មន្ត្រីរដ្ឋាភិបាលមួយរូបបានលើកឡើងកាលពីម្សិលមិញថា ប្តីប្រពន្ធខ្មែរមួយគូដែលត្រូវបាន “ជួញដូរ” ឲ្យទៅធ្វើការនៅក្នុងប្រទេសម៉ាឡេស៊ី បានវិលត្រឡប់មកមាតុភូមិវិញហើយ កាលពីព្រឹកថ្ងៃសុក្រ ក្រោយពីស្ថានទូតកម្ពុជាប្រចាំទីក្រុងគូឡាឡាំពួ ប្រទេសម៉ាឡេស៊ី “ជួយសង្គ្រោះ” ពួកគេ។
លោក កុយ គួង អ្នកនាំពាក្យក្រសួងការបរទេសបានមានប្រសាសន៍ថា ប្តីប្រពន្ធនេះបានចាញ់បោកមេខ្យល់ម្នាក់ ហើយត្រូវគេនាំទៅប្រទេសម៉ាឡេស៊ី កាលពីឆ្នាំ២០១២ ដើម្បីធ្វើការនៅរោងចក្រមួយ។ លោកបានបន្តថា “ពួកគាត់បានត្រឡប់មកវិញហើយនៅព្រឹកនេះ។ ពួកគាត់បានទាក់ទងសុំជំនួយពីស្ថានទូត“។
ទោះជាយ៉ាងណា លោក កុយ គួង មិនចាំថា រោងចក្រនោះផលិតអ្វីទេ ហើយក៏មិនដឹងថា ហេតុអ្វីបានជាប្តីប្រពន្ធនេះទើបតែទាក់ទងទៅស្ថានទូតនានាពេលថ្មីៗនេះដែរ។
នៅក្នុងសេចក្តីប្រកាសព័ត៌មានមួយកាលពីថ្ងៃព្រហស្បតិ៍ ក្រសួងការបរទេសបានបញ្ជាក់អត្តសញ្ញាណប្តីប្រពន្ធនេះថាមានឈ្មោះ អំ សុភ័ណ អាយុ៣១ឆ្នាំ និងប្រពន្ធឈ្មោះផាន ញ៉ាញ់ អាយុ៣០ឆ្នាំមកពីក្រុងស្ទឹងសែន ខេត្តកំពង់ធំ។
លោក កុយ គួង បានមានប្រសាសន៍បន្ថែមថា កាលពីពេលថ្មីៗនេះស្ថានទូតកម្ពុជាប្រចាំទីក្រុងហ្សាការតា ប្រទេសឥណ្ឌូនេស៊ី ក៏បានជួយសង្គ្រោះបុរសអ្នកនេសាទពីរនាក់ដែរពីទូកមួយគ្រឿងរបស់ថៃ ដែលធ្វើការនេសាទដោយខុសច្បាប់នៅក្នុងដែនសមុទ្រឥណ្ឌូនេស៊ី ។ លោកថ្លែងថា “ពួកគាត់ទាំងពីរ ត្រូវបានជួញដូរឲ្យទៅធ្វើការនៅលើទូកនេសាទថៃមួយគ្រឿង“។
យោងតាមសេចក្តីប្រកាសព័ត៌មានរបស់ក្រសួងបានឲ្យដឹងថា បុរសទាំងពីរដែលមានឈ្មោះ ឌៀក ដប មកពីខេត្តសៀមរាប និង ផាន ចំរើន មកពីខេត្តពោធិ៍សាត់ ត្រូវនឹងបញ្ជូនត្រឡប់មកកម្ពុជាវិញនៅថ្ងៃទី១៨ ខែមីនា ៕សុខុម