តុលាការកំពូលបានសម្រេចបន្តឃុំខ្លួនមន្ត្រីគណបក្សសង្គ្រោះជាតិ លោក មាជ សុវណ្ណារ៉ា ដែលត្រូវបានចាប់ខ្លួនពាក់ព័ន្ធនឹងហេតុការណ៍ប៉ះទង្គិចហិង្សាមួយនៅទីលានប្រជាធិបតេយ្យកាលពីថ្ងៃទី១៥ ខែកក្កដា។
លោក អឿង សៀង ចៅក្រមតុលាការកំពូល បានអានសាលដីកាថា “តុលាការកំពូលយល់ឃើញថា តុលាការរាជធានីភ្នំពេញដាក់ឲ្យជនជាប់ចោទនៅក្នុងឃុំ គឺជារឿងត្រឹមត្រូវ។ តុលាការកំពូលសម្រេចតម្កល់សាលដីការបស់សាលាឧទ្ធរណ៍ចុះថ្ងៃទី១២ ខែធ្នូ ឆ្នាំ ២០១៤ទុកជាបានការ”។
លោក សុវណ្ណារ៉ា ដែលត្រូវបានចាប់ខ្លួននៅក្នុងក្រុងភ្នំពេញកាលពីខែវិច្ឆិកា ក្រោយពីតុលាការចេញដីកាឃាត់ខ្លួនតាមការចោទប្រកាន់ពីបទ “ចូលរួមកុបកម្ម” បាននិយាយក្រោយពីបានស្តាប់សាលដីកាថា ការបន្តឃុំខ្លួនរបស់លោកក្នុងពន្ធនាគារព្រៃស គឺទាក់ទិននឹងរឿងនយោបាយ។
លោក សុវណ្ណារ៉ា បាននិយាយថា “រឿងនេះគ្មានយុត្តិធម៌ទេ។ ខ្ញុំយល់ឃើញថា វាជារឿងនយោបាយ អុីចឹង បើថ្នាក់ដឹកនាំលោក ហ៊ុន សែន និងលោក សម រង្ស៊ីមិនមានជំនួបទេ គឺខ្ញុំគ្មានសង្ឃឹមទេ។ គេសុខចិត្តចាប់មនុស្សខុស គេមិនដែលប្រលែងមនុស្សឲ្យច្រឡំទេ”។
កាលពីខែធ្នូ សាលាឧទ្ធរណ៍បានច្រានចោលសំណើសុំនៅក្រៅឃុំរបស់លោក សុវណ្ណារ៉ា។
លោក ណៃ វ៉ង់ដា អនុប្រធានផ្នែកអង្កេតសិទ្ធិមនុស្ស និងជំនួយផ្នែកច្បាប់នៃអង្គការអាដហុកបានមានប្រសាសន៍ថា លោក សុវណ្ណារ៉ា មិនបានពាក់ព័ន្ធនឹងការបង្កហិង្សានៅឯទីលានប្រជាធិបតេយ្យកាលពីថ្ងៃទី១៥ ខែកក្កដានោះទេ។
លោក វ៉ង់ដា បាននិយាយថា “ខ្ញុំសង្កេតឃើញថា លោក មាជ សុវណ្ណារ៉ាមិនបានចូលរួមវាយលើសន្តិសុខទេ ប៉ុន្តែផ្ទុយទៅវិញ ក្រុមសន្តិសុខបានវាយលើក្រុមមហាជននោះ ហើយមហាជនមិនទ្រាំទ្រនឹងការវាយដដែលនោះបាន ហើយគាត់ធ្វើការវាយតបវិញ”។