33 C
Phnom Penh

រដ្ឋាភិបាល​នឹង​ពិនិត្យ​កន្លែង​ផ្នូរ​វៀតណាម​លើ​ភ្នំ​បូកគោ

ដោយ ឌឹ ខេមបូឌា ដេលី

បទវិភាគ

រដ្ឋ​មន្ត្រី​ក្រសួង​អប់រំ​បាន​មាន​ប្រសាសន៍​ថា ក្នុង​ពេល​ប៉ុន្មាន​សប្តាហ៍​ខាង​មុខ​នេះ ក្រុម​ការងារ​ដែល​មាន​មន្ត្រី​មកពី​ក្រសួង​ទេសចរណ៍ ក្រសួង​ធម្មការ ក្រសួង​វប្បធម៌ និង​ក្រសួង​អប់រំ នឹង​ចុះ​ទៅ​ពិនិត្យ​តំបន់​ព្រៃ​ដាច់​ស្រយាល​មួយ​លើ​ភ្នំ​បូកគោ​ក្នុង​ខេត្ត​កំពត ដែល​នៅ​ទីនោះ​ទេសចរ​វៀតណាម​ធ្វើ​ការ​សូត្រធម៌​បន់ស្រន់។

តំណាង​រាស្ត្រ​គណបក្ស​ប្រឆាំង លោក យ៉ែម បុញ្ញឫទ្ធិ ដែល​ជា​ប្រធាន​គណៈ​កម្មាធិការ​កិច្ចការ​សាសនា វប្បធម៌ និងទេសចរណ៍​នៃ​រដ្ឋសភា កាលពី​ខែ​មុន​បាន​ដឹក​នាំ​ការ​ចុះ​ទៅ​ពិនិត្យ​ផ្ទាល់​ដល់​ទី​កន្លែង ដែល​គេ​និយាយ​ថា ជនជាតិ​វៀតណាម​បន់​ស្រន់​ដល់​ព្រលឹង​ដូនតា​កប់​ក្នុង​ផ្នូរ​ថ្ម​ដ៏​ធំ។

គេ​មិន​បាន​ប្រទះ​ឃើញ​ទេសចរ​អំឡុង​ពេល​ដំណើរ​ចុះ​ទៅ​ពិនិត្យ​កាលពី​ថ្ងៃ​ទី​១២​ខែ​កុម្ភៈ​នោះ​ទេ ប៉ុន្តែ​បុគ្គលិក​អង្គការ​ក្រៅ​រដ្ឋាភិបាល​បាន​បង្ហាញ​រូបថត​ទេសចរ​ដែល​ធ្វើ​ការ​បួងសួង ស្ថិត​ក្នុង​ចំណោម​រូបថត​មាន​ស៊ុំ​រូប​មេដឹកនាំ​កុម្មុយនិស្ត​វៀតណាម ហូ ជីមិញ ហើយ​លោក បុញ្ញឫទ្ធិ បាន​សន្យា​ថា​នឹង​ប្រែក្លាយ​ទីកន្លែង​នោះ​សម្រាប់​ពលរដ្ឋ​កម្ពុជា​បន់ស្រន់​វិញ។

កាលពី​ថ្ងៃ​ច័ន្ទ លោក​បាន​ហៅ​រដ្ឋ​មន្ត្រី​ក្រសួង​ទេសចរណ៍ សាសនា វប្បធម៌ និង​អប់រំ មក​សភា​ដើម្បី​សាកសួរ និង​បាន​ប្រាប់​អ្នក​កាសែត​បន្ទាប់ពី​ការ​ប្រជុំ​បិទ​ទ្វារ​ថា ពួកគេ​នឹង​ទៅ​ពិនិត្យ​ទីកន្លែង​នោះ​ក្នុង​ពេល​ឆាប់ៗ​នេះ។

លោក ហង់ ជួនណារ៉ុន រដ្ឋមន្ត្រី​ក្រសួង​អប់រំ​ យុវជន និង​កីឡា បាន​មាន​ប្រសាសន៍​ថា “ប្រហែល​នៅ​សប្តាហ៍​ក្រោយ យើង​ចង់​ធ្វើ​ការ​ស្រាវជ្រាវ​ភ្លាមៗ”។

គណបក្ស​សង្គ្រោះ​ជាតិ​បាន​ប្រើ​វោហារ​សាស្ត្រ​ប្រឆាំង​វៀតណាម​យូរ​មក​ហើយ ដើម្បី​ធ្វើ​ជា​ទុន​នយោបាយ​​ប្រឆាំង​រដ្ឋាភិបាល​លោក​នាយក​រដ្ឋ​មន្ត្រី ហ៊ុន សែន ដែល​មាន​ឫស​គល់​របស់​ខ្លួន​ក្នុង​របប​កុម្មុយនិស្ត​បន្តុប​ដោយ​ប្រទេស​វៀតណាម ដែល​លោក ហ៊ុន សែន បាន​ដឹក​នាំ​ក្នុង​ទសវត្សរ៍​ឆ្នាំ​១៩៨០។

លោក ជួន ណារ៉ុន បាន​មាន​ប្រសាសន៍​ថា រដ្ឋាភិបាល​យល់​អំពី​មូលហេតុ​ដែល​លោក បុញ្ញឫទ្ធិ ព្រួយ​បារម្ភ​អំពី​ទេសចរ​វៀតណាម​ដែល​ដេក​និង​បន់ស្រន់​ក្នុង​ព្រៃ​ជ្រៅ​នៅ​ភ្នំ​បូកគោ។

លោក ជួនណារ៉ុន បាន​មាន​ប្រសាសន៍​ថា “មិន​មាន​គំនិត​ខុស​គ្នា​រវាង​គណៈ​កម្មាធិការ​នេះ​និង​រដ្ឋាភិបាល​ឡើយ។ យើង​ចង់​បាន​ការ​គ្រប់គ្រង​ល្អ ជា​ពិសេស​មិន​ឲ្យ​​អ្នក​ដែល​ទៅ​បន់ស្រន់ ស្នាក់​នៅ​ក្នុង​ព្រៃ​នោះ។ ពួកគេ​ត្រូវតែ​ទៅ​ដេក​ក្នុង​សណ្ឋាគារ”។

លោក ថោង ខុន រដ្ឋ​មន្ត្រី​ក្រសួង​ទេសចរណ៍ បាន​ប្រាប់​អ្នក​កាសែត​ថា នឹង​មាន​ការ​ណែនាំ​ច្បាប់​ទម្លាប់​ចំពោះ​ទេសចរ​វៀតណាម​ទាំងឡាយណា ដែល​ទៅ​ភ្នំ​បូកគោ​ដើម្បី​បន់ស្រន់​នៅ​ផ្នូរ ដូចជា “កំុ​យក​ស៊ីម៉ង់​ទៅ​បិទ​ភ្ជាប់​ឲ្យ​ខូច​តំបន់​ប្រវត្តិ​សាស្ត្រ​នោះ”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស