30.6 C
Phnom Penh

លោក ហ៊ុន សែន ណែនាំ​ឲ្យ​ផ្អាក​ការ​ជ្រើសរើស​មន្ត្រី​ថ្មី

ដោយ ឌឹ ខេមបូឌា ដេលី

បទវិភាគ

លោក​នាយក​រដ្ឋមន្ត្រី ហ៊ុន សែន កាលពី​សប្តាហ៍​មុន​បាន​ចេញ​សេចក្តី​បង្គាប់​មួយ​ដោយ​បញ្ជា​ស្ថាប័ន​រដ្ឋ​ទាំងអស់​ត្រូវ​ផ្អាក​ការ​ជ្រើសរើស​មន្ត្រី​ថ្មី​សម្រាប់​រយៈ​ពេល​នៅ​សល់​នៃ​ឆ្នាំ​នេះ លើក​លែងតែ​ត្រូវ​បំពេញ​តំណែង​មាន​ស្រាប់​ដែល​នៅ​ទំនេរ ជា​ការ​ប្រឹងប្រែង​ជាក់ស្តែង​ដើម្បី​ទប់​ការ​ចំណាយ​ឲ្យ​ស្រប​តាម​ថវិកា​រដ្ឋ​បច្ចុប្បន្ន។

លោក​នាយក​រដ្ឋ​មន្ត្រី​បាន​ចេញ​សារាចរ​ណែនាំ ចុះ​ហត្ថលេខា​កាលពី​ថ្ងៃ​ព្រហស្បតិ៍។ សារាចរ​មាន​ខ្លឹមសារ​ថា “ក្នុង​ឆ្នាំ​២០១៥ ការ​ជ្រើសរើស​មន្ត្រី​រាជការ​នៅ​គ្រប់​ក្រសួង​និង​ស្ថាប័ន​ទាំងអស់​នៅ​ថ្នាក់​ជាតិ​និង​ថ្នាក់​ក្រោម​ជាតិ ទាហាន​និង​ប៉ូលិស​ជាតិ ត្រូវ​បាន​អនុញ្ញាត​ឲ្យ​ជ្រើសរើស​ស្មើ​នឹង​ចំនួន​មន្ត្រី​រាជការ ដែល​បាត់បង់​ពី​ក្របខណ្ឌ​ដោយមូលហេតុ​ចូល​និវត្តន៍ លា​ឈប់ បញ្ឈប់​ពី​ការងារ បាត់បង់​សម្បទា​វិជ្ជាជីវៈ ឬ​មរណៈ​ភាព”។

ដើម្បី​ចៀសវាង​ការ​បង្កើត​តំណែង​ថ្មី សារាចរ​ណែនាំ​នេះ​បង្គាប់​ស្ថាប័ន​រដ្ឋាភិបាល​ទាំងអស់​កំុ​បង្កើត​មន្ទីរ​នាយកដ្ឋាន​ថ្មី និង​ត្រូវ​ប្រើ​មន្ត្រី​រាជការ​ដែល​មាន​ស្រាប់ “ឲ្យ​អស់​លទ្ធភាព​នៃ​ធនធាន​ដែល​មាន”។

សារាចរ​នេះ​ក៏​បាន​និយាយ​ពី​ចេតនា​របស់​រដ្ឋាភិបាល​ដើម្បី​ធ្វើ​ឲ្យគុណភាព​ការងារ​មន្ត្រី​រាជការ​របស់​ខ្លួន​ប្រសើរ​ឡើង ប៉ុន្តែ​មិន​បាន​ផ្តល់​ព័ត៌មាន​បន្ថែម​អំពី​របៀប​ដែល​ខ្លួន​បម្រុង​ធ្វើ​ដើម្បី​សម្រេច​គោល​បំណង​នេះ​ទេ។

លោក ស សាមឺឌី ប្រធាន​នាយកដ្ឋាន​នីតិកម្ម​មុខងារ​សាធារណៈ​នៃ​ក្រសួង​មុខងារ​សាធារណៈ មិន​បាន​និយាយ​លម្អិត​អំពី​សារាចរ​ថ្មី​នេះ ឬ​ពន្យល់​ឲ្យ​ដឹង​ថា​អ្វី​ដែល​ជំរុញ​ឲ្យ​មាន​សារាចរ​នេះ​ទេ។

និយោជិត​រដ្ឋាភិបាល​ល្បី​ខាង​ពុក​រលួយ​ និង​គេចវេស​ពី​ការ​ទទួល​ខុស​ត្រូវ​ចំពោះ​ការងារ​រដ្ឋ​ដែល​ទទួល​បាន​ប្រាក់​ខែ​តិច ដើម្បី​ធ្វើ​ការងារ​បាន​កម្រៃ​ច្រើន​ជាង​នៅ​ក្នុង​វិស័យ​ឯកជន។

លោក កៅ ពឿន ប្រធាន​សមាគម​មន្ត្រី​រាជការ​ឯករាជ្យ​ ដែល​គាំទ្រ​ឲ្យ​មាន​ប្រាក់​ខែ​ខ្ពស់​សម្រាប់​មន្ត្រី​រាជការ បាន​មាន​ប្រសាសន៍​ថា ការ​បំពេញ​ការងារ​របស់​មន្ត្រី​រាជការ​នឹង​មិន​ប្រសើរ​ច្រើន​ទេ លុះត្រាតែ​រដ្ឋ​ពិនិត្យ​ដោះស្រាយ​អត្រា​ប្រាក់​ចំណូល​ ដោយ​បើក​ប្រាក់​ខែ​ឲ្យ​ពួកគេ​អាច​រស់​បាន។

លោក ពឿន បាន​មាន​ប្រសាសន៍​ថា មន្ត្រី​រាជការ​សាមញ្ញ សព្វថ្ងៃ​មាន​ប្រាក់​ខែ​រវាង​១២០​ដុល្លារ​ទៅ​១៥០​ដុល្លារ​ក្នុង​មួយ​ខែ ប៉ុន្តែ​គួរតែ​ទទួល​បាន​៤០០​ដុល្លារ​ទៅ​៥០០​ដុល្លារ​វិញ។

លោក​បាន​និយាយ​ថា “អ្នក​ចូល​ធ្វើការ​ថ្មី​មិន​នៅ​ធ្វើការ​យូរ​ទេ ពីព្រោះ​ពួកគេ​មិន​អាច​រស់​នឹង​ប្រាក់​ខែ​តិច​បែប​នេះ​បាន​ឡើយ។ ប៉ុន្តែ មន្ត្រី​ដែល​ស៊ី​សំណូក ពួកគេ​នៅ​ធ្វើការ​បាន​យូរ”។ លោក ហ៊ុន សែន បាន​ប្រកាស​ការ​ដំឡើង​ប្រាក់​ខែ​ឲ្យ​គ្រូ​បង្រៀន និង​គិលានុបដ្ឋាកយិការ​នៅ​ខែ​សីហា ហើយ​មន្ត្រី​ឃុំ​សង្កាត់​និង​ភូមិ​នៅ​ខែ​មករា៕និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស