31.8 C
Phnom Penh

លោក ហ៊ុន សែន តែងតាំង មន្ត្រីជាន់ខ្ពស់ដើម្បីត្រួតពិនិត្យ មើលកងអង្គរក្ស

ដោយ ឌឹ ខេមបូឌា ដេលី

បទវិភាគ

មេ​​​បញ្ជា​​​ការ​កង​អង្គរក្ស​​​​​​​​​បាន​និយាយ​កាលពី​ម្សិលមិញ​ថា កាលពី​សប្ដាហ៍​មុន​លោក​នាយក​រដ្ឋមន្ត្រី ហ៊ុន សែន បាន​តែង​តាំង​​មន្ត្រី​ជាន់​ខ្ពស់​១៤​រូប ក្នុង​ក្រុម​ការ​ងារ​មួយ​ដែល​ឥឡូវ​នេះ​ទទួល​ខុស​ត្រូវ​​ពិនិត្យ​មើល​កង​អង្គរក្ស​របស់​លោក អំឡុង​ការ​​ចុះ​​​រៀបចំ​​​កិច្ចការ​​​ទាំង​អស់​ដែល​លោក​និង​ភរិយា​របស់​លោក​ចូល​រួម​។

នាយ​​​ឧត្ដម​សេនីយ៍ ហ៊ីង ប៊ុនហៀង ដែល​ជា​ប្រធាន​កង​អង្គរក្ស​របស់​លោក​នាយក​រដ្ឋ​​​មន្ត្រី​បាន​មាន​ប្រសាសន៍​ថា សមាជិក​ក្រុម​ការ​ងារ​នេះ​​បាន​សហការ​​​គ្នា​​​ដើម្បី​​​ការ​ពារ​លោក​នាយក​រដ្ឋមន្ត្រី​រួច​ហើយ។

លោក​បាន​មាន​ប្រសាសន៍​ថា ” កម្លាំង​របស់​យើង​បាន​ធ្វើ​រឿង​នេះ​យូរ​មក​ហើយ ប៉ុន្តែ​​​ទើប​​ចេញ​សេចក្ដី​សម្រេច​​ផ្លូវ​ការ​តែ​ប៉ុណ្ណោះ”។

លោក ហ៊ុន សែន បាន​ចុះ​ហត្ថលេខា​លើ​សេចក្ដី​សម្រេច​នេះ​កាលពី​ថ្ងៃ​​​ទី​២៦ ខែ​កុម្ភៈ។ នាយ​​​ឧត្ដម​សេនីយ៍ ហ៊ីង ប៊ុនហៀង បាន​មាន​ប្រសាសន៍​ថា ​​សមាជិក​១៤​នាក់​ក្នុង​ក្រុម​ការ​ងារ​នោះ​រួម​មាន​ខ្លួន​លោក​ផង​នោះ នឹង​សម្រប​សម្រួល​គ្នា​​​ទៅ​​​វិញ​​​ទៅមក​​​​ដើម្បី​ធានា​សុវត្ថិភាព​ដល់​លោក​នាយក​រដ្ឋមន្ត្រី និង​លោកស្រី​ ប៊ុន រ៉ានី ភរិយា​របស់​លោក​។

លោក​បាន​​​មាន​ប្រសាសន៍​ថា ” នៅ​ពេល​…លោក​ទាំង​ពីរ​ទៅ​កន្លែង​ណា យើង​ត្រូវ​ចុះ​​​រៀបចំ​​​កិច្ច​​​ការ​​​​​​សន្តិសុខ​នៅ​ទីនោះ​ជាមុន”។ លោក​បាន​បន្ថែម​ថា សមាជិក​ក្រុម​ការ​ងារ​ទាំង​អស់​នឹង​មាន​វត្តមាន​នៅ​ពេល​កង​អង្គរក្ស​របស់​លោក​នាយក​រដ្ឋមន្ត្រី​ត្រូវ​បាន​ដាក់​ពង្រាយ​។

លោក​បាន​បន្ថែម​ថា ” ប្រសិន​បើ​យើង​មិន​អាច​ទៅ​បាន​ទេ យើង​ត្រូវ​ចាត់​តាំង​នរណា​ម្នាក់​ឲ្យ​ទៅ​ជំនួស​យើង”។

នាយ​​​ឧត្ដម​សេនីយ៍ យូ ស៊ុនឡុង ប្រធាន​ក្រុម​ការ​ងារ និង​ជា​រដ្ឋលេខាធិការ​ក្រសួង​មុខងារ​សាធារណៈ​​មិន​អាច​ទាក​់​ទង​សុំ​អត្ថាធិប្បាយ​បាន​ទេ។

បន្ថែម​ទៅ​នឹង​​​នាយ​​​ឧត្ដម​សេនីយ៍ ហ៊ីង​ ប៊ុនហៀង និង​នាយ​​​ឧត្ដម​សេនីយ៍ យូ ស៊ុនឡុង ក្រុម​ការ​ងារ​នេះ​ក៏​មាន​លោក ហ៊ុន ម៉ាណែត កូន​ប្រុស​របស់​លោក​ ហ៊ុន សែន និង​​ជា​ឧត្ដម​សេនីយ៍​ឯក​ក្នុង​ជួរ​កង​យោធពល​ខេមរ​​​ភូមិន្ទ​ផង​ដែរ។

យោង​តាម​ច្បាប់​ចម្លង​នៃ​សេចក្ដី​សម្រេច​នេះ ក្រុម​ការ​ងារ​​​ “​នឹង​សហការ​ជាមួយ​សមត្ថកិច្ច​​​​គ្រប់​លំដាប់​ថ្នាក់​​​អំពី​​​​បញ្ហា​សន្តិសុខ​ និង​​​ស​ុវត្ថិ​​​ភាព ដើម្បី​ទប់​ស្កាត់​បញ្ហា និង​​​​ហេតុ​​​ការណ៍​​​​នានា​ដែល​​​អាច​​​កើតមាន​​​អំឡុង​ពិធី​ទាំង​អស់​” ដែល​ចូល​រួម​ដោយ​លោក​នាយក​រដ្ឋមន្ត្រី និង​លោក​ស្រី ប៊ុន រ៉ានី។

សេចក្ដី​សម្រេច​នេះ​ក៏​​​អំពាវ​នាវ​ដល់​គ្រប់​ក្រសួង​ និង​​​ទីស្ដីការ​គណៈរដ្ឋមន្ត្រី​ឲ្យ​​​ទំនាក់​ទំនង​ជាមួយ​ក្រុម​ការ​ងារ​នៅ​ពេល​មាន​គម្រោង​រៀបចំ​ពិធី​​​ផ្សេង​​​ៗ​​​​សម្រាប់​លោក​នាយក​រដ្ឋមន្ត្រី និង​ភរិយា​របស់​លោក។

លោក ហ៊ុន សែន បាន​បង្កើត​កង​អង្គរក្ស​របស់​លោក​​​ពី​​​​ទាហាន​​​កង​ពល​តូច​លេខ​៧០ ជា​អង្គភាព​កង​យោធពល​ខេមរភូមិន្ទ ដែល​គេ​​​ភ្ជាប់​​​ទៅ​នឹង​ការ​ធ្វើ​ឃាត​ ការ​រំលោភ​អំណាច និង​ក្រុម​កាប់​ឈើ​ខុស​ច្បាប់៕ សារុន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស