29 C
Phnom Penh

កម្មករ​​​ចម្ការ​​​កៅស៊ូ​​​បោះ​​​បង់​​​ការ​​​ធ្វើ​​​កូដកម្ម​​​ បើ​​​ទោះ​​​ជា​​​ក្រុមហ៊ុន​​​មិន​​​ទាន់​​​ យល់​​​ព្រម​​​តាម​​​ការ​​​ទាមទារ

ដោយ ឌឹ ខេមបូឌា ដេលី

បទវិភាគ

កម្មករ​ចម្ការ​កៅ​​​​​​ស៊ូ​ជិត​២០០​នាក់ ក្នុង​ខេត្ត​មណ្ឌល​​​គិរី​កាល​​​ពី​ម្សិល​​​មិញ​បាន​បញ្ចប់​កូដកម្ម​រយៈ​​​ពេល​បី​ថ្ងៃ​​​ជុំវិញ​​​ប្រាក់​ឈ្នួល និង​លក្ខ​​​ខណ្ឌ​​​ការ​ងារ បើ​ទោះ​​ជា​មិន​មាន​ការ​ដោះ​​​ស្រាយ​នូវ​កង្វល់​របស់​ខ្លួន​ជាមួយ​ក្រុម​ហ៊ុន Socfin KCD ជា​ក្រុម​ហ៊ុន​បារំាង​ដ៏​ចម្រូង​ចម្រាស​ដែល​កាន់​កាប់​ចម្ការ​កៅស៊ូ​នេះក៏ដោយ​។

យោង​តាម​លោក ចាន់ សុគន្ធ​ រដ្ឋបាល​នៅ​ក្រុម​ហ៊ុន Socfin ដែល​មាន​​ទីស្នាក់​ការ​ក្នុង​ស្រុក​ពេជ្រាដា បាន​មាន​ប្រសាសន៍​ថា កម្មករ​បាន​ធ្វើ​ការ​តវ៉ា​​​ពី​ព្រោះ​ក្រុម​ហ៊ុន​បាន​កាត់​ប្រាក់​ឈ្នួល​ប្រចាំ​ថ្ងៃ​របស់​ខ្លួន​ពី​៦ដុល្លារ​មក​៥ដុល្លារ​ក្នុង​ឆ្នាំ​២០១៣ ហើយ​មិន​បាន​ដំឡើង​ឲ្យ​​​ពួក​​​គាត់​​​ទេ​ចាប់​តាំង​​​ពី​​​ពេល​នោះ​មក​។

លោក​​បាន​មាន​ប្រសាសន៍​ថា “កម្មករ​មិន​ហ៊ាន​ធ្វើការ​​​តវ៉ា​ទេ​ពីមុន​មក ពីព្រោះ​ពួកគាត់​ខ្លាច​ម្ចាស់​ក្រុម​ហ៊ុន​បណ្ដេញ​​​ពួក​​​គាត់​ចេញ”។ លោក​បាន​បន្ថែម​ថា បើ​ទោះ​​​ណា​ជា​លោក​មាន​ប្រាក់​ខែ​២៣១​ដុល្លារ​ក្នុង​មួយ​ខែ​ក៏ដោយ ក៏​លោក​បាន​ចូល​រួម​កូដកម្ម​នោះ​​​ដែរ​។

លោក​បាន​មាន​ប្រសាសន៍​ថា “យើង​បាន​សម្រេច​ធ្វើ​ការ​តវ៉ា​ក្នុង​ពេល​នេះ​​​ប៉ុណ្ណោះ ដោយ​សារ​​ក្រុម​ហ៊ុន​បាន​ដាក់​សម្ពាធ​លើ​កម្មករ”។

លោក​ សុគន្ធ បាន​​​មាន​ប្រសាសន៍​ថា កម្មករ​បាន​​​ចូល​រួម​កិច្ច​​​ប្រជុំ​​​រយៈ​​​ពេល​៦ម៉ោង​នៅ​ការិយាល័យ​របស់​ក្រុម​ហ៊ុន​កាលពី​ថ្ងៃពុធ ប៉ុន្តែ​ថា អ្នក​គ្រប់​គ្រង​បាន​យល់ព្រម​​ចំពោះ​ការ​ទាម​ទារ​របស់​ពួក​​​គាត់​តែ​មួយ​ចំណុច​ប៉ុណ្ណោះ ដោយ​អនុញ្ញាត​ឲ្យ​អ្នក​បើក​បរ​រថយន្ត​ដែល​ត្រូវ​បណ្ដេញ​ចេញ​ចូល​ធ្វើ​ការ​វិញ​។

លោក​បាន​ពន្យល់​ថា កម្មករ​ក៏​បាន​ទាម​ទារ​ឲ្យ​ក្រុម​ហ៊ុន Socfin ដំឡើង​ប្រាក់​ឈ្នួល​ប្រចាំ​ថ្ងៃ​របស់​ខ្លួន​ដល់​៧,៥​ដុល្លារ​ផង​ដែរ និង​កាត់​បន្ថយ​ម៉ោង​ធ្វើ​ការ​ពី១០​ម៉ោង​មក​៨ម៉ោង​ក្នុង​មួយ​ថ្ងៃ​។

តំណាង​ក្រុម​ហ៊ុន Socfin មិន​អាច​ទាក់​ទង​បាន​ទេ​កាលពី​ម្សិលមិញ​ ប៉ុន្តែ​លោក សុគន្ធ បាន​មាន​ប្រសាសន៍​ថា ក្រុម​ហ៊ុន​បាន​​សន្យា​រៀបចំ​រចនា​សម្ព័ន្ធ​ឡើង​វិញ ដើម្បី​ឲ្យ​កម្មករ១៨០​នាក់​ត្រូវ​​​បាន​​​ជួល​​​ធ្វើ​ការ​ពេញ​ម៉ោង​ក្នុង​រយៈពេល​១ឆ្នាំ និង​ដោះស្រាយ​បញ្ហា​មួយ​ចំនួន​ក្នុង​រយៈ​​​ពេល​៣ខែ​ក្រោយ​នេះ។ លោក​បាន​​​មាន​ប្រសាសន៍​ថា “យើង​នឹង​បន្ត​តវ៉ា​​​ទៀត​ ប្រសិន​បើ​ពួកគេ​មិន​គោរព​តាម​​​ការ​​​សន្យា”។

ស្ត្រី​​​ឈ្មោះ​​​ បាញ់ ស្រឿត អាយុ​២៦​ឆ្នាំ ដែល​ធ្វើ​ការ​នៅ​ចម្ការ​កៅស៊ូ​នេះ​រយៈពេល​​​៧​ឆ្នាំ​មក​ហើយ​នោះ​បាន​និយាយ​ថា គាត់​នឹង​ត្រឡប់​ទៅ​ធ្វើ​ការ​វិញ​នៅ​ថ្ងៃ​នេះ ប៉ុន្តែ​ថា គាត់​មិន​សប្បាយ​ចិត្ត​នឹង​​​ការ​សម្រេច​បញ្ចប់​កូដកម្ម​នេះ​​​ឡើយ​។

គាត់​បាន​និយាយ​ថា “ខ្ញុំ​នឹង​ទៅ​ក្រុម​ហ៊ុន​ទាមទារ​ដំឡើង​​​ប្រាក​់​ឈ្នួល​ប្រចាំ​ថ្ងៃ​របស់​ខ្ញុំ​យ៉ាង​ហោច​ណាស់​​ក៏​២៥.០០០​រៀល​ដែរ ហើយ​ប្រសិន​បើ​ក្រុម​ហ៊ុន​មិនព្រម​ទេ​នោះ ខ្ញុំ​នឹង​ឈប់​ធ្វើ​ការ​ ហើយ​ទៅ​ធ្វើ​ស្រែចម្ការ​វិញ​”។

ចាប់​តាំងពី​ទទួល​បាន​ដី​សម្បទាន​ទំហំ​៤.០៦២ហិកតា​ក្នុង​ឆ្នាំ​២០០៩ អង្គការ​សិទ្ធិ​មនុស្ស​បាន​ចោទ​ក្រុម​ហ៊ុន​ Socfin ថា​​​ បាន​​​គាប​​​សង្កត់​សហគមន៍​​​ជនជាតិ​ដើម​​​ភាគ​តិច​នៅ​ក្នុង​តំបន់​នេះ​ឲ្យ​លក់​ដី​ដូន​តា​របស់​ខ្លួន​៕សារុន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស