សមាគមអ្នកកាសែតក្នុងស្រុកចំនួនពីរ គ្រោងដាក់ពាក្យបណ្ដឹងទៅអង្គភាពប្រឆាំងអំពើពុករលួយនៅសប្ដាហ៍នេះ ដោយចោទប្រកាន់ព្រះរាជអាជ្ញាស្ដីទីអមសាលាដំបូងខេត្តព្រះវិហារ ថាបានចោទប្រកាន់អ្នកកាសែតពីបទកំហែងទារប្រាក់ ដោយសារតែពួកគេធ្វើសេចក្ដីរាយការណ៍អំពីរបរកាប់ឈើខុសច្បាប់នៅក្នុងក្រុមគ្រួសាររបស់គាត់។
យោងតាមលោក សុខ សុវណ្ណ ប្រធាន KJDA បានឲ្យដឹងកាលពីម្សិលមិញថា ក្លឹបអ្នកកាសែតកម្ពុជា (CCJ) និងសមាគមប្រជាធិបតេយ្យអ្នកកាសែតខ្មែរ (KJDA) កំពុងសហការគ្នាដើម្បីប្រមូលភ័ស្តុតាងដែលបង្ហាញថា លោក ឡុង ស៊ីថា ព្រះរាជអាជ្ញាស្ដីទី មានផលប្រយោជន៍ផ្ទាល់ខ្លួននៅក្នុងសំណុំរឿងដែលលោកបានចាត់ការ។
លោកបានមានប្រសាសន៍ទៀតថា “ក្រុមស៊ើបអង្កេតរបស់យើងកំពុងប្រមូលរាល់ភ័ស្តុតាងពាក់ព័ន្ធនឹងផលប្រយោជន៍របស់លោក ឡុង ស៊ីថា រួមទាំងឪពុកមារបស់គាត់ឈ្មោះ ហោ សុខហុង ដែលជាវរសេនីយ៍ទោនៅក្នុងជួរកងរាជអាវុធហត្ថខេត្ត និងបក្ខពួកម្នាក់ទៀតនៅក្នុងការកាប់ឈើខុសច្បាប់ផង។ យើងមានរូបថត ហើយយើងនឹងផ្ញើវាទៅអង្គភាពប្រឆាំងអំពើពុករលួយបើមិនថ្ងៃស្អែក ថ្ងៃខានស្អែក”។
លោកបានលើកឡើងបន្តថា ឪពុកក្មេករបស់លោក ឡុង ស៊ីថា ក៏ជាប់ពាក់ព័ន្ធនៅក្នុងផែនការនេះដែរ ហើយថា ទាំងឪពុកក្មេកទាំងឪពុកមាទាំងពីរនេះសុទ្ធតែមានហាងលក់គ្រឿងសង្ហារិមផ្ទាល់ខ្លួន ដែលជាចំណុចស្នូលនៃសំណុំរឿងកំហែងទារប្រាក់មួយប្រឆាំងអ្នកយកព័ត៌មានមកពីទូរទស្សន៍អប្សរា និងទីភ្នាក់ងារព័ត៌មានកម្ពុជា (AKP) របស់រដ្ឋកាលពីខែមុន។
យោងតាមមន្ត្រីនៅក្នុងខេត្តព្រះវិហារបានឲ្យដឹងថា អ្នកកាសែត AKP ឈ្មោះ ទិត ស្រ៊ អាយុ៤៣ឆ្នាំ និងអ្នកយកព័ត៌មានឲ្យទូរទស្សន៍អប្សរាឈ្មោះ ឈឿង ចាន់ អាយុ៤៥ឆ្នាំ បានគំរាមរាយការណ៍ប្រាប់អាជ្ញាធរអំពីសកម្មភាពដឹកឈើផ្ចឹក ដែលជាឈើប្រភេទលេខ១ របស់អ្នកបើកបររថយន្តធុនធំឈ្មោះ ឈាង ម៉ៅ ប្រសិនបើឈ្មោះ ឈាង ម៉ៅ មិនបង់ប្រាក់ឲ្យទៅគាត់ចំនួន៤០០ដុល្លារទេនោះ។
លោក សុខ សុវណ្ណ បានមានប្រសាសន៍កាលពីម្សិលមិញថា ករណីនេះជាការប្រឌិតឡើងដើម្បីសងសឹកចំពោះការចុះផ្សាយព័ត៌មានកន្លងមករបស់អ្នកកាសែតទាំងនេះ និងដើម្បីឆ្លើយតបទៅនឹងការបន្តស៊ើបអង្កេតលើការកាប់ឈើនៅក្នុងខេត្តនេះ។
លោកបានថ្លែងថា “ការចាប់ខ្លួនអ្នកកាសែត AKP និងអ្នកយកព័ត៌មានឲ្យទូរទស្សន៍អប្សរាគឺជាករណីសងសឹក ពីព្រោះថ្មីៗនេះ ពោលគឺកាលពីខែតុលារ ឆ្មាំ២០១៤ មានក្រុមការងារមួយមកពីក្រសួងកសិកម្ម ដែលបានចុះទៅបង្ក្រាបហាងលក់គ្រឿងសង្ហារិមខុសច្បាប់នៅក្នុងខេត្តព្រះវិហារ។ [ពួកគេ] បានដកហូតឈើប្រណីតជាង១០០ម៉ែត្រគូបពីហាងលក់គ្រឿងសង្ហារិមចំនួន១២ ដោយមានជំនួយពីអ្នកកាសែតរបស់យើង ដែលក្រោយមកត្រូវបានចាប់ខ្លួនក្នុងពេលថ្មីៗនេះ និងឃុំខ្លួននៅក្នុងពន្ធនាគារខេត្តព្រះវិហារ”។
ប្រធាន KJDA រូបនេះបានមានប្រសាសន៍ថា ករណីកំហែងទារប្រាក់ប្រឆាំងលោក ទិត ស្រ៊ ត្រូវបានធ្វើឡើងដោយប្រើភ័ស្តុតាងមិនពិត ក្រោយពីអ្នកយកព័ត៌មានរូបនោះតាមឃ្លាំមើលការដឹកជញ្ជូនឈើប្រណីតទៅកាន់ហាងលក់គ្រឿងសង្ហារិមរបស់ព្រះរាជអាជ្ញាស្ដីទីរូបនេះ។
លោកបានមានប្រសាសន៍ទៀតថា “វាមានការរៀបចំទុកមុនបានយ៉ាងល្អ ហើយពួកគេបានចាប់ខ្លួនអ្នកកាសែតរបស់យើងដោយការថតចម្លងក្រដាសប្រាក់១០០ដុល្លារមួយសន្លឹក និងក្រដាសប្រាក់រៀល១០ម៉ឺនរៀល សរុបស្មើនឹង១២៥ដុល្លារដើម្បីធ្វើជាភ័ស្តុតាងចាប់ខ្លួនអ្នកកាសែតរបស់យើង [តាមការអះអាងថា] ពួកគេបានគំរាមកំហែងទារប្រាក់ពីអ្នកកាប់ឈើ”។
ចំណែកវរសេនីយ៍ទោ ហោ សុខហុង ដែលត្រូវជាឪពុកមា បានច្រានចោលការចោទប្រកាន់របស់លោក សុខ សុវណ្ណ ហើយបានមានប្រសាសន៍ថា លោកមិនពាក់ព័ន្ធនៅក្នុងរបរកាប់ឈើខុសច្បាប់ ឬករណីចាប់ខ្លួនអ្នកកាសែតណាម្នាក់ឡើយជុំវិញករណីកំហែងទារប្រាក់។
លោកបានមានប្រសាសន៍ទៀតថា “តាមពិតខ្ញុំមិនពាក់ព័ន្ធនឹងការចាប់ខ្លួនអ្នកកាសែត AKP ទេ ហើយខ្ញុំមិនពាក់ព័ន្ធនឹងក្រុមជួញដូរឈើគ្រញូង ឬរត់ពន្ធទាល់តែសោះ។ ភារកិច្ចរបស់ខ្ញុំគឺខុសពីអ្វីដែលពួកគេបានចោទប្រកាន់”។
ចំណែកឯព្រះរាជអាជ្ញាស្ដីទី ឡុង ស៊ីថា ក៏បានបដិសេធដែរថា លោកគ្មានផលប្រយោជន៍ណាមួយនៅក្នុងប្រតិបត្តិការកាប់ឈើខុសច្បាប់ក្នុងខេត្តព្រះវិហារឡើយ ហើយក៏មិនព្យាយាមរារាំងអ្នកកាសែតទាំងពីរនេះមិនឲ្យធ្វើសេចក្ដីរាយការណ៍នៅក្នុងខេត្តនេះដែរ។
លោកបានលើកឡើងថា “ប្រព័ន្ធផ្សព្វផ្សាយអាចចោទប្រកាន់ [យើង] អ្វីក៏បានតាមតែពួកគេចង់ ហើយខ្ញុំមិនហា៊នប្រឆាំងពួកគេទេ វាជាសិទ្ធិរបស់ពួកគេ។ ប៉ុន្តែពួកគេចាំបាច់ត្រូវគោរពច្បាប់ទម្លាប់របសខ្លួន។ យើងចាប់ខ្លួនអ្នកកាសែត AKP និងអ្នកយកព័ត៌មានឲ្យទូរទស្សន៍អប្សរា ដោយសារតែមានអ្នកប្ដឹងមកតុលាការ។ ខ្ញុំគ្មានអំណាចដេញពួកគេចេញពីខេត្តព្រះវិហារទេ”។
លោកក៏បានព្រមានដែរថា លោកនឹងប្ដឹងបកអ្នកកាសែតទាំងនេះ និងសមាគមរបស់ពួកគេវិញ ប្រសិនបើអង្គភាពប្រឆាំងអំពើរកឃើញថា លោកគ្មានទោសកំហុស។ លោកបានបញ្ជាក់ថា “បើអង្គភាពប្រឆាំងអំពើពុករលួយរកឃើញថា យើងគ្មានទោសកំហុស ហើយនេះគឺជាករណីគំរាមកំហែងនោះ យើងនឹងប្ដឹងបកពួកគេទៅតុលាការ រួមទាំងក្លឹបអ្នកកាសែតផង”៕ សុខុម