ក្រុមមន្ត្រីបាននិយាយកាលពីម្សិលមិញថា អ្នកថតរូបឲ្យទូរទស្សន៍ជាតិកម្ពុជាម្នាក់ត្រូវបានចាប់ខ្លួនកាលពីថ្ងៃសៅរ៍ តាមការបញ្ជាផ្ទាល់របស់លោក ម៉ក់ ជីតូ អគ្គស្នងការរងនគរបាលជាតិ ពីបទប្រើប្រាស់ស្លាកលេខនគរបាលក្លែងក្លាយ និងមានឯកសណ្ឋាននគរបាល និងកាំភ្លើងខ្លីខុសច្បាប់។
យោងតាមលោក ស៊ឹម សារិន អធិការរងនគរបាលស្រុកលើកដែក ខេត្តកណ្ដាលបានឲ្យដឹងថា ការចាប់ខ្លួននេះត្រូវបានធ្វើឡើងបន្ទាប់ពីអ្នកថតរូបឈ្មោះថា អូន ភាព បានបើករថយន្តកាត់រថយន្តរបស់ឧត្ដមសេនីយ៍ឯក ម៉ក់ ជីតូ នៅកំពង់ចម្លងអ្នកលឿង ក្នុងខេត្តកណ្ដាល។
លោក សារិន បានមានប្រសាសន៍ថា “យើងបានចាប់ខ្លួនលោក អូន ភាព តាមបញ្ជារបស់លោក ម៉ក់ ជីតូ អគ្គស្នងការរងនគរបាលជាតិ បន្ទាប់ពីឧត្ដមសេនីយ៍ឯក ម៉ក់ ជីតូ បានឃើញរថយន្តកាមរីពណ៌ខ្មៅនេះមានស្លាកលេខនគរបាលក្លែងក្លាយ ខណៈរថយន្តរបស់ឧត្ដមសេនីយ៍រូបនេះបើកមកពីខេត្តព្រៃវែងឆ្លងស្រឡាងអ្នកលឿង”។
លោក សារិន បានពន្យល់ថា ឧត្ដមសេនីយ៍ឯក ម៉ក់ ជីតូ មានការចាប់អារម្មណ៍លើស្លាកលេខរថយន្តរបស់លោក អូន ភាព ដែលមានលេខ “២-៧២៧២”។
បន្ទាប់ពីកត់សម្គាល់ឃើញរថយន្តនោះ លោកបានទូរស័ព្ទទៅនគរបាលមូលដ្ឋានខេត្តកណ្ដាល ហើយបានសុំឲ្យពួកគេឃាត់រថយន្តនេះ ដើម្បីពិនិត្យថា តើស្លាកលេខនេះពិតឬយ៉ាងណា។
យោងតាមលោក អុីវ ចំរើន ស្នងការនគរបាលខេត្តបានឲ្យដឹងថា នៅពេលនគរបាលឃាត់រថយន្តលោក អូន ភាព ពួកគេបានរកឃើញថា គាត់មានឯកសណ្ឋាននគរបាល និងកាំភ្លើងខ្លីខុសច្បាប់ ហើយមិនបានបង់ពន្ធនៅពេលគាត់នាំចូលរថយន្តរបស់ខ្លួន។
លោក ចំរើន បានមានប្រសាសន៍ថា “លោក អូន ភាព ត្រូវបានចោទប្រកាន់ពីបទប្រើប្រាស់កាំភ្លើងខ្លី ឯកសណ្ឋាននគរបាលដែលមានឋានន្តរស័ក្ដិជាអនុសេនីយ៍ឯក និងស្លាកលេខនគរបាល ហើយក៏ត្រូវបានចោទប្រកាន់ពីបទប្រើប្រាស់រថយន្តដោយមិនបានបង់ពន្ធផងដែរ ហើយគាត់នឹងត្រូវបញ្ជូនទៅសាលាដំបូងខេត្តកណ្ដាលនៅថ្ងៃស្អែក”។
លោក ជ័យ សៅភា នាយករងទូរទស្សន៍ជាតិកម្ពុជាបានបញ្ជាក់ថា លោក អូន ភាព បានបម្រើការងារនៅស្ថានីយទូរទស្សន៍នេះ។ លោកបានមានប្រសាសន៍ថា អ្នកថតរូបរូបនេះ គឺជាអតីតមន្ត្រីនៅនាយកដ្ឋាននគរបាលសេដ្ឋកិច្ចក្រសួងមហាផ្ទៃ ហើយត្រូវបានក្រសួងមហាផ្ទៃលុបចេញពីបញ្ជីបើកប្រាក់ខែពីរឆ្នាំមកហើយ។ លោក សៅភា បានមានប្រសាសន៍ថា “ប្រសិនបើលោក អូន ភាព បានប្រព្រឹត្តសកម្មភាពខុសច្បាប់ទាំងអស់នេះមែន គាត់ត្រូវទទួលខុសត្រូវចំពោះមុខច្បាប់”៕ សារុន