មន្ត្រីនគរបាលម្នាក់បាននិយាយកាលពីម្សិលមិញថា សាលាដំបូងខេត្តក្រចេះកាលពីថ្ងៃអង្គារ បានចោទប្រកាន់កសិករម្នាក់ពីបទចាប់រំលោភក្មួយស្រីអាយុ៨ឆ្នាំរបស់ខ្លួនជាច្រើនដងនៅផ្ទះរបស់ខ្លួនក្នុងស្រុកសំបូរ កាលពីខែមុន។
យោងតាមលោក ហួត លឹមហា៊ង នាយការិយាល័យនគរបាលព្រហ្មទណ្ឌកម្រិតធ្ងន់ខេត្តបានឲ្យដឹងថា បុរសឈ្មោះ សួន វួច អាយុ៤៩ឆ្នាំ ត្រូវបានចាប់ខ្លួនកាលពីថ្ងៃច័ន្ទ ពីបទចាប់រំលោភក្មួយស្រីរបស់ខ្លួនបីដងនៅផ្ទះរបស់ខ្លួនស្ថិតក្នុងឃុំកំពង់ចាម កាលពីដើមខែកុម្ភៈ។
លោក លឹមហា៊ង បានមានប្រសាសន៍ថា “តុលាការបានចោទប្រកាន់ជននេះពីបទរំលោភដោយមានស្ថានទម្ងន់ទោស”។ លោកបានបន្ថែមថា សួន វួច ត្រូវបានបញ្ជូនទៅពន្ធនាគារខេត្តកាលពីម្សិលមិញ។
លោក លឹមហា៊ង បានមានប្រសាសន៍ថា បើទោះណាជាជនសង្ស័យរូបនេះបដិសេធការចោទប្រកាន់ក៏ដោយ ក៏ការធ្វើកោសល្យវិច័យបង្ហាញថា ក្មេងស្រីរូបនេះត្រូវបានរំលោភដែរ។
លោក ឈិន សម្បូរ អធិការនគរបាលស្រុកបានមានប្រសាសន៍កាលពីថ្ងៃអង្គារថា សួន វួច បានចាប់រំលោភក្មួយស្រីរបស់ខ្លួនកាលពីថ្ងៃទី៥ ខែកុម្ភៈ បន្ទាប់ពីសុំឲ្យឪពុកម្ដាយនាងនាំនាងមកផ្ទះរបស់ខ្លួន ដើម្បីឲ្យនាងនៅលេងជាមួយបងប្អូនជីដូនមួយនាង។
លោក សម្បូរ បានមានប្រសាសន៍ថា ជាង៣សប្ដាហ៍ក្រោយមក គឺនៅថ្ងៃសៅរ៍ ក្មេងស្រីរូបនេះបានប្រាប់ឪពុកម្ដាយរបស់ខ្លួនពីអ្វីដែលបានកើតឡើង ហើយពួកគាត់បានដាក់ពាក្យបណ្ដឹងទៅនគរបាលឃុំ។
លោកបានមានប្រសាសន៍ថា “ជនសង្ស័យរូបនេះបានរំលោភនាងបីដងនៅថ្ងៃនោះ មុនពេលនាំនាងទៅផ្ទះវិញ។ ជននេះក៏បានគំរាមសម្លាប់នាងផងដែរ ប្រសិនបើនាងប្រាប់ឪពុកម្ដាយរបស់ខ្លួន ឬនរណាម្នាក់នៅក្នុងភូមិ”៕ សារុន