32.1 C
Phnom Penh

នគរ​បាល​ធ្វើ​សេចក្ដី​ព្រាង​ផែន​ការ​ដើម្បី​ការ​ពារជន​បរទេស​

ដោយ ឌឹ ខេមបូឌា ដេលី

បទវិភាគ

អ្នក​នាំពាក្យ​នគរ​បាល​ម្នាក់​បាន​ឲ្យ​ដឹង​កាលពី​ម្សិលមិញ​ថា ដោយ​បទ​ល្មើស​តូច​តាច​មាន​ការ​កើន​ឡើង​នៅ​ក្នុង​ប្រទេស​កម្ពុជា​ ​កាលពី​ថ្ងៃ​សុក្រ​នគរ​បាល​ជាតិ​បាន​ធ្វើ​សេចក្ដីព្រាង​ផែន​ការ​មួយ​ ដើម្បី​ការ​ពារជនបរទេស​​ និង​វិនិយោគិន​នៅ​ទូទាំង​ប្រទេស​​។

លោក គៀត ច័ន្ទថារិទ្ធ អ្នកនាំពាក្យ​នគរ​បាល​ជាតិ​បាន​លើក​ឡើង​ថា សេចក្ដី​ព្រាង​ផែន​ការ​នេះ​​ត្រូវបាន​បញ្ចប់​កាលពី​ថ្ងៃសុក្រ ហើយ​បញ្ជូន​​ទៅ​កាន់​​ស្ថានទូត​​ទាំង​២៧​នៅ​ក្នុង​រាជធានីភ្នំពេញ។

ឧត្ដម​សេនីយ៍ឯក គៀត ច័ន្ទថារិទ្ធ បានមាន​ប្រសាសន៍​ថា “គោល​បំណង​គឺ​ដើម្បី​ការ​ពារ​ជន​បរទេស​ទាំង​អស់ ជា​ពិសេស​វិនិយោគិន និង​ភ្ញៀវទេសចរណ៍​ ជា​ផ្នែ​ក​នៃ​ផែន​ការ​យុទ្ធ​សាស្ត្រ​របស់​រដ្ឋាភិបាល​។ ការ​វិនិយោគ​ និង​វិស័យ​ទេសចរណ៍​គឺ​មាន​សារៈ​សំខាន់​ណាស់​ក្នុង​ការ​អភិវឌ្ឍ​សេដ្ឋកិច្ច និង​កាត់​បន្ថយ​ភាព​ក្រីក្រ”។

ឧត្ដម​សេនីយ៍ឯក គៀត ច័ន្ទថារិទ្ធ បាន​លើក​ឡើង​ទៀត​ថា អំឡុង​កិច្ច​ប្រជុំប្រចាំ​ឆ្នាំ​របស់​ក្រសួង​មហាផ្ទៃ​កាលពី​ខែ​មុន នគរ​បាល​បាន​រាយការណ៍​ថា បទ​ល្មើស​ទូទៅ​បាន​ធ្លាក់​ចុះនៅ​ទូទាំង​ប្រទេស​ ប៉ុន្តែ​មាន​ការ​កើន​ឡើង​នៃ​បទល្មើស​តូច​តាច​។

លោក​បាន​មាន​ប្រសាសន៍​ថា​ “បទ​ល្មើស​តូច​តាច​ដូច​ជា ការ​លូក​ហោប៉ៅ និង​ការ​ឆក់​កាបូប​មាន​ការ​កើន​ឡើង​បន្តិច​​ ហើយ​វាបាន​ធ្វើ​ឲ្យ​​ប៉ះពាល់​​ដល់ជន​បរទេស។ វា​បាន​ធ្វើ​ឲ្យ​ប៉ះពាល់​ដល់​កិត្តិយស​ជាតិ​យើង​”។

ឧត្ដម​សេនីយ៍ឯក​ គៀត ច័ន្ទថារិទ្ធ មិន​បាន​បញ្ជាក់​ឡើយ​ថា តើ​​ពេល​ណា​ឬ​​ក៏​វិធាន​ការ​​ជាក់​លាក់​អ្វី​ដែល​នឹង​ត្រូវ​ចាត​់​ឡើង​ដើម្បីការ​ពារជន​បរទេស ប៉ុន្តែ​លោក​បាន​លើក​ឡើង​ថា ផែន​ការ​នេះ​នឹង​ត្រូវ​អនុវត្ត​គ្រប់​ខេត្ត​ទាំង​អស់​។

នៅ​ពេល​ថ្លែង​សុន្ទរកថា​ទៅ​កាន់​មន្ត្រី​នៅ​ក្រសួង​មហាផ្ទៃ​កាលពី​ថ្ងៃសុក្រ លោក នេត សាវឿន អគ្គស្នង​ការ​នគរ​បាល​ជាតិ​​បាន​លើក​ឡើង​ថា ប្រទេស​កម្ពុជា​ស្វាគមន៍​ជន​បរទេស​ទាំង​អស់​ឲ្យ​តែ​ពួកគេ​គោរព​ច្បាប់​របស់​ប្រទេស​កម្ពុជា​។

យោង​តាម​​ការ​បង្ហោះ​មួយ​នៅ​លើ​គេហទំព័រ​របស់​​នគរ​បាល​ជាតិ​កាលពី​ម្សិលមិញ ឧត្ដម​សេនីយ៍ នេត សាវឿន បាន​មាន​ប្រសាសន៍ថា ” ប៉ុន្តែ​កម្ពុជា​នឹង​មិន​អនុញ្ញាត​ឲ្យ​ក្រុម​មា៉ហ្វីយ៉ា​​បរទេស​​មក​ប្រព្រឹត្ត​បទ​ល្មើស​ខុស​ច្បាប់​​នៅ​ក្នុង​ទឹក​ដី​កម្ពុជា​ឡើយ។ ប្រសិន​បើ​បញ្ហា​នេះ​កើត​ឡើង​ កង​កម្លាំង​នគរ​បាល​នឹង​ស៊ើបអង្កេត​អ្នក​ទាំង​នោះ ហើយ​នឹង​ផ្ដន្ទាទោស​ពួកគេ​តាម​ច្បាប់​”។

ឧត្ដម​សេនីយ៍ នេត សាវឿន បាន​បន្ថែម​ថា “លោក​ក៏​កត់​សម្គាល់​ឃើញ​ថា មាន​ការ​កើន​ឡើង​នៃ​បទ​ល្មើស​ដែល​បង្ក​ឡើង​ដោយ​ជន​បរទេស​នៅ​ក្នុង​ខេត្តព្រះសីហនុ​ផង​ដែរ​”។

លោក​បាន​មាន​ប្រសាសន៍​បន្ថែម​ទៀត​ថា “ជន​បរទេសបាន​​បង្ក​​បទ​ល្មើស​មួយ​ចំនួន​ដូច​ជា ​រឿង​គំនុំ ការ​បាញ់​ប្រហារ​​ដោយ​មាន​គោលដៅ​សម្លាប់ ស្នេហា​ត្រីកោណ និង​ជម្លោះ​ក្នុង​ការ​រក​ស៊ី​ជា​ដើម​”។

នៅ​ក្នុង​ប៉ុន្មាន​ខែ​ថ្មីៗ​នេះ ជន​ជាតិ​រុស្ស៊ី​ដែល​រស់​នៅ​ក្នុង​ក្រុង​ព្រះសីហនុ មាន​ការ​ជាប់​ពាក់ព័ន្ធ​នៅ​ក្នុង​អំពើ​ហិង្សា​មួយ​ចំនួន ក្នុង​នោះ​មាន​ដូច​ជា ជម្លោះ​រវាង​​អ្នក​ជំនួញ​ជនជាតិ​រុស្ស៊ី​​ដែល​មាន​ទ្រព្យ​សម្បត្តិ​ស្ដុក​ស្ដម្ភ​ចំនួនពីរ​នាក់​ជាដើម។

កាលពី​ខែ​ធ្នូ លោក នីកូឡៃ ដូរ៉ូសិនកូ (Nicolai Doroshenko) ដែល​រស់​នៅ​ក្នុង​​ក្រុង​ព្រះ​សីហនុ​ជាយូរ​មក​ហើយ​បាន​ចោទ​ប្រកាន់​គូប្រជែង​របស់​លោកឈ្មោះ សេរហ្គេ ប៉ូលុន​ស្គី (Sergei Polonsky) ពីបទ​បញ្ជា​ឲ្យ​មាន​ការ​វាយ​ប្រហារ​​លើ​កូន​ប្រុស​របស់​លោក​ឈ្មោះ អូសថេប ដូរ៉ូសិនកូ (Ostap Doroshenko) ដែល​ជា​មេក្រុមម្នាក់​ក្នុង​​​កង​​កម្លាំង​នគរ​បាល​មូលដ្ឋាន​ក្នុង​ខេត្ត​ព្រះសីហនុ។

លោក​ ប៉ូលុនស្គី ​ជា​អតីត​​មហាសេដ្ឋី​ដែល​រដ្ឋាភិបាល​ក្រុង​មូស្គូ​តាម​ចាប់​ខ្លួន​ពីបទ​​កិប​កេង​ប្រាក់​រាប់​លាន​ដុល្លារ​​ បាន​បដិសេធ​ថា លោក​មិន​បាន​រៀបចំ​ផែន​ការ​វាយ​ប្រហារ​នេះ​ឡើយ។

កាលពី​ម្សិលមិញ លោក កុល ផល្លី ស្នង​ការ​រង​នគរ​បាល​ខេត្ត​នេះ​បាន​លើក​ឡើង​ថា រថយន្ត​មួយ​គ្រឿង​​ដែល​ចត​នៅ​ខាង​ក្រៅ​ផ្ទះ​​របស់​លោក ដូរ៉ូសិនកូ ក្នុង​ក្រុង​ព្រះសីហនុ បាន​ផ្ទុះ​ឡើង​​ពេល​ទៀប​ភ្លឺ​ឈាន​ចូល​ព្រឹក​ថ្ងៃសុក្រ។

លោក ផល្លី បាន​​មាន​ប្រសាសន៍​ទាក់​ទិន​នឹង​ការ​ស៊ើបអង្កេត​​ដែល​កំពុង​បន្ត​លើ​ករណី​ផ្ទុះ​រថយន្ត​នេះ​ថា “ឥឡូវ​នេះ យើង​មិន​ទាន់​សង្ស័យ​អ្វី​នៅ​ឡើយ​ទេ យើង​​ត្រូវ​រង់ចាំ​លទ្ធផល​របស់​ក្រុម​បច្ចេកទេសសិន​​​”។

កាលពី​ថ្ងៃទី​១៣ ខែ​កុម្ភៈ ការ​វាយ​តប់​គ្នា​មួយ​បាន​កើត​ឡើង​រវាង​​បុរស​ពីរ​ក្រុម​នៅ​សណ្ឋាគារ​ និង​កាស៊ីណូ Queenco ក្នុង​ក្រុង​ព្រះសីហនុ ដោយ​បណ្ដាល​ឲ្យ​​បុរស​យ៉ាង​តិ​ចពីរ​នាក់​រង​របួស​ ​ក្នុង​នោះ​​មាន​ម្នាក់​ត្រូវ​គេ​ចាក់​ឲ្យ​​របួសធ្ងន់។ សាក្សី​បាន​និយាយ​នៅពេល​នោះ​ថា ជម្លោះ​នេះ​បាន​ចាប់​ផ្ដើម​កើត​ឡើង​នៅ​ពេល​បុរស​មួយ​ក្រុម​បាន​ទាម​ទារ​ប្រាក់​ចំណេញ​​ពី​ក្រុម​ហ៊ុន​ទេសចរណ៍ Lotus Tours ដែល​ជា​អ្នក​លក់​សំបុត្រ​សម្រាប់​ការ​​ប្រគុំតន្ត្រី​ Kazantip នៅ​លើ​កោះពស់​ ដែល​ក្រោយ​មក​ត្រូវ​អាជ្ញាធរ​មូលដ្ឋាន​បញ្ជា​ឲ្យ​លុប​ចោល​នោះ​។

នៅ​ក្នុង​​សុន្ទរកថា​កាលពី​ថ្ងៃ​សុក្រ ឧត្ដម​សេនីយ៍ នេត សាវឿន បាន​លើក​ឡើង​ថា ជន​បរទេស​ក៏​បង្ក​ឲ្យ​មាន​ភាព​អាសអាភាស​នៅ​ក្នុង​ផ្នែក​ផ្សេងៗ​ទៀតនៃ​ប្រទេស​កម្ពុជា​ផង​ដែរ។

លោក​បាន​លើក​ឡើង​ពីករណី​មួយ​ក្នុង​ខែ​មករា ដែល​ភ្ញៀវទេសចរ​មកពី​អឺរ៉ុប​ចំនួន​បី​នាក់​ត្រូវ​បាន​និរទេស​ខ្លួន​បន្ទាប់ពី​ត្រូវ​បាន​ចាប់​ខ្លួនពីបទ​ជិះម៉ូតូ​ទាំង​អាក្រាត​កាយ​នៅ​ក្នុង​ខេត្ត​កណ្ដាល ក៏ដូច​ជា​ការ​ចាប់​ខ្លួន និង​ការ​និរទេស​​បង​ប្អូនស្រី​ជនជាតិ​អាមេរិក​ចំនួន​ពីរ​នាក់​ ដែល​ត្រូវ​បាន​ចាប់​ខ្លួន​ពេល​ថត​រូប​ស្ថាត​ឲ្យ​គ្នា​ទៅវិញទៅ​មក​នៅ​ឧទ្យាន​បុរាណ​អង្គរ​ ក្នុង​ក្រុង​សៀមរាប​កាលពីខែ​កុម្ភៈផងដែរ​៕ ស៊ុយឈាង (រាយការណ៍​បន្ថែម​ដោយ អ៊ូច សូនី)​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស