អតីតមន្ត្រីម្នាក់នៅអាជ្ញាធរជាតិប្រយុទ្ធនឹងជំងឺអេដស៍បានអះអាងនៅសប្ដាហ៍នេះថា ស្ថាប័ននេះបានក្លែងលិខិតអនុញ្ញាតឲ្យមានការចុះបំពេញបេសកកម្មនៅខេត្តចំនួនបីផ្សេងគ្នា ដើម្បីស្នើសុំការចំណាយដែលក្លែងបន្លំនោះ។
លោក លឹម ពេជ្រពិសី អតីតទីប្រឹក្សារបស់លោក អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ កាលពីថ្ងៃអង្គារបានដាក់ជូនលិខិតបណ្ដឹងផ្លូវការទៅអាជ្ញាធរជាតិប្រយុទ្ធនឹងជំងឺអេដស៍ជុំវិញការជាប់ពាក់ព័ន្ធពីបទពុករលួយ។
នៅក្នុងបទសម្ភាសកាលពីម្សិលមិញ លោក ពេជ្រពិសី បានមានប្រសាសន៍ថា លោកបានលាឈប់ពីការងាររបស់លោកកាលពីចុងឆ្នាំមុន បន្ទាប់ពីរកឃើញលិខិតបីច្បាប់នៅការិយាល័យរបស់លោក អៀង មូលី ដែលមានឈ្មោះរបស់លោកជាអ្នកដឹកនាំការចុះបំពេញបេសកកម្ម ដែលលោកមិនដែលបានធ្វើ។ លិខិតទាំងនេះនឹងផ្ដល់សិទ្ធិឲ្យសាមីខ្លួនស្នើសុំការចំណាយផ្សេង។
លោកបានមានប្រសាសន៍ថា ” ខ្ញុំសូមបញ្ជាក់ថា ពួកគេ [មេដឹកនាំអាជ្ញាធរជាតិប្រយុទ្ធនឹងជំងឺអេដស៍] មិនដែលឲ្យខ្ញុំចុះបំពេញបេសកកម្មទេ។ ខ្ញុំគិតថា ពួកគេបានចេញលិខិតទាំងនេះដើម្បីស្នើសុំថវិកាតែប៉ុណ្ណោះ ហើយនេះគឺជាទង្វើរបស់ជនពុករលួយ។
លោក ពេជ្រពិសី បានផ្ដល់ឯកសារដែលអនុញ្ញាតឲ្យលោកដឹកនាំបេសកកម្មបីផ្សេងគ្នាកាលពីឆ្នាំ២០១៤៖ គឺចុះទៅខេត្តកំពង់ឆ្នាំងរយៈពេលបីថ្ងៃ ទៅខេត្តតាកែវមួយថ្ងៃ និងទៅខេត្តព្រះវិហារបីថ្ងៃ។
លោកបានមានប្រសាសន៍ថា លោកមិនដែលបានចុះទៅទេ ហើយថា បើតាមលោកដឹងមិនដែលមានបេសកកម្មទាល់តែសោះ។
លោកបានមានប្រសាសន៍ថា ” វាអយុត្តិធម៌ចំពោះខ្ញុំ ពីព្រោះខ្ញុំមិនដែលប្រើលិខិតទាំងនេះទេ ប៉ុន្តែពួកគេ [មន្ត្រីអាជ្ញាធរជាតិប្រយុទ្ធនឹងជំងឺអេដស៍] បានប្រើលិខិតទាំងនេះដោយមានឈ្មោះរបស់ខ្ញុំ ដើម្បីស្នើសុំថវិកា ហើយយកលុយទាំងនោះដាក់ហោប៉ៅខ្លួនឯង។ ខ្ញុំបានលាលែងពីការងាររបស់ខ្ញុំកាលពីពេលថ្មីៗនេះ ពីព្រោះខ្ញុំគិតថា ពួកគេ…ប្រព្រឹត្តអំពើពុករលួយ។
លោក ពេជ្រពិសី បានមានប្រសាសន៍ថា អ្នកដឹកនាំបេសកកម្មមានសិទ្ធិស្នើសុំថវិកាសម្រាប់ចំណាយថ្លៃស្នាក់នៅសណ្ឋាគារក្នុងមួយថ្ងៃ១៥ដុល្លារសម្រាប់សមាជិកក្រុមម្នាក់ៗ ព្រមទាំងប្រាក់សម្រាប់ចំណាយថ្លៃអាហារមួយពេល៥ដុល្លារក្នុងសមាជិកក្រុមម្នាក់ៗ។
លោក អៀង មូលី មិនអាចទាក់ទងសុំអត្ថាធិប្បាយបានទេ។ ទោះជាយ៉ាងណា លោក គង់ រដ្ឋា អនុប្រធានអាជ្ញាធរជាតិប្រយុទ្ធនឹងជំងឺអេដស៍ ដែលចុះហត្ថលេខានៅលើលិខិតទាំងនោះបានបដិសេធការចោទប្រកាន់ពីបទពុករលួយ។
លោកបានមានប្រសាសន៍ថា ” ខ្ញុំសូមបញ្ជាក់ថា គ្មាននរណាម្នាក់អាចលួចលុយពីលិខិតបេសកកម្មបានទេ ពីព្រោះយើងមានដំណើរការផ្លូវច្បាប់សម្រាប់បុគ្គល ដើម្បីប្រើប្រាស់លិខិតបេសកកម្មក្នុងការស្នើសុំថវិកាពីក្រសួងសេដ្ឋកិច្ច”។
លោក រដ្ឋា បានមានប្រសាសន៍ថា លោក ពេជ្រពិសី បានបដិសេធមិនព្រមទៅបំពេញបេសកកម្មទាំងបីនេះ ហើយថា អាជ្ញាធរជាតិប្រយុទ្ធនឹងជំងឺអេដស៍បានបញ្ជូនអ្នកផ្សេង ដោយលោកបដិសេធមិនបញ្ចេញឈ្មោះអ្នកដែលទៅជំនួសលោក ពេជ្រពិសី ឡើយ។
លោកបានបន្ថែមថា លោកបានទទួលពាក្យបណ្ដឹងរបស់លោក ពេជ្រពិសី ហើយ ហើយបានសម្រេចរួចហើយថា មិនមានការចាត់វិធានការទាក់នឹងការអះអាងពីបទពុករលួយឡើយ។
លោកបានមានប្រសាសន៍ថា ” ខ្ញុំបានទទួលពាក្យបណ្ដឹងពីគាត់នៅថ្ងៃនេះមានទាំងភ័ស្តុតាងមួយចំនួនផង ប៉ុន្តែភ័ស្តុតាងនោះមិនគ្រប់គ្រាន់ដើម្បីបង្ហាញថា ឯកឧត្ដម អៀង មូលី និងខ្ញុំបានលួចលុយពីលិខិតបេសកកម្មនោះឡើយ”៕ សារុន