សាលា​​​ដំបូង​​​រាជធានី​​​ភ្នំពេញ​​​សាកសួរ​​​ភរិយា​​​ឧកញ៉ា អុឹង​​​ ម៉េងជឺ​

កាលពី​​​ថ្ងៃសុក្រ​​​​​​ សាលា​​​ដំបូង​​​​​​រាជ​​​ធានី​​​ភ្នំពេញ​​​បាន​​​សាក​​​សួរ​​​ភរិយា​​​ជា​​​ស្ត្រី​​​មេម៉ាយ​​​របស់​​​លោក​​​ អុឹង​​​ ម៉េងជឺ ប្រធាន​​​ក្រុមហ៊ុន Shimmex Group ​​​ដែល​​​ត្រូវ​​​បាន​​​បាញ់សម្លាប់​​​កាលពី​​​ឆ្នាំ​​​មុន​​​​​​ក្នុង​​​ការ​​​វាយ​​​ប្រហារ​​​ដែល​​​រៀប​​ចំ​​​ឡើង​​​ដោយ​​​លោក ថោង សារ៉ាត់ មន្ត្រី​​​ក្រសួង​​​ការ​​​ពារ​​​ជាតិ​​​​​​​​​ដែល​​​កំពុង​​​រត់​​​គេចខ្លួន និង​​​ធ្វើឡើង​​​ដោយ​​​អង្គ​​​រក្ស​​​របស់​​​គាត់។

លោក ឡាច សំរោង មេធាវី​​​តំណាង​​​អ្នកស្រី តាំង គីមឆេង ស្ត្រី​​​មេម៉ាយ​​​របស់​​​ពាណិជ្ជករ​​​ឆ្នើម​​​រូប​​​នេះ​​​បាន​​​អះអាង​​​ថា កូន​​​ក្តី​​​របស់​​​លោក​​​​​​ត្រូវ​​​បាន​​​សាកសួរ​​​​​​ជា​​​ផ្នែក​​​មួយ​​​នៃ​​​ការ​​​ស៊ើប​​​អង្កេត​​​របស់​​​សាលាដំបូង​​​​​​រាជធានី​​​​​​ពី​​​ករណី​​​មនុស្ស​​​ឃាត​​​នេះ។

លោក​​​បាន​​​មាន​​​ប្រសាសន៍​​​ថា “​​​តុលាការ​​​បាន​​​កោះហៅ​​​កូន​​​ក្តី​​​របស់​​​ខ្ញុំ​​​មក​​​សាក​​​សួរ​​​​​​ទាក់ទង​​​​​​ការ​​​ធ្វើឃាត​​​ឧកញ៉ា អុឹង ម៉េងជឺ។​​​នេះ​​​ជា​​​លើក​​​ទី​​​១ហើយ​​ដែល​​​កូន​​​ក្តី​​​របស់​​​ខ្ញុំ​​​​​​ត្រូវ​​​បាន​​​កោះ​​​ហៅ​​​មក​​​សាកសួរ”។

លោក សំរោង បាន​​​បដិសេធ​​​មិន​​​ផ្តល់​​​ព័ត៌មាន​​​លម្អិត​​​​​​អំពី​​​ការ​​​សាកសួរ​​​នេះ​​​ទេ ប៉ុន្តែ បាន​​​លើក​​​ឡើង​​​ថា អ្នកស្រី គីមឆេង បាន​​​ទាម​​​ទារ​​​​​​សំណង​​​ចំនួន​​​៥០លានដុល្លារ​​​​​​ពី​​​បុគ្គល​​​ដែល​​​បាន​​​រៀបចំ​​​ការ​​​ធ្វើឃាត​​​ប្តី​​​របស់​​​អ្នកស្រី ដែល​​​ត្រូវ​​​បាន​​​បាញ់​​​៦គ្រាប់​​​​​​នៅ​​​ខាងក្រៅ​​​ហាង​​​លក់​​​ផ្លែឈើ​​​មួួួយ​​​កាលពី​​​ល្ងាច​​​ថ្ងៃ​​​ទី​​​២២ ខែ​​​វិច្ឆិកា។

មេធាវី​​​របស់​​​អ្នកស្រី​​​​​​បាន​​​បន្ថែម​​​ថា អ្នកស្រី គីមឆេង ក៏បាន​​​ស្នើសុំ​​​​​​សំណង​​​ចំនួន​​​១០​​​លាន​​​ដុល្លារ​​​ពី​​​អ្នក​​​ដែល​​​បាន​​​ប្រព្រឹត្ត​​​បទ​​​ឧក្រិដ្ឋ​​​នេះ​​​ផង​​​ដែរ។ លោក​​​បាន​​​មាន​​​ប្រសាសន៍​​​ថា “កូន​​​ក្តី​​​របស់​​​ខ្ញុំ​​​ក៏បាន​​​ស្នើ​​​ឲ្យ​​​តុលាការ​​​ដាក់​​​ទោស​​​​​​ជន​​​ដៃដល់​​​​​​តាម​​​ច្បាប់​​​ផង​​​ដែរ”។

ឧត្តម​​​សេនីយ៍​​​ទោ ថោង សារ៉ាត់ ដែល​​​កំពុង​​​រត់​​​គេចខ្លួន​​​នៅឡើយ​​​​​​ចាប់​​​តាំងពី​​​ការ​​​ឆ្មក់​​​ចូល​​​របស់​​​នគរបាល​​​​​​ទៅលើ​​​ភូមិគ្រឹះ​​​របស់​​​លោក​​​ក្នុង​​​រាជ​​​ធានី​​​ភ្នំពេញ​​​កាលពី​​​ដើម​​​ខែ​​​ធ្នូ​​​នោះ​​​ ត្រូវ​​​បាន​​​ចោទ​​​ប្រកាន់​​​កំបាំងមុខ​​​​​​​​​ពី​​​បទ​​​ញុះញង់​​​ឲ្យ​​​មាន​​​អំពើ​​​មនុស្ស​​​ឃាត​​​ដោយ​​​គិត​​​ទុក​​​ជាមុន។

អង្គរក្ស​​​ប្រាំ​​​នាក់​​​របស់​​​ឧត្តម​​​សេនីយ៍​​​រូប​​​នេះ​​​ត្រូវ​​​បាន​​​ចោទ​​​ប្រកាន់​​​ពី​​​បទ​​​ជាប់​​​ពាក់ព័ន្ធ​​​ក្នុង​​​រឿង​​​នេះ​​​។

ឪពុក​​​ម្តាយ​​​របស់​​​ឧត្តម​​​សេនីយ៍​​​ទោ ថោង សារ៉ាត់ ដែល​​​ត្រូវ​​​បាន​​​ចាប់ខ្លួន​​​អំឡុង​​​ការ​​​ឆ្មក់​​​ចូល នោះ ត្រូវ​​​បាន​​​ជាប់ពន្ធនាគារ​​​ពី​​​បទ​​​មាន​​​អាវុធ​​​ខុស​​​ច្បាប់​​​​​​​​​​។ ពួកគេ​​​ត្រូ​​​វ​​​បាន​​​ឲ្យ​​​នៅ​​​ក្រៅ​​​ឃុំ​​​កាល​​​ពីដើម​​​ខែមុន ប៉ុន្តែ​​​ត្រូវ​​​បាន​​​ចាប់​​​ដាក់​​​ពន្ធនាគារ​​​វិញ​​​​​​មិន​​​ដល់​​​១០ថ្ងៃផង​​​​​​បន្ទាប់ពី​​​ត្រូវ​​​បានតាម​​​​​​ទាន់​​​ពេល​​​ប៉ុនប៉ង​​​​​​គេច​​​ខ្លួន​​​ទៅ​​​ប្រទេស​​​​​​វៀត​​​ណាម​​​តាម​​​រថយន្ត​​​សង្គ្រោះ​​​បន្ទាន់។

លោក គឹម សន្តិភាព អ្នកនាំពាក្យ​​​​​​ក្រសួង​​​យុត្តិធម៌​​​បាន​​​មាន​​​ប្រសាសន៍​​​ថា ឪពុក​​​ម្តាយ​​​របស់​​​ឧត្តម​​​សេនីយ៍​​​រូប​​​នេះ​​​ក៏​​​ត្រូវ​​​បាន​​​សាកសួរ​​​​​​នៅ​​​តុលាការ​​​ផង​​​ដែរ​​​កាលពី​​​ថ្ងៃសុក្រ​​​ ប៉ុន្តែ​​​​​​បាន​​​បដិ​​​សេធ​​​មិន​​​ធ្វើ​​​អត្ថាធិប្បាយ​​​បន្ថែម​​​ឡើយ។ លោក​​​បាន​​​មាន​​​ប្រសាសន៍​​​ថា “​​​ឥឡូវ​​​នេះ​​​​​​ ករណី​​​នេះ​​​ស្ថិត​​​ក្នុង​​​ដំណាក់កាល​​​​​​ស៊ើប​​​អង្កេត​​​ ដូច្នេះ​​​ខ្ញុំ​​​មិន​​​អាច​​​និយាយ​​​បាន​​​ឡើយ”​​​៕សារុន