព្រះរាជអាជ្ញា​​​បាន​សួរ​ថា ​”និយាយ​ជារួម​​ពាក់​ព័ន្ធ​នឹង​រដ្ឋបាល​ ការ​សួរ​ចម្លើយ និង​ការ​សម្លាប់​អ្នក​ទោស គឺ​សុទ្ធតែ​មេគុក​ជាអ្នក​ធ្វើ រីឯ​ឆ្មាំគុក​វិញ​មិន​មាន​ពាក់​ព័ន្ធ​ឡើយ​មែន​ទេ​? លោក​ សឿន បាន​ឆ្លើយ​ថា “មែន​”។

​ការ​បើក​សវនាការ​នៅ​ក្នុង​​ដំណាក់​កាលទី២​នៃ​សំណុំរឿង​០០២ ដែលក្នុង​នោះ​បងធំ​ទី២ នួន ជា និង​ ខៀវ សំផន អតីត​ប្រមុខ​រដ្ឋ​សម័យ​ខ្មែរ​ក្រហម​ប្រឈម​ការ​ចោទ​ប្រកាន់​រួម​ទាំង​បទ​​ប្រល័យ​ពូជសាសន៍​ផង​នោះ​នឹង​បន្ត​នៅ​ថ្ងៃ​នេះ​៕ ស៊ុយឈាង​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស