34 C
Phnom Penh

សកម្មជន​ការ​ពារ​សិទ្ធិស្ត្រី​នាំគ្នា​រាំជាក្រុម​ ដើម្បី​ទាមទារ​ឲ្យ​មាន​ការ​ផ្លាស់​ប្ដូរ​

ដោយ ឌឹ ខេមបូឌា ដេលី

បទវិភាគ

សកម្មជន​មួយ​ក្រុម​បាននាំគ្នា​រាំ​ជា​ក្រុម​នៅ​សួន​មុខ​វត្ត​បទុម ក្នុង​រាជធានី​ភ្នំពេញ​​កាលពី​ម្សិលមិញ ដោយ​បាន​រាំ​​ចង្វាក់​​ម៉ាឌីហ្សុន និង​ឆាឆាឆា ដើម្បី​ឲ្យ​សាធារណជន​ចាប់​អារម្មណ៍​លើ​សិទ្ធិ​របស់​ស្ត្រី​នៅមុន​ទិវា​សិទ្ធិ​នារី​អន្តរជាតិ​ ដែល​នឹង​ប្រារព្ធ​ធ្វើ​ឡើង​នៅ​ថ្ងៃ​អាទិត្យ។

កញ្ញា សេង​ រាសី ជំនួយ​ការ​នាយិការ​អង្គការ​សីលកា ជា​អង្គការ​មិន​មែន​រដ្ឋាភិបាល​ដែល​ជួយ​រៀបចំ​ព្រឹត្តិការណ៍​នេះ​បាន​និយាយ​ថា ” [យើង​] ចង់​លើក​កម្ពស់​ការ​យល់​ដឹង​ក្នុង​ចំណោម​សាធារណជន​ ជាពិសេស​យុវជន​ឲ្យពួកគេ​ចូល​រួម​ពាក់​ព័ន្ធ​នៅ​ក្នុង​យុទ្ធនាការ​របស់​យើង​។ យើង​ចង់​ធ្វើ​អ្វី​ដែល​សប្បាយ និង​ស្រស់​ស្រាយ”។

ការ​សម្ដែង​នេះ ​គឺ​ជា​ការ​សម្ដែង​មួយ​ក្នុង​ចំណោម​ការ​រាំ​សម្ដែង​ជាក្រុម​ចំនួន​បី ដែល​ត្រូវ​បាន​ធ្វើ​ឡើង​​នៅ​ក្នុង​រាជធានី​ភ្នំពេញ​កាលពី​ម្សិលមិញ ហើយ​ជា​ផ្នែក​នៃ​ព្រឹត្តិការណ៍​មួយ​ចំនួន​ ​រៀបចំ​ធ្វើ​ឡើង​ដោយ​អង្គការ​សិទ្ធិស្ត្រី​ចំនួន​​១៧ ដែល​គ្រោង​ដាក់​ញត្តិជូន​​ក្រសួង​រដ្ឋាភិបាល នៅ​ប៉ុន្មាន​ថ្ងៃ​ខាង​មុខ​ទាម​ទារ​ឲ្យ​មាន​ការ​ចាត់វិធានការ​​ឲ្យ​បាន​ខ្លាំង​ក្លា​លើ​បញ្ហា​របស់​ស្ត្រី​។

ក្នុង​ចំណោម​ការ​ទាម​ទារ​ទាំង​នោះ បញ្ហា​ដែល​ត្រូវ​ដោះ​ស្រាយ​ជា​បន្ទាន់​គឺ​សិទ្ធិ​ការ​ងារ​។

អ្នកស្រី ស៊ាន សុផល អាយុ​៤២​ឆ្នាំ ជា​កម្មការិនី​មួយ​រូប​បាន​និយាយ​នៅ​ខាង​ក្រៅ​កិច្ច​ប្រជុំ​មួយ​ក្នុង​រាជធានី​ភ្នំពេញ ជា​ទីដែល​សកម្មជន​ប្រហែល​១០០​នាក់​បាន​មក​ជួបជុំគ្នា​កាលពីព្រឹក​ម្សិលមិញ បាន​និយាយ​ថា ” នៅពេល​មាន​ស្ត្រីមាន​ផ្ទៃ​ពោះ​ ម្ចាស់​រោងចក្រ​នៅ​តែ​បង្ខំ​ពួកគេ​ឲ្យ​ធ្វើ​ការ​ ហើយ​ប្រសិន​បើ​ពួកគេ​មិន​ព្រម​ធ្វើ​ការ​នោះ​ទេ ពួកគេ​នឹង​ត្រូវ​បាន​បណ្ដេញ​ចោល”។

យោង​តាម​អ្នកស្រី សុផល បាន​​ឲ្យ​ដឹង​បន្ថែម​ទៀត​ថា កម្មករ​រោងចក្រ​ភាគច្រើន​​​ត្រូវ​បាន​គេ​ជួល​ឲ្យ​ធ្វើ​ការ​ក្នុង​កិច្ច​សន្យា​រយៈពល​ខ្លី ដែល​ជា​ហេតុ​ធ្វើ​ឲ្យ​ស្ត្រី​មានផ្ទៃ​ពោះ​ងាយ​នឹង​ត្រូវ​គេ​បណ្ដេញ​ចោល​។ ហើយ​ខណៈ​ស្ត្រី​គឺ​ជា​កម្លាំង​ភាគច្រើន​​នៅ​ក្នុង​វិស័យ​កាត់​ដេរ តម្រូវ​ការ​ផ្នែក​សុខភាព និង​អនាម័យ​របស់ពួកគេ​មិន​ត្រូវ​បាន​គេ​យក​ចិត្ត​ទុក​ដាក់​នោះឡើយ​។

លោកស្រី ធីតា ឃឹះ ប្រធាន​គណៈកម្មការ​ដើម្បី​លើក​កម្ពស់​ស្ត្រី​នៅ​ក្នុង​ឆាក​នយោបាយ ដែលជា​អង្គការ​សង្គម​ស៊ីវិល​ក្នុង​ស្រុក​ បាន​យល់​ស្រប​ថា ស្ថានភាព​នៅ​តាម​រោងចក្រ​កាត់​ដេរ​គឺ​ជា​កត្តា​ចម្បង​ដ៏គួរ​ឲ្យ​ព្រួយបារម្ភ​សម្រាប់​ស្ត្រី​ភាគច្រើន​។

លោកស្រី​បានមាន​ប្រសាសន៍​ថា “ពួកគាត់​មាន​ចំនួន​ភាគ​ច្រើន​​​ក្នុង​ចំណោម​កម្មករ​ដែលធ្វើការ​ក្នុង​វិស័យ​ឧស្សាហកម្ម​ ប៉ុន្តែ​មេដឹកនាំ​ភាគច្រើន​នៅ​ក្នុង​សហជីព​​មិនមែន​ជា​ស្ត្រីទេ គឺ​មាន​សុទ្ធ​តែ​បុរស​”។

លោកស្រី​បានមាន​ប្រសាសន៍​បន្ថែម​ថា ” បុរស​មិន​ចាប់​អារម្មណ៍​ចំពោះ​បញ្ហា​របស់​ស្ត្រី​ឡើយ ពួកគេ​គិត​ថា ស្ត្រី​មិន​មាន​សារៈសំខាន់​នៅ​ក្នុង​ការ​ចរចា​នោះទេ”។ លោកស្រី​បាន​បន្ថែម​ថា ស្ត្រី​គួរ​តែ​ទទួល​បាន​សិទ្ធិ​ក្នុង​ការទទួល​បាន​​តួនាទី​​ធ្វើ​ជា​អ្នក​ដឹកនាំ​ក្នុង​សហជីព និង​រដ្ឋាភិបាល​។

លោកស្រី​បាន​មាន​ប្រសាសន៍​បន្ថែមទៀត​ថា ” ស្ត្រី​ខ្មែរ​​មាន​ចរិត​ស្ងប់ស្ងាត់​ និយាយ​​ទន់​ភ្លន់ ដើរ​មិន​​ឲ្យ​ឮ​សំឡេង​ឡើយ។​ ប៉ុន្តែ​ឥឡូវ​នេះយើង​បាន​ធ្វើ​ឲ្យ​អ្វី​ៗទាំង​អស់​នេះ​ផ្លាស់​ប្ដូរ​ហើយ យើង​ហ៊ាន​និយាយ​ យើង​ហ៊ាន​ទាមទារ​ ហើយ​មាន​ស្ត្រី​ភាគច្រើន​ក្លាយ​ជា​សកម្មជន​​ទៀត​ផង​”៕ ស៊ុយឈាង​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស