មិត្តភក្ដិ និងសាច់ញាតិរបស់ស្ត្រីរងគ្រោះ សាន់ អាស្រស់ ដែលសាកសពរបស់នាងត្រូវគេប្រទះឃើញនៅជិតចិញ្ចើមផ្លូវក្នុងខេត្តកណ្ដាលកាលពីថ្ងៃសៅរ៍ បាននាំគ្នាចាកចេញពីបន្ទប់របស់ខ្លួនកាលពីម្សិលមិញ ដោយខ្លាចក្រែងឃាតករដែលសម្លាប់ស្ត្រីរងគ្រោះរូបនេះអាចវិលត្រឡប់មកវិញ។
កញ្ញា សាន់ អាស្រស់ អាយុ២២ឆ្នាំ ជាជំនួយការអ្នកគ្រប់គ្រងនៅរោងចក្រកាត់ដេរតាក់សាន់ ក្នុងរាជធានីភ្នំពេញ បានបាត់ខ្លួនកាលពីថ្ងៃទី២០ ខែកុម្ភៈ នេះបើយោងតាមឪពុករបស់នាងដែលបានដាក់ពាក្យប្ដឹងនគរបាលអំពីការបាត់ខ្លួននេះពីរថ្ងៃក្រោយមក។ យោងតាមនគរបាលបានឲ្យដឹងថា សពរបស់នាងត្រូវគេប្រទះឃើញកាលពីថ្ងៃសៅរ៍ នៅក្នុងប្រឡាយមួយចម្ងាយពីរបីម៉ែត្រពីផ្លូវជាតិលេខ៦១ ក្នុងស្រុកពញាឮ ដោយបុរសម្នាក់ដែលចុះទៅជុះនោមនៅទីនោះ។
នគរបាលបានកំណត់អត្តសញ្ញាណជនសង្ស័យថា មានឈ្មោះ សំអុល មុនី អាយុ៣០ឆ្នាំ ជាអ្នកជិតខាងរបស់កញ្ញា សាន់ អាស្រស់ ដែលរស់នៅផ្ទះជួលក្រោយរោងចក្រក្នុងខណ្ឌដង្កោ។ សំអុល មុនី ដែលកំពុងរត់គេចខ្លួនក៏ប្រឈមនឹងការចោទប្រកាន់ពីបទរំលោភ និងប្លន់ជនរងគ្រោះផងដែរ។
អ្នកស្រី ជេស សៀងអែម អាយុ៤២ឆ្នាំ ជាម្ដាយមីងរបស់កញ្ញា សាន់ អាស្រស់ ដែលបានភៀសខ្លួនចេញពីបន្ទប់ជួលក្នុងសង្កាត់ក្រាំងពង្រ ជាមួយមិត្តភក្ដិ និងសមាជិកគ្រួសារប្រមាណ១០នាក់ បាននិយាយថា “យើងចាកចេញពីទីនោះ ព្រោះយើងខ្លាច។ យើងគិតថា ប្រហែលជាមាននរណាម្នាក់ចង់សម្លាប់ពួកយើង”។
អ្នកស្រី អ៊ុក សោភ័ណ អាយុ៤៩ឆ្នាំ ជាកម្មការិនីនៅរោងចក្រតាក់សាន់ និងដែលជួលបន្ទប់ក្បែរសាច់ញាតិ និងមិត្តភក្ដិរបស់ស្ត្រីរងគ្រោះបានបង្ហើបឲ្យដឹងថា ប្រភពចំណូលទី២របស់ស្ត្រីរងគ្រោះខ្លួនអាចជាមូលហេតុដែលនាំឲ្យកើតមានអំពើឃាតកម្មនេះ។ អ្នកស្រីបាននិយាយថា “ខ្ញុំគិតថា ឃាតករអាចមានជាប់ពាក់ព័ន្ធនឹងជម្លោះការរកស៊ី ព្រោះជនរងគ្រោះគឺជាអ្នកចងការប្រាក់”។
យោងតាមនគរបាលបានឲ្យដឹងទៀតថា ប្រាក់ចំនួន១.៥០០ដុល្លារបានបាត់ពីបន្ទប់ជួលរបស់កញ្ញា សាន់ អាស្រស់ ជាមួយនឹងគ្រឿងអលង្កា ម៉ូតូហុងដាស៊េរី២០១៣របស់នាង និងទូរស័ព្ទស្មាតហ្វូនចំនួនពីរគ្រឿងទៀត។
អ្នកស្រី សៀងអែម បានលើកឡើងទៀតថា ក្មួយស្រីរបស់គាត់ទទួលបានប្រាក់ខែយ៉ាងតិច៣០០ដុល្លារក្នុងមួយខែពីការងារជាជំនួយការអ្នកគ្រប់គ្រង ពោលគឺជិត២ដងនៃប្រាក់ខែជាមធ្យមរបស់កម្មករ។
អ្នកស្រីបានលើកឡើងបន្ថែមទៀតថា កញ្ញា សាន់ អាស្រស់ ក៏បានចងការប្រាក់ឲ្យអ្នករួមការងារ និងអ្នកជិតខាងផងដែរ រួមទាំងជនសង្ស័យ សំអុល មុនី ផង ហើយជារឿយៗនាងរំពឹងថា ពួកគេនឹងសងប្រាក់មកវិញបូករួមទាំងការប្រាក់។
អ្នកស្រីបាននិយាយថា ”ក្មួយស្រីរបស់ខ្ញុំធ្លាប់ប្រាប់ខ្ញុំថា មុនី ជួនកាលបានខ្ចីលុយនាងពី១០ដុល្លារទៅ២០ដុល្លារ ប៉ុន្តែវាមិនដែលសងប្រាក់វិញទេ ហើយបានទម្លាក់បំណុលនេះទៅឲ្យប្រពន្ធជាសង។ មុនី ដឹងយ៉ាងច្បាស់ថាក្មួយស្រីរបស់ខ្ញុំជាអ្នកចងការប្រាក់ ហើយវាសម្លាប់នាងដើម្បីយកលុយ និងគ្រឿងអលង្ការ”។
លោក លួន ហឿន អាយុ៣១ឆ្នាំ ដែលក៏រស់នៅក្បែរបន្ទប់ជួលរបស់ស្ត្រីរងគ្រោះដែរនោះបានឲ្យដឹងថា ជនសង្ស័យ សំអុល មុនី នៅតែស្នាក់នៅក្នុងបន្ទប់ជួលរបស់ខ្លួនរយៈពេលពីរថ្ងៃបន្ទាប់ពីកញ្ញា សាន់ អាស្រស់ បាត់ខ្លួន។
លោកបាននិយាយថា ” គ្មាននរណាម្នាក់ដឹងថា វាជាឃាតករទេ ព្រោះបន្ទាប់ពី អាស្រស់ បាត់ខ្លួន វានៅផ្ទះជាធម្មតា”។ លោកបានបន្ថែមថា ជនសង្ស័យនេះបានរត់គេចខ្លួនពីបន្ទប់ជួលនៅថ្ងៃទី២៣ ខែកុម្ភៈ។
កាលពីថ្ងៃច័ន្ទ លោក លី សាន់ ឪពុករបស់ស្ត្រីរងគ្រោះបានឲ្យដឹងថា សំអុល មុនី បានហៅទូរស័ព្ទទៅប្រពន្ធកាលពីថ្ងៃទី២៣ ខែកុម្ភៈ ហើយបានប្រាប់ប្រពន្ធថា ខ្លួនបានសម្លាប់កូនស្រីរបស់លោក ហើយចោលសាកសពរបស់នាងនៅខេត្តកណ្ដាល។ លោក លី សាន់ បាននិយាយដោយប្រាប់ពីឈ្មោះហៅក្រៅរបស់ សំអុល មុនី ថា “អារក្ស ធ្វើជាទៅដើររកកូនស្រីរបស់ខ្ញុំពីរថ្ងៃបន្ទាប់ពីនាងបាត់ខ្លួន។ វាបានប្រាប់ខ្ញុំនៅពេលនោះថា វាអត់ដឹងពីការបាត់ខ្លួនរបស់កូនស្រីខ្ញុំទេ”៕ ស៊ុយឈាង