ក្រុមមន្ត្រីបានឲ្យដឹងកាលពីម្សិលមិញថា មន្ត្រីបរិស្ថានខេត្តរតនគិរីកាលពី១០ថ្ងៃមុន បានរឹបអូសឈើសុក្រមជាប្រភេទឈើមានតម្លៃជាង៥០០ដុំ ដែលបានរកឃើញគរទុកក្នុងដែនជម្រកសត្វព្រៃលំផាត់ក្នុងខេត្តនេះដោយអ្នកកាប់ឈើខុសច្បាប់។
លោក ជូ សុភ័ក្ត្រ ប្រធានមន្ទីរបរិស្ថានខេត្តបានមានប្រសាសន៍ថា ឈើប្រភេទលេខ១នេះត្រូវបានរកឃើញគរទុកក្នុងដែនជម្រកសត្វព្រៃទំហំ២៥០.០០០ហិកតា ដែលមើលការខុសត្រូវដោយក្រសួងបរិស្ថាន។
លោកបានមានប្រសាសន៍ថា “ខ្ញុំបានបញ្ជាឲ្យប្រធានដែនជម្រកសត្វព្រៃលំផាត់ ប្រមូលឈើដែលរឹបអូសបាននេះ…ពីព្រោះយើងត្រូវធ្វើរបាយការណ៍ទៅរដ្ឋមន្ត្រីក្រសួងបរិស្ថាន ដើម្បីឲ្យក្រសួងអាចរៀបចំដាក់ដេញថ្លៃឈើនេះ”។
លោក សុភ័ក្ត្រ បានបដិសេធមិនពន្យល់ពីមូលហេតុនៃការដាក់ដេញថ្លៃឈើនេះឡើយ។ អនុក្រឹត្យរបស់រដ្ឋាភិបាលដែលបានចេញកាលពីឆ្នាំមុន បង្គាប់ឲ្យអាជ្ញាធរលក់ឈើដែលរឹបអូសបានទាំងអស់ទៅឲ្យក្រុមហ៊ុន ទ្រី ភាព។
លោក ប៉ក់ ពឿ នាយប៉ុស្តិ៍ឃុំសេរីមង្គល ស្រុកកូនមុំ បានមានប្រសាសន៍ថា ដំបូងលោកបានឃើញក្រុមមន្ត្រីប្រមូលឈើដែលរឹបអូសបាននេះប្រហែល១០ថ្ងៃមុន ប៉ុន្តែថា នៅពេលលោកទៅសាកសួរពីរឿងនោះ គេបានព្រងើយកន្ដើយដាក់លោក។
លោកបានមានប្រសាសន៍ថា “ខ្ញុំបានសួរមន្ត្រីទាំងនោះអំពីឈើនោះ ប៉ុន្តែពួកគេបានស្រែកដាក់ខ្ញុំ ហើយបានប្រាប់ខ្ញុំថា ‘អ្នកមិនចាំបាច់ដឹងទេ ពីព្រោះតំបន់នេះស្ថិតក្រោមការគ្រប់គ្រងរបស់ដែនជម្រកសត្វព្រៃនេះ’”៕សារុន