ដោយធ្វើតាមសំណើរបស់លោកនាយករដ្ឋមន្ត្រី ហ៊ុន សែន ពន្ធនាគារនៅទូទាំងប្រទេសបានប្រារព្ធទិវាសិទ្ធិនារីអន្តរជាតិកាលពីម្សិលមិញ ដោយដោះលែងស្ត្រីមានផ្ទៃពោះឬមានកូនជាប់ពន្ធនាគារជាមួយសរុបចំនួន២២នាក់ រួមទាំងស្ត្រីម្នាក់ដែលត្រូវបានផ្ដន្ទាទោសពីបទប៉ុនប៉ងមនុស្សឃាតជុំវិញការជះទឹកអាស៊ីតផងដែរ។
លោក គឹម សន្តិភាព អ្នកនាំពាក្យក្រសួងយុត្តិធម៌បានលើកឡើងបន្ទាប់ពីមានការដោះលែងស្ត្រីចំនួនប្រាំពីរនាក់ពីមណ្ឌលអប់រំកែប្រែទី២ នៅពន្ធនាគារព្រៃស ក្នុងរាជធានីភ្នំពេញ ថា អ្នកទោសចំនួន២២នាក់ត្រូវបានជ្រើសរើសសម្រាប់ការលើកលែងទោស បន្ទាប់ពីសុន្ទរកថារបស់លោកនាយករដ្ឋមន្ត្រី ហ៊ុន សែន កាលពីខែមុន។
លោក សន្តិភាព បានមានប្រសាសន៍ថា “យើងដោះលែងពួកគេ [នៅក្នុងថ្ងៃនេះ] ដើម្បីភ្ជាប់ការដោះលែងនេះទៅនឹងទិវាសិទ្ធិនារីអន្តរជាតិ”។
លោកបានបន្ថែមថា បន្ថែមពីលើស្ត្រីចំនួនប្រាំពីរនាក់ដែលត្រូវបានដោះលែងនៅក្នុងរាជធានីភ្នំពេញ ស្ត្រីជាប់ពន្ធនាគារដែលនៅសេសសល់គឺត្រូវបានដោះលែងពីពន្ធនាគារនៅក្នុងខេត្តបន្ទាយមានជ័យ បាត់ដំបង ព្រះសីហនុ សៀមរាប កោះកុង និងខេត្តឧត្ដរមានជ័យ។
យោងតាមមន្ត្រីនគរបាលដែលនិយាយអំឡុងពិធីដោះលែងនៅពន្ធនាគារព្រៃសបានឲ្យដឹងថា ស្ត្រីទាំងប្រាំពីរនាក់េនះត្រូវបានចោទប្រកាន់ពីបទជួញដូរគ្រឿងញៀន អំពើចោរកម្មដែលមានស្ថានទម្ងន់ទោស ឬពីបទប៉ុនប៉ងមនុស្សឃាត។
មន្ត្រីនគរបាលបានឲ្យដឹងទៀតថា សាលាដំបូងរាជធានីភ្នំពេញ បានផ្ដន្ទាទោសស្ត្រីម្នាក់ឈ្មោះ ឃិន ម៉ាលីន អាយុ៣៤ឆ្នាំ ក្នុងចំណោមស្ត្រីដែលត្រូវដោះលែងទាំងនេះកាលពីឆ្នាំ២០១១ ឲ្យជាប់ពន្ធនាគាររយៈពេល១៤ឆ្នាំពីបទប៉ុនប៉ងមនុស្សឃាត។
ក្មួយប្រុសរបស់អ្នកស្រី ម៉ាលីន ឈ្មោះ ម៉ែន ដារា៉រិទ្ធ អាយុ២២ឆ្នាំ បានលើកឡើងថា តុលាការបានផ្ដន្ទាទោសគាត់ពីបទជួលភាគីទី៣ឲ្យជះទឹកអាស៊ីតលើស្ត្រីម្នាក់ផ្សេងទៀត។ ដារ៉ារិទ្ធ បានបន្ថែមថា នៅពេលអ្នកស្រី ម៉ាលីន ត្រូវបានផ្ដន្ទាទោស គាត់មានទារកអាយុ១ខែម្នាក់ដែលត្រូវបញ្ជូនទៅពន្ធនាគារជាមួយ។ ក្រោយពិធីដោះលែង អ្នកស្រី ម៉ាលីន បានលើកឡើងថា ខ្លួនរីករាយខ្លាំងណាស់ដែលត្រូវបានដោះលែងវិញ។
អ្នកស្រីបាននិយាយថា “ខ្ញុំសន្យាឈប់ប្រព្រឹត្តបទឧក្រិដ្ឋទៀតហើយ ព្រោះខ្ញុំមិនចង់ទុកឲ្យគ្រួសាររបស់ខ្ញុំស្ថិតក្នុងស្ថានភាពបែបនេះម្ដងទៀតឡើយ។ ខ្ញុំនឹងទទួលបានជីវិតថ្មីក្នុងពេឆាប់ៗ”។
អំឡុងសុន្ទរកថាកាលពីម្សិលមិញ ដើម្បីរំឭកទិវាសិទ្ធិនារីអន្តរជាតិ លោក ហ៊ុន សែន បានលើកឡើងថា លោកបានសម្រេចស្នើឲ្យមានការដោះលែងស្ត្រីទាំងនេះ ដោយសារតែក្នុងពេលថ្មីៗនេះអង្គការសិទ្ធិមនុស្សលីកាដូបានចេញរបាយការណ៍មួយរៀបរាប់អំពីស្ថានភាពលំបាករបស់ក្មេងតូចៗដែលជាប់ពន្ធនាគារជាមួយម្ដាយ។ តែទោះជាយ៉ាងណា លោកបានសង្កត់ធ្ងន់ថា ការដោះលែងនេះមិនមែនជាការលើកទឹកចិត្តឲ្យស្ត្រីផ្សេងៗទៀតចាប់ផ្ដើមប្រព្រឹត្តបទល្មើសនោះឡើយ។
លោកនាយករដ្ឋមន្ត្រីបានមានប្រសាសន៍ថា “យើងចង់បញ្ជាក់ថា យើងមិនមែនចង់លើកទឹកចិត្តឲ្យស្ត្រីដែលមានកូន និងមានផ្ទៃពោះប្រព្រឹត្តទង្វើខុសច្បាប់នោះឡើយ។ ខ្ញុំសូមអំពាវនាវដល់ស្ត្រីផ្សេងៗទៀតថា សូមកុំប្រព្រឹត្តទង្វើខុសច្បាប់”៕ ស៊ុយឈាង
(រាយការណ៍បន្ថែមដោយ ឆន ចាន់ស៊ី)