នារីអាយុ២០ឆ្នាំម្នាក់បានរងការរលាកធ្ងន់ធ្ងរលើផ្ទៃមុខ និងរាងកាយ ក្រោយពីទទួលរងការជះទឹកអាស៊ីតនៅក្នុងរាជធានីភ្នំពេញកាលពីថ្ងៃសុក្រ ពីសំណាក់ស្ត្រីម្នាក់ដែលសង្ស័យថាជនរងគ្រោះបានដេកជាមួយប្តីរបស់ខ្លួន។
យោងតាមលោក សៅ សារិទ្ធ នាយរងប៉ុស្តិ៍នគរបាលបានឲ្យដឹងថា ខណៈស្ត្រីរងគ្រោះឈ្មោះ មាស វណ្ណី ដែលជាសន្តិសុខធ្វើការនៅរោងចក្រស្បែកជើង ហូ ស៊ីន តាយ (Ho Hsin Tai) ស្ថិតនៅតាមបណ្តោយផ្លូវវេងស្រេង ទើបតែចាកចេញពីផ្ទះជួលរបស់ខ្លួនក្នុងសង្កាត់ចោមចៅ ខណ្ឌពោធិ៍សែនជ័យ កាលពីវេលាម៉ោងប្រហែល៥និង៣០នាទីព្រឹក ក៏ស្រាប់តែមានស្ត្រីម្នាក់យួរធុងទឹកដើរចូលទៅជិតនាង។
លោកបានមានប្រសាសន៍ទៀតថា “នៅពេលជនសង្ស័យចាកចេញពីផ្ទះមានស្ត្រីម្នាក់សួរថា នាងឯងធ្វើការកន្លែងណា ហើយធ្វើការអី?”។ លោកបានបន្តថា ដំបូងជនសង្ស័យបានដើរចេញទៅវិញក្រោយពី មាស វណ្ណី ឆ្លើយតប មុនពេលជះទឹកអាស៊ីតដាក់នាងនៅតាមផ្លូវនោះ។
លោកបានបញ្ជាក់ថា “ជនរងគ្រោះបានដើរចម្ងាយប្រហែល១០០ម៉ែត្រ ពេលនោះជនសង្ស័យបានត្រឡប់មកវិញដើរតាមពីក្រោយ ហើយជះទឹកអាស៊ីតលើមុខជនរងគ្រោះ បណ្តាលឲ្យនាងរងរបួសធ្ងន់”។
នាយរងប៉ុស្តិ៍នគរបាលរូបនេះបានមានប្រសាសន៍ថា ក្រោយពីនិយាយជាមួយ មាស
វណ្ណី និងធ្វើការស៊ើបអង្កេតត្រួសៗ នគរបាលបានសាកសួរឈ្មោះ ជុន ឃឿន អាយុ៣២ឆ្នាំជាសន្តិសុខដូចគ្នានៅរោងចក្រនេះដែលបានប្រាប់ពួកគេថា ខ្លួនមានស្នេហាលួចលាក់ជាមួយជនរងគ្រោះ។
កម្មការិនីរោងចក្រកាត់ដេរឈ្មោះ ស្រឿន ណាន់ អាយុ៣៨ឆ្នាំ ដែលត្រូវជាប្រពន្ធរបស់ ជុន ឃឿន ត្រូវបានចាប់ខ្លួនភ្លាមៗ បន្ទាប់ពីប្តីនាងបានសារភាព ប៉ុន្តែ បានបដិសេធថា នាងមិនជាប់ពាក់ព័ន្ធនៅក្នុងករណីជះទឹកអាស៊ីតដើម្បីសងសឹកនេះទេ។
លោក សៅ សារិទ្ធ បានលើកឡើងថា “ពេលយើងសាកសួរលោក ឃឿន រួច យើងបានចុះទៅឃាត់ខ្លួនស្ត្រីឈ្មោះ ណាន់ ដល់កន្លែងធ្វើការ [ពីព្រោះ] វាអាចជាករណីស្នេហាត្រីកោណ។លោក ឃឿន និយាយថា គាត់បានដេកជាមួយជនរងគ្រោះនៅផ្ទះរបស់នាង”។
មាស វណ្ណី ដែលភ្នែករបស់នាងមើលលែងឃើញដោយសារតែរបួស និងការរលាកមុខ និងរាងកាយ បាននិយាយពីលើគ្រែរបស់នាងនៅមន្ទីរពេទ្យកាល់ម៉ែតថា ដំបូងនាងមិនដឹងពីមូលហេតុទេ ប៉ុន្តែ ក្រោយមកបានដឹងពីការចាប់ខ្លួននេះ។
នាងនិយាយថា “ខ្ញុំមិនដឹងអ្វីទាំងអស់ គ្រាន់តែមានស្ត្រីម្នាក់មកសួរសំណួរខ្ញុំមួយចំនួន រួចក៏ត្រឡប់ទៅវិញ ហើយក៏ជះទឹកអាស៊ីតលើខ្ញុំតែម្តង។ ខ្ញុំបានស្គាល់បុរសម្នាក់រយៈពេលពីរខែហើយ ប៉ុន្តែ ខ្ញុំមិនដឹងថា គាត់មានប្រពន្ធ ឬអត់ទេ”។
មាស រតនៈ បងស្រីរបស់ជនរងគ្រោះដែលបានឃើញប្អូនស្រីបង្កើតរបស់ខ្លួនស្រែកដោយការឈឺចាប់ បាននិយាយថា នាងសង្ស័យថា វាជាស្នាដៃរបស់ប្រពន្ធដែលប្រច័ណ្ឌម្នាក់នោះ។ នាងនិយាយទៀតថា “ខ្ញុំធ្វើការនៅព្រឹកនេះ ហើយខ្ញុំបានឮនាងស្រែកឲ្យជួយ។
ពេលនេះខ្ញុំកើតទុក្ខណាស់ ខ្ញុំគិតថាជនសង្ស័យធ្វើបែបនេះដោយសារតែស្នេហាត្រីកោណ”។ នាងបានបន្តថា លោក ជុន ឃឿន បានប្រាប់ប្អូនស្រីរបស់នាងថា រូបគេស្រឡាញ់នាង ហើយថា រូបគេបានលេងលះប្រពន្ធហើយ។
កាលពីខែមករា ឆ្នាំ២០១២ រដ្ឋាភិបាលបានអនុម័តច្បាប់មួយស្តីពីការវាយប្រហារដោយទឹកអាស៊ីត ហើយក្រោយមកក៏ចេញអនុក្រឹត្យមួយដើម្បីគ្រប់គ្រងការលក់អាស៊ីតនៅរយៈពេលមួយឆ្នាំក្រោយមក។
អង្គការជួយជនរងគ្រោះកម្ពុជាដោយសារអាស៊ីត ដែលផ្តល់សេវាជាច្រើនរួមមានការពិគ្រោះយោបល់ ការបណ្តុះបណ្តាលវិជ្ជាជីវៈ និងការវះកាត់កែលម្អលើរងគ្រោះ បានកាត់បន្ថយប្រតិបត្តិការរបស់ខ្លួនកាលពីឆ្នាំមុន បន្ទាប់ពីសង្កេតឃើញចំនួននៃការជះទឹកអាស៊ីតធ្លាក់ចុះគួរឲ្យកត់សម្គាល់។
លោក អំ សំអាត ប្រធានផ្នែកគ្រប់គ្រងបច្ចេកទេសសើុបអង្កេតនៅអង្គការសិទ្ធិមនុស្សលីកាដូ បានមានប្រសាសន៍ថា ការជះទឹកអាស៊ីតកាលពីថ្ងៃសុក្រ គឺជាករណីទី១ដែលត្រូវបានកត់ត្រានៅឆ្នាំនេះ ហើយថា វាបានបង្ហាញសារៈសំខាន់នៃការអនុវត្តច្បាប់ស្តីពីអាស៊ីត។
លោកបានបន្ថែមថា “អាជ្ញាធរគួរតែរឹតបន្តឹងបន្ថែមទៀតចំពោះអ្នកលក់អាស៊ីត បើសិនពួកគេទាមទារ ពេលនោះអ្នកលក់នឹងធ្វើតាម”៕សុខុម