41.3 C
Phnom Penh

រដ្ឋា​ភិបាល​រឹបអូស​ឈើ​ប្រណីត​ខុស​ច្បាប់​ក្នុង​ខេត្ត​បន្ទាយ​មាន​ជ័យ​តិច​ជាង​ឆ្នាំ​មុន​

ដោយ ឌឹ ខេមបូឌា ដេលី

បទវិភាគ

រដ្ឋាភិបាល​លើក​ឡើង​ថា ខ្លួន​បាន​​រឹបអូស​ឈើ​ប្រណីត​​ពី​អ្នក​កាប់​ឈើ​ខុស​ច្បាប់​នៅ​ក្នុង​ខេត្ត​បន្ទាយ​មាន​ជ័យក្នុង​ឆ្នាំ​២០១៤តិច​ជាង​ឆ្នាំ​មុន ដោយ​សារ​ការ​​អនុវត្ត​ច្បាប់​តឹងរ៉ឹង​ បន្ទាប់​ពី​មាន​កិច្ច​ប្រជុំ​មួយ​កាលពី​ម្សិលមិញដើម្បីពិនិត្យ​មើល​សកម្មភាព​ប្រឆាំង​ការ​កាប់​ឈើ​ខុស​​ច្បាប់​នៅ​ក្នុង​តំបន់​នេះ​។

អ្នក​កាប់​ឈើ​ខុស​ច្បាប់​តែង​តែ​លួច​ចូល​ក្នុង​ប្រទេស​ថៃ​ ពីខេត្ត​បន្ទាយ​មានជ័យ ដើម្បី​កាប់​ឈើ​ប្រណីត​ដ៏មាន​តម្លៃ និង​មាន​ការ​ការ​ពារ​ជា​អន្តរជាតិ​ ហើយ​តែង​តែ​ត្រូវ​រង​ការ​បាញ់​ប្រហារ​ ជួន​កាល​ស្លាប់​ក៏មាន​ ពី​សំណាក់​​កម្លាំង​សន្ត​ិសុខ​​ថៃ​។

លោក ជា ផល្លី នាយ​ខណ្ឌ​រដ្ឋបាល​ព្រៃឈើ​ខេត្ត​បន្ទាយ​មានជ័យ​ បាន​មាន​ប្រសាសន៍​ថា មន្ត្រី​ប្រចាំតំបន់​ និង​មន្ត្រី​ថ្នាក់​ជាតិ​បាន​ជួប​ប្រជុំគ្នា​នៅ​ក្នុង​ខេត្ត​នេះ ដើម្បី​ពិនិត្យ​មើល​ការ​ខិត​ខំប្រឹង​ប្រែង​របស់​ខ្លួន ដើម្បី​ទប់​ស្កាត់​សកម្មភាពនេះ។

តាម​រយៈ​ការ​ខិត​ខំ​ប្រឹងប្រែង​របស់​រដ្ឋាភិបាលនេះ​ លោក ផល្លី បានមាន​ប្រសាសន៍​ថា ​ចំនួន​​ករណី​ និង​ចំនួន​ឈើ​ដែល​រឹបអូស​បាន​នៅ​ក្នុង​ខេត្ត​បាន​ធ្លាក់​ចុះ​​កាលពី​ឆ្នាំ​មុន​។

លោក​បាន​មាន​ប្រសាសន៍​ថា អាជ្ញាធរ​​រឹបអូសឈើ​ប្រណីតបាន​​ប្រាំពីរ​ម៉ែត្រគូប​​ក្នុង​សកម្ម​ភាព​កើត​ឡើង​១១ករណី​កាលពី​ឆ្នាំ​២០១៤ កត​់សម្គាល់​ឲ្យ​ឃើញ​ពីការ​ធ្លាក់​ចុះ​ជាង​ឆ្នាំ​មុន​ដែល​រឹបអូ​ស​បាន​ឈើ​៣០​ម៉ែត្រគូប​ក្នុង​សកម្មភាព​កើតឡើង​១៣​ករណី​។

លោក​បានមាន​ប្រសាសន៍​ថា ” យើង​ឃើញ​ថា ការ​ដឹក​ឈើ​ប្រណីត​បាន​ថយ​ចុះ ហើយ​យើង​សង្ឃឹម​ថា សកម្មភាព​នេះ​នឹង​​​ត្រូវ​លុប​បំបាត់​ក្នុង​រយៈ​ពេល​ពីរបី​ឆ្នាំ​ក្រោយ​នេះ ដោយ​សារ​យើង​បាន​ពង្រឹង​កម្លាំង​របស់​យើង​”។

ក្រុម​មន្ត្រី​ខេត្ត និង​មន្ត្រី​ក្រសួង​កសិកម្ម​ក៏​បាន​ចូល​រួម​ក្នុង​កិច្ច​ប្រជុំ​នេះ​ដែរ។ លោក ស៊ុម ចាន់គា អ្នក​សម្រប​សម្រួល​អង្គការ​សិទ្ធិមនុស្ស​អាដ​ហុក​ប្រចាំ​ខេត្ត​នេះ​ ដែល​ឃ្លាំ​មើល​ការ​កាប់​ឈើ​ខុស​ច្បាប់​បាន​មាន​ប្រសាសន៍​ថា លោក​​សង្ស័យ​ថា ការ​ធ្វើ​អាជីវកម្ម​ឈើ​ខុស​ច្បាប់​មិន​បាន​ថយ​ចុះ​ដូច​លោក ផល្លី បាន​អះអាង​នោះ​ឡើយ​​។

លោក​បានមាន​ប្រសាសន៍​ថា “យើង​ឃើញ​ថា បទ​ល្មើសពាក់ព័ន្ធការ​កាប់ឈើ​ប្រណីត​មិន​បាន​ថយ​ចុះ​ទេ ពីព្រោះ​ឈ្មួញ​រក​ស៊ី​ឈើ​ប្រណីត​បាន​ឆ្លង​កាត់​ខេត្ត​នេះ​រាល់​ថ្ងៃ និង​រាល់​យប់​”។

លោក​បាន​បន្ថែម​ថា “ពួកគេ​ [អាជ្ញាធរ​] ស្គាល់​អត្តសញ្ញាណ​អ្នក​រក​ស៊ី​ឈើ​ទាំង​នោះ ប៉ុន្តែ​ពួកគេ​មិន​បាន​ចាប់​ខ្លួន​ឡើយ។ ខ្ញុំ​គិត​ថា អាជ្ញាធរ​បាន​ចាប់​ខ្លួន​អ្នក​រក​ស៊ីឈើ​ទាំង​នោះ​ម្ដង​ម្កាល​តែប៉ុណ្ណោះ ពីព្រោះ​អ្នក​រក​ស៊ី​ឈើ​ទាំង​នោះ​មិន​បាន​​សូកបា៉ាន់​ពួកគេ​”។

​​វាជារឿង​ខុស​ច្បាប់​ក្នុង​ការ​កាប់​ឈើ គរឈើ​ទុក​ ដឹក​ជញ្ជូន​ ឬនាំចេញ​ឈើ​ប្រណីត​នៅ​ក្នុង​ប្រទេស​កម្ពុជា​។

ទោះយ៉ាង​ណា នៅ​ក្នុង​របាយការណ៍​កាលពី​ពេល​ថ្មី​ៗ​នេះ អង្គការ​ក្លូបលវីតណេស ជា​អង្គ​ការ​ឃ្លាំ​មើល​បរិស្ថាន​ដែល​មាន​មូលដ្ឋាន​នៅ​ប្រទេស​អង់គ្លេស​បាន​លើក​ឡើង​ថា អ្នក​ស៊ើប​អង្កេត​សម្ងាត់​មួយ​ក្រុម​បាន​រក​ឃើញ​ភ័ស្តុរបស់​ក្រុមហ៊ុន​ដែលកាន់​កាប់ដោយ​លោក​ ទ្រី ភាព ដែលបាន​ឃុប​ឃិត​ជាមួយ​រដ្ឋាភិបាល និង​មន្ត្រី​យោធា​ដើម្បីកាប់​ឈើ​ និង​នាំចេញ​ឈើ​ប្រណីត​យ៉ាង​ច្រើន​និង​ប្រភេទឈើការ​ពារ​ដទៃទៀត​​ទៅ​ប្រទស​ចិន​។ ក្រុម​មន្ត្រី​រដ្ឋាភិបាល​ និង​តំណាង​លោក​​ ទ្រី ភាព បាន​បដិសេធ​ការ​អះអា​ងនេះ៕ សារុន​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស